Ва Украіне рыхтаваўся дзяржаўны пераварот

Пра гэта заявіў прэзідэнт Уладзімір Зяленскі. Пераварот павінен быў адбыцца 1 снежня.

Зяленскі назваў датычным да падрыхтоўкі перавароту алігарха Рыната Ахметава. Аднак, па словах Зяленскага, ён не верыць, што Ахметаў будзе ўдзельнічаць у гэтым.

Брытанскі слоўнік Collins назваў слова 2021 года. І яно не звязанае з кавідам

NFT (non-fungible token) — «неўзаемазамяняльны токен» — стала словам года. Гэта такія сертыфікаты, у якіх гаворыцца, што вы валодаеце арыгіналам віруснага відэа, ці мема, ці папулярнага твіта. Іх копіі можна прадаваць як творы мастацтва, але арыгінал твора пры гэтым абавязкова знішчаецца — каб стварыць лічбавы актыў.

Да 2021 года гэтае слова мала хто ведаў. А сёлета частата яго выкарыстання вырасла на 11000%.

Разам з NFT у шорт-ліст увайшлі два іншыя словы, звязаныя з тэндэнцыяй аблічбоўваць рэчаіснасць — crypto (скарот ад крыптавалюты) і metaverse (трохвымерны віртуальны сусвет).

У 2020 годзе укладальнікі Collins English Dictionary словам года назвалі lockdown (лакдаўн).

У Гродне грузавік з паднятым кузавам знёс тралейбусныя правады

Born to be wild. Відэа: @autogrodnoby

Памятаеце дом у Баранавічах, на сцяне якога з’явіўся жаночы твар, што не даваў спаць жыхаркам? Сцяну зафарбавалі

Пра гэта паведамляе @onlinerby, у рэдакцыю якога чытачка даслала фота.

Нагадаем, што пенсіянеркі не маглі спаць з-за аблічча жанчыны на сцяне. Яны не выключалі, што гэта палтэргейст.

Літва можа закрыць пункты пропуску на мяжы з Беларуссю, калі будзе і надалей выяўляць спробы перавозу мігрантаў у грузавіках

Аб гэтым заявіла МУС Літвы, піша Delfi.

Нагадаем, учора затрымалі чатырох іракцаў, якіх спрабавалі перавезці праз мяжу ў запламбаванай беларускай фуры.

25-гадовы курд памёр у той самы дзень, калі дабраўся да Нямеччыны праз Беларусь

Бахціяру Анвару ўдалося перайсці мяжу, перажыць начныя маразы ў лесе і нават дабрацца да Нямеччыны. Але пасля пераахалоджвання ў пушчы яго арганізм доўга не вытрымаў, і ў той жа дзень, калі дабраўся да запаветнай краіны, ён памёр.

Чытайце далей

Дырэктарку турфірмы «Кінг Трэвэл» абвінавачваюць у махлярстве

Па звестках следства, 36-гадовая дырэктарка збірала ў людзей грошы нібыта для аказання турыстычных паслуг, але аказваць іх яна не збіралася. Пацярпелымі прызнаныя 66 чалавек, у якіх узялі 248 тысяч рублёў.

Заведзена крымінальная справа за махлярства ў асабліва буйным памеры. Жанчына пад вартай.

Берлін зноў абвергнуў інфармацыю, што гатовы прыняць дзве тысячы мігрантаў

Сцвярджэнні Лукашэнкі, што Берлін пагадзіўся прыняць 2000 мігрантаў, якія апынуліся ў Беларусі, ілжывыя, заявіў у пятніцу афіцыйны прадстаўнік урада Нямеччыны.

Гэта ўжо другая такая заява з Берліна на гэтым тыдні. Лукашэнка заяўляў пра нібыта згоду Ангелы Меркель прыняць 2000 чалавек, калі прыехаў сёння ў лагер мігрантаў, піша Deusche Welle.

Журналістка Ірына Слаўнікава стала падазраванай паводле «народнага» артыкула

Гэта артыкул 342 Крымінальнага кодэкса («Арганізацыя і падрыхтоўка дзеянняў, якія груба парушаюць грамадскі парадак або актыўны удзел у іх»).

Пра гэта паведамляе @viasna96.

«Калі немцы і палякі мяне не пачуюць — я не вінаваты»

Сёння Лукашэнка выступіў перад мігрантамі, якія знаходзяцца ў лагістычным цэнтры ў Брузгах. Ён гаварыў пра памежнікаў-сяброў, заходніх палітыкаў і Германію, а таксама спрагназаваў новую хвалю нелегальнай міграцыі зімой-вясной.

Сабралі ў адным відэа галоўныя цытаты.

Ва Украіне абваліўся рэйтынг прэзідэнта. Гэта азначае канец эры Зяленскага?

У 2019 годзе ўкраінцы сенсацыйна абралі прэзідэнтам Уладзіміра Зяленскага — чалавека, які раней не займаўся палітыкай. Летам таго ж года ўкраінцы на хвалі татальнага абнаўлення ўлады далі небывалы крэдыт даверу і прапрэзідэнцкай партыі «Слуга народа».

Аднак шматлікія сацыялагічныя групы ва Украіне апошнім часам фіксуюць імклівае зніжэнне падтрымкі Уладзіміра Зяленскага з боку ўкраінцаў. Дайшло да таго, што ў некаторых апытаннях Зяленскі ўзначаліў антырэйтынг украінскіх палітыкаў. Апусцілася падтрымка і ягонай палітычнай партыі «Слуга народа».

У чым прычына такога падзення падтрымкі ўкраінскага прэзідэнта, абранага з рэкордным вынікам на выбарах, і ці з’яўляецца такое істотнае зніжэнне рэйтынгаў канцом эры Зяленскага?

Чытайце па спасылцы

Салігорскага актывіста Паўла Батуева асудзілі на 15 сутак. нібыта за супраціў міліцыі АБНОЎЛЕНА

Паўла Батуева затрымалі 23 лістапада, калі ён ішоў за дачкой у садок. У той жа дзень у ягонай кватэры і ў кватэры бацькоў прайшоў ператрус. Казалі, што гэта звязана з крымінальным артыкулам за абразу.

Праз тры дні мужчына не выйшаў на волю. У РАУСе сваякам сказалі, што да заўтра дакладна будзе ў ізалятары. Дома ў Батуева паўторна прайшоў ператрус.

Увечары следчы паведаміў сям’і, што Паўлу далі 15 сутак па адміністрацыйным артыкуле — нібыта за супраціў міліцыі. 

Наколькі вядома, абвінавачанняў па крыміналцы Паўлу не прад'яўлялі.

У Мінску — дзевяцібальныя заторы

Абірайце маршруты аб’езду праблемных участкаў.

Прычына ў пуціне? Чырвоная ікра ў Беларусі за год падаражэла ў паўтара-два разы

Цана на чырвоную ікру ў Беларусі за год вырасла ў паўтара-два разы. На пачатку тыдня расійскія СМІ актыўна пісалі аб гэтым гістарычным росце (за 20 гадоў у сем разоў).

Прычым тут пуціна?

Чытайце па спасылцы

Даляр расце ўжо каторы дзень, а нафта працягвае таннець. Чаго чакаць беларусам?

Апошнімі днямі паціху пачалі расці і даляр, і еўра. Таксама стаў слабейшым і расійскі рубель, падаюць кошты на нафту. Чаго чакаць далей? Крызісу? Дэвальвацыі? Ці неяк наладзіцца?

Спыталі ў эксперта.

Чытайце па спасылцы

Фільм тыдня: «Паляўнічыя на прывідаў: нашчадкі». Рэальны шанец расслабіцца

Успомніць дзяцінства і рэлакснуць сярод нашай жахлівай рэчаіснасці. Гэта толькі адна з прычын, чаму варта паглядзець гэты фільм.

У дзяцінстве многія глядзелі ў дзяцінстве і назаўжды запомнілі белых як зефіркі прывідаў, песню Ghostbusters Рэя Паркера і ўсю адважную каманду саміх паляўнічых. Гэта працяг знакамітых «Паляўнічых на прывідаў».

Чытайце па спасылцы

Нафта патаннела на 10% на фоне паведамленняў пра новы штам каранавіруса

Сусветныя кошты на нафту апусціліся да самага нізкага ўзроўню за апошнія два месяцы на фоне паведамленняў пра новы штам кавіду B.1.1.529.

Кошт студзеньскіх ф'ючарсаў маркі Brent на Лонданскай біржы ICE Futures да 20:06 упаў на 10,4% да 73,6 даляра за бараль. Цэны на студзеньскія ф'ючарсы WTI упалі на 12,2% да 68,8 даляра за бараль.

Штам B.1.1.529 упершыню быў знойдзены на поўдні Афрыкі, а затым стаў распаўсюджвацца ў іншых краінах. 26 лістапада стала вядома аб першым выпадку заражэння ў Еўропе.

Многія еўрапейскія і азіяцкія краіны пачалі спыняць авіязносіны з краінамі Паўднёвай Афрыкі.

Новы штам з'яўляецца патэнцыйна больш заразным і ўстойлівым да вакцынацыі.

У Беларусі амаль 60% студэнтаў бясплатна атрымліваюць адукацыю

Даныя прыводзіць Белстат. Сёлета студэнтамі сталі больш за 58 тысяч чалавек, дыпломы атрымалі каля 55 тысяч спецыялістаў.

Самым буйным універсітэтам застаецца БДУ — амаль 23 тысячы студэнтаў, на другім месцы — БНТУ (21 тысяча), на трэцім — БДЭУ (14 тысяч).

Сярод рэгіянальных вну найбуйнейшым з’яўляецца Гродзенскі дзяржаўны ўніверсітэт (больш за 10 тысяч студэнтаў).

59,8% студэнтаў у Беларусі атрымліваюць адукацыю за кошт бюджэту, стыпендыю атрымлівае больш за 84 тысячы чалавек.

Больш за 40% сумяшчаюць вучобу з працай (дзяўчаты больш актыўна за хлопцаў). А яшчэ амаль кожны пяты студэнт яшчэ падчас навучання ўзяў шлюб. На 110 дзяўчат ва ўніверсітэтах прыходзіцца 100 хлопцаў.

Нягледзячы на пандэмію і грамадска-палітычны крызіс пасля выбараў, у Беларусі, па афіцыйнай статыстыцы, расце колькасць замежных студэнтаў: сёлета — амаль 19 тысяч чалавек, а дзесяць год таму — 9,3 тысячы. Пераважна гэта выхадцы з постсавецкіх краін (больш за 60%).

У Брэсце пазбавілі грамадзянства 27-гадовага жыхара. Ён нарадзіўся і вырас у Беларусі

Цікавы кейс разгледзелі ў Вярхоўным судзе. 27-гадовы хлопец спрабаваў абскардзіць рашэнне брэсцкай міліцыі і суда: яго пазбавілі грамадзянства, хоць ён нарадзіўся і вырас у Беларусі.

Чытайце па спасылцы.

Амікрон. Запомніце гэтае слова, вы яго будзеце чуць часта

Сусветная арганізацыя аховы здароўя (СААЗ) прысвоіла новаму штаму каранавіруса, які быў выяўлены ў Паўднёвай Афрыцы, грэчаскую літару амікрон.

У СААЗ прыйшлі да высновы, што штам B.1.1.529 пасля цэлай серыі мутацый можа быць больш небяспечным, і вакцыны могуць дзейнічаць на яго не так эфектыўна.

Гэты варыянт віруса распаўсюджваецца хутчэй, чым яго папярэднікі, і можа закрануць большую колькасць людзей, у тым ліку і тых, хто раней перахварэў на іншыя штамы, мяркуюць у СААЗ. У арганізацыі заклікалі ўсе краіны надаць большую ўвагу вывучэнню новага штаму.

За апошнія тыдні новы штам віруса быў выяўлены ў Батсване, Бельгіі, Ізраілі і Ганконгу.