Што вядома пра інжынера Максіма Карпука, які загінуў у Іркуцку?

Яму было ўсяго толькі 26 гадоў.

Хлопец родам з аграгарадка Дзярэчын, што ў Зельвенскім раёне. Скончыў там школу, пасля адвучыўся ў Мінскім вышэйшым авіяцыйным каледжы, пасля — у Беларускай дзяржаўнай акадэміі авіяцыі.

Мінскі дэвелапер абвясціў пра дэфолт па аблігацыях. Сярод удзельнікаў кампаніі — Дзмітрый Баскаў

Мінфін абвясціў аб невыкананні абавязацельстваў па аблігацыях буйнога мінскага дэвелапера «Байкал». Кампанія, якая раней размяшчала на продаж каштоўныя паперы на 500 тысяч даляраў, не можа выканаць свае абавязацельствы перад пакупнікамі.

Як паведамляе Мінфін, сярод удзельнікаў гэтай кампаніі значыцца поўны цёзка Дзмітрыя Баскава, які ў верасні стаў сенатарам. 

Што яшчэ вядома?

Абсурд па-беларуску: з дзвярэй аптэкі ва Уруччы здзіраюць абвестку аб масачным рэжыме

Як стала вядома, сёння па гандлёвых кропках прайшлі праверкі, каб у іх не было патрабаванняў аб выкананні масачнага рэжыму.

«Так, распараджэнне адміністрацыі прыйшло». У Мінску масава здымаюць аб'явы пра масачны рэжым

У грамадскім транспарце забаранілі слова «маскі»? Цяпер дыктар кажа мудрагелістае «сродкі абароны органаў дыхання»

«У мэтах эканоміі самалёты абслугоўвалі самі». Што вядома пра авіякампанію «Гродна», чый самалёт разбіўся ў Расіі?

Грузавы самалёт Ан-12 беларускай авіякампаніі разбіўся сёння пад Іркуцкам. На борце было сямёра членаў экіпажа, трое з іх — беларусы. Прадстаўнікі авіякампаніі пакуль адмаўляюцца ад каментароў.

Што гэта за авіякампанія і што пра яе вядома?

СААЗ адобрыла яшчэ адну вакцыну ад каранавіруса

Індыйскую вакцыну Covaxin дазволілі выкарыстоўваць у надзвычайных сітуацыях. Пра гэта арганізацыя паведаміла ў твітары.

Па дадзеных СААЗ, эфектыўнасць Covaxin — 78%. Такі паказчык дасягаецца праз 14 або больш дзён пасля ўвядзення другога кампанента прэпарату. Вакцыну рэкамендавалі для краін «з нізкім і сярэднім узроўнем даходу з-за нескладаных патрабаванняў захоўвання».

Гэта сёмы прэпарат ад Covid-19, які атрымаў адабрэнне СААЗ. Да гэтага арганізацыя дазволіла прымяненне вакцын ад кампаній Pfizer і BioNTech, Johnson & Johnson, Modernа, два варыянты вакцыны ад AstraZeneca і прэпараты ад кітайскіх вытворцаў Sinopharm і Sinovac.

У Беларусі прыпыняць камерцыйную эксплуатацыю самалётаў Ан-12 да вынікаў расследавання катастрофы пад Іркуцкам

Такое рашэнне прыняў дэпартамент па авіяцыі Мінтранса Беларусі. Расследаваннем абставінаў падзення самалёта авіякампаніі «Гродна» будзе займацца спецыяльная камісія.

Улады Узбекістана абмежавалі доступ да Facebook, Telegram, «Аднакласнікаў», Instagram і YouTube

Дзяржаўная інспекцыя па кантролі ў сферы інфарматызацыі і тэлекамунікацый Узбекістана заявіла, што сацсеткі парушылі правілы апрацоўкі персанальных дадзеных, адмовіўшыся захоўваць іх унутры краіны, а таксама ігнаруючы запыты ўладаў.

Раней ва Узбекістане заблакавалі TikTok, «УКантакце», Twitter, WeChat.

Кантралёр «Мінсктранса» атрымала тры гады пазбаўлення волі з адтэрміноўкай на два гады па артыкуле аб злоўжыванні ўладай або службовымі паўнамоцтвамі.

За што? Паводле абвінавачвання, кантралёр са студзеня па чэрвень 2020 года лавіла безбілетнікаў і выпісвала штрафы на іншых людзей, якія раней прыцягваліся за безбілетны праезд і чые пашпартныя звесткі ў яе былі.

Такім чынам жанчына хацела атрымліваць прэміі за штрафы, якія паступілі ў бюджэт. Агульная шкода тром пацярпелым і «Мінсктрансу» была ацэненая ў 751 рубель.

Турэцкія ўлады завялі справу супраць 30 чалавек пасля серыі твітаў, у якіх паведамлялася, што прэзідэнт Турцыі Рэджэп Таіп Эрдаган памёр.

Спецслужбы ідэнтыфікавалі 30 аўтараў падобных публікацый у Twitter і прад'явілі ім абвінавачванні ў дэзынфармацыі, маніпуляцыях і абразе прэзідэнта.

Пасты пра магчымую смерць турэцкага лідара распаўсюдзіліся на фоне чутак аб пагаршэнні здароўя 67-гадовага Эрдагана.

Імкнучыся развеяць чуткі пра здароўе прэзідэнта Турцыі, яго памочнікі размясцілі сёння ў твітары відэаролікі, на якіх ён энергічна крочыць пасля пералёту са Стамбула ў Анкару.

Бацька загінулага авіяінжынера: Гэта быў першы палёт сына

@nashaniva пагаварыла з бацькам Максіма Карпука, інжынера авіякампаніі «Гродна». Яго імя — у спісе загінулых у авіякатастрофе самалёта АН-12 пад Іркуцкам.

Што расказаў мужчына — чытайце па спасылцы.

Вакцынацыя дзяцей ад кавіду: адказы на асноўныя пытанні

Вывучылі досвед замежных краін па вакцынацыі дзяцей і падлеткаў ад каранавіруса. Пра якія рызыкі кажуць вытворцы прэпаратаў, ці сапраўды прышчэпка ад кавіду патрэбная дзецям не менш, чым дарослым?

Адказы чытайце па спасылцы.

Блакіроўка сацсетак ва Узбекістане атрымала нечаканы паварот: пра абмежаванне даведаўся нядаўна пераабраны прэзідэнт Шаўкат Мірзіёеў і загадаў адмяніць рашэнне Інспекцыі па наглядзе ў сферы інфармацыі і тэлекамунікацый, а кіраўнік інспекцыі Галібшэр Зіяеў тут жа быў звольнены з пасады.

Рынкавы кошт EPAM за год вырас на 80% — кампанію ацэньваюць у $33 мільярды

Такія звесткі апублікаваў часопіс Fortune, які склаў новы рэйтынг «100 самых хуткарослых кампаній свету».

У аналагічным рэйтынгу 2020 года кошт EPAM складаў крыху больш за 18 мільярдаў даляраў (на канец верасня). Такім чынам, за год рынкавы кошт EPAM вырас амаль на 15 мільярдаў даляраў, або на 81%.

Уся карціна дня — на nashaniva.com (з Беларусі — праз VPN). Што гэта і як усталяваць, чытайце тут.

Паглядзіце, які транспартны сродак сабраў для ўнукаў пенсіянер з Клімавіцкага раёна

Пра вясковага майстра піша «Родная ніва».

Васіль Чарноў з Кісялёвай Буды ўзяў каляску ад матацыкла «ІЖ», паставіў яе на тры колы і да гэтай канструкцыі прыладзіў матор ад бензапілы. Такі агрэгат пенсіянер сабраў для чатырох унукаў.

У інтэрнэце рагочуць з чарговага відэа, на якім косяць апалае лісце. У ЖКГ растлумачылі, чаму яны так робяць

У кастрычніку ўсё пачалося з Віцебска, пасля сітуацыя паўтарылася ў Слуцку і Барысаве. Млын.by звярнуўся ў Барысаўскую ЖКГ, аказалася, што трымерамі косяць не лісце, а траву.

— Касцы не вінаватыя, што лісце не паспелі прыбраць. А свае абавязкі яны павінны выканаць, бо атрымалі заданне з пэўным аб'ёмам працы, якую трэба зрабіць. Нам не прывыкаць да такога кшталту іроніі. Летась касцы таксама атрымалі заданне скасіць траву, але нечакана выпаў снег. Тады ў інтэрнэце з'явілася інфармацыя, што яны снег косяць, — адказаў начальнік цэха Андрэй Казлоў.

Ён дадае, што прыбіраць лісце павінна ЖЭУ. Там карэспандэнтам сказалі, што ўборка лісця ажыццяўляецца два разы на тыдзень па графіку. Выданне робіць выснову, што арганізацыі не ўзгаднілі чаргу ўборкі лісця і пакосу травы.

Застаецца незразумелым, навошта разам з травой касіць апалае лісце, а тым больш снег.

«Чакаем» — гэта слова-сігнал для сваіх, амаль як «Жыве Беларусь!». Гутарым з палітвязнем Антонам Бяленскім

Малады прадпрымальнік быў валанцёрам штаба Бабарыкі. Але ўжо 10 жніўня 2020 года хлопца затрымалі на вачах яго дзяўчыны. 7 месяцаў Антон правёў у СІЗА, пасля быў асуджаны на год і 6 месяцаў «хіміі» — з пераразлікам дзён, у папраўчай установе ён прабыў з 12 ліпеня па 29 кастрычніка 2021 года.

Палітвязень расказаў «Нашай Ніве» пра свае шкадаванні, «хімію», планы і жыццё «з пачуццём небяспекі».

▫️«У супрацоўнікаў органаў нібыта нейкая метадычка: ты што, не ведаў, што будзе? Табе што, кепска было? Галадаеш? А ты сам бачыў, што ў калгасах праблемы?»
▫️«Сёння ўражанне, што людзі пачынаюць проста шукаць спосабы жыць у новай рэальнасці. Гэта як з кавідам. Глабальная перамена — што затухае і знікае ініцыятыва».
▫️«Калі падарожнічаеш па свеце, то бачыш, што паўсюль усё мяняецца, і перамены могуць быць да лепшага. Тая ж Украіна, хто б што ні казаў, там горш не стала»

Цалкам чытайце па спасылцы

Улады заблакавалі сайт арганізацыі «Экадом», чыю ліквідацыю прызналі незаконнай на міжнародным узроўні

Мінінфарм паведаміў «Экадому» аб тым, што вырашыў абмежаваць доступ да сайта.

Улады пазбавілі экалагічную арганізацыю рэгістрацыі ў жніўні. Але кастрычніку ліквідацыю прызналі незаконнай на міжнародным узроўні. Уладам далі час да 1 снежня на аднаўленне рэгістрацыі «Экадома» — іначай Беларусь чакаюць абмежаванні.

Беларусь плануе атрымаць яшчэ 1,75 млн доз вакцын ад каранавіруса

Беларусь разлічвае купіць каля 1 млн доз замежнай вакцыны і 250 тысяч доз расійскай. Яшчэ 500 тысяч плануюць атрымаць у межах бязвыплатнай дапамогі. Пра гэта паведаміў тэлеграм-канал Мінздароўя.

Вакцыны плануюць закупіць з грошай, выдзеленых Лукашэнкам з «рэзервовага фонду прэзідэнта».

Пад «замежнай» вакцынай хутчэй за ўсё маецца на ўвазе кітайская VeroCell. Раней Лукашэнка выказаўся катэгарычна супраць закупкі ў Беларусь заходніх прэпаратаў, маўляў, тыя, хто атрымаюць такую вакцыну, змогуць паехаць на Захад «атрымліваць інструкцыі». У той жа час Святлана Ціханоўская заяўляла, што Еўрасаюз гатовы дапамагчы Беларусі з вакцынамі.