Гомельскаму праваабаронцу Леаніду Судаленку прысудзілі 3 гады калоніі

Яго памочніцы Таццяне Ласіцы прысудзілі два з паловай гады, паведамляе @viasna96.

Праваабаронцаў затрымалі ў студзені, а працэс над імі пачаўся ў верасні. Іх прызналі вінаватымі ў «арганізацыі і падрыхтоўцы дзеянняў, што груба парушаюць грамадскі парадак». Пракурор запрасіў для абодвух па тры гады пазбаўлення волі.

Разам з імі па справе праходзіла таксама валанцёрка «Вясны» Марыя Тарасенка, але перад абвяшчэннем прысуду жанчына з’ехала з Беларусі.

Па Лепельшчыне бегае чупакабра? Мясцовы жыхар злавіў дзіўнага звера, хацеў завезці спецыялістам, але жывёла збегла

Жыхарка аграгарадка Стаі знайшла ў цяпліцы на ўчастку невядомага звера, піша лепельская раёнка. Яна звярнулася да суседа, які працаваў у лясной гаспадарцы і папрасіла агледзець знаходку.

Мужчына быў у шоку, калі пабачыў жывёлу: яна вяла сябе зусім спакойна і яе можна было ўзяць на рукі. Аднак было бачна, што гэта не сабака і не кот. Доўгі хвост без поўсці, як у пацука, даўгія кіпцюры. Ад звера пахла ці то салёнай рыбай, ці то гніллю.

Вясковец вырашыў звярнуцца да спецыялістаў. Паклаў жывёлу ў мяшок і прынёс у нежылы дом. Вярнуўся праз 20 хвілін — а звер да таго моманту ўжо збег.

Цяпер мясцовыя гадаюць, хто гэта быў: чупакабра, хворы сабака ці янот альбо нешта іншае.

У Ляхавіцкім раёне арганізавалі туры па зборы журавін

Пра незвычайную магчымасць для турыстаў піша БелТА. Ягадныя туры на выхадных арганізуе фізкультурна-спартыўны клуб Ляхавіцкага раёна. За ягадамі турысты адпраўляюцца невялікай групай у суправаджэнні гіда, які добра ведае мясцовасць. На збор журавін адводзіцца некалькі гадзін.

Зборшчыкаў загадзя інфармуюць, як трэба быць апранутымі і без чаго не абысціся ў лесе. Напрыклад, трэба паклапаціцца пра цёплае адзенне і высокія гумавыя боты, узяць з сабой ежу і ваду, зараджаны тэлефон.

Для анархіста Мікалая Дзядка пракурор запрасіў 5 гадоў калоніі

Пра гэта паведамляе @viasna96.

Пракурор Антон Цюменцаў у судовых спрэчках заявіў, што віна Мікалая Дзядка цалкам даказаная.

Мінчука пабілі ў пераходзе метро за адмову выпіць. Пазней ён памёр у бальніцы

Здарэнне адбылося ў пераходзе «Пушкінскай». Жыхар Міханавічаў шукаў кампанію і прапанаваў выпіць 58-гадоваму незнаёмаму. Той адмовіўся, пасля чаго атрымаў некалькі ўдараў, ад якіх паваліўся. Пазней мужчына памёр ад атрыманых траўм.

Нападніка затрымалі. Распачата крымінальная справа.

Дырэктар Дэпартамента па авіяцыі пацвердзіў, што ёсць рызыка адключэння «Белаэранавігацыі» ад еўрапейскай базы даных аб паветраным руху

«Такая праблема існуе. Мы знаходзімся ў дыялогу з нашымі еўрапейскімі партнёрамі. На жаль, яны тлумачаць, што гэта палітычная каманда паступіла. Яна ніяк не звязана з пытаннямі нашага ўзаемадзеяння. Напэўна, гэта самая непрыемная частка, што авіяцыю выкарыстоўваюць для нядобрасумленнай канкурэнцыі, як інструмент аказання ціску», — заявіў Арцём Сікорскі.

«Белаэранавігацыя» знаходзіцца пад санкцыямі ЕС пасля інцыдэнту з самалётам Ryanair.

Па словах Сікорскага, беларускі бок падлічвае ўпушчаную выгаду «Белавіі» і «Белаэранавігацыі» ад санкцый і можа звярнуцца ў суд. А ў выпадку новых санкцый беларускія авіякампаніі змогуць выкарыстоўваць расійскія самалёты.

«Чорная пляма на карце»: што будзе з беларускай авіяцыяй без аэранавігацыі ЕС?

«Гэта плявок мне ў твар!» Былыя сілавікі заяўляюць, што Следчы камітэт дапамагае міліцыі падмяняць доказы

Былыя сілавікі, якія на знак пратэсту пакінулі службу, апублікавалі новае расследаванне. Яны заяўляюць, што следчыя дапамагаюць аператыўнікам падтасоўваць доказы па крымінальных справах. 

Апублікавана аўдыя размоў з голасам, падобным да намесніцы начальніка СК па Кастрычніцкім раёне ў Мінску Міраславы Хлышчанка-Хазаноўскай.

З адной гутаркі вынікае, што аператыўнікі накасячылі з афармленнем доказаў, але замест таго, каб адмовіць у завядзенні справы, як таго патрабуе закон, следчая раіць, як іх выправіць, каб яны выглядалі законнымі.

Што яшчэ стала вядома з новага зліву?

Дома ў палітвязня Іллі Міронава, які напісаў за краты больш за 2500 лістоў, прайшоў чарговы ператрус.

Пра гэта паведаміла маці Іллі Валянціна. Паводле яе словаў, нічога не знайшлі, бо ўсё, што хацелі, забралі ў мінулыя разы.

Раней паведамлялася, што Міронава правяралі на фінансаванне экстрэмізму.

Улады працягнулі забарону на ўвоз тавараў Skoda, Nivea і Liqui Moly

На які тэрмін, пакуль невядома.

Рэшткі прадукцыі можна было прадаваць пасля іх маркіроўкі.

Нагадаем, што Liqui Moly, Skoda Auto и Beiersdorf адмовіліся быць спонсарамі чэмпіяната свету па хакеі ў Мінску. Турнір быў перанесены ў Латвію.

Прысуд Мікалаю Дзядку будзе абвешчаны 10 лістапада. Палітвязень выступіў з апошнім словам

Яго публікуе @viasna96.

«Усе ўдзельнікі працэсу з юрыдычнай адукацыяй выдатна бачаць і разумеюць, што адбываецца. Я толькі хачу падзякаваць сваім родным, сябрам, таварышам-анархістам, журналістам, праваабаронцам, усім неабыякавым, усім, хто шануе маю працу, за тое, што падтрымлівалі мяне на працягу гэтага года і дапамагалі матэрыяльна. Гэта вельмі важна для мяне. Ну а ўсім, хто мае дачыненне да арганізацыі гэтага судовага працэсу, а роўна і іншых палітычных рэпрэсій у маёй краіне, я хачу сказаць: не майце ілюзій! Ніякія напісаныя вамі паперкі, ніякі тэрор ня здольныя спыніць вызваленне чалавека і прагрэс. Мы ўсё роўна пераможам!»

Салігорскія шахцёры трымалі страйк 44 дні, у Мінску да стачкі далучыліся 98 прадпрыемстваў. Успамінаем, як баставалі беларусы

Забастоўкі рабочых былі нячастай з’явай як у Савецкай Беларусі, так і ў лукашэнкаўскай. Масавыя страйкі з палітычнымі патрабаваннямі нечакана зноў сталі актуальнай тэмай у жніўні 2020 года, калі рабочыя буйных прадпрыемстваў выступілі супраць гвалту з боку сілавікоў і за новыя выбары.

Згадалі для вас гісторыю асноўных забастовак у Беларусі.

Чытайце па спасылцы

Уся карціна дня — на nashaniva.com (З Беларусі — праз VPN). Што гэта і як усталяваць, чытайце тут.

У Оршы мужчына краў агароджы з могілак і здаваў у металалом

З вясны ў Оршы сталі знікаць металічныя агароджы на могілках. Аршанская міліцыя затрымала падазраванага ў серыі крадзяжоў. Мяркуецца, што 39-гадовы мясцовы жыхар скраў як мінімум сем агароджаў з месцаў пахавання. Пасля ён іх разбіраў і здаваў у металалом.

Супраць аршанца завялі крымінальную справу. Правяраецца датычнасць да іншых злачынстваў.

Памёр архітэктар «Камароўкі» і іншых вядомых будынкаў Вальмен Аладаў. Яму быў 91 год

Вальмен Аладаў стварыў і ўзначаліў беларускі дзяржаўны інстытут праектавання прадпрыемстваў гандлю і грамадскага харчавання «Белгіпраторг». Спецыялісты гэтага інстытута ў савецкі час здзейснілі рэвалюцыю ў сістэме заводскіх сталовых, распрацаваўшы і ўкараніўшы аўтаматызаваныя лініі раздачы страў, якія дазволілі ў некалькі разоў паскорыць абслугоўванне.

Гэта выключала чэргі, а сістэма безнаяўных разлікаў спрашчала аплату. Пілотны праект апрабавалі на МАЗе. Потым па такім прынцыпе працавалі 3 тысячы сталовых па ўсім СССР.

Менавіта з падачы Аладава ў 1976-м у Мінску з'явіўся першы ў БССР універсам «Фрунзенскі», які працаваў па прынцыпе самаабслугоўвання.

Іншыя вядомыя яго працы — Камароўскі рынак, спартыўны комплекс «Раўбічы», універсамы «Серабранка», «Цэнтральны», ансамбль жылых дамоў на рагу Незалежнасці — Казлова з крамай «Акіян» у Мінску.

❓Міністэрства аховы здароўя з «рэзервовага фонду прэзідэнта» выдзеляць 140 млн рублёў. Шмат гэта ці не?

Лукашэнка выдзеліў Мінздароўя 140 млн рублёў з «рэзервовага фонду прэзідэнта». Сродкі накіруюць на набыццё вакцын, а таксама лекаў.

БелТА запэўнівае, што гэта мае ці не лёсавызначальнае значэнне для беларускай медыцыны. Між тым, гэтыя грошы выглядаюць нязначнай сумай у параўнанні з сённяшнімі патрэбамі беларускай медыцыны.

У 2021 годзе з бюджэту на ахову здароўя выдзелена больш за Br7,6 млрд, або 5% ад ВУП, 6 мільярдаў ужо патрацілі. У кастрычніку Галоўчанка паведаміў, што грошай не хапае: «урад выкарыстоўвае ўсе даступныя фінансавыя інструменты для забеспячэння ўстойлівага функцыянавання галіны. Але, вядома, уздым захворвання змушае шукаць дадатковыя крыніцы для фінансавання».

Тады ж Галоўчанка паведаміў, што ўрад будзе звяртацца да Лукашэнкі з просьбай аб выдзяленні дадатковых сродкаў у памеры амаль Br250 млн, 140 з якіх — на закупку лекаў ды вакцын.

З заявы прэм’ера вынікае, што за першыя 9 месяцаў 2021 года ахове здароўя Беларусі патрабавалася блізу 650 млн рублёў штомесяц.
140 млн рублёў з так званага «рэзервовага фонду прэзідэнта» наўрад ці могуць цалкам вырашыць праблему беларускай медыцыны.

Як не ўтвараюць 140 млн рублёў дзірку і ў самім рэзервовым фондзе. У 2021 годзе туды планавалася адлічыць 613 мільёнаў рублёў. У 2020 годзе — 244 мільёны.

У адкрытым доступе няма інфармацыі аб крыніцах рэзервовага фонду. Згодна з Законам «Аб рэспубліканскім бюджэце», частка сродкаў паступае туды з бюджэту, а частка — гэта «дадатковыя даходы».

«Белсат» — экстрэмісцкае фарміраванне. Што гэта значыць для іх аўдыторыі?

Экстрэмісты пачалі расці ў Беларусі як грыбы па восені пасля змен у заканадаўстве, набыўшых моц гэтым летам. Згодна з імі, быў пашыраны сам панятак экстрэмізму, канчаткова размыліся межы паміж яго гвалтоўнымі рысамі і непажаданай для ўладаў праявай грамадзянскай пазіцыі.

У новым законе прапісаны і панятак экстрэмісцкага фарміравання. Адказнасць прадугледжаная не толькі за стварэнне і кіраўніцтва, але і за членства. Сёння ў Беларусі стала на адно такое фарміраванне больш: МУС прызнала такім інтэрнэт-рэсурсы «Белсат».

Папрасілі юрыстаў патлумачыць, што гэта значыць для аўдыторыі тэлеканала.

«Адказнасць за членства ў экстрэмісцкім фарміраванні прадугледжаная толькі тады, калі была мэта здзяйснення злачынства экстрэмісцкай накіраванасці. Калі ад чалавека няма актыўных дзеянняў, ніяк не парушаецца цяперашні правапарадак, то за падпіскі самі па сабе нельга пераследаваць у крымінальным парадку».

Чытайце цалкам па спасылцы

⚡️Самалёт беларускай авіякампаніі «Гродна», які ляцеў з Якуцка ў Іркуцк, пацярпеў крушэнне

Загінулі як мінімум двое. Застаецца невядомым лёс яшчэ шасці чалавек.

Паведамляецца, што самалёт рухнуў каля вёскі Піваварыха пры заходзе на пасадку. На месцы працуюць ратавальнікі.

Інтэрфакс паведамляе, што 5 чалавек выжылі пры крушэнні беларускага самалёта ў Іркуцку.

У той жа час ТАСС піша, што ў салоне былі толькі два пілоты, якія загінулі. Пасажыраў у самалёце не было.

На фота — як самалёт выглядаў да катастрофы.

Замовілі экскурсію, каб затрымаць. Экскурсаводку арыштавалі на 15 сутак за «непадпарадкаванне»

Раніцай 2 лістапада на плошчы Свабоды затрымалі гіда Аксану Манкевіч. Сёння яе судзілі нібыта за непадпарадкаванне, піша @viasna96.

Манкевіч на судзе распавяла, што на выходных патэлефанаваў малады чалавек, прадставіўся Аляксеем і замовіў экскурсію. Яны дамовіліся сустрэцца на плошчы Свабоды.

Калі Аксана прыйшла ў прызначаныя месца і час, то падышоў малады чалавек, паказаў пасведчанне і аказалася, што гэта і быў той Аляксей.

З міліцыянерам яны пайшлі ў будынак ГУБАЗіК, там ад яе патрабавалі пароль на тэлефоне. Пасля таго, як атрымалася трапіць у змесціва тэлефона, нічога патрэбнага там не выявілі. Дзяўчыне прапанавалі запісаць пакаяльнае відэа, але яна адмовілася.

Пасля гэтага супрацоўнікі паехалі да Аксаны дадому і правялі ператрус.

На судзе ў якасці сведкі быў дапытаны міліцыянт Аляксандровіч. На судзе ён блытаўся у паказаннях.

У выніку суддзя Шабуня арыштавала Аксану на 15 сутак.

На борце самалёта Ан-12 дакладна знаходзіліся грамадзяне Беларусі. Пра гэта паведаміла МЗС Беларусі.