У Гомелі загарэліся чатыры аўто, падазраюць падпал

Учора ўвечары ў МНС паведамілі, што гараць чатыры аўтамабілі на вуліцах Дзімітрава, Ільіча і Радзішчава.

Пацярпелых няма, паведамляе МНС.

Прычыны пажараў высвятляюцца. Разглядаецца версія падпалу.

Павел Вінаградаў распавёў феерычную гісторыю пра тое, як міліцыянеры яму вярталі самагон

Публікуем са скарачэннямі. Цалкам можна прачытаць у фэйсбуку.

«Памятаеце, я пісаў, што падчас ператрусу ў мяне самагон забралі? 15 літраў. А яшчэ ў Юрыя Вінаградава [НН — бацькі Паўла] таксама канфіскавалі 10 літраў. Пасля экспертызы яму патэлефанавалі: «Ідзі забірай». Ён адмовіўся. Мне не тэлефанавалі, але я б таксама адмовіўся.

Фішка ў тым, што самагонку можна толькі захоўваць, а перавозіць нельга. Пакуль будзем везці яго дадому з РУУС, мы будзем парушаць закон, за што можна атрымаць штраф. Мы вырашылі, што не станем правяраць.

Але ім жа справу закрыць трэба, таму сёння здагадайцеся што? Дзынь-дзынь! Дастаўка самагону.

Беларусікі, пераязджайце ў Беразіно, я вам кажу. Тут міліцыя прывязе табе алкаголь проста да брамы, нават калі ты адмаўляешся яго забіраць, і ўсё гэта ў масках і на патрульнай машыне. Такое нават «Еўраопт» не робіць».

СК Беларусі пацвердзіў смерць Андрэя Скрыпкіна, якога падазравалі ў забойстве сям’і банкіра

«Следча-аператыўная група праводзіць агляд у ізалятары. Атрыманыя звесткі ўказваюць на тое, што мела месца самагубства», — заявіла афіцыйны прадстаўнік СК Юлія Ганчарова.

Як падчас пандэміі начальнік з ГУБАЗіК уладкоўвае ў двухмесную палату свайго бацьку і яго сужыцельку — новы зліў

У той час, як у Брэсце пад палаты для каранавірусных хворых пераабсталёўваюць нават сталовыя, намеснік начальніка 6-га ўпраўлення ГУБАЗіК Андрэй Бараноўскі па блаце без праблем уладкоўвае свайго бацьку і яго сужыцельку ў двухмесную палату. Так сцвярджаюць былыя сілавікі, якія апублікавалі новы зліў тэлефоннай размовы.

Чытайце па спасылцы

Інстаграм дазволіць усім карыстальнікам дадаваць спасылкі ў сторыз

Раней функцыя была даступнай толькі верыфікаваным акаўнтам і профілям, у якіх больш за 10 тысяч падпісчыкаў.

«Ад астатняй часткі супольнасці мы пачулі, што яны таксама хочуць дзяліцца спасылкамі, якія маюць для іх значэнне <...> . Так што цяпер мы даём доступ [да функцыі гіперспасылак] для ўсіх», — гаворыцца ў паведамленні, апублікаваным у сераду ў афіцыйным блогу Instagram.

Падпішыцеся на «Нашу Ніву» ў Інстаграме — instagram.com/nashaniva

❕❔Пазітыўныя эмоцыі, сон у прон-пазіцыі і масаж. Як аднавіцца пасля каранавіруса

Як аднавіцца пасля каранавіруса? Ці вернуць свой аб'ём лёгкія пасля цяжкай пнеўманіі і чаму важна есці шмат бялку? Рэкамендацыі дае доктар інтэнсіўнай тэрапіі Валер Лышчык. Цяпер ён працуе ў польскім кавідным шпіталі. Пры рэкамендацыях ён абапіраўся на асабісты досвед назірання за кавідам і лячэння цяжкіх хворых.

▫️«Прон-пазіцыя — палажэнне на жываце — карысная ў працэсе аднаўлення».
▫️«Раяць ужываць шмат бялку, прыкладна на 50% больш, чым да хваробы. Бялок патрэбны для сінтэзу антыцелаў».
▫️«Пасля цяжкага кавіду бываюць сасудзістыя ўскладненні, таму важна прафілактыка тромбаў».
▫️«Выкцынавацца ад кавіду можна праз месяц пасля хваробы».

Чытайце цалкам па спасылцы

У Брэсце судзяць маёра міліцыі, які вывез са штрафстаянкі чатыры аўтамабілі і матацыкл

42-гадовы былы маёр міліцыі, паводле абвінавачвання, завалодаў трыма аўтамабілямі і адным матацыклам са штрафстаянкі на суму 13 тысяч рублёў, паведамляе «Вячэрні Брэст».

Мужчына паказваў работнікам стаянкі ліпавыя дакументы, якія нібыта давалі яму права забіраць машыны для далейшых следчых дзеянняў. Машыны і матацыкл ён размясціў на ўчастках сяброў у Брэсцкім раёне.

Віну мужчына цалкам прызнаў і растлумачыў свае дзеянні ў судзе цяжкай хваробай жонкі, з-за якой яму тэрмінова спатрэбіліся грошы.
Аўтамабілі былі знойдзены ў лесе без кіроўцаў і знаходзіліся на стаянцы для захоўвання больш за чатыры гады. Таму ён і вырашыў, што яны нікому не патрэбныя.

Былому міліцыянеру пагражае ад 2 да 7 гадоў турмы.

20-гадовая дзяўчына на машыне каршэрынгу ўрэзалася ў слуп у Малінаўцы

Дзяўчына паварочвала налева з вуліцы Напалеона Орды на вуліцу Чачота ў Мінску і ўрэзалася ў слуп.

Кіроўца не пацярпела, у адрозненне ад легкавіка.

Разгром на стадыёне ў Баранавічах зладзілі падлеткі. Старэйшаму ўсяго 14 гадоў

Следчыя ўстанавілі, што да злачынства маюць дачыненне трое падлеткаў. Старэйшаму з іх 14 гадоў, а дваім па 13. СК сцвярджае, што непаўналетнія трапілі на тэрыторыю стадыёна, дзе праходзіць рэканструкцыя, і вырашылі пакатацца на пагрузчыку. Аднак не далі рады кіраванню і пашкодзілі маёмасць.

Паведамляецца, што гэтыя ж падлеткі ў той жа вечар спалілі вянкі ля Вечнага агню.

«П**дуй на прышчэпку!». Маскоўскі абласны штаб па барацьбе з кавідам апублікаваў відаролік з катом і нецэнзурным заклікам вакцынавацца

Ролік з'явіўся ў тэлеграм-канале штаба, але праз некалькі хвілін быў выдалены.

Пасля Масаблштаб аднавіў ролік, але цяпер ён заканчваецца фразай «Ідзі рабі прышчэпку. Калі ласка».

У Кіеве з лістапада ўводзіцца лакдаўн

Наведванне рэстаранаў, кафэ, забаўляльных мерапрыемстваў, гандлёва-забаўляльных цэнтраў і іншых публічных аб'ектаў і мерапрыемстваў будзе магчымым толькі пры наяўнасці ва ўсіх работнікаў і наведвальнікаў ПЛР-тэсту або сертыфіката аб вакцынацыі.

Карыстацца грамадскім транспартам таксама змогуць толькі тыя, хто мае ПЛР-тэст або сертыфікат аб вакцынацыі. Прычым правяраць іх наяўнасць будуць не кіроўцы, а спецыяльныя групы праваахоўнікаў.

За што кіраўнікоў дзяржарганізацый будуць пазбаўляць прэмій і калі заплацяць 12 акладаў?

Новыя правілы аплаты працы кіраўнікоў дзяржарганізацый прапісаны ў пастанове Саўміна № 612.

Цяпер могуць пазбавіць прэміі за нясплату камуналкі.

Чытайце больш па спасылцы

Уся карціна дня — на nashaniva.com (З Беларусі — праз VPN). Што гэта і як усталяваць, чытайце тут.

Падобна, у Беларусі заблакавалі сайты Deutsche Welle, «Настоящего времени» і «Новага часу». Яны не адкрываюцца, замест некаторых — плашка Мінінфарма аб блакіроўцы.

Віцэ-прэм'ер Назараў прызнаўся, што расіяне хочуць падняць цану на нафту для Беларусі з-за санкцый

Гэта вынікае з яго адказу на пытанне дэпутата Гайдукевіча, відэазапіс якога выклала прэс-служба Палаты прадстаўнікоў. На гэта звярнуў увагу партал Reform.by.

«Вось мы зараз вядзем кампанію закупкі нафты на наступны год. Нам кажуць: слухайце, ну рызыкоўна з вамі працаваць. Давайце мы за рызыкі падымем цану. Мы абмяркоўваем, мы пераконваем, мы знаходзім рашэнні. Вось гэта вельмі важна», — сказаў Юрый Назараў.

Паводле яго слоў, ва ўрада ёсць пэўныя планы, што рабіць у выпадку прыняцця пятага пакета санкцый.

«Разумееце, што з 2007 года прадпрыемствы «Белнафтахіма» навучыліся вось хітрыць… У нас па кожным ведамстве распрацавана дарожная карта. Яна не застылая. <…> Мы ведаем, што трэба рабіць у выпадку далейшага паглыблення санкцый», — патлумачыў схему абыходу санкцый чыноўнік.

У Оршы заклалі алею з дзіўнай назвай

У горадзе на Віцебшчыне з'явілася алея адзінства грамадскіх аб'яднанняў і палітычных партый «Спадчына». Ініцыятарам акцыі выступіў мясцовы райкам БРСМ, прымеркаваўшы гэта да дня нараджэння камсамола.

Нагадаем, што сёлета па ўсёй Беларусі ліквідавалі больш за 100 грамадскіх аб’яднанняў.

У Гродне да 80-годдзя перамогі ў Вялікай Айчыннай вайне пабудуюць другую Каложу

У Гродне ў 2025 годзе з'явіцца другая Каложа, створаная па ўзоры святыні XII стагоддзя, перадае «Перспектыва». 

Пра будучы праект распавялі старшыня Гродзенскага аблвыканкама Уладзімір Каранік і архіепіскап Гродзенскі і Ваўкавыскі Антоній падчас цырымоніі памятнага гашэння паштовага блока «Каложская ікона Божай Маці».

Новы храм будзе прысвечаны 80-годдзю перамогі ў Вялікай Айчыннай вайне. У якой частцы горада ён будзе ўзведзены, пакуль невядома.