Латвія гарыць ад кавіду. А мясцовыя, каб не рабіць прышчэпку, гатовыя за грошы заражацца вірусам

Апошнім часам у Латвіі, дзе надзвычай цяжкая сітуацыя з каранавірусам, распаўсюдзілася незвычайная з’ява: мясцовыя жыхары гатовыя плаціць грошы людзям, якія хварэюць, каб заразіцца ад іх, атрымаць імунітэт і не рабіць прышчэпку.

Аб’явы з’яўляюцца проста ў прэсе. Паліцыя лічыць гэта парушэннем закону і мае намер змагацца.

Чытайце па спасылцы.

Пракуратура забрала ў мінскага ідэолага 25 тысяч рублёў

Намеснік дырэктара па ідэалогіі аднаго з камунальных прадпрыемстваў Мінска адначасова быў і старшынёй садовага таварыства. Амаль за 14 гадоў на гэтай пасадзе ён зарабіў больш за 25 500 рублёў, паведамляюць «Мінск-Навіны».

Па законе «Аб барацьбе з карупцыяй» кіраўнікі, іх намеснікі і галоўныя бухгалтары дзяржарганізацый не маюць права выконваць іншую аплатную працу. Калі выяўляецца парушэнне, трэба цягам 10 сутак вярнуць грошы ў бюджэт. Што вышэй згаданы чыноўнік і зрабіў.

У беларускіх рэанімацыях з COVID-19 вакцынаваных менш за 1%

У рэанімацыях з COVID-19 вакцынаваных людзей менш за 1%, паведаміў загадчык кафедры інфекцыйных хвароб і дзіцячых інфекцый Беларускай дзяржаўнай акадэміі паслядыпломнай адукацыі Юрый Горбіч.

«Аб'ектыўна цяпер вакцынацыя абараняе ад цяжкага працякання захворвання. Калі паглядзім колькасць вакцынаваных, якія ляжаць у аддзяленнях рэанімацыі, яна складае менш за 1%. Калі быць дакладнымі, 0,2-0,5%. У сярэднім па краіне яна складае 0,47%», — сказаў Юрый Горбіч.

У Баранавічах невядомыя зладзілі разгром на стадыёне

Увечары 18 кастрычніка нехта трапіў на гарадскі стадыён у Баранавічах, дзе ідзе рэканструкцыя. У выніку невядомыя пабілі шкло ў катку, перакулілі пагрузчык, сапсавалі газон у рулонах, паламалі будаўнічыя лясы. Сума шкоды, па словах мясцовых чыноўнікаў, «каласальная».

У зробленым падазраюць школьнікаў, якіх затрымалі, калі яны палілі вянкі ля Вечнага агню. Цяпер правяраецца іх датычнасць да інцыдэнту на стадыёне.

ТЭСТ: Ці ведаеце вы беларускіх міністраў?

Беларусь — лідар па колькасці міністэрстваў сярод сваіх суседзяў. У нас іх ажно 24. Кадравыя змены ў іх адбываюцца досыць часта, вось нядаўна на пасаду прыйшоў новы міністр юстыцыі.

Ці ведаеце вы міністраў у твар і дакладна скажаце, хто на фота? «Наша Ніва» склала спецыяльны тэст-праверку.

Прайдзіце наш тэст

«У нас пазіцыя — не трэба масак, нічога, само пройдзе». Што думаюць медыкі пра рэзанаснае пасяджэнне па каранавірусе

19 кастрычніка Лукашэнка правёў нараду, прысвечаную каранавірусу. На ёй прагучала некалькі нечаканых загадаў: штрафаў за парушэнне масачнага рэжыму не будзе, міліцыя не павінна кантраляваць нашэнне масак, нельга «напружваць людзей вакцынацыяй».

Галоўнае даручэнне Лукашэнкі міністру аховы здароўя Піневічу — «вяртайцеся да таго, што мы рабілі ў першую хвалю».

Дзяржпрапаганда адразу ж прынялася ўхваляць гэтыя рашэнні. А што ж пра ўсё гэта думаюць медыкі?

Чытайце па спасылцы.

Наталля Эйсмант публічна прызналася, што перанесла каранавірус

Наталля Эйсмант дала невялікае інтэрв'ю тэлеканалу «Беларусь 1», у якім прызналася, што зусім нядаўна перахварэла на каранавірус. Прэс-сакратарка Лукашэнкі адзначыла, што вострая фаза хваробы цягнулася 2,5 дні. У гэты час яна ляжала ў бальніцы. А за ходам хваробы падначаленай сачыў сам Лукашэнка.

Цікава, што на злівах аўдыёразмоў за лістапад мінулага года голас, падобны да голаса Наталлі Эйсмант, казаў пра адсутнасць пахаў. «Мне ўсё роўна падаецца, што гэта вось яно», – гаворка недвухсэнсоўна ішла пра каранавірус.

Але тады Лукашэнка яшчэ называў каранавірус «псіхозам». Як стала вядома з запісаў размоў, што трапілі ў сетку, на той момант топавыя чыноўнікі хадзілі на пасяджэнні без масак і хворыя, а прызнавацца Лукашэнку баяліся.

Чытайце па спасылцы.

Уся карціна дня — на nashaniva.com (З Беларусі — праз VPN). Што гэта і як усталяваць, чытайце тут.

Дырэктар Дэпартамента па авіяцыі прызнаў, што «Белавія» стала пляцоўкай для нелегальнай міграцыі, і параіў увесці санкцыі супраць Міжземнага мора

Дырэктар Дэпартамента па авіяцыі Міністэрства транспарту і камунікацый Арцём Сікорскі ў эфіры АНТ звярнуў увагу, што «Белавія» стала «пляцоўкай, праз якую гэтыя людзі [мігранты] бягуць за лепшым жыццём». «Яны не да нас прыйшлі, і нават не ў Літву, і не ў Польшчу», — заўважыў Сікорскі.

«Я б прапанаваў Барэлю, можа быць, увесці санкцыі супраць Міжземнага мора. Бо тысячы і тысячы мігрантаў прыбываюць у Еўропу праз Міжземнае мора», — сказаў чыноўнік.

«Сказалі, што ў ЕС мне лепш не прыязджаць». Блогер, якога затрымалі ў аэрапорце Браціславы, расказаў, чаму гэта адбылося

«Нашай Ніве» ўдалося пагаварыць з Яўгенам Малахоўскім. Блогер кажа, што яго ўсё ж затрымліваў не Інтэрпал, а Еўрапал:

«Гэта Еўрапейская паліцыя, што мае базу ў межах ЕС. На пашпартным кантролі да мяне падышлі супрацоўнікі паліцыі, забралі дакумент, папрасілі прысесці – і сышлі. А калі вярнуліся, сказалі, што Германія ўвяла на мае дадзеныя чырвоную картку. Гэта значыць, што ў любой краіне Еўрасаюза мяне могуць затрымаць. То бок, у славацкай паліцыі не было дакладнай інфармацыі, чаму і за што гэта было. У іх ёсць толькі інфармацыя, што на мяне чырвоная карта, і што я павінен быць затрыманы і правераны.

Затым яны звязаліся з нямецкімі калегамі. Яны не далі адказу, затрымліваць мяне, ці не. У выніку мяне адпусцілі і пасадзілі на самалёт. Але сказалі, што, калі я яшчэ раз прыеду ў ЕС, то, хутчэй за ўсё, мяне будуць чакаць праблемы з такой адзнакай».

«Выпуск СМІ можа быць спынены». Набыў моц закон, які закліканы абараняць суверэнітэт. Што важна ведаць?

Набылі моц папраўкі, унесеныя ў заканадаўства па пытаннях абароны суверэнітэту і канстытуцыйнага ладу. Яны былі зацверджаныя яшчэ ў ліпені і, з пункту гледжання законатворцаў, сталі адказам на пратэсты пасля выбараў 2020 года.

У прыватнасці, змены закранулі законы «Аб узброеных сілах Рэспублікі Беларусь» і «Аб надзвычайным становішчы».

Што важнага ў новым законе?

Чытайце па спасылцы

Цела 19-гадовага мігранта з Сірыі знайшлі ў рацэ Буг на мяжы Беларусі і Польшчы

Ратавальнікі дасталі з ракі Буг цела 19-гадовага мігранта з Сірыі. Пра гэта паведаміла ў сераду польская паліцыя.

«Яго асобу пацвердзіў іншы малады мужчына, з якім яны днём раней спрабавалі нелегальна пераправіцца праз раку Буг. Разам з целам знойдзены дакументы», — сказаў прэс-сакратар галоўнага каменданта паліцыі ў Любліне Анджэй Фіёлек. Абставіны смерці маладога чалавека расследуюцца.

Гэта не адзіны выпадак гібелі мігрантаў на мяжы. Зафіксавана каля сямі падобных выпадкаў.

МУС прызнала Telegram-канал «Кибер Партизаны» і Telegram-чат «Кибер Сливы» экстрэмісцкім фарміраваннем

Нагадаем, што група людзей, якія называюць сябе «Кібер-партызанамі», атрымала доступ да закрытых баз і запісаў тэлефонных размоваў сілавікоў і цяпер публікуе іх у інтэрнэце. Дзяржаўныя органы ніяк не адрэагавалі на масавыя злівы, але ў выніку прызналі групу экстрэмісцкім фарміраваннем.

#мяняюкавунапалац. Актывісты прыдумалі, як кожны можа лёгка паўдзельнічаць у ратаванні палаца Радзівілаў (далучайцеся!)

У мінулым годзе ў былога палаца Радзівілаў у вёсцы Паланечка, што ў Баранавіцкім раёне, з'явіліся новыя гаспадары. Яго выкупіла сям’я прадпрымальнікаў з Мінска, якія паставілі сабе задачу: не даць палацу знікнуць і аднавіць яго. Дапамагчы ім у гэтым можа кожны беларус — проста цяпер дастаткова пералічыць на рахунак палаца кошт аднаго кубка кавы.

Чытайце па спасылцы

Ва Украіне забаранілі міжгароднія паездкі грамадскім транспартам без ПЛР-тэста або вакцынацыі

Ва Украіне з 21 кастрычніка пачалі дзейнічаць новыя правілы перавозак пасажыраў унутры краіны. Яны датычацца ўсіх відаў транспарту, уключаючы самалёты, аўтобусы і цягнікі. З сённяшняга дня пасажыры павінны паказаць не толькі білет на транспарт і пашпарт, але і доказ аб вакцынацыі або адмоўны тэст на каранавірус, піша РБК-Украіна.

Пры гэтым, ПЛР-тэст павінен быць зроблены за 72 гадзіны да паездкі. Новыя правілы дзейнічаюць ва ўсіх відах транспарту.
Паказаць дакументы аб вакцынацыі можна як у электронным, так і ў папяровым выглядзе.

Дарэчы, у памяшканні чыгуначнага вакзала арганізавалі пункт экспрэс-тэставанняў на COVID-19. Кошт тэста складае 350 грыўняў (каля 32 беларускіх).

Па звестках на сённяшнюю раніцу ва Украіне быў зафіксаваны максімум штодзённых заражэнняў і смерцяў за ўсе хвалі: 22 415 выпадкаў і 546 смерцяў, пратэсціравалі каля 130 тысяч чалавек.

Як часта можна хварэць на кавід, калі не прышчапляцца? Вось што кажуць навукоўцы

Год таму эксперты лічылі, што паўторны кавід — дужа рэдкая з’ява. Тады ва ўсім свеце было зафіксавана прыкладна два дзясяткі такіх выпадкаў.

Чытайце больш па спасылцы

Уся карціна дня — на nashaniva.com (З Беларусі — праз VPN). Што гэта і як усталяваць, чытайце тут.

Урад Латвіі зацвердзіў лакдаўн па 15 лістапада з каменданцкай гадзінай з 20:00: што забаронена і што дазволена

Выходзіць дазволена толькі ў выпадках абгрунтаванай неабходнасці.

Чытайце па спасылцы

Чытайце таксама: Латвія гарыць ад кавіду. А мясцовыя, каб не рабіць прышчэпку, гатовыя за грошы заражацца вірусам