Амаль 100 дзён у няволі — мужу і жонцы далі чарговыя суткі за рэпосты ў прыватнай перапісцы. Што адбываецца?

Драматычная гісторыя сям’і Крупеніч-Кандрацьевых працягваецца: Анастасія і Сяргей ужо адсядзелі 84 дні за рэпосты з «экстрэмісціх» тэлаграм-каналаў у прыватнай перапісцы. Сёння, як стала вядома «Нашай Ніве» ад адвакатаў, іх асудзілі зноў — Анастасіі дадалі яшчэ 14 сутак, а Сяргею — 15.

Першы раз пару затрымалі яшчэ ў ліпені. Як нам вядома з уласных крыніц, сям’ёй зацікавіліся пасля вяртання з камандзіроўкі ў Польшчу.

У ізалятарах яны перахварэлі на каранавірус, моцна схуднелі. За такі працяглы час у няволі маладзёны падарвалі сваё здароўе.

Пра драму беларускай сям'і чытайце па спасылцы

Паглядзіце, якія буракі выраслі на Старадарожчыне

Зоя Праташчык з аграгарадка Старыя Дарогі (гэта за пару км ад райцэнтра) вырасціла буракі вагой 2 кг 700 г і 2 кг 300 г.

Жанчына шчыра хацела падзяліцца радасцю са сваімі землякамі, таму аператыўна на ровары прывезла свой ураджай у рэдакцыю мясцовай газеты.

Пенсіянерка збіраецца прыгатаваць з гігантаў аснову для халадніку.

Расчараваныя мігранты могуць зладзіць пратэсты? Што будуць рабіць мігранты ў Беларусі?

Мігранты, якіх не ўдасца пераправіць у Еўрасаюз, могуць аказацца праблемай для беларускіх уладаў. Эксперты паспрачаліся, ці лёгка будзе «турыстаў» адправіць назад дадому.

Чытайце па спасылцы

Уся карціна дня — на nashaniva.com (З Беларусі — праз VPN). Што гэта і як усталяваць, чытайце тут.

У Шчучыне ратавальнікі прыйшлі на дапамогу кошцы, што забралася на высокае дрэва

У МНС звярнулася жанчына і распавяла, што яе кошка забралася на бярозу на вышыню сем метраў. Жанчына патлумачыла, што кошка Мая ўжо другія суткі знаходзіцца на дрэве, а дапамагчы ёй спусціцца не атрымліваецца.

Выратаванне жывёл не ўваходзіць у функцыі службы 101, але ў залежнасці ад сітуацыі дыспетчар МНС тлумачыць, як самастойна дапамагчы жывёле, а ў выключных — накіроўвае байцоў на месца здарэння, паведамляе 112.by. Гэтым разам ратавальнікі выехалі на месца здарэння.
Работнік МНС падняўся па лесвіцы, акуратна зняў жывёлу і перадаў гаспадыні.

Сітуацыя вырашылася паспяхова.

Паэт, які шукаў жонку ў сацсетках, патлумачыў, што гэта было

Вось што распавёў Валерый Пазнякевіч у каментары @nashaniva:

«Я проста вырашыў заняцца вывучэннем жаночай псіхалогіі. Дзеля гэтага і размясціў пост. Каментары былі больш чым жахлівыя. Некаторыя адкрыта пісалі аб тым, што калі перапішу кватэру, то тады ёсць над чым падумаць. Як ні дзіўна, але ў большасці жанчын на першым месцы стаіць матэрыяльнае пытанне. Дзеля яго дасягнення яны гатовыя пазбавіцца і свайго гонару, і сваёй незалежнасці.

Аналіз мне патрэбен для новага псіхалагічнага рамана «Каханне ў квадраце». Пост мне вельмі дапамог. А што тычыцца пошуку жанчыны, спадзяюся, што час гэтаму паспрыяе».

‼️Чыжа выпусцілі пад хатні арышт і адправілі на псіхіятрычную экспертызу 

Сёння ў судзе Цэнтральнага раёна Мінска адбываецца разгляд скаргі бізнэсмена Юрыя Чыжа, якога следства вырашыла накіраваць на судова-псіхіятрычную экспертызу. Пасяджэнне пройдзе ў закрытым рэжыме, гэта стандартная практыка.

З апісання скаргі вынікае храналогія пераследу бізнэсмена: спачатку яго ўтрымлівалі пад вартай у СІЗА, прычым тэрмін працягваўся, пасля перавялі пад хатні арышт, затым следства вырашыла накіраваць яго на судова-псіхіятрычную экспертызу. Яе праводзяць у РНПЦ псіхічнага здароўя ў Навінках.

Цяпер Юрый Чыж не ў следчым ізалятары. Па законе, калі экспертыза выявіць псіхічнае расстройства ці захворванне, па рашэнні псіхіятра чалавека могуць накіраваць у бальніцу на лячэнне, але патрабуецца згода самога пацыента (выключэнне — для недзеяздольных, за іх згоду даюць законныя прадстаўнікі).

Прымусова адправіць на лячэнне могуць толькі па рашэнні суда. Аднак зараз бізнэсоўца накіроўваюць толькі на экспертызу, якая павінна вызначыць ягоны стан. І нават гэта рашэнне ён мае права абскардзіць у судзе, што зараз і робіць абвінавачаны.

Брат Юрыя, Аляксандр, адмовіўся каментаваць «Нашай Ніве» стан здароўя бізнэсмена. 

Сітуацыя ў Чыжа бязрадасная — працягваецца арышт ягонай маёмасці, судовыя разбіральніцтвы і крымінальны пераслед па справах колішняй паспяховай бізнэс-імперыі.

Гадавая інфляцыя ў Беларусі перавысіла 10%

Паводле звестак Белстата, у верасні індэкс спажывецкіх коштаў вырас на 10,2% у параўнанні з аналагічным месяцам 2020 года.

Месячная інфляцыя ў верасні склала 1,3% і стала самай высокай за апошні час.

У верасні цэны на харчовыя тавары выраслі на 2,1%, на нехарчовыя — на 1%, на паслугі — на 0,5%.

У параўнанні са снежнем мінулага года індэкс спажывецкіх цэн вырас на 7,5%, цэны на харчовыя тавары — на 2,1%, нехарчовыя тавары — на 8,5%, на паслугі — на 5,9%.

У гадавым вымярэнні харчаванне падаражэла на 11,2%, нехарчовыя тавары — на 10,3%, паслугі — на 8,5%.

IT-краіна: Пераможца кубка Беларусі па міні-футболе атрымае прызавыя ў крыптавалюце

Пра гэта перадае прэс-служба федэрацыі міні-футбола.

Таксама адзначаецца, што федэрацыя на 3 гады ўсталёўвае прызавы фонд для пераможцаў Кубка краіны ў крыптавалюце.

«Напісала, што ён абаср…ся і абняславіўся». На маці-адзіночку з Івацэвіч, якую асудзілі за смайлік з гаўняшкай, зноў завялі справу за абразу міліцыянера

На Вольгу Кронду, якая жыве ў Івацэвічах і адна гадуе дзіця, завялі новую крымінальную справу за абразу мясцовага міліцыянта Руслана Куцко.

У жніўні 33-гадовую жанчыну ўжо судзілі за абразу таго ж Куцко. Тады падставай для пераследу сталі некалькі смайлікаў «какашка», якія жанчына пакінула пад фатаздымкам міліцыянта.

Суд, які праходзіў у закрытым рэжыме, пакараў яе двума гадамі хатняй хіміі, таксама яна мусіць выплаціць сілавіку 2000 рублёў у якасці маральнай кампенсацыі.

Чытаць далей

У Крамлі адмаўляюць крадзеж формулы вакцыны AstraZeneca

У Крамлі назвалі «глыбока ненавуковай» газету The Sun, паводле звестак якой расійскі агент выкраў у кампаніі AstraZeneca праект вакцыны.
«Газета Sun — гэта ж вельмі вядомая глыбока ненавуковая газета. Ну, напэўна, так мы і ставімся да гэтых публікацый», — сказаў прэс-сакратар Крамля Пяскоў.

Паведамленні аб тым, што пры распрацоўцы расійскай вакцыны «Спутнік V» нібыта выкарыстоўвалася «скрадзеная» формула брытанскай вакцыны AstraZeneca, — «нахабная хлусня, заснаваная на ананімных крыніцах», заявілі ў расійскім фондзе прамых інвестыцый.

Раней The Sun напісала, што спецслужбы Вялікабрытаніі паведамілі ўраду аб тым, што расійскі агент выкраў формулу каранавіруснай вакцыны, распрацаванай кампаніяй AstraZeneca, у Расіі нібыта выкарыстоўвалі яе пры распрацоўцы прэпарата «Спутнік V».

У бальніцах Мінскай вобласці амаль 96% хворых на кавід непрышчэпленыя

У бальніцах Мінскай вобласці з 21 верасня па 11 кастрычніка бягучага года з COVID-19 знаходзілася толькі 4,3% пацыента са скончаным курсам вакцынацыі супраць 95,7% непрышчэпленых, паведаміла БелТА намеснік галоўнага лекара «Мінскага абласнога цэнтра гігіены, эпідэміялогіі і грамадскага здароўя» Ірына Мілановіч.

Першай дозай вакцыны ад каранавіруса ў сталічным рэгіёне прышчэплены 333413 чалавекі (22,6%), з іх 199125 (13,5%) завяршылі поўны курс вакцынацыі.

Што больш эфектыўна: «Спутнік» або кітайская вакцына?

У Брэсцкім раёне мясцовы жыхар абсікаў міліцэйскае аўто, а пасля разам з сябрамі прабіў у ім колы

Вечарам 10 кастрычніка ў аграгарадку Тамашоўка ў Брэсцкім раёне ўчастковы заўважыў, што ў службовай Geely прабітыя колы, а на капоце — сляды ног.

Высветлілася, што трое мясцовых жыхароў ужывалі алкаголь. У іх узнікла спрэчка, у выніку адзін з тамашоўцаў залез на капот міліцэйскай машыны і памачыўся на яе. Пасля тройца парэзала ў легкавіку шыны.

Распачатая крымінальная справа за хуліганства.

Генеральнае консульства Беларусі ў Нью-Ёрку спыняе сваю працу

Па патрабаванні амерыканскага боку генеральнае консульства Беларусі ў Нью-Ёрку спыніць сваю працу 21 кастрычніка.

Грамадзяне Беларусі, якія пражываюць на тэрыторыі консульскай акругі генеральнага консульства (уключаючы Канаду), пасля закрыцця генеральнага консульства змогуць звяртацца па ўсіх пытаннях у пасольства Беларусі ў ЗША ў Вашынгтоне па адрасе 1619 New Hampshire Ave, N. W., Washington, DC, 20009.

Беларусы, раней запісаныя на асабісты прыём да 15 кастрычніка ўключна, змогуць падаць дакументы для выканання консульскіх дзеянняў. Пасля 15 кастрычніка доступ у офіс генеральнага консульства будзе немагчымы.

Прыём і апрацоўка дакументаў, накіраваных па пошце, спыняецца з 8 кастрычніка. Кансультацыі па тэлефоне будуць недаступныя пасля 8 кастрычніка.

У Нюрнбергу абмеркавалі план прызнання Лукашэнкі міжнародным тэрарыстам. Да чаго дамовіліся?

Сёння ў Нюрнбергу прайшла міжнародная канферэнцыя па злачынствах беларускага рэжыму. На ёй згадалі правапарушэнні і рэпрэсіі, якія мелі месца не толькі пасля выбараў 2020 года, але і на працягу ўсяго кіравання Лукашэнкі.

Палітыкі, члены Еўрапарламента, юрысты і іншыя эксперты з усяго свету сабраліся, каб зацвердзіць план ужыцця ўніверсальнай юрысдыкцыі і агулам усіх даступных прававых інструментаў для прыцягнення да адказнасці асоб, датычных да катаванняў беларусаў.

Чытайце далей

«Працуюць больш — атрымліваюць менш». Цімлід з Wargaming напісаў трэд аб зарплаце ў IT

Вось яго кароткія высновы:

✅Софт скілы > хард скілы.
✅Мяняць працу больш выгадна, чым расці на бягучым месцы.
✅Веданне замежнай мовы і замежнага рынку адкрывае новыя развілкі заробкаў.
✅Не ведаеш, як расці? Спытай свайго шэфа.

Больш чытайце па спасылцы.

Доктар медыцынскіх навук рэкамендавала цяжарным вакцынавацца ад кавіду

Пра гэта доктар медыцынскіх навук Людміла Макарына-Кібак заявіла ў эфіры тэлеканала СТБ.

«Каранавірус змяніўся, памаладзеў. Калі раней казалі пра тое, што цяжарныя жанчыны не захворваюць альбо захворваюць без наступстваў, то, на жаль, ёсць цяпер і хворыя, і выпадкі каранавіруса ў нованароджаных. Таму мы праводзім вялікую тлумачальную працу. Гаворым пра тое, што цяжарныя жанчыны ўсё ж такі, рыхтуючыся стаць мамамі, павінны прышчапіцца і выконваць усе прафілактычныя меры», — сказала Макарына-Кібак.

«Калектыўны імунітэт будзе сфармаваны, калі прышчэпленых будзе не менш за 60%», — сказала яна.

Міліцыя будзе правяраць выкананне масачнага рэжыму ў Мінску

Камітэт па ахове здароўя Мінгарвыканкама нагадвае, што ў Беларусі з 9 кастрычніка стала абавязковым для ўсіх нашэнне масак і прытрымліванне дыстанцыі ў грамадскіх месцах. Выкананне гэтых патрабаванняў будзе правяраць у тым ліку і міліцыя.


— Асобна сказана аб грамадскім транспарце і таксі — у гэтай норме гаворыцца толькі аб масках, але не аб дыстанцыі, — падкрэслілі ў Камітэце аховы здароўя Мінгарвыканкама.

Кіраўнікі розных аб'ектаў і арганізацый павінны забяспечыць кантроль выканання гэтых правілаў. Будзе праводзіцца маніторынг, у тым ліку з удзелам міліцыі.

— Спачатку парушальнікаў будуць проста пераконваць, а потым магчымая адказнасць, — адзначылі ў Камітэце.

Журналісту «Камсамольскай праўды ў Беларусі» Генадзю Мажэйку выставілі абвінавачванне, яму ставяць у віну два артыкулы КК: аб распальванні сацыяльнай варожасці або розні і аб абразе прадстаўніка ўлады.

Генадзь у жодзінскім СІЗА ў камеры з каранцінам па каранавірусе, яго нельга наведваць адвакатам і сваякам, таксама яму забаронена перадаваць перадачы.

Сёмая параза запар з агульным лікам 3:19

Такі журботны вынік паказвае зборная Беларусі па футболе.

Сёння падначаленыя Георгія Кандрацьева прайгралі Чэхіі ў кваліфікацыі да чэмпіянату свету з лікам 0:2, прычым беларусы не нанеслі ніводнага ўдару ў створ брамы чэхаў.

Каманда застаецца на апошнім месцы ў групе.