Кітайскі забудоўшчык Evergrande вінен $310 мільярдаў. Яго праблемы параўноўваюць з пачаткам крызісу 2008 года

Карпаратыўны доўг найбуйнейшага кітайскага забудоўшчыка Evergrande на сёння складае больш за $310 млрд, гэта як 5 гадавых беларускіх ВУП.

Свет застыў чакаючы: што будзе з праблемным кітайскім кангламератам і яго велізарнай кучай даўгоў? Ці не паўторыцца сітуацыя 2008 года, калі банкруцтва Lehman Brothers выклікала сур'ёзную глабальную рэцэсію?

Чытайце па спасылцы.

Улады Германіі расследуюць датычнасць Лукашэнкі да перавозкі нелегальных мігрантаў у ЕС

Улады Германіі расследуюць магчымае дачыненне Аляксандра Лукашэнкі да перавозкі нелегальных мігрантаў у Германію. Пра гэта паведаміла ў нядзелю газета Bild am Sonntag са спасылкай на ўласныя крыніцы.

Германскія следчыя лічаць, што «з дапамогай арганізаванай на дзяржаўным узроўні перавозкі мігрантаў» Лукашэнка нібыта «хоча шантажаваць Еўропу з мэтай зняцця санкцый» з Мінска. З пачатку жніўня гэтага года праз Беларусь у Нямеччыну (праз тэрыторыю Польшчы) нелегальна дабраліся амаль 4 тысячы замежнікаў, з іх толькі за першы тыдзень кастрычніка — 1 183. Гаворка, перш за ўсё, ідзе пра сірыйцаў і іракцаў.

Пальчысу выставілі канчатковае абвінавачванне па чатырох артыкулах

Як стала вядома праваабаронцам, палітзняволенаму блогеру Эдуарду Пальчысу выставілі канчатковае абвінавачванне па чатырох артыкулах Крымінальнага кодэкса. Меркавана, гэта ч. 1 арт. 293 КК (арганізацыя масавых беспарадкаў), ч. 1 арт. 342 КК (арганізацыя дзеянняў, якія груба парушаюць грамадскі парадак), арт. 130 КК (распальванне сацыяльнай варожасці), арт. 361 КК (заклікі да дзеянняў, накіраваных на прычыненне шкоды нацыянальнай бяспецы Рэспублікі Беларусь).

Гэта значыць, што крымінальная справа супраць палітвязня хутка апынецца ў судзе.

Нагадаем, Эдуарда затрымалі ў канцы верасня мінулага года — яму завочна прысудзілі 30 сутак арышту па арт. 23.34 КаАП. Але пасля «сутак» ён так і не выйшаў. Што канкрэтна ставяць у віну блогеру — невядома.

Gulagu.net апублікаваў апавяданне беларускага праграміста, які перадаў праваабаронцам відэа катаванняў зняволеных у Расіі

Заснавальнік расійскага праваабарончага праекта Gulagu.net Уладзімір Асечкін зрабіў невялікае інтэрв'ю з беларускім праграмістам, які перадаў яму відэазапісы катаванняў зняволеных у Расіі.

Расійскія праваабаронцы атрымалі відэа ад беларускага праграміста з імем Сяргей. Ён прыехаў у Расію і ў 2013 годзе быў затрыманы з торбай з наркотыкамі, якую перавозіў па просьбе знаёмых. У 2015 годзе Сяргея асудзілі на дзевяць гадоў. Ён адбываў пакаранне ў Саратаўскай вобласці і быў адміністратарам камер назірання ў сухотнай бальніцы. Пасля вызвалення Сяргей папрасіў палітычны прытулак у ЕС.

Праграміст заявіў, што хацеў данесці да людзей інфармацыю аб катаваннях зняволеных у Расіі.

“Гэта страшна, гэта бесчалавечна, гэта жахліва, гэта агідна”, — сказаў ён пра катаванні.

Польская памежная служба апублікавала новае відэа з мяжы: на ім бачна, як беларускія вайскоўцы ходзяць міма груп нелегальных мігрантаў, не звяртаючы на іх ніякай увагі.

«Беларускія службы дэманструюць, як прадухіляць нелегальную міграцыю», — каментуюць дзеянні калег польскія памежнікі. Палякі дадаюць, што яшчэ летась мяжа ахоўвалася сумесна, а цяпер у беларускіх афіцэраў іншыя задачы і загады.

У Мінску 17-гадовы хлопец разбіў некалькі машын

Інцыдэнт здарыўся сёння раніцай на вул. Ясеніна, дзе ў выхадныя праходзіць сельскагаспадарчы кірмаш. Малады чалавек разабраў гандлёвую палатку і, адарваўшы ад яе каркаса металічную трубу, стаў наносіць удары па прыпаркаваных аўтамабілях. Хулігана затрымалі відавочцы.

Хлопец пашкодзіў некалькі машын, гандлёвую палатку, халадзільную вітрыну. Ужо 12 уладальнікаў аўто звярнуліся ў міліцыю з заявамі. Іншыя заявы працягваюць паступаць.

Затрыманым аказаўся 17-гадовы мінчанін, навучэнец у сталічным прафесійным ліцэі. Малады чалавек патлумачыў свае дзеянні вялікай колькасцю выпітага алкаголю.

Прэзідэнта Чэхіі Земана даставілі ў рэанімацыю

Прэзідэнт Чэхіі Мілаш Земан, пра пагаршэнне стану здароўя якога апошнія дні пісалі СМІ, у нядзелю быў шпіталізаваны і змешчаны ў рэанімацыю. Гэта адбылося на наступны дзень пасля абвяшчэння вынікаў парламенцкіх выбараў, паводле якіх апазіцыя атрымала большасць у парламенце.

Земан быў перавезены ў Прагу са сваёй загараднай рэзідэнцыі на рэанімабілі. Мяркуючы па відэа, па прыездзе ў бальніцу ён быў без прытомнасці. Лекар Земана — ён жа галоўны лекар бальніцы — пацвердзіў журналістам, што прэзідэнт у рэанімацыі, аднак адмовіўся паведамляць яго дыягназ. Раней са спасылкай на крыніцы прэса пісала, што ў 77-гадовага прэзідэнта праблемы з печанню. У сярэдзіне верасня ён ужо быў шпіталізаваны, а пасля выхаду з бальніцы не паказваўся на публіцы. На выбарах ён галасаваў у сваёй рэзідэнцыі.

Земан быў шпіталізаваны адразу пасля таго, як яго наведаў прэм'ер-міністр Андрэй Бабіш, яго палітычны саюзнік.

Сёння за кратамі адзначае свой 30-гадовы юбілей Яўген Бабак, былы памочнік пракурора Першамайскага раёна Мінска.

Бабак стаў вядомы ў жніўні 2020, калі паспрабаваў прыцягнуць да адказнасці невядомых у форме ДАІ, якія па-звярынаму збівалі байкераў у ноч з 11 на 12 жніўня.

Пасля заварочвання праверкі кіраўніцтвам Бабак звольніўся "па меркаваннях сумлення". У чэрвені 2021 кватэра Бабака была разгромлена супрацоўнікамі МУС, а сам ён з'яўляецца абвінавачаным па ч.1 арт. 342.

Павіншаваць палітвязня можна адправіўшы паштоўку на адрас 200030, г. Мінск, вул. Валадарскага, 2.

Памятаеце дзіўны чайны грыб з 90-х? Цяпер ён у трэндзе ва ўсім свеце

Нядаўна чайны грыб сталі прадаваць на разліў у легендарным універсаме «Цэнтральны». Многія пасміхаліся, узгадваючы 90-я, калі слоік з ім стаяў ледзь не ў кожнай сям’і.

Але насамрэч чайны грыб набірае папулярнасць ва ўсім свеце, у Еўропе яго таксама прадаюць на разліў, а яшчэ вялікімі партыямі выпускаюць буйныя карпарацыі. І нават у дадатках кантролю фізічнай формы з’явілася камбуча — так напой называюць за мяжой.

Чытайце па спасылцы.

Міністр лясной гаспадаркі: Беларусь не экспартуе лес у выглядзе сыравіны

Беларусь не экспартуе лес у выглядзе сыравіны — толькі палетную нарыхтоўку і піламатэрыялы. Пра гэта заявіў міністр лясной гаспадаркі Віталь Дрожжа ў эфіры тэлеканала СТБ.

«Я абсалютна адказна заяўляю, што ніводнага куба драўніны з краіны не вывозіцца. Больш за тое, мы сёння гаворым пра тое, што ўжо дошка — гэта паўфабрыкат, і яго таксама не трэба вывозіць».

У цэлым, што тычыцца экспарту, то лясная гаспадарка Беларусі ўжо выкарыстала сітуацыю, калі былі высокія цэны на такі тавар, атрымаўшы максімальны заробак. Цяпер, па словах міністра, пік ужо пройдзены, адбываецца адкат па цане.

«Мы сыравіну не экспартуем, мы экспартуем палетную нарыхтоўку і піламатэрыялы», — яшчэ раз падкрэсліў Віталь Дрожжа. Экспарт дошкі да ўзроўню мінулага года (за 9 месяцаў) знізіўся на 5%. На фоне гэтага падымаецца спажыванне прадукцыі арганізацый Міністэрства лясной гаспадаркі ўнутры краіны.

Павел Дураў у дзень нараджэння назваў тры недаацэненыя і сем пераацэненых рэчаў у жыцці

У гонар свайго 37-годдзя заснавальнік Telegram склаў спіс парадаў.

Недаацэненыя:
▫️Сон — павышае імунітэт, творчыя здольнасці і псіхалагічны дабрабыт.
▫️Прырода — гэта тое асяроддзе, у якім мы па сваіх біялагічных асаблівасцях адчуваем сябе добра.
▫️Адзінота — дае свабоду для духоўнага і інтэлектуальнага прарыву.

Пераацэненыя:
▫️Вялікія гарады — гэта крыніцы забруджвання, злачыннасці і шуму. Добра мець доступ да іх рэсурсаў, але лепш жыць за іх межамі.
▫️Рэстараны — прапануюць самы павольны і найменш эфектыўны спосаб харчавання. Гатаванне ежы дома дазваляе прытрымлівацца больш здаровага харчавання і кантраляваць інгрэдыенты.
▫️Спякотнае надвор'е. Можа прывесці не толькі да стомы, але і да рызыкі захворвання на рак і больш хуткага старэння. Больш халодная тэмпература, наадварот, умацоўвае дух, цела і розум.
▫️Мода — бясконцае імкненне адпавядаць тэндэнцыям, што пастаянна змяняюцца, — дорага і не трэба.
▫️Нерухомасць — купля часта абмяжоўвае выбар і з'яўляецца сумнеўнай інвестыцыяй. Арэнда дае больш свабоды для перамяшчэння і вывучэння розных месцаў.
▫️Сацыяльныя сеткі — бесперапынны паток непатрэбнай інфармацыі загрувашчвае наш розум, негатыўна ўплывае на шчасце і крэатыўнасць. Пазбавіцца ад гэтых інтэрнэт-сэрвісаў — найлепшае, што мы можам зрабіць у любы дзень.
▫️Парады знакамітасцяў. Вядомыя людзі часта даюць неабгрунтаваныя парады, якія не адносяцца да іх кампетэнцыі. Ва ўсіх важных рэчах ў жыцці лепш спадзявацца на навуковыя дадзеныя і меркаванне экспертаў.

Некалькі дзён таму пісьменнік Алесь Аркуш паведаміў, што ў Полацку знік камень «Таварыства вольных літаратараў». Ён шмат гадоў ляжаў каля Палаты. Гэта было знакавае месца для беларускіх літаратараў.

10 кастрычніка камень вярнулі на месца. Полацкая міліцыя напярэдадні праводзіла праверку. Магчыма, нехта зразумеў, які камень вывез, і сёння прыцягнуў яго назад.

Самае папулярнае — пра сэкс па-беларуску. Пагутарылі з беларускамоўнай ціктокеркай, відэа якой збіраюць сотні тысяч праглядаў

Як у жыццё рускамоўнага біяхіміка Лізы Ветравай прыйшла беларуская мова і развярнула жыццё на 180 градусаў?

Яе відэа ў ціктоку набіраюць сотні тысяч праглядаў, а нядаўна яна стала вядучай новага беларускамоўнага трэвэл-шоу «Бусь Беларусь».

Чытайце па спасылцы

У Босніі 72-гадовы мужчына пабудаваў для жонкі дом, які круціцца, каб у яе быў разнастайны від з акна

Мужчына распавёў, што стаміўся ад скаргаў жонкі і бясконцага рамонту. «Я сказаў: «Пабудую табе дом, які верціцца, круці яго як хочаш», — дадаў ён. На поўнай хуткасці дом здзяйсняе абарот за 22 секунды.

На рэалізацыю праекта сышло шэсць гадоў. Падчас пабудовы мужчына трапіў у бальніцу з сардэчным прыступам. «Я папрасіў лекараў паспрабаваць падоўжыць маё жыццё, таму што ўвесь праект у маёй галаве, ніхто не даведаецца, як яго завяршыць», — распавёў ён.

Бо так справядліва і каб людзі не з’язджалі з вёсак. Міністр фінансаў патлумачыў, чаму ўводзяць падатак на кватэры

Пра гэта Юрый Селіверстаў распавёў у эфіры АНТ.

«Трэба зацікавіць людзей не з'язджаць з сельскай мясцовасці, жыць ва ўласным жыллі. Умовы, якія сёння ёсць для ўладальнікаў гэтай нерухомасці, розныя. Напрыклад, жывуць на тэрыторыі раённага цэнтра два школьныя настаўнікі. Адзін з іх у шматкватэрным доме. Другі жыве ў прыватным доме і плаціць падатак за зямлю прапарцыйна таму ўчастку, які займае яго домаўладанне. Можа, яно і не вельмі вялікае, але сотак 10, напэўна, займае. Плюс дом, які там на ім стаіць. Ён плаціць падатак за зямлю, плаціць падатак за нерухомасць, ды яшчэ яму трэба яго страхаваць ў абавязковым парадку.

Калі ж ён паляпшае жыллёвыя ўмовы і побач дзесьці пераязджае ў шматкватэрны дом, то зразумела, што падатак на зямлю там будзе мінімальны, таму што прыкладна такі ж участак, як гэта домаўладанне, займае дом шматпавярховы, ён расце ўверх, а не ў шырыню. І там не трэба плаціць падатак на нерухомасць, гэта льгота. Вось тут мы забяспечым разумны справядлівы падыход.

Можна, вядома, пайсці іншым шляхам. Хай падатак на нерухомасць не плацяць і ў індывідуальных дамах, але як быць з бюджэтам? І ў свеце асноўныя даходы дзяржава атрымлівае з маёмасці, якой валодаюць. Даражэйшая маёмасць — больш плаціш. Больш маёмасці — адпаведна гэтак жа», — расказаў міністр фінансаў.

СААЗ: Чалавецтва пераадолела 60% шляху ў барацьбе з каранавірусам

Але з'яўленне новых штамаў і іншыя нечаканыя перашкоды могуць значна аддаліць завяршэнне пандэміі. Пра гэта заявіла вядучая навуковая супрацоўніца Сусветнай арганізацыі аховы здароўя Сумія Свамінатан ў інтэрв'ю швейцарскаму выданню Blick.

На думку прадстаўніцы СААЗ, казаць, што пандэмія хутка завершыцца, «заўчасна».

«Для гэтага існуе шмат невядомага. ... У прыватнасці, гэта нечаканае з'яўленне новых варыянтаў віруса», — патлумачыла яна.

Свамінатан звярнула ўвагу на тое, што ў некаторых частках свету вельмі высокі адсотак вакцынаванага насельніцтва — 70-80%, тады як у іншых, напрыклад ва ўсёй Афрыцы, цалкам імунізаваных менш за 4%.

Супрацоўніца СААЗ заклікала выкарыстоўваць усе наяўныя прэпараты для павышэння ўзроўню вакцынацыі ва ўсім свеце.