Прычынай смерці бабулі і ўнучкі ў Маскве хутчэй за ўсё быў не кавун. З суседніх дамоў шпіталізавалі 10 чалавек

9 верасня ў Маскве шпіталізавалі трох членаў адной сям’і з атручэннем. Пазней бабуля і ўнучка памерлі. Першапачатковай прычынай смерці ў СМІ назвалі кавун з найбліжэйшай крамы.

З кватэры на экспертызу адправілі ўсе прадукты, а краму апячаталі. Пастаўшчык кавуноў у гандлёвую сетку адмаўляў, што іх тавар мог стаць прычынай смерці людзей.

У доме, дзе жылі памерлыя, зладзілі праверку. Спецыялісты ўзялі пробы вады і паветра, а жыхароў праверылі на кавід і забаранілі карыстацца вадой.

У наступныя дні з суседніх дамоў шпіталізавалі 10 чалавек з падобнымі сімптомамі: высокай тэмпературай, сутаргамі і прыкметамі кішэчнай інфекцыі. Ніхто з новых пацярпелых кавун не еў.

Афіцыйнай версіі масавага атручэння пакуль няма. Па адной з неафіцыйных, прычынай маглі стаць таксічныя рэчывы ў будматэрыялах — у доме ідзе капрамонт. Жыхары ж мяркуюць, што людзей шпіталізавалі з-за хімікатаў, якімі труцілі насякомых.

Мутная дабрыня: задаём пытанні дабрачыннаму фонду «Рух душы», а нас палохаюць міліцыяй

Мінчукі могуць сустрэць каля ЦУМа маладых людзей са скрыначкамі, якія збіраюць грошы на дабрачыннасць, — гэта хутчэй за ўсё валанцёры фонду «Рух душы». Ад яго імя ў кампаніі, СМІ і нават дзяржустановы прыходзяць лісты з заклікам дапамагчы хворым дзецям. Як правіла, райвыканкамы і газеты публікуюць інфармацыю ад фонду на сваіх сайтах, кампаніі арганізуюць нейкі мінімальны збор грошай.

Але ў некаторых дзейнасць «Руху душы» выклікае справядлівыя пытанні. Мы паспрабавалі знайсці адказы на іх — і ўражанне засталося неадназначнае: кіраўнік фонду паабяцаў звярнуцца ў праваахоўныя органы.

Чытайце па спасылцы

Галоўчанка: Беларусь збіраецца стварыць уласны флот

Для зніжэння выдаткаў пры перавозцы грузаў Беларусь плануе набыць ці стварыць свой грузавы флот. Пра гэта распавёў прэм'ер-міністр Раман Галоўчанка ў эфіры Беларусь-1.

«Аналізуем перспектывы набыцця або стварэння ўласнага грузавога флоту для таго, каб мінімізаваць выдаткі на фрахт», — цытуе кіраўніка беларускага ўрада РБК.

Галоўчанка дадаў, што ўлады Беларусь таксама прапрацоўваюць пытанне аб стварэнні ўласнага марскога порта. Найбольш эфектыўным беларускі ўрад лічыць яго размяшчэнне на тэрыторыі Ленінградскай вобласці, дадаў ён.

«У гэтым кірунку працуем вельмі сур'ёзна», — адзначыў прэм'ер-міністр.

«Хіт продажаў — пячоначнае печыва». Як мінчанка адкрыла хатнюю пякарню для сабак

Мінчанка Юлія Мальцава паўгады таму адкрыла хатнюю пякарню для сабак — «Morda.dog». Ёй хацелася, каб гаспадары маглі частаваць сваіх любімцаў карыснымі прысмакамі. Асартымент узгадняла Фібі — залацісты рэтрывер, а рэцэпты для распрацоўваў шэф-кухар.

Расказваем гісторыю гэтай маленькай незвычайнай пякарні.

Чытайце па спасылцы

Польскія памежнікі за выхадныя выявілі 509 спробаў незаконнага перасячэння мяжы з боку Беларусі

Сем нелегалаў былі затрыманыя: пяць грамадзян Сірыі і два — Самалі. Астатнія спробы былі сарваныя.

На літоўска-беларускай мяжы літоўскія памежнікі не прапусцілі за суткі каля 40 нелегальных мігрантаў. Прыкладна палова нелегалаў знаходзілася ля мяжы ў Лаздзіяйскім раёне (мяжуе з Беларуссю, у раёне Гродна). Аднаго замежніка ўпусцілі ў краіну з гуманітарных прычын.

ЕАБР: у Беларусі павышаныя інфляцыйныя чаканні

Аналітыкі Еўразійскага банку развіцця паведамляюць: гадавая інфляцыя ў Беларусі за жнівень (у параўнанні са жніўнем 2020 года) складае 9,8%. Такі ж узровень быў і ў ліпені.

«Рост цэн падтрымліваюць павышаныя інфляцыйныя чаканні, глабальныя затрымкі паставак, рост коштаў на харчаванне і сыравіну на сусветным рынку, – паведамляе ЕАБР. – Зніжэнне ўраджаю збожжа (на 19% па стане на 10 верасня) можа стаць дадатковым інфляцыйным фактарам да канца года. У выніку мы чакаем захавання гадавой інфляцыі каля бягучага ўзроўню аж да лістапада ўключна», — гаворыцца ў паведамленні.

ЕАБР адзначае, што ў снежні інфляцыя можа запаволіцца.

У Брэсце машына таксі пратараніла жылы дом

Учора ноччу 29-гадовы кіроўца «Крайслера» з налепкамі таксі не даў рады кіраванню на Т-абразным перакрыжаванні і ўрэзаўся ў жылы дом. Ніхто не пацярпеў, будынак і аўто атрымалі пашкоджанні.

Па знешніх прыкметах кіроўца быў нецвярозы, але ён адмовіўся ад медыцынскага агляду.

Сёння — год «карагоду» ў Брэсце. Па гэтай справе асуджаныя больш за 80 чалавек

Роўна год таму, 13 верасня 2020 года, у Брэсце падчас чарговай акцыі пратэсту дэманстранты перакрылі рух на скрыжаванні праспекта Машэрава, бульвара Касманаўтаў і бульвара Шаўчэнкі, зладзіўшы карагод. Каб іх разагнаць, прыехаў вадамёт.

Гэты карагод пацягнуў вельмі жорсткія наступствы. Была заведзена крымінальная справа па ч. 1 арт. 342 КК (актыўны ўдзел у групавых дзеяннях, якія груба парушаюць грамадскі парадак). Следчыя выявілі 115 чалавек, якія мелі дачыненне да гэтага карагоду, 108-мі з іх былі выстаўленыя абвінавачванні.

Людзей судзяць групамі, даючы ад «хатняй хіміі» да рэальных тэрмінаў. Ужо асуджана больш за 80 чалавек.

Відэа: @khliabets

8-класнік з Мастоў зрабіў 3D-мадэль свайго горада ў камп’ютарнай гульні Minecraft. Паглядзіце, як яна выглядае

Як піша «Зара над Нёманам», цяпер можна прагуляцца па віртуальных месцах Мастоў. Навучэнец 8 класа Гудзевіцкай сярэдняй школы Андрэй Солтан зрабіў мадэль беларускага горада ў папулярнай камп’ютарнай гульні Minecraft.

Маленькі, але вельмі дружны аркестр. Паглядзіце, як футбалісты «Гомеля» адзначылі забіты мяч

Футбольны «Гомель» у суботу выйграў у «Віцебска» з лікам 4:1. Адзін з забітых мячоў футбалісты адзначылі даволі арыгінальна.

«Гомель», які год таму гуляў у першай лізе, цяпер ідзе пятым у табліцы вышэйшай лігі.

Дзмітрый Баскаў выключаны з Савета дырэктараў КХЛ

Былога кіраўніка ФХБ, які трапіў пад санкцыі Міжнароднай федэрацыі хакея, няма ў складзе Савета дырэктараў Кантынентальнай хакейнай лігі. Замест яго ў Савет трапіў гендырэктар мінскага «Дынама» Сяргей Сушко.

Нагадаем, што Баскава адхілілі ад любой хакейнай дзейнасці на 5 гадоў за перавышэнне паўнамоцтваў, пераслед спартоўцаў за іх пазіцыю і магчымую датычнасць да абставінаў гібелі Рамана Бандарэнкі. Ён падаў у адстаўку з пасады кіраўніка ФХБ.