Затрымана яшчэ адна рэдактарка партала Tut.by — Галіна Уласік. Яна знаходзілася ў раёне плошчы Бангалор у адным з кафэ.

‼️ У раёне плошчы Бангалор затрымалі галоўнага рэдактара "Нашай Нівы" Ягора Марціновіча і фатографку Надзею Бужан. Іх машыну спынілі даішнікі. Ягора спачатку павялі на размову, а пасля амапавец суправадзіў яго ў аўтазак. Апошняе, што напісала Надзея: "Прынялі".

❗️Калі вы сталі сведкам затрымання нашых журналістаў у раёне Бангалора каля 15 гадзін дня, маеце фота альбо відэа, калі ласка, шліце інфармацыю і файлы ў @NashaNivaBot.

Жорсткае затрыманне маладога чалавека трапіла на відэа. Сілавікі павалілі хлопца на зямлю. Але раварысту ў выніку ўдалося вырвацца і збегчы.

Затрыманая таксама Наталля Дуліна, сябра Каардынацыйнай рады, экс-дацэнтка кафедры італьянскай мовы Мінскага дзяржаўнага лінгвістычнага ўніверсітэта.

У дварах ля плошчы Бангалор пагоня і затрыманні.

❗️Новая інфармацыя па сітуацыі з мастаком Алесем Пушкіным.

"А 2-й гадзіне ночы ў вёсцы Бобр, дзе жыве мастак, быў ператрус. Яго праводзілі ў хаце і ў майстэрні.
Прыязджалі людзі з Гарадзенскага аддзелу Следчага камітэту і пяцёра амапаўцаў. Забралі тэлефоны і тэхніку ўсіх чальцоў сям'і, у тым ліку няпоўнагадовых сына і дачкі.
У майстэрні пашкодзілі карціны, пабілі шкло", — паведамляе Беларускі фонд культурнай салідарнасці.

‼️ Галоўнае на гэты момант

Сілавікі не далі сабрацца людзям у Мінску на акцыю пратэсту. Людзей на вуліцах і ў дварах затрымлівалі прэвентыўна.

У Мінску ў раёне месца збору дэманстрантаў сістэмна затрымлівалі таксама рэпарцёраў недзяржаўных выданняў. Сярод затрыманых — рэдактары і фотарэпарцёры @nashaniva i Tut.by.

Масавыя затрыманні адбыліся сёння таксама ў Навагрудку, а ператрусы — у Салігорску, дзе яны закранулі стачкамаўцаў "Беларуськалія", а таксама ў мастака Алеся Пушкіна ў Бабры Крупскага раёна.

Сын Уладзіміра Макея, былы дыпламат, раскрытыкаваў учарашнюю заяву МЗС на адрас ЗША: «Мне сумна, што мае былыя калегі, да многіх з якіх я адчуваю шчырыя сяброўскія пачуцці, вымушаныя мірыцца з сітуацыяй, пры якой немагчыма свабодная стваральная творчасць. Вельмі хацелася б, каб у гэты задушлівы час прафесіяналы захавалі свае веды, навыкі, вопыт і маральныя арыенціры. Яны нам усім яшчэ спатрэбяцца», — напісаў ён у LinkedIn.

Міліцыя паведамляе пра больш за 100 затрыманых

Большасць — у Мінску, каля плошчы Бангалор. У тым ліку затрыманыя галоўны рэдактар "Нашай Нівы" Ягор Марціновіч, фатографка Надзея Бужан і рэпарцёрка Кацярына Карпіцкая. Затрыманыя рэдактары Tut.by Ганна Калтыгіна і Галіна Уласік.

Таксама затрыманыя жыхары Навагрудку. Паведамляецца, што яны прыйшлі на экскурсію.

Спісы шукайце тут

Наталля Дуліна на волі. Яе адпусцілі пасля праверкі дакументаў і асабістых рэчаў. У РУУС яе не забіралі, паведамляе канал Каардынацыйнай рады.

Момант затрымання нашай журналісткі Каці Карпіцкай. Яе суправаджаюць два чалавекі ў чорным. На Каці выразна бачны бэйдж "Прэса".

Фота: Tut.by

У відэа пра затрыманне чалавека з газавым пісталетам міліцыя паказала каналы, на якія ён нібыта быў падпісаны.

Сярод іх быў і наш канал, але ў МУС заблюрылі імя і прозвішча Арцёма Шрайбмана ў апублікаваным допісе.

Таксама чытачы звяртаюць увагу, што ўсе падпіскі на "забароненыя" каналы свежыя.

У Навагрудку людзі прыйшлі на экскурсію, а трапілі ў РАУС

У міліцыю забралі каля 15 чалавек.

https://nn.by/?c=ar&i=270523