Kiberxavfsizlik va ma’lumotlarni himoyalash bo‘yicha seminar tashkil etildi

2026-yil 20-may kuni Namangan viloyati statistika boshqarmasida “Milliy statistika tizimida axborot va kiberxavfsizlikni ta’minlash bo‘yicha majburiy talablar” mavzusida seminar tashkil etildi. Unda boshqarma rahbariyati, xodimlar hamda hududiy statistika bo‘limlari mutaxassislari masofaviy tarzda ishtirok etdilar.

Seminarda axborot xavfsizligini ta’minlash, xizmat faoliyatida zamonaviy axborot texnologiyalaridan xavfsiz foydalanish, ma’lumotlarni himoyalash hamda kiberxavfsizlikka oid qonunchilik hujjatlarida belgilangan talablar yuzasidan tushuntirishlar berildi.

Shuningdek, xodimlarga xizmat kompyuterlari va axborot tizimlaridan foydalanishda xavfsizlik qoidalariga qat’iy rioya etish, shubhali elektron xabarlar va zararli dasturlardan ehtiyot bo‘lish, maxfiy ma’lumotlarni himoya qilish bo‘yicha tavsiyalar berildi.

Seminar yakunida ishtirokchilar o‘zlarini qiziqtirgan savollarga mutaxassislar tomonidan batafsil javob oldilar.

Namangan davlat texnika universitetida “Karyera kuni” mehnat yarmarkasi o‘tkazildi

Joriy yilning 21-may kuni Namangan davlat texnika universitetida talaba-yoshlarning bandligini ta’minlash, ularni munosib ish o‘rinlariga yo‘naltirish hamda bitiruvchilarning kelgusidagi mehnat faoliyatiga ko‘maklashish maqsadida “Karyera kuni” mehnat yarmarkasi tashkil etildi.

Mazkur tadbir O‘zbekiston Respublikasi Prezidentining 2025-yil 14-fevraldagi “Oliy ta’lim tashkilotlari bitiruvchilarining ishga joylashishiga ko‘maklashish bo‘yicha qo‘shimcha chora-tadbirlar to‘g‘risida”gi PQ–61-son qarori ijrosini ta’minlash doirasida o‘tkazildi.

Mehnat yarmarkasida Namangan viloyati statistika boshqarmasi Inson resurslarini boshqarish bo‘yicha bosh mutaxassisi M. Asraqulov ishtirok etib, boshqarma faoliyati, mavjud vakant ish o‘rinlari hamda statistika tizimida faoliyat yuritish imkoniyatlari haqida ma’lumot berdi.

Tadbir davomida bitiruvchilar o‘zlarini qiziqtirgan savollariga mutaxassislar tomonidan batafsil javob oldilar.