မြေငလျင်ကြီးမားစွာလှုပ်ခတ်မည်ဖြစ်ကြောင်း Tiktok အကောင့်မှတစ်ဆင့် မဟုတ်မမှန် သတင်းအမှားဖြန့်ဝေခဲ့သူ John(Palmistry)အကောင့်ပိုင်ရှင် ဂျွန်မိုးသဲအား ဖမ်းဆီးရမိ

သိန္နီမြို့နယ် MNDAA မှ ဈေးဆိုင်ဗွီနိုင်းဆိုင်းဘုတ်များတွင် သျှမ်းစာကို ကန့်သတ်တားမြစ်ပြီး တရုတ်စာ ဦးစားပေးအသုံးပြုခိုင်း

သျှမ်းသံတော်ဆင့်၊ ၂၀၂၅ ဧပြီလ ၂၃ ရက်

သျှမ်းပြည် သိန္နီမြို့နယ် ဈေးဆိုင်များရှိ အသစ်ပြုလုပ်မည့် ဗွီနိုင်းဆိုင်းဘုတ်များတွင် ကိုးကန့်တပ်ဖွဲ့ MNDAA မှ သျှမ်းစာနှင့် အင်္ဂလိပ်စာ အသုံးပြုခွင့် ကန့်သတ်တားမြစ်ပြီး တရုတ်စာကို ဦးစားပေးအသုံးပြုခိုင်းနေကြောင်း စုံစမ်းသိရသည်။

ဧပြီလဆန်းပိုင်းမှ စတင်ပြီး ကိုးကန့်တပ်ဖွဲ့ MNDAA ထိန်းချုပ်ထားသည့် သိန္နီမြို့ပေါ်ရှိ ဈေးဆိုင်များတွင် အသစ်ပြုလုပ်မည့် ဗွီနိုင်းဆိုင်းဘုတ်များကို သျှမ်းစာနှင့် အင်္ဂလိပ်စာ အသုံးပြုခွင့် ကန့်သတ်တားမြစ်လိုက်ပြီး မြန်မာစာ အသုံးပြုလိုပါက တရုတ်စာလည်း ထည့်သွင်းရေးသားရမည်ဟု MNDAA အရာရှိများက ပြောဆိုကြောင်း သိန္နီဒေသခံတစ်ဦးက သျှမ်းသံတော်ဆင့်ကို ပြောသည်။

“အခု ဗွီနိုင်းအသစ် သွားလုပ်တာ၊ သျှမ်းစာနဲ့ အင်္ဂလိပ်စာပါတဲ့ ဆိုင်းဘုတ်အဟောင်းတော့ ပေးမသုံးတော့ဘူး။ အသစ်လုပ်ခိုင်းတာ၊ တရုတ်စာပါတဲ့ ဆိုင်းဘုတ်လုပ်ရမှာ။ ဗမာစာနဲ့ ဆိုင်းဘုတ်ထောင်ချင်ရင် တရုတ်စာလည်း ထည့်ရမယ်။ လာပြောတဲ့ ကိုးကန့်တရုတ်နဲ့ဆို ရန်ဖြစ်တော့မလို့၊ ဒါပေမယ့် သူတို့က သေနတ်လည်းပါတော့ ဟုတ်ကဲ့ လို့ပဲ ပြန်ပြောနိုင်တယ်”ဟု သိန္နီမြို့ ဈေးသည်တစ်ဦးက ပြောသည်။

သိန္နီမြို့နယ်တွင် ကိုးကန့်တပ်ဖွဲ့ MNDAA ကို အခွန်မျိုးစုံ ပေးဆောင်နေရသည့်အပြင် ကား၊ ဆိုင်ကယ်၊ ဈေးဆိုင်ခန်းနှင့် တပိုင်တနိုင် ဈေးသည်များမှအစ ၎င်းတို့ဖွင့်လှစ်ထားသည့် ရုံးတွင် အခွန် သွားရောက်ပေးဆောင်ရကြောင်း ဒေသခံများက ပြောဆိုသည်။

ပြီးခဲ့သည့် ဧပြီလ ၁၅ ရက်တွင် သိန္နီမြို့ ရပ်ကွက် (၁) ဈေးတန်းရပ်ရှိ ပျက်စီးသွားသည့် သိန္နီမြို့မဈေးထဲ မူလဆိုင်ခန်းနေရာတွင် ပြန်လည်ဖွင့်လှစ် ရောင်းချနေသည့် ဈေးသည်များကို ကိုးကန့်တပ်ဖွဲ့ MNDAA ရဲများက လာရောက်နှင်ထုတ်ခဲ့ပြီး ၎င်းတို့ အသစ်ဖွင့်လှစ်ထားသည့် ပန်လော့ရွာဘက်သို့ သွားရောက်ရောင်းချခိုင်းကြောင်း ဒေသခံများက ပြောသည်။

“ဧပြီလကုန် ၂၈ ရက် နောက်ဆုံးထားပြီး မြို့မဈေးထဲက ဈေးသူဈေးသားအားလုံး ဖယ်ရမယ်။ ၁၉ ရက်နေ့က ဈေးထဲ အစည်းအဝေး လုပ်ကြတာ မြို့မဈေးကို ၁၀၀ ရာခိုင်နှုန်း ဆုံးရှုံးရမယ်။ ဆိုင်ခန်းအစားထိုး ပေးမလား ဒါမှမဟုတ် လျော်ကြေးပေးမလား ရွေးချယ်စရာ နှစ်မျိုးပဲ ရှိတယ်၊ လောလောဆယ်တော့ စာတင်ထားတယ်”ဟု အစည်းအဝေး တက်ရောက်ခဲ့သည့် ဈေးသည်အမျိုးသမီးတစ်ဦးက သျှမ်းသံတော်ဆင့်ကို ပြောသည်။

သိန္နီမြို့နယ် ကိုးကန့်တပ်ထံ တရုတ်လောပန်း လုပ်ငန်းရှင်များမှ လေလံဆွဲကာ ပန်လော့ကျေးရွာဘက် အသစ်ပြန်လည်‌တည်ဆောက်ထားသည့် ဈေးသစ်သည် မြို့ထဲရှိ မြို့မဈေးနှင့် ၂ မိုင်ကျော် ကွာဝေးပြီး ပေးဆောင်ရမည့် ဈေးဆိုင်ခန်း အခွန်အခ များပြားခြင်းကြောင့် အခက်တွေ့နေကြောင်း ဈေးသည်များက ပြောသည်။

ထို့ကြောင့် စီးပွားရေး ကြပ်တည်းမှုနှင့် အလုပ်အကိုင် ရှားပါးမှုကြား ပြည်သူများ၏ တစ်ပိုင်တစ်နိုင် လုပ်ငန်းများကိုပါ အခွန်ကောက်ယူမှုအပေါ် ရပ်ဆိုင်းပေးရန် (သို့မဟုတ်) လျှော့ချပေးရန် ဒေသခံများက MNDAA ထံ တောင်းဆိုထားကြောင်း သိရသည်။

လက်ရှိတွင် သိန္နီမြို့ပေါ် လမ်းမကြီးတလျှောက်တွင် ကိုးကန့်တပ်ဖွဲ့ MNDAA မှ CCTV များ တပ်ဆင်ကာ စောင့်ကြည့်နေပြီး လောင်းကစားဝိုင်းများလည်း ဆက်လက်ဖွင့်လှစ်ထားကြောင်း ဒေသခံများက ပြောဆိုသည်။

သိန္နီမြို့သည် သျှမ်းပြည်မြောက်ပိုင်းရှိ စော်ဘွားနယ်များအနက် ခေတ်အဆက်ဆက် သျှမ်းစော်ဘွားများ အုပ်ချုပ်ခဲ့သည့် နယ်ကြီးတစ်ခု ဖြစ်ခဲ့ပြီး ရှေးယခင်ကတည်းက မြန်မာနှင့် တရုတ်အကြား ကုန်သွယ်ရေးလမ်းကြောင်းပေါ်တွင် အရေးပါခဲ့သည်။

“၁၀၂၇ စစ်ဆင်ရေး” ပထမပိုင်း စကတည်းက ၂၀၂၃ အောက်တိုဘာ လကုန်ပိုင်းတွင် သိန္နီမြို့ကို ကိုးကန့်တပ်ဖွဲ့ MNDAA က သိမ်းပိုက်ထိန်းချုပ်ထားပြီး လားရှိုးမြို့နှင့် မိုင် ၃၀ ခန့်သာ ကွာဝေးသည်။

ပုံစာ - သိန္နီမြို့မဈေးနှင့် MNDAA အသစ်တည်ဆောက်ထားသည့် ပန်လော့ရွာ ဈေးသစ်