المتعدد || 𝗠𝘂𝗹𝘁𝗶𝗽𝗹𝗲

السلام عليكم ورحمه الله وبركاته.
انا حُلم عادل ، طالبة طب بشري جامعة ٢١ سبتمبر في سنتي الأولى.

طبعاً كــ خريجي ثانوية يستعدون لاختبارات القبول تعتبر هذي فترة مهمة جداً في حياتكم ولازم تستغلوها بأفضل الطرق ، عشان تحصلوا على نتائج إيجابية وتكون النتيجة قبولكم إن شاء الله🌼.

نبدأ نتكلم على جانب المذاكرة ، وكيف نذاكر ، ومن فين نذاكر ، وايش نعتمد من ملازم ، وكيف نقسم وقتنا ونقدر نكمل المنهج مع مراجعته قبل الاختبار؟!!!..

كل هذي الأسئلة مثل ما بتتسائلوا عنها احنا تسائلنا عليها من قبلكم كثيير ، وبكلمكم عن تجربتي الشخصية و إن شاء الله تستفيدوا منها.

🌼 اولا : واهم شي واساس نجاح كل عمل التوكل على رب العالمين،وتقوية علاقتنا بالله، ونثق انو مهما كان اختيار الله لنا هو الأفضل ونرضى باختياره.

بالنسبة للمذاكرة كتجربة شخصية مريت بها ما انصح ابدا بملازم وبعاسيس وألف ملزمة ويجي لك اكتئاب ماقدرت تخلصها او متوسعه كثير ووووو ، انصح بكتب المنهج فقط ، وممكن ملزمة سلسلة الإبداع حلوة في الكيمياء لانو مادرسنا مواضيع مهمة في الكيمياء اول وثاني ثانوي لذلك استفدت خيرات منها، وممكن ملزمة الأستاذ طلال الشوافي في الكيمياء فقط هذولا الي اعتمدتهم في مذاكرتي الى جانب كتب المنهج (هذا في الأحياء و الكيمياء).

بالنسبة للأنجليزي انصح بكتاب جرامر ان يوز فخم جدا ، ويشرح كل شيء بأسلوب جميل وسهل.

واهممم شي في المذاكرة النماذج ، النماذج ، النماذج ، ممكن تطلعوا علي النماذج كمان في سلسلة الإبداع مجمعين نماذج كثثير واستفدت قوي منهن ، اخذت حق سنه٢٠٢٠و ٢٠٢١ و ٢٠٢٢+بالإضافة الى النماذج الي تقدروا تحصلوا عليهن من التيليجرام .

بالنسبة لأوقات المذاكرة كل شخص وما يناسبه ، بس بشكل عام كنت ما اجلس طول الوقت فوق مادة ، كنت احدد لي مثلا من اول ثانوي كيمياء وحدة كاملة وجنبها وحدة احياء من ثالث ثانوي وهكذاا ...

لانو بعض الاشخاص مثلي يملوا ما يقدروا يواصلوا على نفس المادة لأوقات طويلة ، هذي طريقة فعالة بالنسبة لي وانجزت كثير لما اتبعتها.

🌼 ثانياً: بصراحة ايام ماكنت اذاكر للقبول كنت ادور نصائح من الناحية النفسية قبل المذاكرة لان نفسيتك وانت بتذاكر شيء مهم جدا وتؤثر على الإنجاز ، وعلى استيعابك للمواضيع اللي بتذاكرها ، فَـ نصيحتي لكم -كما ذكرت من قبل- توكلوا على الله وارضوا بكل ما كتبه لكم حتى لو ما حصلتوا على الشي الي تشتوه ، يعني انت تعبت واجتهدت اكيد رب العالمين ما بيضيع حقك ، واذا اختار لك غير رغبتك فأكيد هو أعلم منك ، واعلم بما يناسبك، حتماً وضعك في المكان المناسب.

من تجربتي طبعاً اختبرت بـ ٣ جامعات الي هي صنعاء و ذمار و٢١ سبتمبر.

اختبرت في جامعة صنعاء وطلعت ٨٦ وبيني وبين اخر مقبول درجتين فقط تخيلوا اجي ابسر اسمي في الكشف كان ترتيبي ١٥٧ قبلي ٦ طلاب فقط والفرق بيننا فواصل ، كانت صدمة كبيرة لي واكتأبت🥲💔، بعدين اختبرت صيدلة في صنعاء وطلعت من أوائل المقبولين تقريباً السابعة، حرفيا رضيت بما كتبه لي الله وقلت خلاص باقي معي فرصتين ذمار و ٢١ سبتمبر اذا ماانقبلت برضى بما اختاره لي الله وبادرس صيدلة ، اختبىت في ذمار وما انقبلت ، بعدين رحت جامعة صنعاء اسجل التسجيل الأولي في كلية الصيدلة واليوم الثاني معي اختبار البشري في ٢١ سبتمبر.

طبعاً دخلت الامتحان بكل هدوء ورضى انو خلاص متوكلة على ارحم الراحمين سواء انقبلت هنا او لا مش فارقة معي دام هذا اختيار الله.

الناس كلهم يراجعوا من حولي وكل من يجمع له معلومة من هانا ولا من هانا وانا ولا حتى جبت معي كتاب اراجع منه🌚،ولا راجعت حرف ، دخلنا كنت هادئة بشكل استغربت من نفسي يعني انا اتوتر جدا في الاختبارات،اختبرت وظللت وخرجت وعاد باقي وقت كثير ، ولا كنت حاطه ببالي اني با انقبل.

بعد يوم او يومين ما اذكر ، يجي لي اتصال من رقم غريب ، طبعا انا اكنسل المكالمة طوالي اذا هي من رقم غريب🫠، ذيك اليوم جاء لي فضول قلت يمكن من جامعة صنعاء عشان التسجيل وكذا.

رديت على المكالمة ويقل لي المتصل انتِ حلم عادل، قلت ايوة ،قال انقبلتي في كلية الطب البشري جامعة ٢١ سبتمبر ، انا تجمدت هذيك الساعة من الصدمة غلقت لاوجهه 🌚💔فرحةة ان الواحد يوصل للشيء الي بيحلم فيه يعني الله يذوقكم هذي الفرحة حرفيا نسيت كل التعب الي تعبته والسهر والجعجعة ومن نموذج لانموذج وندور الحل الصح .........،بالأخير سحبت ملفي من صنعاء وسجلت طب بشري في جامعة ٢١ سبتمبر ، والحمدلله الي اكرمني ودخلت المجال الي هو حلمي ، وان شاء الله ربي ما بيضيع جهدكم وبتوصلوا لأهدافكم ، شدوا الهمة وتوكلوا على الله وابشروا بكل خير🤍🤍.

بالأخير ، نقلق ونفكر اكثر من اللازم ورب العالمين كاتب كل خير لك حتى لو ماشفته خير ، توكلوا على الله ، ذاكروا ، اجتهدوا ، وربي ما بيضيع اجر احد .

وماهو مكتوب لك عيجي لك.

اتمنى تكونوا استفدتوا من تجربتي ، موفقين🌼🤍.

#المتعدد_Multiple
#إختبارات_القبول
#تجربة_كل_يوم
#طلبة_٢١سبتمبر
😍🔥😍🔥📌

❤4

136 views18:03