በማዘጋጃ ቤታዊ አገልግሎት ስታንዳርዳይዜሽን ማዘመን ዙሪያ የአሰልጣኞች ስልጠና ተሰጠ
አዳማ፣ጥቅምት 27/2016 ዓ.ም፣(ከ.መ.ልሚ.)
ከሁሉም ክልል ከተሞች ለተውጣጡ አመራሮችና ባለሙያዎች በማዘጋጃ ቤታዊ አገልግሎት ስታንዳርዳይዜሽን ማዘመን ዙሪያ የአሰልጣኞች ስልጠና ተሰጠ፡፡
የስልጠና መድረኩን በይፋ የከፈቱት በከተማና መሠረተ-ልማት ሚኒስቴር በከተማ አመራር፣ ፋይናንስ አገልግሎት መሪ ስራ አስፈጻሚ የሆኑት አቶ ደሳለኝ ገመቹ የስልጠናውን ዓላማ አስመልክተው እንደተናገሩት በሁሉም የሀገሪቱ ከተሞች በየደረጃው የሚገኙ አመራሮችና ባለሙያዎች ዜጎች የሚያነሷቸውን የመልካም አስተዳደር ችግሮች ለመፍታት ዘመኑ የሚጠይቀውን ቴክኖሎጂ ተጠቅመው ፈጣንና ቀልጣፋ አገልግሎት ለመስጠት በቂ እውቀትና ግንዛቤ ስለሚያስፈልጋቸው ስልጠናውን መስጠት አስፈልጓል ብለዋል፡፡
አቶ ደሳለኝ አክለውም ዜጎች በመልካም አስተዳደር በተደጋጋሚ የሚያነሷቸውን ቅሬታዎች ለመፍታት ሚኒስቴር መ/ቤቱ የሚያወርዳቸውን ሁሉንም የህግ ማዕቀፎችና ስታንዳርዶችን ሳይሸራረፉ ሥራ ላይ እንዲውሉ ተከታታይ ሰልጠናዎች እንደሚሰጡና አመራሮችና ባለሙያዎችም ለተግባራዊነታቸው የበኩላቸውን ድርሻ እንዲወጡ አደራ ብለዋል፡፡
በሌላ በኩል የማዘጋጃ ቤታዊ አገልግሎት ስታንዳርዳይዜሽን ዴስክ ኃላፊ የሆኑት አቶ ተስፋዬ ታረቀኝ ስለስታንዳርዳይዜሽን እንዳብራሩት ዜጎች በማዘጋጃ ቤታዊ አገልግሎት የሚፈልጓቸውን ዘርፈ-ብዙ ፍላጎቶች ለመመለስ ዘመኑ የሚጠይቀውን ቴክኖሎጂ በመጠቀም ፈጣን፣ ቀልጣፋ፣ ግልጽነት፣ ቅንነት፣ ውጤታማና ተደራሽ የሆነ ተገልጋዩን የሚያረካ አገልግሎት ለመስጠት ሰልጣኞች ስለ ስታንዳርዳይዜሽን አጠቃላይ ምንነት፣ ባህሪያትና ጽንሰ-ሀሳብ በቂ የሆነ ግንዛቤ ሊኖራቸው ይገባል ብለዋል፡፡
ዜጎች በከተሞች የሚፈልጓቸውን አገልግሎቶች ለማግኘት ማሟላት የሚገባቸውን ነገሮች ሁሉ በግልጽ እንዲያገኙ የመረጃ መንገዶችንና አማራጮች ላይ በቂ ግንዛቤ እንደኖራቸው አስቀድሞ ማስታወቅ እንደሚገባ አቶ ተስፋዬ ለሠልጣኞች አስገንዝበዋል፡፡
በዚህ የአሰልጣኞች ስልጠና መድረክ የተለያዩ ባለሙያዎች በተለያዩ ሰነዶች ዙሪያ ስልጠና እንደሚሠጡ በመርሃ ግብሩ ተመልክቷል፡፡
ሪፖርተር፡-ሞገስ ዓሊ
የፎቶ ግራፍ ባለሙያ፡-አስመላሽ ተፈራ