အေလာလေဆိပ် တိုက်ခိုက်ခံရပြီးနောက် လုံခြုံရေးတိုးမြှင့်ထား

ဧရာဝတီ၊ နိုဝင်ဘာ ၆၊ ၂၀၂၄

နေပြည်တော်ကောင်စီနယ်မြေရှိ အေလာလေဆိပ်အား နိုဝင်ဘာ ၅ ရက် နံနက်တွင် ဒရုန်း ၃ စင်းဖြင့် တိုက်ခိုက်မှုဖြစ်ပွားပြီးနောက် လုံခြုံရေးများ တိုးမြှင့်ထားကြောင်း စစ်ကောင်စီက ယမန်နေ့ညက ထုတ်ပြန်သည်။

တရုတ်နိုင်ငံ၊ ယူနန်ပြည်နယ် ကူမင်းမြို့တွင် ကျင်းပမည့် အဋ္ဌမအကြိမ်မြောက် မဟာမဲခေါင်ဒေသခွဲ ထိပ်သီးအစည်းအဝေး (GMS) သို့ တက်ရောက်ရန် ယမန်နေ့ နံနက် စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် နေပြည်တော် အေလာလေဆိပ်မှ ထွက်ခွာခဲ့ပြီးနောက် နံနက် ၈ နာရီ ဝန်းကျင်တွင် ဒရုန်း ၃ စင်းဖြင့် တိုက်ခိုက်ခံရခြင်း ဖြစ်သည်။

Fixed Wing ဒရုန်း ၃ စင်းဖြင့် လာရောက် တိုက်ခိုက်သည်ကို လေကြောင်းရန်ကာကွယ်ရေးစနစ်များဖြင့် ကြိုတင် ထောက် လှမ်းသိရှိခဲ့ရပြီး ပစ်ချခဲ့ရာ လယ်ဝေးမြို့နယ်၊ ကြောင်ရေရွာအနီး ၁ စင်း၊ ကြံခင်းစုရွာအနီး ၁ စင်းနှင့် နနွင်းအိုင်ကျေးရွာအနီး ၁ စင်းတို့အား ဗုံးသီးများနှင့်အတူ ရှာဖွေတွေ့ရှိ သိမ်းဆည်းနိုင်ခဲ့ကာ နည်းပညာအကူအညီနှင့် စတင် ပစ်လွှတ်သည့်နေရာ များဖော်ထုတ်နိုင်ခဲ့သလို အဆိုပါ နေရာများကို လုံခြုံရေးတပ်ဖွဲ့ဝင်များ လျင်မြန်စွာ တုံ့ပြန်ဆောင်ရွက်နိုင်ခဲ့ကြောင်း စစ်ကောင်စီက ဆိုထားသည်။

အေလာလေဆိပ်ကို ပြီးခဲ့သည့် ဧပြီနှင့် ဇူလိုင်လအတွင်းကလည်း PDF အထူးတပ်ဖွဲ့များက မောင်းသူမဲ့ ဒရုန်း အစင်း ၃၀ နီးပါးဖြင့် တိုက်ခိုက်ခဲ့သလို ရှော့တိုက်ဒုံးများနှင့် ပစ်ခတ်တိုက်ခိုက်ခြင်းများ ပြုလုပ်ထားပြီး ယခု တိုက်ခိုက်မှုအား မည်သည့် အဖွဲ့က လုပ်ဆောင်သည်ကိုမူ ယနေ့ထိ ထုတ်ပြန်ခြင်း မရှိသေးပေ။

ဓာတ်ပုံ- CINCDS

#WhatsHappeningInMyanmar
#RejectMilitaryCoup
စာဖတ်သူများ၏ ပံ့ပိုးမှုက ပြည်သူများ လိုအပ်နေသည့် အကောင်းဆုံး နှင့် အရည်အသွေးမီ သတင်းများကို ဖော်ပြစေနိုင်မည်။ Support The Irrawaddy: https://bit.ly/3btQYpR

ကျဆင်းနေသည့် စိုက်ပျိုးရေးတွင် ရင်းနှီးမြှုပ်နှံရန် တရုတ်ကို စစ်ကောင်စီဖိတ်ခေါ်

ဧရာဝတီ၊ နိုဝင်ဘာ ၆၊ ၂၀၂၄

စစ်တပ်အာဏာသိမ်းမှုကြောင့် ကျဆင်းနေသည့် စိုက်ပျိုးရေးကဏ္ဍအား တရုတ်ရင်းနှီးမြှုပ်နှံမှုများ လာရောက်ကြရန် အာဏာသိမ်း စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က တရုတ်ပြည်သူ့သမ္မတနိုင်ငံ၊ ကူမင်းမြို့၊ HUALUXE Kunming Hotel၌ ပြုလုပ်သော တရုတ်-မြန်မာ ရင်းနှီးမြှုပ်နှံမှုနှင့် စီးပွားရေးလုပ်ငန်းရှင်များ တွေ့ဆုံပွဲတွင် ပြောသည်။

မြန်မာနိုင်ငံ၌ စိုက်ပျိုးရေးလုပ်ငန်းအတွက် ရာသီဥတုကောင်းမွန်မှုနှင့် မြေအကျယ်အဝန်းရှိပြီး အရှေ့တောင် အာရှ ဒေသတွင် ဟက်တာ ၆၅ သန်းကျော်ရှိသော လယ်ယာမြေ အများဆုံးပိုင်ဆိုင်သည့် နိုင်ငံဖြစ်ကာ စိုက်ပျိုးမြေ ၂၀ ရာခိုင်နှုန်းကျော်သာ စိုက်ပျိုးနိုင်သေးသောကြောင့် ရင်းနှီးမြှုပ်နှံလိုသူများအနေဖြင့် အခွင့်လမ်းကောင်းများ ဖြစ်ကြောင်း စစ်ခေါင်းဆောင်က ဆိုသည်။

တရုတ်နိုင်ငံအနေဖြင့်လည်း စိုက်ပျိုးရေးကဏ္ဍတွင် အဆင့်မြင့် နည်းပညာနှင့် ဇီဝနည်းပညာသုံး စိုက်ပျိုးရေး နည်းစနစ်ကို အောင်မြင်စွာ အသုံးပြုနေသဖြင့် ရင်းနှီးမြှုပ်နှံမှုမှတဆင့် နည်းပညာလွှဲပြောင်း ရယူရေး၊ ဒေသနှင့် ကိုက်ညီသည့် စိုက်ပျိုးရေး ထုတ်ကုန်နှင့် အစားအစာ ဘေးကင်းလုံခြုံမှု ဂေဟစနစ်ရေရှည်ထိန်းသိမ်းထားနိုင်သော ထုတ်ကုန်များ ထုတ်လုပ်ရေးတို့ကို ပူးပေါင်း ဆောင်ရွက်လိုသည်ဟု စစ်ခေါင်းဆောင်က ပြောသည်။

စိုက်ပျိုးရေးကဏ္ဍ၌ ဓာတ်မြေဩဇာထုတ်လုပ်ရေး၊ သဘာဝမြေဩဇာထုတ်လုပ်ရေး၊ အပင်အားဆေးနှင့် ပိုးသတ်ဆေး လိုအပ်ချက်များရှိနေသဖြင့် ယင်းကဏ္ဍတွင် ရင်းနှီးမြှုပ်နှံရန်နှင့် စက်မှုလယ်ယာကဏ္ဍကို အရှိန်အဟုန် မြှင့်တင်နိုင်မည့် ထွန်ယက်ခြင်း၊ စိုက်ပျိုးခြင်း၊ ခြွေလှေ့ခြင်း၊ သိုလှောင်ခြင်းတို့အတွက် ခေတ်မီစက်ကိရိယာများ၊ သိုလှောင်ရုံများ ရင်းနှီးမြှုပ်နှံရန်လည်း ဖိတ်ခေါ်ခဲ့ကြောင်းသိရသည်။

စစ်တပ်အာဏာသိမ်းပြီးနောက် မြန်မာနိုင်ငံတွင် ဒေသတွင်း မတည်ငြိမ်မှုများကြောင့် စိုက်ပျိုးထုတ်လုပ်မှု လျော့ကျနေသလို စိုက်ပျိုးနိုင်သည့် လယ်သမားမှာလည်း စစ်ဘေးရှောင်နေရပြီး စစ်ကောင်စီ၏ စစ်သားစုဆောင်းမှုများကြောင့် လူငယ်လူရွယ်များ ပြည်ပထွက်ခွာမှု များနေသဖြင့် လုပ်သား ရှားပါးမှုနှင့် ရင်ဆိုင်နေရသည်။

ပုံစာ-နိုဝင်ဘာ ၅ ရက်က တရုတ်နိုင်ငံ ကူမင်းမြို့၌ တရုတ်လုပ်ငန်းရှင်များနှင့် တွေ့ဆုံစဉ်/ MOI

#WhatsHappeningInMyanmar
#RejectMilitaryCoup
စာဖတ်သူများ၏ ပံ့ပိုးမှုက ပြည်သူများ လိုအပ်နေသည့် အကောင်းဆုံး နှင့် အရည်အသွေးမီ သတင်းများကို ဖော်ပြစေနိုင်မည်။
Support The Irrawaddy: https://bit.ly/3btQYpR

စစ်ခေါင်းဆောင်က ကမ္ဘောဒီးယား၊ လာအိုဝန်ကြီးချုပ်တို့နှင့် တွေ့ပြီး မြန်မာ့အရေး ရှင်းပြ

ဧရာဝတီ၊ နိုဝင်ဘာ ၆၊ ၂၀၂၄

တရုတ်နိုင်ငံ၊ ကူမင်းမြို့သို့ ရောက်ရှိနေသော အာဏာသိမ်း စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်သည် အဋ္ဌမအကြိမ်မြောက် မဟာမဲခေါင်ဒေသခွဲထိပ်သီးအစည်းအဝေးသို့ တက်ရောက်ရန် ရောက်ရှိနေသော ကမ္ဘောဒီးယားနှင့် လာအိုနိုင်ငံ ဝန်ကြီးချုပ်တို့ကို ယနေ့ နံနက်ပိုင်းတွင် တွေ့ဆုံ၍ မြန်မာ့နိုင်ငံရေး အခြေအနေများ ရှင်းပြခဲ့ကြောင်း သိရသည်။

စစ်ကောင်စီ ထုတ်ပြန်ချက်အရ စစ်ခေါင်းဆောင်သည် ကမ္ဘောဒီးယားနိုင်ငံဝန်ကြီးချုပ် H.E. Mr. Hun Manet နှင့် အဖွဲ့ဝင်များကို Green Lake ဟိုတယ်၌လည်းကောင်း၊ လာအိုနိုင်ငံဝန်ကြီးချုပ် H.E. Mr. Sonexay Siphandone နှင့် အဖွဲ့ဝင်များအား HUALUXE Kunming ဟိုတယ်၌လည်းကောင်း သီးခြားစီတွေ့ဆုံခဲ့ခြင်းဖြစ်ကြောင်း သိရသည်။

ထိုသို့တွေ့ဆုံစဥ် မြန်မာ့နိုင်ငံရေး ဖြစ်ပေါ် ပြောင်းလဲမှု အခြေအနေများ၊ လွတ်လပ်ပြီးတရားမျှတသည့် ပါတီစုံဒီမိုကရေစီ ရွေးကောက်ပွဲတရပ်ကျင်းပနိုင်ရေး ဆောင်ရွက်သည့်အခြေအနေများနှင့် အာဆီယံအတွင်းဆောင်ရွက်နေမှု၊ အာဆီယံ အစည်းဝေးများတွင် မြန်မာပါဝင်မှု စသည်တို့ကို ရှင်းလင်းပြောဆိုခဲ့သည်။

ထို့ပြင် မြန်မာနိုင်ငံတွင် ဖြစ်ပေါ်နေမှုများနှင့် ပတ်သက်၍ ငြိမ်းချမ်းစွာ ဖြေရှင်းနိုင်ရန် လိုအပ်သည့် အခြေအနေများ၊ ကမ္ဘောဒီးယားနှင့် လာအိုနိုင်ငံ ဝန်ကြီးချုပ်များက ကူညီဆောင်ရွက်မည့် အခြေအနေများ၊ သံတမန်ဆက်ဆံရေးဆိုင်ရာ၊ ကုန်သွယ်ရေးနှင့် ရင်းနှီးမြှုပ်နှံမှု၊ ခရီးသွားကဏ္ဍ စသည်တို့ကို ဆွေးနွေးခဲ့ကြောင်းလည်း ထုတ်ပြန်ချက်၌ ဖော်ပြထားသည်။

စစ်ခေါင်းဆောင်က လွတ်လပ်ပြီးတရားမျှတသည့် ပါတီစုံဒီမိုကရေစီ ရွေးကောက်ပွဲတရပ်ကျင်းပနိုင်ရေး ပြောဆိုနေသော်လည်း နိုင်ငံတဝန်း တိုက်ပွဲများကြောင့် မြို့နယ်အများစု၌ တည်ငြိမ်မှုမရှိသလို အဓိက အတိုက်အခံပါတီကြီးများဖြစ်သော အမျိုးသားဒီမိုကရေစီအဖွဲ့ချုပ် (NLD) နှင့် ရှမ်းတိုင်းရင်းသားများဒီမိုကရေစီအဖွဲ့ချုပ် (SNLD) ပါတီတို့ အပါအဝင် တော်လှန်ရေးအင်အားစုများက စစ်ကောင်စီ ဦးဆောင်မည့် ရွေးကောက်ပွဲကို ဆန့်ကျင်ထားသည်။

ဓာတ်ပုံ - CINCDS

#WhatsHappeningInMyanmar
#RejectMilitaryCoup

စာဖတ်သူများ၏ ပံ့ပိုးမှုက ပြည်သူများ လိုအပ်နေသည့် အကောင်းဆုံး နှင့် အရည်အသွေးမီ သတင်းများကို ဖော်ပြစေနိုင်မည်။
Support The Irrawaddy: https://bit.ly/3btQYpR

မြန်မာ့ရိုးရာအတာသင်္ကြန် ယူနက်စကိုပဏာမစာရင်းတွင် ပါဝင်

ဧရာဝတီ၊ နိုဝင်ဘာ ၇၊ ၂၀၂၄

ကုလသမဂ္ဂ ပညာရေး၊ သိပ္ပံနှင့် ယဉ်ကျေးမှုအဖွဲ့ (UNESCO) ၏ ဒြပ်မဲ့ယဉ်ကျေးမှုအမွေအနှစ် - Intangible Cultural Heritage (ICH) ပဏာမစာရင်းတွင် မြန်မာ့ရိုးရာအတာသင်္ကြန်ပွဲတော် ပါဝင်လာကြောင်း သိရသည်။

အဆိုပါ ပဏာမစာရင်းဝင်များကို ဒီဇင်ဘာ ၂ ရက်မှ ၇ ရက်အထိ ပါရာဂွေးနိုင်ငံ၊ အာဆွန်စီယွန်မြို့၌ ကျင်းပပြုလုပ်မည့် ၁၉ ကြိမ်မြောက် ကမ္ဘာ့ဒြပ်မဲ့ယဉ်ကျေးမှုအမွေအနှစ်ညီလာခံတွင် တရားဝင် ဆုံးဖြတ်မည်ဖြစ်သည်။

ယခုလို ယူနက်စကို၏ ICH ပဏာမစာရင်းတွင် မြန်မာ့ရိုးရာအတာသင်္ကြန်ပွဲတော် ပါဝင်လာခြင်းသည် ကမ္ဘာ့ဒြပ်မဲ့ယဉ်ကျေးမှုစာရင်းဝင်ရန် သေချာသလောက်ရှိနေကြောင်း ရှေးဟောင်းသုတေသနပညာရှင်များက သုံးသပ်ထားသည်။

မြန်မာ့ရိုးရာအတာသင်္ကြန်ကို ကမ္ဘာ့ဒြပ်မဲ့ယဉ်ကျေးမှုအမွေအနှစ်အဖြစ် အသိအမှတ်ပြုရန် စစ်ကောင်စီက ၂၀၂၃ ခုနှစ် မတ်လ၌ ယူနက်စကိုသို့ တင်ပြထားခြင်း ဖြစ်သည်။

ထိုင်းနိုင်ငံတွင်လည်း နှစ်စဥ်ဧပြီလတိုင်း ကျင်းပလေ့ရှိသည့် ဆုန်ခရန် (သင်္ကြန်ပွဲ) ကို ကမ္ဘာ့ဒြပ်မဲ့ယဉ်ကျေးမှုအမွေအနှစ် အဖြစ် ၂၀၂၃ ဒီဇင်ဘာ ၆ ရက်၌ ယူနက်စကိုက သတ်မှတ်ထားသည်။

#WhatsHappeningInMyanmar
#RejectMilitaryCoup
The Irrawady

တိုင်းရင်းသားများ ဆင်းရဲဒုက္ခမျိုးစုံ ခံစားနေရ၍ တွေ့ဆုံဆွေးနွေးအဖြေရှာရန် စစ်ခေါင်းဆောင်ပြော

ဧရာဝတီ၊ နိုဝင်ဘာ ၇၊ ၂၀၂၄

နိုင်ငံအတွင်း ကြုံနေရသည့် သဘောထားကွဲလွဲမှုများကို လက်နက်စွဲကိုင်ပြီး တိုက်ပွဲများ၊ အကြမ်းဖက်မှုများဖြင့် ဖြေရှင်းနေကြခြင်းကြောင့် ဒေသခံတိုင်းရင်းသားပြည်သူများ ဆင်းရဲဒုက္ခမျိုးစုံ ခံစားနေရခြင်းဖြစ်ရာ တွေ့ဆုံဆွေးနွေးညှိနှိုင်းပြီး အဖြေရှာခြင်းနည်းလမ်းဖြင့် ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) လမ်းကြောင်းအတိုင်း ဆောင်ရွက်နိုင်ရေး သက်ဆိုင်သူများအား တိုက်တွန်းလိုသည်ဟု စစ်ခေါင်းဆောင်က ပြောသည်။

ယနေ့ ကျရောက်သည့် ၆၉ နှစ်မြောက် ကရင်ပြည်နယ်နေ့ အခမ်းအနားသို့ ပေးပို့သော သဝဏ်လွှာ၌ ထိုသို့ ထည့်သွင်းပြောဆိုသည်။

နိုင်ငံနှင့်လူမျိုးအပေါ် ကျရောက်လာမည့် မည်သည့်အခက်အခဲ အကျပ်အတည်း၊ စိန်ခေါ်မှုမျိုးကိုမဆို တိုင်းရင်းသား ပြည်သူများနှင့်အတူ ရင်ဆိုင်ကျော်လွှားနိုင်မည်ဟု ယုံကြည်ကြောင်း၊ တည်ငြိမ်အေးချမ်းရေးကို မလိုလားသည့် နိုင်ငံတော်အစိုးရဆန့်ကျင်လျက်ရှိသော အကြမ်းဖက်အဖွဲ့များ၏ သွေးထိုးလှုံ့ဆော်မှု၊ ဖျက်ဆီးမှုအန္တရာယ်များကို တွန်းလှန်ချေမှုန်းလျက်ရှိရာ ပြည်သူများ ပူးပေါင်းပါဝင်ဆောင်ရွက်ပေးကြရန်လည်း စစ်ခေါင်းဆောင်က ဆိုသည်။

၁၉၅၁ ခုနှစ် ဖွဲ့စည်းအုပ်ချုပ်ပုံအခြေခံဥပဒေ ပြင်ဆင်ချက်ဥပဒေကို အတည်ပြုပြဋ္ဌာန်းခဲ့သည့် ၁၉၅၅ ခုနှစ် နိုဝင်ဘာ ၇ ရက်ကို ကရင်ပြည်နယ်နေ့အဖြစ် သတ်မှတ်ပြီး ယခင် ခရိုင် ၄ ခုနှင့်မြို့နယ် ၇ ဖြင့် ဖွဲ့စည်းထားသော ကရင်ပြည်နယ်ကို ၎င်းတို့တာဝန်ယူပြီးနောက် နိုင်ငံရေး၊ စီးပွားရေး၊ လူမှုရေးဖွံ့ဖြိုးတိုးတက်မှုများ ပိုမိုထိရောက်စွာ ဆောင်ရွက်နိုင်စေရန် ရည်ရွယ်၍ ကြာအင်းဆိပ်ကြီး နှင့် သံတောင်ကြီးမြို့နယ်တို့ကို ခရိုင်အဆင့်တိုးမြှင့်ဖွဲ့စည်းထားပြီး ဖြစ်သည်ဟုလည်း စစ်ခေါင်းဆောင်က ဆိုသည်။

၁၉၅၂ ခုနှစ် ကရင်ပြည်နယ် တိုးချဲ့သတ်မှတ်ရေး အက်ဥပဒေအမှတ် ၁၄ အရ သံလွင်ခရိုင်နှင့် ဆက်စပ်ဒေသများဖြစ်သည့် ကြာအင်းဆိပ်ကြီး၊ ကော့ကရိတ်၊ လှိုင်းဘွဲ့၊ ဘားအံနှင့် သံတောင်ကြီးမြို့နယ်တို့ကို ဒုတိယအဆင့် တိုးချဲ့သတ်မှတ်ခဲ့ပြီး ၆ မြို့နယ်ဖြင့်လည်းကောင်း၊ ၁၉၆၀ မတ်လ ၁ ရက်တွင် မြဝတီမြို့အား မြို့နယ်သတ်မှတ်ခဲ့၍ စုစုပေါင်း ၇ မြို့နယ်လည်းကောင်း အဆင့်ဆင့်ပြောင်းလဲဖွဲ့စည်းခဲ့သည်ဟု စစ်ခါင်းဆောင်က ပြောသည်။

စစ်အာဏာရှင်များက သတ်မှတ်ပေးခဲ့သည့် ကရင်ပြည်နယ်နေ့ကို ကရင်လူထုက အသိအမှတ်မပြုလက်မခံကြသလို ကရင်တော်လှန်ရေးအဖွဲ့အစည်းများအနေဖြင့် တန်းတူအခွင့်အရေးရရှိရန် ကိုယ်ပိုင်အုပ်ချုပ်ခွင့်ရရှိရန် တော်လှန် တိုက်ပွဲဝင်နေသည်မှာ နှစ်ပေါင်း ၇၀ ကျော်တိုင်နေပြီဖြစ်သည်။

ကရင်အမျိုးသားအစည်းအရုံး (KNU) အနေဖြင့် ၎င်းတို့ထိန်းချုပ်နယ်မြေ၌ စစ်ကောင်စီကိုရန်သူအဖြစ်သတ်မှတ်၍ ပြတ်ပြတ်သားသား တိုက်ခိုက်ရှင်းလင်းသွားမည်ဟု KNU အထွေထွေ အတွင်းရေးမှူး ပဒိုစောတာဒိုမူးက နိုဝင်ဘာ ၅ ရက် သတင်းစာရှင်းလင်းပွဲတွင် ပြောကြားခဲ့သည်။

ပုံစာ -NCA လက်မှတ်ထိုးခဲ့သည့် ကရင်တိုင်းရင်းသားခေါင်းဆောင်များနှင့် စစ်ခေါင်းဆောင်တို့ ၂၀၂၃ ခုနှစ်က တွေ့ဆုံခဲ့စဉ်/ MOI
#WhatsHappeningInMyanmar
#RejectMilitaryCoup
စာဖတ်သူများ၏ ပံ့ပိုးမှုက ပြည်သူများ လိုအပ်နေသည့် အကောင်းဆုံး နှင့် အရည်အသွေးမီ သတင်းများကို ဖော်ပြစေနိုင်မည်။ Support The Irrawaddy: https://bit.ly/3btQYpR

စစ်ကောင်စီသံအမတ်ခန့်အပ်လွှာ ရုရှားသမ္မတ လက်ခံ

ဧရာဝတီ၊ နိုဝင်ဘာ ၇၊ ၂၀၂၄

စစ်ကောင်စီ ခန့်အပ်ထားသည့် ရုရှားနိုင်ငံဆိုင်ရာ သံအမတ် ဦးသစ်လင်းအုန်း၏ ခန့်အပ်လွှာအား ကရင်မလင်နန်းတော်၌ ရုရှားသမ္မတ မစ္စတာ ဗလာဒီမာ ဗလာဒီမီရိုဗစ်ချ် ပူတင်ထံ ပေးအပ်ခဲ့ကြောင်း နိုင်ငံခြားရေးဝန်ကြီးဌာနက ယနေ့ ထုတ်ပြန်သည်။

သံအမတ် ဦးသစ်လင်းအုန်းကို စစ်ကောင်စီက ပြီးခဲ့သည့်နှစ် ဒီဇင်ဘာတွင် ကမ္ဘောဒီးယားနိုင်ငံ သံအမတ်မှ ရုရှားနိုင်ငံသံအမတ်အဖြစ် ပြောင်းလဲခန့်အပ်ခဲ့ခြင်း ဖြစ်သည်။

ဦးသစ်လင်းအုန်းသည် စစ်တက္ကသိုလ် (DSA) အပတ်စဉ် ၂၅ ဆင်းဖြစ်ပြီး တပ်မတော်ဆေးတက္ကသိုလ် ကျောင်းအုပ်ကြီးအဖြစ်မှ အငြိမ်းစားယူခဲ့ပြီးနောက် နိုင်ငံခြားရေးဝန်ကြီးဌာနသို့ ကူးပြောင်းခဲ့ကာ ဦးသိန်းစိန် အစိုးရလက်ထက် ၂၀၁၄ တွင် တရုတ်နိုင်ငံဆိုင်ရာသံအမတ်အဖြစ် ခန့်အပ်ခံရသည်။

ထို့နောက် ၂၀၁၉ အမျိုးသားဒီမိုကရေစီအဖွဲ့ချုပ် NLD အစိုးရလက်ထက်တွင် ကမ္ဘောဒီးယားနိုင်ငံ သံအမတ်အဖြစ် ပြောင်းလဲခန့်အပ်ခြင်းခံခဲ့ရသည်။

ဓာတ်ပုံ - MOFA

#WhatsHappeningInMyanmar
#RejectMilitaryCoup

စာဖတ်သူများ၏ ပံ့ပိုးမှုက ပြည်သူများ လိုအပ်နေသည့် အကောင်းဆုံး နှင့် အရည်အသွေးမီ သတင်းများကို ဖော်ပြစေနိုင်မည်။
Support The Irrawaddy: https://bit.ly/3btQYpR

ရွှေရောင်းဝယ်လုပ်ငန်းလိုင်စင်လျှောက်ရန် စစ်ကောင်စီ သတိပေး

ဧရာဝတီ၊ နိုဝင်ဘာ ၇၊ ၂၀၂၄

ဓာတ်သတ္တု (ရွှေ) ရောင်းဝယ်ခြင်းလုပ်ငန်းကို အရေးကြီးဝန်ဆောင်မှုအဖြစ် ပြီးခဲ့သည့် အောက်တိုဘာ ၂၅ ရက်က စစ်ကောင်စီ ကြေညာပြီးနောက်ပိုင်း ယခုလ ၁၈ ရက်မှစတင်၍ တိုင်းသို့မဟုတ် ပြည်နယ် ကနဦး စိစစ်ရေးအဖွဲ့ အတွင်းရေးမှူးရုံးများတွင် လိုင်စင်လျှောက်ထားရန် ယနေ့ အသိပေးထားသည်။

ထို့ပြင် ဓာတ်သတ္တု (ရွှေ) ရောင်းဝယ်ခြင်းလုပ်ငန်းလုပ်ကိုင်ဆောင်ရွက်ရာတွင် လိုင်စင် လျှောက်ထားရယူရန်နှင့် သတ်မှတ်ထားသော စည်းကမ်းချက်များကို မလိုက်နာလျှင် အရေးကြီး ကုန်စည်ဝန်ဆောင်မှုဥပဒေ ပုဒ်မ ၅ ဖြင့် အရေးယူမည်ဟုလည်း ဖော်ပြထားသည်။

ရွှေလုပ်ငန်းရှင်တဦးက “လိုင်စင်တွေက များနေပြီး တခုပြီးတခု လုပ်နေရတာ။ ဒါပေမယ့် သူတို့ (စကစ) တင်ခိုင်းရင် တော့ တင်ရမှာပေါ့။ မတင်ထားရင်လည်း သူတို့ အရေးယူချင် ယူလို့ရတာလေ။ ရွှေဈေးကတော့ အခု YGEA ကပဲထုတ်နေတာ။ စစ်ကောင်စီကတော့ မလာသေးဘူး။ ဘယ်ကနေ ကြေညာမလဲဆိုတာလည်း မသိရသေးဘူး။ စစ်ကောင်စီ ပြဋ္ဌာန်းတဲ့အတိုင်း တိတိကျကျသာ လုပ်ရင်တော့ ရွှေဈေးကွက်မှာ အရောင်းအဝယ် အဆင်ပြေတော့မှာ မဟုတ်ဘူး။ ကမ္ဘာ့ရွှေဈေးက အချိန်နဲ့အမျှ ပြောင်းနေတာ” ဟု ဧရာဝတီသို့ ပြောသည်။


ပြီးခဲ့သည့် နှစ်အတွင်းကလည်း အဖိုးတန်သတ္တု လိုင်စင်မရှိဟုဆိုကာ ရွှေဆိုင် ၅ ဆိုင်အား ၆လခန့် ရောင်းဝယ်ခွင့် ပိတ်ခဲ့ကြောင်း ၎င်းက ဆိုသည်။


ထို့ပြင် နိုဝင်ဘာ ၂ ရက်တွင် ရန်ကုန်တိုင်း ရွှေလုပ်ငန်းရှင်များအသင်း (YGEA)၊ မန္တလေး ရွှေလုပ်ငန်းရှင်များအသင်း၊ မြန်မာနိုင်ငံ ရွှေလုပ်ငန်းရှင်များအသင်းချုပ်တို့ တွေ့ဆုံပြီး ရွှေဈေးကွက်အတွင်း လုပ်ကိုင်ရခက်ခဲသည့် ကိစ္စရပ်များအား စစ်ကောင်စီထံ တင်ပြရန် စီစဉ်နေကြောင်း သိရသည်။


လက်ရှိ ရွှေဈေးကွက်မှာ အရောင်းအဝယ်ပါးနေပြီး အကယ်ဒမီအခေါက် ရွှေ တကျပ်သားလျှင် ကျပ် ၆၂ သိန်းကျော်၊ ၆၃ သိန်းကျပ်ဝန်းကျင်၌ရှိနေကာ YGEA သတ်မှတ်ဈေးမှာ တကျပ်သား ကျပ် ၅၅ သိန်းကျော်တွင် ရှိနေသည်။

ဓာတ်ပုံ- ဧရာဝတီ

#WhatsHappeningInMyanmar
#RejectMilitaryCoup
စာဖတ်သူများ၏ ပံ့ပိုးမှုက ပြည်သူများ လိုအပ်နေသည့် အကောင်းဆုံး နှင့် အရည်အသွေးမီ သတင်းများကို ဖော်ပြစေနိုင်မည်။ Support The Irrawaddy: https://bit.ly/3btQYpR

မြန်မာ၌ ဆန်းသစ်တီထွင်မှုများ လုပ်ဆောင်နေဟု စစ်ခေါင်းဆောင်ပြော

ဧရာဝတီ၊ နိုဝင်ဘာ ၇၊ ၂၀၂၄

မြန်မာနိုင်ငံတွင် အမျိုးသားသိပ္ပံ၊ နည်းပညာနှင့် ဆန်းသစ်တီထွင်မှုကောင်စီကို ဖွဲ့စည်းထားပြီး ဆန်းသစ်တီထွင်မှုဆိုင်ရာလုပ်ငန်းများ ဆောင်ရွက်လျက်ရှိကြောင်း တရုတ်နိုင်ငံ၊ ကူမင်းမြို့၌ ယနေ့ နောက်ဆုံးကျင်းပသည့် မဟာမဲခေါင်ဒေသခွဲ (GMS) ၏ “ဆန်းသစ်တီထွင်မှုဖော်ဆောင်ခြင်းဖြင့် ဖွံ့ဖြိုးတိုးတက်ရေး” ခေါင်းစဉ်ဖြင့် ဆွေးနွေးရာ စစ်ခေါင်း ဆောင်က ပြောဆိုသည်။

ဖွံ့ဖြိုးတိုးတက်ရန်အတွက် ဆန်းသစ်တီထွင်မှုကို အခြေခံပြီးဆောင်ရွက်ရာတွင် အုပ်ချုပ်မှု၊ လူ့စွမ်းအားအရင်းအမြစ်၊ သုတေသနနှင့်ဖွံ့ဖြိုးတိုးတက်မှု၊ ပူးပေါင်းဆောင်ရွက်မှု၊ ရန်ပုံငွေစသည်တို့ကို အလေးထားဆောင်ရွက်ရမည်ဖြစ်ကြောင်း၊ မြန်မာနိုင်ငံအနေဖြင့်လည်း ယင်းအချက်များကို အခြေခံပြီး အမျိုးသားအဆင့် သိပ္ပံ၊ နည်းပညာနှင့် ဆန်းသစ် တီထွင်မှုလမ်းပြမြေပုံ (၂၀၂၅-၂၀၃၀) အပြီး သတ်နိုင်ရေး လုပ်ဆောင်နေကြောင်း စစ်ခေါင်းဆောင်က ဆိုသည်။

၎င်းက “တချိန်တည်းမှာပဲ တီထွင်ဆန်းသစ်မှုများဟာ မိမိနိုင်ငံရဲ့ ရေမြေသဘာဝ၊ ပထဝီအနေအထားတွေနဲ့ ကိုက်ညီဖို့လိုတဲ့အပြင် အစိုးရ၊ ဖွံ့ဖြိုးမှုမိတ်ဖက်များ၊ ပုဂ္ဂလိကနဲ့ ဒေသန္တရအစိုးရများ၊ အသိပညာရှင် အတတ်ပညာရှင်တွေ၊ စွန့်ဦးတီထွင်သူတွေနဲ့ စီးပွားရေးလုပ်ငန်းရှင်များကပါ ဝိုင်းဝန်းပူးပေါင်းဆောင်ရွက်ကြရမှာ ဖြစ်ပါတယ်” ဟု ဆိုသည်။

ဆန်းသစ်တီထွင်မှုကို ဖော်ဆောင်ရာတွင် နိုင်ငံများအကြား ပူးပေါင်းဆောင်ရွက်ခြင်း၊ နည်းပညာများလက်ခံကျင့်သုံးမှု တိုးမြင့်လာစေခြင်းတို့ဖြင့် မဲခေါင်ဒေသတွင်း ဆန်းသစ်သော ကုန်စည် စီးဆင်းမှုလွယ်ကူချောမွေ့ လာစေမည်ဖြစ်ကာ စိုက်ပျိုးရေး၊ ခရီးသွားလုပ်ငန်း၊ ကုန်သွယ်မှုနှင့် ရင်းနှီးမြှုပ်နှံမှုကဏ္ဍတို့ကို ဦးစားပေးဆောင်ရွက်လျှင် သင့်တော်ကြောင်း စစ်ခေါင်းဆောင်က ပြောဆိုသည်။

လက်ရှိ မြန်မာနိုင်ငံအနှံ့ စစ်ပွဲများကြောင့် မြို့/ရွာများ မီးလောင်ပျက်စီး၍ တောင်သူများစစ်ရှောင်နေရကာ မစိုက်ပျိုးနိုင်တော့သဖြင့် စိုက်ပျိုးရေးထွက်ကုန်များ ကျဆင်းနိုင်ကြောင်း ခန့်မှန်းပြောဆိုကြသလို၊ လူငယ်လူရွယ်အများစုမှာ ပြည်ပထွက်အလုပ် လုပ်ကိုင်ခြင်း၊ လက်နက်ကိုင်တော်လှန်နေကြခြင်းတို့အပြင် တိုက်ပွဲများကြောင့် နယ်စပ်ကုန်သွယ်ရေး ရပ်တန့်လုနီးပါးဖြစ်နေပြီး ရင်းနှီးမြှုပ်နှံမှုများလည်း ကျဆင်းလျက်ရှိသည်။

ဓာတ်ပုံ- CINCDS
#WhatsHappeningInMyanmar
#RejectMilitaryCoup
စာဖတ်သူများ၏ ပံ့ပိုးမှုက ပြည်သူများ လိုအပ်နေသည့် အကောင်းဆုံး နှင့် အရည်အသွေးမီ သတင်းများကို ဖော်ပြစေနိုင်မည်။
Support The Irrawaddy: https://bit.ly/supporttheirrawaddy

တရုတ်ရှိ အဆင့်မြင့်ဒရုန်းစက်ရုံကို စစ်ခေါင်းဆောင် လေ့လာ

ဧရာဝတီ၊ နိုဝင်ဘာ ၉၊ ၂၀၂၄

တရုတ်နိုင်ငံ၊ ကူမင်းမြို့သို့ ရောက်ရှိနေသည့် စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်သည် ယနေ့ နိုဝင်ဘာ ၈ ရက်တွင် ချုံချင့်မြို့ရှိ စက်ရုံ၊ အလုပ်ရုံများကို သွားရောက်ခဲ့ပြီး အဆင့်မြင့်ဒရုန်းများကို လေ့လာခဲ့ကြောင်း သတင်းထုတ်ပြန်သည်။

ချုံချင့်မြို့ရှိ Zhongyue Aviation UAV Firefignting-Drone Co.Ltd. ကုမ္ပဏီမှ ထုတ်လုပ်ထားသည့် လူမှုကယ်ဆယ်ရေး လုပ်ငန်းများတွင် အသုံးပြုသော အဆင့်မြင့်ဒရုန်းများကို ကြည့်ရှုခဲ့ပြီး အထပ်မြင့်အဆောက်အဦများ၊ တောမီး လောင်ကျွမ်းမှုများနှင့် အခြားသဘာဝဘေးကယ်ဆယ်ရေးလုပ်ငန်းတို့တွင် ဒရုန်းများအသုံးပြု၍ ပြုလုပ်ပုံ အဆင့်ဆင့်နှင့် ဒရုန်းဖြင့်မီးငြှိမ်းသတ်မှုအား လက်တွေ့ သရုပ်ပြသခဲ့သည်။

အဆင့်မြင့်နည်းပညာများကို အသုံးပြု၍ လူသားအကျိုးပြုဒရုန်းများ တီထွင်ထုတ်လုပ်မှုနှင့် ဘေးအန္တရာယ်ကယ်ဆယ်ရေး လုပ်ငန်းများ ဆောင်ရွက်နိုင်ခဲ့မှုအား ချီးကျူးဂုဏ်ပြုခဲ့ကြောင်း စစ်ခေါင်းဆောင်က ဆိုသည်။

ထို့ပြင် SERES မော်တော်ကားကုမ္ပဏီမှ ထုတ်လုပ်လျက်ရှိသည့် ကားအမျိုးအစားများကို ပြကွက်တခုချင်းစီအလိုက်၊ ကားအမျိုးအစားအလိုက်အချက်အလက်များနှင့် စက်ရုံအတွင်း ကားထုတ်လုပ်နေမှုအဆင့်ဆင့်တို့ကိုလည်း လိုက်လံ ကြည့်ရှုခဲ့ကြောင်း သိရသည်။

Chongqing International Logistics Hub Park ၌ တရုတ်-ဥရောပ-အနောက်နိုင်ငံတို့ကြား ကုန်စည်စီးဆင်းလျက်ရှိသည့် ကုန်းလမ်း၊ ရေလမ်း လမ်းပြမြေပုံ၊ ချုံချင့်မြို့၏ ဖွံ့ဖြိုးတိုးတက်မှုသမိုင်း၊ ယန်စီမြစ်ပေါ်ရှိ ကုန်စည်စီးဆင်းမှုဆိပ်ကမ်းများနှင့် လမ်းပန်းဆက်သွယ်ရေးနှင့် မြို့ပြပုံစံငယ်တို့ကိုလည်း ကြည့်ရှုခဲ့ကြောင်း သိရသည်။

ဓာတ်ပုံ- MRTV

#WhatsHappeningInMyanmar
#RejectMilitaryCoup

စာဖတ်သူများ၏ ပံ့ပိုးမှုက ပြည်သူများ လိုအပ်နေသည့် အကောင်းဆုံး နှင့် အရည်အသွေးမီ သတင်းများကို ဖော်ပြစေနိုင်မည်။
Support The Irrawaddy: https://bit.ly/supporttheirrawaddy

ဟိုပန်တွင် ပြည်သူ့စစ်ဖွဲ့ရန် UWSA ညွှန်ကြား

ဧရာဝတီ၊ နိုဝင်ဘာ ၁၀၊ ၂၀၂၄

“ဝ" ပြည် သွေးစည်း ညီညွတ်ရေး တပ်မတော် (UWSA) ထိန်းချုပ်ထားသော ရှမ်းပြည်နယ် မြောက်ပိုင်း၊ ဟိုပန်မြို့တွင် ရပ်ရွာလုံခြုံရေးအတွက်ဟုဆိုကာ ပြည်သူ့စစ်များဖွဲ့စည်းရန် ညွှန်ကြားလိုက်ကြောင်း ဒေသခံများက ဆိုသည်။

"ရပ်ရွာလူကြီးတွေကို ခေါ်တွေ့တယ်၊ ရပ်ရွာလုံခြုံရေးအတွက်လို့ ပြောတာပဲ။ ၁၀ အိမ်မှာ အနည်းဆုံး ၃ ယောက်လောက် သွားရတယ်” ဟု ဒေသခံတဦးက ဆိုသည်။

ပြည်သူ့စစ်ဖွဲ့ရန် အသက် ၁၈ နှစ်မှ ၄၀ နှစ်အတွင်း စာရင်းကောက်ခံလျက်ရှိပြီး လူငယ်များကို အဓိကထားကောက်ခံနေကြောင်း၊ ရပ်ကွက်တခုနှင့်တခု ကောက်ခံရာတွင်လည်း ပုံစံမတူကြောင်း သိရသည်။

"တချို့ရွာတွေကို ၂ ယောက်လောက်ပဲ ကောက်တယ်။ တချို့ကျတော့လည်း ၁၅ ယောက်ကနေ ၂၅ ယောက်ထိ ကောက်တယ်” ဟု ဒေသခံ အမျိုသားတဦးက ဆိုသည်။

မိသားစုဝင်တဦးဦးသည် ဝ ပြည်နယ်၏ အစိုးရလက်အောက်၌ တာဝန်ထမ်းဆောင်သူဖြစ်ပါက ပြည်သူ့စစ်အဖြစ် ကောက်ယူမှုမှကင်းလွတ်ခွင့်ရှိကြောင်း ၎င်းက ထပ်မံပြောသည်။

ထို့အတူ တန့်ယန်း၊ မိုင်းယော်နှင့် မိုင်းကျက်တို့၌လည်း အောက်တိုဘာ၊ နိုဝင်ဘာလတို့တွင် "ဝ" တပ်၏ တပ်သားသစ် ကောက်ခံသည့် သတင်းများ ထွက်ပေါ်လျက်ရှိသည်။

သတင်း- “ခေါက်တွေတိုက်”
ပုံစာ- UWSA တပ်ဖွဲ့ဝင်များ/ ဧရာဝတီ
#WhatsHappeningInMyanmar
#RejectMilitaryCoup
စာဖတ်သူများ၏ ပံ့ပိုးမှုက ပြည်သူများ လိုအပ်နေသည့် အကောင်းဆုံး နှင့် အရည်အသွေးမီ သတင်းများကို ဖော်ပြစေနိုင်မည်။
Support The Irrawaddy: https://bit.ly/supporttheirrawaddy

NUG ပတ်စပို့စ်သက်တမ်းတိုးပေးခြင်း တရားမဝင်ဟု စစ်ကောင်စီ ကြေညာ

ဧရာဝတီ၊ နိုဝင်ဘာ ၁၀၊ ၂၀၂၄

တောင်ကိုရီးယားနိုင်ငံရောက် မြန်မာနိုင်ငံသားများ၏ နိုင်ငံကူးလက်မှတ်များကို အမျိုးသား ညီညွတ်ရေးအစိုးရ (NUG) ကိုယ်စားလှယ်ရုံးမှ သက်တမ်းတိုးပေးနေချိန်တွင် ဆိုးလ်မြို့ရှိ စစ်ကောင်စီ မြန်မာသံရုံးက တရားမဝင်ဟုဆိုကာ ယမန်နေ့၌ ထုတ်ပြန်သည်။

ထိုသို့ ထုတ်ပြန်ရာတွင် တောင်ကိုရီးယားနိုင်ငံသို့ ရောက်ရှိနေသော မြန်မာနိုင်ငံသားများအနေဖြင့် နိုင်ငံကူးလက်မှတ်များကို တရားမဝင်တံဆိပ်တုံး အတုအပဖြင့် သက်တမ်းတိုးခြင်းများ လုပ်ဆောင်နေကြောင်းတွေ့ရှိရသည့်အတွက် မြန်မာသံရုံးက ယင်းနိုင်ငံကူးလက်မှတ်များကို ဖျက်သိမ်းခြင်းနှင့် အမည်မည်းစာရင်းရေးသွင်းခြင်းများ ဆောင်ရွက်ခဲ့ကြောင်း၊ တရားမဝင် တံဆိပ်တုံး အတုအပပြုလုပ်ပြီး နိုင်ငံကူးလက်မှတ်များကို သက်တမ်းတိုးနေသူများအား အိမ်ရှင်နိုင်ငံ၏ တရားဥပဒေအရ အရေးယူဟန့်တားနိုင်ရေး လုပ်ဆောင်နေသည်ဟု ထည့်သွင်းဖော်ပြထားသည်။

တောင်ကိုရီးယားနိုင်ငံသို့ရောက်ရှိနေသာ မြန်မာနိုင်ငံသားများအနေဖြင့် နိုင်ငံကူးလက်မှတ်ကိုင်ဆောင် အသုံးပြုခြင်းဆိုင်ရာ စည်းကမ်းများကို ဖောက် ဖျက်ခြင်းကြောင့် မိခင်နိုင်ငံနှင့် အိမ်ရှင်နိုင်ငံ၏ ဥပဒေအရ အရေးယူခံရနိုင်သည်ဟု အောက်တိုဘာ ၁၅ ရက်တွင်လည်း စစ်ကောင်စီက ပထမအကြိမ် ထုတ်ပြန်ခဲ့သေးသည်။

ထိုသို့ ထုတ်ပြန်အသိပေးထားသော်လည်း မြန်မာနိုင်ငံသားများအနေဖြင့် နိုင်ငံကူးလက်မှတ်သက်တမ်းတိုးခြင်းများကို NUG ကိုယ်စားလှယ်ရုံး၌ သာ သွားရောက် လုပ်ကိုင်နေကြဆဲဟု သိရသည်။

NUG တောင်ကိုရီးယားကိုယ်စားလှယ်ရုံးက နိုင်ငံကူးလက်မှတ် သက်တမ်းတိုးခြင်းများအတွက် အခွန်နှင့် ငွေကြေး ကောက်ခံခြင်းမရှိဘဲ သက်တမ်း ၂ နှစ် တိုးပေးနေကြောင်း၊ NUG ကိုယ်စားလှယ်ရုံးမှ နိုင်ငံကူးလက်မှတ် သက်တမ်းတိုးပေးမှု လုပ်ဆောင်နေခြင်းကို တောင်ကိုရီးယားအစိုးရကလည်း အသိအမှတ်ပြုကာ တရားဝင်လက်ခံထားကြောင်း ကိုရီးယားရောက် မြန်မာများထံက သိရသည်။

ပုံစာ- ယခုနှစ် မေလအတွင်းက NUG နိုင်ငံခြားရေးဝန်ကြီး ဒေါ်ဇင်မာအောင်နှင့် စီမံကိန်း၊ ဘဏ္ဍာရေးနှင့် ရင်းနှီးမြှုပ်နှံမှု ဝန်ကြီး ဦးတင်ထွန်းနိုင်တို့ ကိုရီးယားလွှတ်တော်အမတ်များနှင့် တွေ့ဆုံခဲ့စဉ်/ NUG ကိုယ်စားလှယ်ရုံး

#WhatsHappeningInMyanmar
#RejectMilitaryCoup
စာဖတ်သူများ၏ ပံ့ပိုးမှုက ပြည်သူများ လိုအပ်နေသည့် အကောင်းဆုံး နှင့် အရည်အသွေးမီ သတင်းများကို ဖော်ပြစေနိုင်မည်။
Support The Irrawaddy: https://bit.ly/supporttheirrawaddy

မနေ့က နပခဌာနချုပ်ကို ဂျက်ဖိုက်တာ ၃ စီးနဲ့ လေကြောင်းတိုက်ခိုက်မှု အပြင်းအထန်လုပ်ပြီးတော့ Y12 အပါအဝင် ရဟတ်ယာဉ်တွေနဲ့ ရိက္ခာ၊ စစ်ကူတွေကို ချပေးတယ်။ AA က ပြန်လည်ပစ်ခတ်တာ ရဟတ်ယာဉ် ၁ စီးက မီးခိုးတွေထွက်ပြီးတော့ သူပျံတာ ဒရုန်းလောက်တောင် မမြန်တော့ဘူး။ မကွေးဘက်ကို ထိုးကျသွားတာ တွေ့လိုက်တယ်

Website တွင် ဖတ်ရန် https://bit.ly/3Cq5CQ3
#WhatsHappeningInMyanmar
---------------------
စာဖတ်သူများ၏ ပံ့ပိုးမှုက ပြည်သူများ လိုအပ်နေသည့် အကောင်းဆုံး နှင့် အရည်အသွေးမီ သတင်းများကို ဖော်ပြစေနိုင်မည်။
Support The Irrawaddy: https://bit.ly/supporttheirrawaddy

တိုင်းရင်းသားဘက်ကလည်း ထိန်းထားတာပဲရှိတာ၊ အဝင်/အထွက်ကို ပေးလုပ်တယ်။ ဆက်ကြေးတော့ ကောက်တာပေါ့။ ဒါကြောင့်လည်း စကစက အော်တာပေါ့။ အခုလည်း တရုတ်က လူမြင်မကောင်းလို့ အပေါက်ရွှေ့တဲ့ သဘောပဲ။ ဒီဘက်ကျတော့ မြင်နေတာပေါ့။ တရုတ်က လူပါးဝတာပဲ ခံနေရတာ။ သူတို့ဆီက ပစ္စည်း ထုတ်တာ လူမမြင်စေချင်လို့ လုပ်တာ။ သူတို့ (တရုတ်) လိုချင်တဲ့ ကျောက်၊ သစ်၊ သတ္တုတို့ဆို အကုန်ဖွင့်တယ်

Website တွင် ဖတ်ရန် https://bit.ly/4fFyv9c
#WhatsHappeningInMyanmar
---------------------
စာဖတ်သူများ၏ ပံ့ပိုးမှုက ပြည်သူများ လိုအပ်နေသည့် အကောင်းဆုံး နှင့် အရည်အသွေးမီ သတင်းများကို ဖော်ပြစေနိုင်မည်။
Support The Irrawaddy: https://bit.ly/supporttheirrawaddy

ဖားကန့် မြေစာပုံပြိုကျပြီး ရေမဆေး ကျောက်ရှာသူ ၄၀ ကျော် ပျောက်ဆုံး

ဧရာဝတီ၊ နိုဝင်ဘာ ၁၂၊ ၂၀၂၄

ကချင်ပြည်နယ်၊ ဖားကန့်မြို့ မှော်စီစာကျေးရွာရှိ တင်အောင်ကြိုင် ကျောက်တူးဖော်ရေးလုပ်ကွက်၌ နိုဝင်ဘာလ ၁၀ ရက် ည ၁၂ နာရီဝန်းကျင်တွင် မြေစာပုံ ပြိုကျရာ မြေစာပစ်နေသည့် ကုမ္ပဏီကားနှစ်စီး၊ ဝန်ထမ်းတချို့နှင့် ရေမဆေးကျောက် ရှာဖွေသူ ၄၀ နီးပါး ပျောက်ဆုံးနေကြောင်း ဒေသခံများထံက သိရသည်။

ဖားကန့်ဒေသခံ တဦးက “ကုမ္ပဏီက ကားနှစ်စီးနဲ့ ကားသမား နှစ်ယောက်ရယ် ပါသွားတယ်။ ရေမဆေးရှာတဲ့သူတွေလည်း ပျောက်နေတယ်။ လူ ၄၀ လောက်ပျောက်နေတယ်။ လူမှုကူညီကယ်ဆယ်ရေးအသင်းတွေကို အဝင်မခံလို့ ဝင်လို့မရဘူးဗျ။ အခုကတော့ အလောင်းပေါ်အောင် စောင့်နေတဲ့ သဘောရှိတယ်”ဟု ဧရာဝတီသို့ ပြောသည်။

အဆိုပါ လုပ်ကွက်ပြိုကျမှုကို သက်ဆိုင်ရာ လုပ်ကွက်ဘက်မှ တာဝန်ရှိသူများကသာ လုပ်ဆောင်မည့် သဘောရှိပြီး လတ်တလောအထိ လူမှုကူညီကယ်ဆယ်ရေး အသင်းအဖွဲ့များကို ဝင်ခွင့်မပေးကြောင်း၊ ဖားကန့်မြို့၏ ကျောက်မျက်တူးဖော်ရေး လုပ်ကွက်များကို အမျိုးသားဒီမိုကရေစီအဖွဲ့ချုပ် (NLD)အစိုးရလက်ထက် ၂၀၁၉ ခုနှစ်နောက်ပိုင်းမှ စပြီး လုပ်ကွက်ချပေးခြင်း မရှိတော့သဖြင့် သက်တမ်းကုန်သည့် လုပ်ကွက်များကို ဆက်လုပ်နေခြင်း ဖြစ်ကြောင်း ဒေသခံများထံက သိရသည်။

စစ်တပ်အာဏာသိမ်းပြီးနောက်ပိုင်း ဖားကန့်မြို့ရှိ ကျောက်မျက်တူးဖော်ရေး လုပ်ကွက်များကို စစ်တပ်၊ KIA တို့နှင့် လုပ်ငန်းရှင်များက ရှယ်ယာ ခွဲဝေ၍ တူးဖော်ခြင်း၊ ပိုက်ဆံပေးလုပ်ခြင်းများကြောင့် တရားမဝင် ခိုးတူးများသာရှိကြောင်း အမည်မဖော်လိုသည့် လုပ်ငန်းရှင်တဦးက ပြောသည်။

၎င်းက “အခုနောက်ပိုင်းက သူဌေးနာမည်မခံတော့ဘူး။ စစ်တပ်နဲ့ ပေါင်းတူးရင် စစ်ထွက် တယောက်ယောက်ကို နာမည် ခံခိုင်းတယ်။ KIA နဲ့ ရှယ်ပြီး တူးရင် ကချင်တယောက်ယောက်ကို နာမည်ခံခိုင်းပြီးတူးကြတယ်။ အဲဒီလိုမျိုးလုပ်တယ်။ သူဌေးတွေကတော့ နောက်ကွယ်ကနေပဲ ပံ့ပိုးပြီး ကြိုးကိုင်ကြတယ်”ဟု ရှင်းပြသည်။

လက်ရှိ ဖားကန့်မြို့ကို ကချင်လွတ်လပ်ရေးတပ်မတော် (KIA) မှ ၉၀ ရာခိုင်နှုန်း ထိန်းချုပ်ထားပြီး တပ်မကုန်းနှင့် ဖားကန့်မြို့ပေါ်သာ ကျန်ရှိတော့ကြောင်း ဒေသခံများထံက သိရသည်။

ပုံစာ-၂၀၂၃ ဩဂုတ်လ ၁၃ ရက်က ဖားကန့် အေးမြသာယာအုပ်စု မနမှော်တွင် မြေပြိုကျမှုမြင်ကွင်း/ CJ

#WhatsHappeningInMyanmar
#RejectMilitaryCoup

စာဖတ်သူများ၏ ပံ့ပိုးမှုက ပြည်သူများ လိုအပ်နေသည့် အကောင်းဆုံး နှင့် အရည်အသွေးမီ သတင်းများကို ဖော်ပြစေနိုင်မည်။
Support The Irrawaddy: https://bit.ly/supporttheirrawaddy

စစ်တပ် ကူးဆိပ်တံတားစခန်း KNLA ပူးပေါင်းအဖွဲ့ သိမ်းပိုက်

ဧရာဝတီ၊ နိုဝင်ဘာ ၁၂၊ ၂၀၂၄

ကရင်ပြည်နယ်၊ ဖာပွန်မြို့နယ်၊ ကမမောင်း- ဖာပွန်သွား ကားလမ်းမကြီးပေါ်ရှိ စစ်ကောင်စီ၏ ကူးဆိပ်တံတားလုံခြုံရေးစခန်းကို နိုဝင်ဘာ ၉ ရက်က ကရင်အမျိုးသား လွတ်မြောက်ရေးတပ်မတော် (KNLA)၊ တပ်မဟာ ၅ နှင့် မဟာမိတ်ပူးပေါင်းတပ်ဖွဲ့များ တိုက်ခိုက်သိမ်းပိုက်နိုင်ကြောင်း ယနေ့ ထုတ်ပြန်သည်။

အဆိုပါ စခန်းသိမ်းတိုက်ပွဲအတွင်း လက်နက်၂ လက်၊ မောင်းပြန်ရိုင်ဖယ် ၃ လက်၊ ကျည်ဖူး ၂၇ လုံး၊ ၆၀ မမ ကျည်ဖူး၂၂ လုံး လက်နက်ကြီး၊ ဒရုန်းဖျက်စက် ၃ ခုနှင့် မောင်းပြန်ရိုင်ဖယ်ကျည်၂ ထောင်ကျော် သိမ်းဆည်းရမိခဲ့ကြောင်း ဖော်ပြထားသည်။

အမှတ် ၅ တပ်မဟာနှင့် မဟာမိတ်ပူးပေါင်းတပ်ဖွဲ့ဝင်များသည် နိုဝင်ဘာ ၆ ရက်တွင် ယင်းစခန်းအားစတင်တိုက်ခိုက်ရာ ၄ ရက်အတွင်း စခန်းသိမ်းနိုင်ခဲ့ခြင်းဖြစ်ကြောင်း တိုက်ပွဲအတွင်း စစ်ကောင်စီဘက်မှ အလောင်း ၈ လောင်းတွေ့ရှိခဲ့ပြီး KNLA ပူးပေါင်းတပ်ဖွဲ့ဝင်၂ ဦး ဒဏ်ရာအနည်းငယ်ရရှိခဲ့ကြောင်း ထုတ်ပြန်ချက်၌ ပါရှိသည်။

ဓာတ်ပုံ-KNLA

#WhatsHappeningInMyanmar
#RejectMilitaryCoup
စာဖတ်သူများ၏ ပံ့ပိုးမှုက ပြည်သူများ လိုအပ်နေသည့် အကောင်းဆုံး နှင့် အရည်အသွေးမီ သတင်းများကို ဖော်ပြစေနိုင်မည်။
Support The Irrawaddy: https://bit.ly/supporttheirrawaddy

စစ်မှုထမ်းဖို့ပါ အေဂျင်စီတာဝန် ဖြစ်လာတယ်။ ၂ နှစ်စာချုပ်နဲ့ လွှတ်လိုက်တယ်၊ စစ်မှုထမ်းဖို့အတွက် ဆင့်ခေါ်တယ်ဆိုရင် အေဂျင်စီကနေ တာဝန်ခံပြီး ပြန်ခေါ် ပေးရမယ်ဆိုတဲ့ပုံစံမျိုး သူက (စကစ) ထပ်ပြီးတော့ ထည့်ထား တာ။ ကိုယ့်တာဝန် မဟုတ်တာကြီးကို ကိုယ်ကနေ အတင်းခေါ်ရမှာ

Website တွင် ဖတ်ရန် https://bit.ly/4hOBNsO
#WhatsHappeningInMyanmar
---------------------
စာဖတ်သူများ၏ ပံ့ပိုးမှုက ပြည်သူများ လိုအပ်နေသည့် အကောင်းဆုံး နှင့် အရည်အသွေးမီ သတင်းများကို ဖော်ပြစေနိုင်မည်။
Support The Irrawaddy: https://bit.ly/supporttheirrawaddy

ပုလဲမြို့ပေါ်သို့ ဗိုလ်နဂါး၏ တော်လှန်ရေးတပ်များ အလုံးအရင်းဖြင့် ဝင်ရောက်တိုက်ခိုက်ပြီး လက်နက်ချရန် လည်း တိုက်တွန်းနေသဖြင့် ပိတ်မိနေသော ဝန်ထမ်းများအား ကယ်ထုတ်ကာ လေကြောင်းဖြင့် ရှင်းလင်း၍ စစ်ကူ လက်နက်ခဲယမ်းများ ပို့ဆောင်ပေးရန် စစ်တပ်လော်ဘီတို့က တောင်းဆိုနေသည်။

Website တွင် ဖတ်ရန် https://bit.ly/3OrsmSF
#WhatsHappeningInMyanmar
---------------------
စာဖတ်သူများ၏ ပံ့ပိုးမှုက ပြည်သူများ လိုအပ်နေသည့် အကောင်းဆုံး နှင့် အရည်အသွေးမီ သတင်းများကို ဖော်ပြစေနိုင်မည်။
Support The Irrawaddy: https://bit.ly/supporttheirrawaddy

မြန်မာမှထွက်သည့် သဘာဝဓာတ်ငွေ့ရည် တရုတ်နှင့် မျှဝေသုံးမည်ဟု စစ်ကောင်စီပြော

ဧရာဝတီ၊ နိုဝင်ဘာ ၁၄၊ ၂၀၂၄

မြန်မာနိုင်ငံတွင် သဘာဝဓာတ်ငွေ့ရည် သိုလှောင်ရုံ (Liquefied Natural Gas- LNG Terminal) တည်ဆောက်ပြီး ရရှိလာမည့် သဘာဝဓာတ်ငွေ့ကို မျှ‌ဝေသုံးစွဲရန် တရုတ်နိုင်ငံမှ စွမ်းအင်အဖွဲ့အစည်းများနှင့်တွေ့ဆုံစဉ် စစ်ကောင်စီ လက်အောက်ခံ စွမ်းအင်ဝန်ကြီးဌာန ဝန်ကြီး ဦးကိုကိုလွင် က ပြောသည်။

တရုတ်နိုင်ငံ အမျိုးသားစွမ်းအင် အုပ်ချုပ်မှုအဖွဲ့ (National Energy Administration-NEA)၊ China National Petroleum Corporation (CNPC) တို့နှင့် နိုဝင်ဘာ ၁၁၊ ၁၂ ရက်တွင် ပေကျင်းမြို့၌တွေ့ဆုံခဲ့ပြီး နှစ်နိုင်ငံလုံးသည် သဘာဝဓာတ်ငွေ့များ လိုအပ်ချက်ရှိနေ၍ မျှ‌ဝေသုံးစွဲနိုင်ရန် ပူးပေါင်းဆောင်ရွက်မည့်အခြေအနေ၊ ရေနံနှင့်သဘာဝဓာတ်ငွေ့ကဏ္ဍတိုးမြှင့်ရေး၊ ရေနံချက်စက်ရုံများ အဆင့်မြှင့်တင်ခြင်းနှင့် အသစ်တည်ဆောက်ခြင်း စီမံကိန်းများအတွက်လိုအပ်သည့် ရေနံစိမ်းနှင့် သဘာဝဓာတ်ငွေ့ စဉ်ဆက်မပျက်ရရှိနိုင်ရေး၊ မြန်မာ-တရုတ် ရေနံစိမ်းနှင့် သဘာဝဓာတ်ငွေ့ပိုက်လိုင်းများ၏ စွမ်းရည်အပြည့် အသုံးပြုနိုင်ရန် ပူးပေါင်းဆောင်ရွက်ရန် ဦးကိုကိုလွင် က ဆွေးနွေးခဲ့သည်။

ထို့ပြင် မြန်မာနိုင်ငံ၏ အလားအလာကောင်းသော ရေနံနှင့်သဘာဝဓာတ်ငွေ့ စီမံကိန်းများ၊ ရေနံချက်စက်ရုံနှင့် ဓာတ်မြေဩဇာစက်ရုံ အဆင့်မြှင့်တင်ခြင်း၊ အသစ်တည်ဆောက်ခြင်းများတွင် ရင်းနှီးမြှုပ်နှံနိုင်မည့်အခြေအနေများကို ပြောဆိုခဲ့ကြောင်း သိရသည်။

ပုံစာ- စစ်ကောင်စီ စွမ်းအင်ဝန်ကြီး ဦးကိုကိုလွင် တရုတ်စွမ်းအင်အဖွဲ့နှင့် ဆွေးနွေးနေစဉ်/MOI

#WhatsHappeningInMyanmar
#RejectMilitaryCoup
စာဖတ်သူများ၏ ပံ့ပိုးမှုက ပြည်သူများ လိုအပ်နေသည့် အကောင်းဆုံး နှင့် အရည်အသွေးမီ သတင်းများကို ဖော်ပြစေနိုင်မည်။
Support The Irrawaddy: https://bit.ly/supporttheirrawaddy

အမ်းမြို့နယ်အတွင်း သိမ်းပိုက်ထားသည့် စစ်စခန်းအချို့ AA ထုတ်ပြန်

ဧရာဝတီ၊ နိုဝင်ဘာ ၁၄၊ ၂၀၂၄

ရခိုင်ပြည်နယ်၊ အမ်းမြို့အခြေစိုက် အနောက်ပိုင်းတိုင်းစစ်ဌာနချုပ် (နပခ) အား ထိုးစစ်ဆင်တိုက်ခိုက်နေစဥ်အတွင်း အာရက္ခတပ်တော် (AA) သိမ်းပိုက်ထားပြီးဖြစ်သည့် စစ်ကောင်စီတပ်စခန်းများထဲမှ မှတ်တမ်းဓာတ်ပုံအချို့ကို AA က ဓာတ်ပုံများနှင့်တကွ ယနေ့ သတင်းထုတ်ပြန်သည်။

လက်ကျန်တပ်စခန်းများကို ထိုးစစ်ဆင်တိုက်ခိုက်လျက်ရှိသလို ထွက်ပြေးလွတ်မြောက်နေသော စစ်ကောင်စီ တပ်ဖွဲ့ဝင်များကို လိုက်လံချေမှုန်း တိုက်ခိုက်နေသောကြောင့် အမ်းနပခဌာနချုပ်ရှိရာ ပတ်ဝန်းကျင်၌ တိုက်ပွဲများ ဆက်လက်ပြင်းထန်နေကြောင်းလည်း AA က အသိပေးထားသည်။

အမ်းမြို့နယ်အတွင်းရှိ အမှတ် ၃၇၄ အမြောက်တပ်ရင်း (အမတ ၃၇၄)၊ အမှတ် ၇၅၇ လျှပ်စစ်အလုပ်ရုံတပ်ခွဲ (လလစ ၇၅၇)၊ အမှတ် ၃၄၅ စစ်လက်နက်ပစ္စည်းတပ်ခွဲ (စနခ ၃၄၅)၊ အမှတ် ၈ တိုက်ပွဲဝင်စည်းရုံးရေးသင်တန်းကျောင်း (တစသ ၈)၊ အမှတ် ၂ /ကုတင် ၃၀၀ တပ်မတော်စစ်ဆေးရုံ (တဆရ ၂/၃၀၀)၊ လေကြောင်းရန်ကာကွယ်ရေးတပ် (လကရ)၊ စစ်ဖက်ရေးရာလုံခြုံရေးတပ် (စရဖ)၊ ခမရ ၃၇၃ တပ်ရင်းတို့အား AA က တိုက်ခိုက်သိမ်းပိုက်ထားနိုင်ကြောင်း သိရသည်။

AA သည် ရခိုင်ပြည်နယ်နှင့် ပလက်ဝဒေသစစ်ဆင်ရေးကို ၂၀၂၃ နိုဝင်ဘာ ၁၃ ရက်တွင် စတင်ခဲ့ရာ တနှစ်ပြည့်သည့် ၂၀၂၄ နိုဝင်ဘာ ၁၃ ရက်အထိ တိုက်ပွဲအရှိန် လျော့ကျသွားခြင်းမရှိဘဲ နေ့စဉ်နှင့်အမျှ ဆက်လက်ပြင်းထန်လျက်ရှိကြောင်းလည်း AA က အသိပေးထားသည်။

AA အနေဖြင့် ရခိုင်ပြည်နယ် (အာရက္ခဒေသ) တခုလုံး သိမ်းပိုက်နိုင်ရေး၊ စစ်ကောင်စီတပ်ဖွဲ့ဝင်များကင်းစင်ရေး စသည့် ရည်မှန်းချက်များဖြင့် စစ်စခန်းများကို ထိုးစစ်ဆင်တိုက်ခိုက်ခဲ့ရာ ၁ နှစ်အတွင်း ချင်းပြည်နယ် ပလက်ဝ၊ ပေါက်တော၊ ကျောက်တော်၊ မြေပုံ၊ မြောက်ဦး၊ မင်းပြား၊ ပုဏ္ဏားကျွန်း၊ ရမ်းဗြဲ၊ ရသေ့တောင်၊ ဘူးသီးတောင်၊ သံတွဲမြို့များအား မြို့သိမ်း တိုက်ပွဲဆင်နွှဲ၍ သိမ်းပိုက်နိုင်ခဲ့ကြောင်း၊ လက်ရှိအချိန်၌ အပြီးသတ်သိမ်းပိုက်ရန် လက်တကမ်းအလိုသို့ ရောက်ရှိနေပြီ ဖြစ်သော အမ်း၊ တောင်ကုတ်၊ ဂွနှင့် မောင်တောမြို့များတွင် တိုက်ပွဲများ ဆက်လက်ပြင်းထန်လျက်ရှိကြောင်း ဆိုထားသည်။

ထို့အတူ မောင်တောမြို့တခုလုံးအား သိမ်းပိုက်ရယူထားနိုင်ပြီဟု ပြော၍ရသော်လည်း မြို့အပြင်၌ရှိသော အမှတ် ၅ နယ်ခြား စောင့်တပ် (နခခ ၅) စခန်း တခုကျန်ရှိနေပြီး ဆက်လက်ထိုးစစ်ဆင်တိုက်ခိုက်နေကြောင်း သိရသည်။

AA မှ အလုံးစုံသိမ်းပိုက်ရရှိထားသည့် မြို့များတွင် ပြည်သူများ၏ လူမှုစားဝတ်နေထိုင်ရေး၊ ဖူလုံရေးနှင့် ပြည်သူ့ဝန်ဆောင် ရေးလုပ်ငန်းများကို မပြီးပြတ်သေးသော ထိုးစစ်များ ဆက်လက်ဆင်နွှဲရင်း ကြိုးပမ်းဆောင်ရွက်ပေးနေသော်လည်း လိုအပ်ချက်များရှိနေမှုကို အနှေးနှင့်အမြန် ဖြည့်ဆည်းပေးသွားမည်ဖြစ်ကြောင်း၊ တနှစ်တာ စစ်ဆင်ရေးကာလ စခန်းသိမ်း၊ မြို့သိမ်းတိုက်ပွဲများအတွင်း အသက်ပေးဆပ်စွန့်လွှတ်ခဲ့ကြသော အာရက္ခတပ်တော်နှင့် မိတ်ဖက်အဖွဲ့အစည်းအချို့မှ စစ်သည်တော်များ၊ ကိုယ်လက်အင်္ဂါပေးဆပ်ခဲ့ကြသည့် စစ်သည်တော်များနှင့် စစ်ဆင်ရေးကို ပုံစံတမျိုးမျိုးဖြင့် အထောက်အပံ့ဖြစ်စေသော ကျန်းမာရေးဝန်ထမ်းများ အပါအဝင် သက်ဆိုင်သူအားလုံးကို အလေးအနက် မှတ်တမ်းတင်ဂုဏ်ပြုကြောင်းလည်း AA ၏ ထုတ်ပြန်ချက်၌ ဖော်ပြထားသည်။

ဓာတ်ပုံ - AA Info Desk

#WhatsHappeningInMyanmar
#RejectMilitaryCoup

စာဖတ်သူများ၏ ပံ့ပိုးမှုက ပြည်သူများ လိုအပ်နေသည့် အကောင်းဆုံး နှင့် အရည်အသွေးမီ သတင်းများကို ဖော်ပြစေနိုင်မည်။
Support The Irrawaddy: https://bit.ly/supporttheirrawaddy

တရုတ်နယ်စပ်ဂိတ်က ပိတ်ထားသေးတယ်။ ပြီးခဲ့တဲ့ တရက်နှစ်ရက်လောက်က နာရီပိုင်းလောက် တရုတ်ဘက်က ပြန်ဖွင့်လာတာ။ ဒီရက်ပိုင်းကတော့ ကချင် KIO ဘက်ကနေ ပြန်ပိတ်ခိုင်းလိုက်တာ။ နာရီပိုင်းလောက်ဖွင့်ပြီးတော့မှ သူတို့ဘက်က သူတို့စိတ်ကြိုက် ဖွင့်ချင်ဖွင့်၊ ပိတ်ချင်ပိတ် အဲဒီလိုပုံစံလုပ်နေလို့ ဒီဘက်မြန်မာပြည်ဘက်ကနေ ပြန်ပိတ်လိုက်တာ။ လူလည်း အဝင်အထွက် လုံးဝ ပိတ်လိုက်တာ။ တရုတ်တွေရော အကုန်ပဲ။ ဘယ်တော့ပြန်ဖွင့်မလဲတော့ မသိရသေးဘူး

Website တွင် ဖတ်ရန် https://bit.ly/4hP5Dxe
#WhatsHappeningInMyanmar
---------------------
စာဖတ်သူများ၏ ပံ့ပိုးမှုက ပြည်သူများ လိုအပ်နေသည့် အကောင်းဆုံး နှင့် အရည်အသွေးမီ သတင်းများကို ဖော်ပြစေနိုင်မည်။
Support The Irrawaddy: https://bit.ly/supporttheirrawaddy