ابدأ يومك بذكر الله، فمن جعل الله أوّل همّه كفاه ما بعده.🌹

_وتذكّر قول النبي ﷺ:
"من سلك طريقًا يلتمس فيه علمًا سهّل الله له به طريقًا إلى الجنة."

فكل ساعة تدرس فيها بنية طلب العلم تقرّبك من الله قبل أن تقرّبك من النجاح الدنيوي. اجعل نيتك صافية، وابدأ يومك بالدعاء والعمل، وسترى بركة الله في وقتك وجهدك.

#تجمع_طلاب_صناع_المستقبل
#FMSG

صندوق الاسئلة :

✨ أحيانًا الطريق بيكون صعب، بس الصعاب دي ما علشان توقفك… بالعكس، هي علشان تجهزك لنسخة أقوى من نفسك .
خليك متذكر دايمًا: كل تعب الليلة هو استثمار في نجاح بكرة .

🚀 ارفع همتك، خليك واثق إنك تقدر، وخطوة ورا خطوة ح توصل لأحلامك مهما كانت بعيدة.

بعض الأدعية المأثورة والجميلة لطلب العلم، يمكنك ترديدها في صباحك أو قبل دراستك:

-"اللهم انفعني بما علّمتني وعلّمني ما ينفعني وزدني علمًا."

-"ربّ اشرح لي صدري ويسّر لي أمري واحلل عقدة من لساني يفقهوا قولي."
-"اللهم اجعلني من الذين يستمعون القول فيتبعون أحسنه."

-"اللهم افتح عليّ فتوح العارفين، ووفقني توفيق الصالحين، وانفعني بالقرآن والذكر الحكيم."

-"ربّ زدني علمًا."

-"اللهم ارزقني فهم النبيين، وحفظ المرسلين، وإلهام الملائكة المقرّبين."

#تجمع_طلاب_صناع_المستقبل
#FMSG

لا يغرّنك تشتت أمرِك!
ستأتي إرادة الله، فيتيسّر العًسر،
و يُمهّد الطريق، و تفتح الأبواب...
فتأتيك كاملة تامّة بعطاءِ الله...

- صباح الخير🪻

صباحُ الخير 🌸
صباحٌ جديد، فرصةٌ جديدة، وابتسامة تكفي لتُضيء اليوم كله. ✨

كلّما صعُب عليك الأمر، و عزّ عليك حلمك،
استند يقينك بأنّ الله لا يكلّف نفساً إلا وسعها،
و لكن : " الله يُعطي أصعب المعارك لأقوى جُنوده"

- صباح الخير 🪻

سيمضي القلق و ستأتي الراحة بعد هذا الكم من العناء،
سيعوّض الله توتّر المشاعر و اضطّراب الأمل و خوف المستقبل بكل ما هو جميل، ستأتيك البُشرى التي تُبهجك قريباً بإذن الله ✨

- صباح الخير🪻

أعزائنا الطلاب 🔥
نرجو تعبئة هذا الاستبيان لمساعدتنا على تحديد احتياجاتكم الأكاديمية والنفسية والاجتماعية والترفيهية في بيئة التعليم عن بعد.
القسم الأول: معلومات عامة
الجنس: ١_ ذكر ٢_ أنثى
رقم : ( )
المستوى الدراسي: ١_ ثانوي ٢_ جامعي
رقم : ( )
هل لديك خبرة سابقة في التعلم عن بعد؟ ١_ نعم ٢_ لا
رقم : ( )
القسم الثاني: الاحتياجات الأكاديمية
أكثر ما تحتاجه لتحسين تعلمك عن بعد:
١_ جلسات متابعة عبر المنصات (Zoom, Google Meet…)
٢_ مجموعات دراسية أونلاين
٣_ مواد مسجلة يمكن الرجوع لها
٤_ أخرى: ____ ( أكتبها )
رقم : ( )
ما الصعوبات الأكاديمية التي تواجهك غالباً؟
١_ ضعف الإنترنت/الكهرباء
٢_ صعوبة التركيز أثناء الحصص أونلاين
٣_ قلة التفاعل مع الأساتذة
٤_ ضغط الواجبات والاختبارات
رقم : ( )
القسم الثالث: الاحتياجات التنموية
أي المهارات تود تطويرها في بيئة التعليم عن بعد؟
١_ استخدام المنصات التعليمية بفعالية
٢_ إدارة الوقت وتنظيم الدراسة
٣_ مهارات العرض والمشاركة عبر الإنترنت
٤_ أخرى: ____ ( أكتبها )
رقم : ( )
أفضل طريقة للتعلم بالنسبة لك:
١_ ورش عمل مباشرة عبر الإنترنت
٢_ دورات مسجلة قصيرة
٣_ جلسات تفاعلية جماعية
٤_ أنشطة عملية أونلاين
رقم : ( )
القسم الرابع: الدعم النفسي والاجتماعي
أكثر ما تحتاجه نفسياً واجتماعياً في التعليم عن بعد:
١_ جلسات دعم نفسي فردية
٢_ مجموعات تشجيعية وتحفيزية
٣_ أنشطة افتراضية لتقليل العزلة
٤_ أخرى: ____ ( أكتبها )
رقم : ( )
كيف تصف مستوى الدعم النفسي والاجتماعي المتاح حالياً عبر المنصات؟
١_ ضعيف جداً ٢_ ضعيف ٣_ متوسط ٤_ جيد ٥_ ممتاز
رقم : ( )
القسم الخامس: الأنشطة الترفيهية
ما الأنشطة الترفيهية التي تفضل المشاركة فيها عن بعد؟
١_ مسابقات أونلاين (ثقافية/رياضية/ألعاب ذهنية)
٢_أمسيات فنية افتراضية ( رسم، مواهب…)
٣_ نوادي قراءة
٤_ أخرى: ____ ( أكتبها )
رقم : ( )
ما مدى أهمية وجود أنشطة ترفيهية أونلاين بجانب الدراسة؟
١_ غير مهم ٢_ قليل الأهمية ٣_ مهم ٤_ مهم جداً
رقم : ( )
القسم الأخير: مقترحاتك
ما اقتراحك الرئيسي لتحسين تجربة التعليم عن بعد؟

#قصة_مُلهمة


السلام عليكم ورحمه الله وبركاته🤍
كيفكم إن شاء الله كويسين وبأحسن حال وانتو بتقروا القصة.
حبدأ ليكم قصتي من البداية شديد.
بحكم إني كان اتذعت في الصف الثامن بمجموع 278، كان زي تحدي أو إلتزام بالنسبة لي إني لازم بإذن الله أتذاع في سنه تالتة، ودا المتوقعنو الأهل، الضغط بالنسبة لي كان من ناحية توقعاتهم، سنتنا كانت حكاية المدارس النموذجية إنتهت والتوزيع بقى جغرافي ولمن وصلنا سنة تالتة كان في زي عملية بتاعت تحويل كبيرة للبنات من المدرسة، الأغلبية كانت بتتحول لمدارس خاصة، بالنسبة لي كنت من المتفوقات في المدرسة وكان في جزء من معارفنا بدعم فكرة التحويل لكن أنا كنت شايفة إنو ما المدرسة هي البتحدد مع إنها عندها دور كبير لكن الأكتر بكون على الإجتهاد الشخصي، ومن هنا بوجه تحية لأي استاذة أو أستاذ درسني في رحلتي المدرسية كلها🤍.
بدينا سنة تالتة بحماس كبير وكنت بحاول اقرأ درس اليوم باليوم وأكون مواظبة على القراية أول بأول، بتذكر مدرستنا ما كانت بتعمل لينا إمتحانات كتيرة، يعني في السنة كلها امتحنا امتحان واحد بس بالإضافة للتجريبي لكن من الامتحانين ديل عرفت نقاط الضعف وكنت بحاول أركز فيها، مرّينا بفترة إضرابات طويلة شديد، ودا كلو و كان باقي للإمتحان أقل من شهرين، فما كنا خلصنا المقررات، رغم دا قلت أقعد براي في البيت واقرأ وأحاول أبحث، وأشوف حصص اونلاين، بتذكر قبل بداية الحرب بفترة بسيطة شديد كان عملو لينا الإمتحان التجرببي وأنا من الإمتحان دا عرفت إني في مواد لازم أغير طريقة قرايتي فيها، من المواد دي كانت الأحياء العندي معاها معاناة كبيرة شديد كنت جبت فيها 86 في الامتحان دا، أنا بعد الدرجة دي جاني إحباط منها وكنت بشوف إني مهما أذاكرها ما قاعدة ألقى نتيجة مُرضية.
الحرب بدت قبل ما يوزعوا لينا باقي الورق زاتو، بدت ونحن كنا المقررات ما خلصناها😞.
منطقتنا كان فيها اشتباكات قوية من اول يوم، الكهرباء قطعت من أول يوم والموية والشبكة، أنا كنت لسه بحاول أقرأ لكن بدون هدف، الرؤية كانت ضبابية شدييد لطالبة إمتحانها كان مفترض باقي ليهو شهر ونص تقريباً.
بتذكر الفترة ديك المنشورات في مواقع التواصل كانت عبارة عن: ما توقفو قراية وإنو الناس بتقرأ في الولايات ومواصلة وكدا، الكلام دا كان بيؤثر معاي لأنو انا شايفة نفسي ما قادرة اقرأ لا نفسياً ولا من أي ناحيه تانية.
بعدها نزحنا لمنطقة قريبة....وقفت القراية بصورة شبه دائمة، حتى كتبي ما كان جبتها كلها، ومنطقة بيتنا بقت خطرة ومافي طريقة أصلاً للرجوع.
ولأنو الحاصل دا كان في الخرطوم بس، كنت بتابع مواقع التواصل وبلقاها كلها منشورات برضو لمعاهد شغالة ولحصص في الولايات...مرات كنت بحاول أضغط نفسي وأقوم اقرأ ودا ما كان بتعدى ليهو الصفحتين وتاني بخليها خصوصاً إنو المنطقة كانت فيها إشتباكات كتيرة شديد شدييد وضرب، التدوين ما كان بقيف نهائياً مننا.
.
.
وقفت القراية نهائياً، كان مافي كهرباء، مافي موية، وفقدت الأمل خلاص في الإمتحانات دي...
جات علينا فترة حصار محكم جداً، كانت عملية لتجويع السكان في المنطقة، لا في أكل بدخل لا موية لا دواء، كانت اسوأ فترة مرّت عليّ في حياتي، الواحد لا عارف حيموت بي دانة ولا رصاصة ولا حيموت من الجوع😞! بقيت في الفترة ديك لا فارق معاي قراية ولا إمتحانات ولا غيره. طُبٍّقت علينا عملية تجويع ممنهجة والدانات كانت حرفياً اليوم كله، الناس كانت بتفتش الأكل في السوق والدانات بتقع جمبها، وحرفياً الناس شايلة قروشها وما لاقية حاجة تشتريها، زيادة على الحصار الواحد ما عارف زاتو يمشي يجيب موية من الضرب والدانات💔، وإنك تلقى موية صالحة للشرب دي كانت معاناة براها، بتذكر إني كنت بقول لنفسي إنتِ ضامنة اصلاً تعيشي لمن تمتحني؟
(كنت واصلة لمرحلة كبيرة من اليأس من كل النواحي)
وقعو تلاتة دانات في بيتنا، لولا رحمة الله وحدة فيهم كانت قرّبت تنتهي مننا.

ما كان في أي سبب ولا دافع إني أقرأ.
الناس كانت بتمشي في الشارع وكل البتفكر فيهو كيلو دقيق ولا رز، الفترة ديك نحنا أكلنا حاجات أنا في اسوأ الإحتمالات ما حلمت إني آكلها، الوضع كان مأساوي شديد وكل فترة بنسمع بخبر وفاة زول من أهل المنطقة.
في الفترة ديك عمي الوحيد قاسم رحمة الله عليه اتوفى في كرري، ونحنا ما قدرنا نمشي، حتى أبوي ما قدر يمشي العزاء💔، الحاجة دي أثرت علينا شديد وحسّينا بمدى العجز الكنا واصلين ليهو.

شهر 2 جاء ودا كان فيهو الحصار وصل قمته حتى الحاجات الكانت بأسعار خرافية في السوق بقت مافي، وكلنا كنا مرضنا من الجوع والحصار، وما كان في علاجات.
قررنا إنو ننقسم وجزء يطلعوا رغم خطورة الطريق لكن الوضع بقى لا يحتمل نهائياً، كلنا مرضنا جانا فقر دم وكان عندنا سوء تغذية من الوضع، إتقسمنا في جزء طلع وجزء قعد لخطورة الطريق، بتذكر قرار إنو نطلع كان فجأة وما مخطط ليه، يعني فجأة قالو لينا إنو في مجموعة طالعة وإنتو حتمشوا معاهم، لا شلت معاي كتب ولا أي حاجة، كان

مفترض أي زول يشيل شنطة صغيرة أو كيس بس ما أكتر، طلعنا وما عارفين نلاقي ناس أبوي تاني متين، ما عارفين الشارع دا حيفتح متين، ما عارفين حنلاقي شنو وحنصل ولا لأ 💔.
طلعنا بتذكر قريب الساعة واحدة صباحاً والطريق كان مشي ومافي طريقة تانية،
كان زي في نقطة تجمع كدا قريب لآخر ارتكاز جيش، ناس كتاار شدييد من مناطق متعددة اتجمعت معانا في المكان دا، الطريق المفترض ما ياخد أكتر من ساعة، بقى 3 أيام لحدي ما وصلنا كرري، الرحلة دي ممكن أقول إنها كانت أبشع أيام حياتي، مرّينا فيها بحاجات صعبة شدييد، وأشد أنواع المعاناة، وفي الطريق كان القصف جمبنا والدانات بتقع جمبنا، في لحظة من لحظات الطريق أنا فقدت الأمل في الحياة زاتو.💔
كنت بدعي ربنا أننا نصل ونحن أحياء بس.
مشينا بطرق طويلة وأول مرة أشوفها.
والحمدلله في النهاية وصلنا سالمين، الوضع كان أحسن من هناك بكتيير ما شاء الله، كأنك كنت في بلد وجيت بلد تانية، أول ما وصلنا بقينا شايفين العيش والفواكه دي كأننا لينا عشر سنين ما شفناها وشفنا السوق وزحمة السوق ووفرة الحاجات ما شاء الله تبارك الله، الواحد بس كان تفكيره في باقي أهلنا والناس الخليناهم هناك💔.
في الوقت داك كانت زي فترة معافاة بالنسبة لينا وبرضو ما كنت بقرأ...بعد كل الشفتو دا كان عندي إحباط وعدم شغف...كان سمعنا إنو بيتنا إنسرق وفقدنا حاجاتنا كلها، كانت حالتي النفسية ما مهيئة اني أرجع اقرأ تاني..... بعد فترة الشارع فتح الحمدلله، وناس أبوي جو ولاقيناهم أخيراً، أبوي الله يديهو العافية كان من أكبر الداعمين لي كان دايماً بقول لي حتتذاعي إن شاء الله🤍.
بشكره شدييد هو وأمي وأخواني وبهدي ليهم النجاح دا🤍، بتذكر بعدها فتحو التسجيل والحصر للإمتحانات، كنت مرّة مرّة بفتح الكتب واخليها...كنت بفكر إنو هل لو اتحددت الإمتحانات دي حأقدر أواصل على هدف إني اتذاع ولا لأ؟!
هل ممكن أنا الموقفة القراية لي سنة وحاجة إذا حددو الإمتحانات ألحق مقارنة بناس ما وقفت من القراية نهائياً؟!
كانت فترة صعبة شديد وبقيت فيها ما واثقة من نفسي نهائي.
بعدها تقرر فتح المدارس للدفعة المعلقة بعد عيد الأضحى في الولاية، و بعد القرار دا قلت في نفسي خلاص بعد دا حيكون في إمتحان بصورة جدية، وإتذكرت آمال أهلي الخاتنها فيني، وبعد نزلت المدرسة بدأ الشغف يرجع. والحمدلله الأساتذة راجعو لينا وكملوا لينا المقررات الما كنا خلصناها، المشي للمدرسة كان فيهو صعوبة، كنت أيام بمشي وايام لأ، لأنو كان في تدوين وضرب، بتذكر في الطريق للمدرسة الدانات كانت بتقع جمبنا، كنت بستنى شوية لمن تقيف وأرجع البيت..رغم المعاناة دي كلها..كان في بصيص أمل إتولد فيني، حاولت ألم الكتب الما عندي شوية شوية والما قدرت القاهم كنت بقراهم من التلفون، وبديت أحاول أغير طريقة القراية في كل المواد الكان عندي فيها مشكلة زي الأحياء، اكتشفت إنو طريقتي القبل الحرب ما كانت صح بقيت أركز على الكتاب أكتر، وعلى إني اقرا بطريقة أسئلة الإمتحان والحمدالله الحمدلله كانت أعلى درجة لي وجبت فيها 98🤍، وفي التلاتة شهور دي حاولت أركز أكتر شيء على حل الإمتحانات وإني اقرأ من الكتاب، بالإضافة للتركيز على مصادر محددة للقراية والمراجعة.

*أخيراً مواعيد الإمتحانات جات الحمدلله، بعد حددوها كنا خايفين خصوصاً إنها حتتعمل في امدرمان لكن الحمدلله بفضل الله مرت بسلام، أيام الإمتحانات كانت أيام ضاغطة شدييد فيها كمية من التوتر والسهر خصوصاً مع المواعيد الجديدة، كنت برجع بعد المغرب، لكن الحمدلله عدّت على خير وربي اكرمني الحمدلله🤍.

بعد داك جاء يوم النتيجة، اليوم الحتنسوا فيهو كل التعب التعبتوهو والسهر السهرتوهو وحتفضل بس الفرحة الحتشوفوها في عيون اهلكم والناس البتحبوهم، اول ما بدوا يذيعوا ومشوا في الإذاعة انا خلاص بديت اشك في نفسي وقلت ما حاتذاع، وفي اللحظة الخلاص كنت دايرة اقوم فيها سمعت اسمي، كانت لحظات لاتنسى التعب كله بتنسي وبتبقى الفرحة بس، ف واصلوا واجتهدوا وما تيأسوا مهما كانت ظروفكم وان شاء الله كلكم اوائل.
أهم شي بنصحكم بيه حل الامتحانات والقراية من الكتاب.
بتمنى تكون القصة دي إلهام ولو لواحد منكم، ومنها دايرة أذكركم أنه مهما كان وضعك هسي أو منطقتك فإنتَ قادر ومافي حاجة مستحيلة، ومهما كانت مدرستك إنتَ البتقدر تحدد نسبتك.
بتذكر كنت بقول في نفسي هل انا ممكن أتفوق بظروفي دي؟
لكن الحمدلله حمدا كثيراً طيباً مباركاً فيه🤍.
أسعو و توكلو على الله
وأدعو كتييير وألحو في الدعاء
وان شاء الله كلكم اوائل زي ما قلت.

بس
وربنا يوفقكم
واي زول بقرأ الكلام دا فضلاً ادعي لي ربنا يسهل لي امري 🤍.

ريان طارق محمداحمد محمدخير

المركز الحادي عشر على مستوى السودان

بنسبة 96%
مساق علمي أحياء

اللهم وكّلت أمري إليك، و ألجأت ظهري إليك، فوّضت أمري إليك،
لا رادّ لفضلك، ولا مانع لعطائك، لا إله إلا أنت سبحانك إني كنت من الظالمين،
اللهم إني أسألك أن توفقني و أن ترزقني النجاح و التفوق يا كريم،
اللهم وفقنا من حيث لا نحتسب،
اللهم إنا نسألك النجاح بكرمك و لطفك،
اللهم إنا فوضنا أمرنا إليك إيماناً بحسن تدبيرك،
يا رب أكتب لنا الخير حيث كان.

- ساعة الإستجابة 🪻

لأنّ المُستقبل عَظِيم،
و لأنّ الإنجازات فرحَة،
و لأنّ الحُلم شَغَف،
و لأنّ العِلم رِفعَة...
اتعَب مِن أجلِ ذَاتِك!

- صباح الخير 🪻

إذا كانت نيّتُك " لَا أبرَح حَتّى أبلُغ " ،
فلا بُدّ أن " تَصبِر عَلَى مَا لم تُحِط بِه خُبرا "

- صباح الخير 🪻

مَا دُمت تُحاوِل الوُصول إلى شَغَفِك و أحلامِك يوماً ما سَتَصل فَقَط كُن واثقاً متأكداً بأنّ تَعبَك و جُهدك فِي مُحَاولات الوُصُول لن يضِيع

- صباح الخير 🪻