صرت ماتسمع همستي
وإنت نگاط النده يجفل خيالك ..




ريسان الخزعلي
ليش 💔

أشتاگت عيوني لـ ضواه
وروحي فَتحت كل روازين المحنة

- آية طارق

انا وگلبي مشينا لحد صدى النسيان
غنينا وحفرنا گبورنا ومتنا

- عمار خضير

عودني اعلا بُعدك و انت ابو الطيبات
بلكت علـ بُعد يمعود اتـعود ...!



عريان السيد خلف-

لا تدگ
بابي اعله مامش چفك الفارغ محنة
انته مو ذاك العرفته المشتريني


ولا هذاك
الينحب ويذرف سواجي
شما كثر بـ الهم ونيني




عباس الغالبي

وليش ماخضر نسيمك بالچذب خبصة گصب
سنين حاني اعليك ظهري وگوه سويتك رطب





عبدالله العبدلي

تصادفنه والدنيه گضت بعيونج المملوحه...
خلصان كل هذا العمر بس بيج شايل روحه...
گتلج يحلوه استعجلي ..!
خلص وكتنه ولا يجي الليل ويحط جروحه
صدفه ولكن من مشت...
بالدنيه كل هذا الهوه وما گدر گلبي يلوحه...

حسن وصفي

إنا لله وإنا اليه راجعون انتقل الى رحمة الله الشاعر سمير صبيح شاعر المقاومه احد المجاهدين في ذمة الله اثر حادث مؤسف ،

يا خسارتنه بيك استاذ سمير

ثلمه والله

اذا حجمك علة
لتشوف حجمي صغير
الغابة شكد جبيرة بعود تشعلهة

- سمير صبيح

المفارك واليحب والمتعبه سهر الليل
والسهرن والفاركن يبجن وراه
سمير ومن متت ماتهم لوحشتك
الليلة عريان بجيتك يصيح الله

- منذر نعمان

من اجيت
وسيرت بالطيف يمي
خضر اليابس بروحي
و لبستني العافية بجيتك گلايد

- غفران طالب

الدنيا لوتنطيني فرصة
شمالني وماكلت احبج والتهيت

ــ وسام عبد

☜ بـسمـه تعـالى ☞

الـقصـيدة : آهات وضمه
اداء : مرتضى حرب
كلـمات : احمد الهلباوي

★★★★★★★★★★★★

حنين وآهات وضمه
ونين وعين تصب دمه

تهد الحيل بليل آهات الرباب
تگول يصير لزغير ينام على التراب

★★★★★★★★★★★★

يا عظم مصابي ودمعتي وعذابي
تگول القهر بدمع السهر جرحلي الچفوف
تگله يا حبيبي يبني شح نصيبي
التترك رضيع على الترب تغمض شلون
انته قطعة مني والهضم كتلني
الگالوا على الأم الضنى مو غالي يهذون

بكربلا انتظرنه .. ما رجع گمرنه .. شفت ابني من گد العطش ضل بس الأعيون
تصيح والمدمع يصب
ذبيح سباح الگلب
تجر حسرات .. عالمات .. ما ضاگ الشراب
تگول يصير الزغير ينام على التراب

★★★★★★★★★★★★

ينعصر دليلي والهدملي حيلي
ادري يعبدالله الظهر چان الرمل حار
مثلي بالخرابة تحرگك الترابه
وصدر امك بدال اللبن بيه جمرتك صار
گلبي منكسر بيك گلي وين اوديك
خيمه ونجن بيها الظهر ما خلت النار
وافرشت حياتي الباقي من عباتي
بگلبي نعال اغفه عگب ما هدموا الدار

غريب .. مهجة حيدره سليب .. گطعوا خنصره
گبال العين يحسين عاري بلا ثياب
تگول يصير الزغير ينام على التراب

★★★★★★★★★★★★

والرمل حلالك تعلمت شجالك
گلي يهل نايم چفي وعالغبره مگلوب
اصحه من منامك يا بدر عمامك
ما يصلح النوم العصر ولا نوم الغروب
تزعل على اديه وترضى بالوطيه
نوبه الطم عليك الوجه وعالصدر نوب
لو ردت اگمطك يبني وين احطك

لا ضل مهد ما محترگ يوليدي لا ثوب
عجيب بت گلبي نگطع ضامي وما رضع
تحچي وياه ويلاه .. وما تسمع جوابه
تگول يصير الزغير ينام على التراب

★★★★★★★★★★★★

الدنيا غاضريه والعمر منيه
ليل اليروحله ابن ما يگصر يطول
وجهك وصفاته ذبلت حلاته
تبقى طريح الغبرة لو ترجعلي شتگول
رد علي يوالي يالعفت دلالي
صار الرمل يبني احن من حضني معقول
لكبرتي ذخرتك بهل المسه فگدتك
صار السهم عگب امك يگلك دلول

گضيت .. ضامي بهل فله يريت ميته بكربلا
بهذا الحال واطفال تركض عالسراب
تگول يصير الزغير ينام على التراب

★★★★★★★★★★★★

احچي وي دمعتي وتنذبح صفنتي
من تصبح رسومك گبالي بهدوه الليل
ابقى الولي وحدي ويمنتي على خدي
ما ضل بعد عندي دمع ولا للطم حيل
من رحت حبيبي هسه در حليبي
هذا الهظم گلبي وصحت من عنده يا ويل
ردت اضل لباچر يمك ارد اناطر
خافن يغالي تنسحگ من تعبر الخيل

شيفيد .. لو صار المهد اريد .. يريت يرجعلي الولد
مني تروح واجروح تتركلي وعذاب

تگول يصير الزغير ينام على التراب

★★★★★★★★★★★★

☜ بـسمـه تعـالى ☞

الـقصـيدة : اثق بيمن
اداء : مرتضى حرب
كلـمات : علي عبود العبودي

❃❃❃❃❃❃❃❃❃❃❃❃❃❃

اثق بيمن .. اوصيمن .. يوديلك خبر
السوالف لا تصدگها .. الرسالة التوصلك شگها

❃❃❃❃❃❃❃❃❃❃❃❃❃❃

سفيرك تايه بين الازقه
اوديمن عليك يگلك ابقى
وشگگها الرسايل ورقه ورقه
عليك تأمروا سبعين فرقه

الغدر وارد ولا واحد تشد بيه الظهر
الغدر للكوفه عاشگها .. الرسالة التوصلك شگها

❃❃❃❃❃❃❃❃❃❃❃❃❃❃

الرسايل على الورق ظاهرهن حروف
مو بقلامهم كتبوها بسيوف
تجي وهسه انته توصل كربلا وشوف
تلگه الراسلوا كلهم بالطفوف

الكتب اقبل رمح يحمل نوه الگطع النحر
وخيمكم ناوي يحرگها .. الرسالة التوصلك شگها

❃❃❃❃❃❃❃❃❃❃❃❃❃❃

الگالولك نتبعك ما يتبعوك
بالأول بايعوك نوب باعوك
الماي عيونهم تاخذها قنعوك
ترى من الماي بس توصل يمنعوك

اليگلولك هله بطولك يگطعونك وذر
وضلوعك خل تسحگها .. الرسالة التوصلك شگها

❃❃❃❃❃❃❃❃❃❃❃❃❃❃

ترى المجبل عليهم موش اجاويد
على وجه الگاع ضلتهم تجاعيد
لا دين اليكضهم لا تقاليد
هنا عدهم سبي بنياتكم عيد

منو اليسوه تجي بخطوة الينصرك ما ندر
شگلك وانه ضايگها .. الرسالة التوصلك شگها

❃❃❃❃❃❃❃❃❃❃❃❃❃❃

سمعوا بيك اجيت وجبت العيال
وبديت اسمع عليك القيل والقال
سمعت مفصلين سياط تفصال
وعلى گد عيلتك جابوها الحبال

بديت اسمع حچي اليطلع يجمعولك حجر
وعيالك ينسلب حگها .. الرسالة التوصلك شگها

❃❃❃❃❃❃❃❃❃❃❃❃❃❃

☜ بـسمـه تعـالى ☞

الـقصـيدة : لن تمحوا ذكرنا
اداء : مرتضى حرب
كلـمات : علي الابراهيمي

★★★★★★★★★★★★

والله والله ..والله لن تمحوا ذكرنا
والله والله ..والله لن تمحوا ذكرنا

★★★★★★★★★★★★

عقيلتنة بأسرها شالت الرايه
اجت وي الضعن لحسين مشايه
تنوح وتبچي لكن عدها الف غايه
علي مربيها بيده وبيها الكفايه

والله والله .. احنه عالي يضل ذكرنا

★★★★★★★★★★★★

اميرة وبنت اميرة واخت ابو فاضل
للعيال بسبيها اصبحت كافل
يزيد تحير بهل منطق الكامل
تگله اسمع خطبتي ايها الجاهل

والله والله .. حسبالك نذل بيسرنه

★★★★★★★★★★★★

صحيح على المجالس تدخل چبيره
وصحيح الحره شافت نايبه وحيره
لچن وگفت صبوره چنها ابو الغيره
ابد ما چنها حرمه وراحت يسيره

والله والله .. ما نوفي هل كعبه بشعرنه

★★★★★★★★★★★★

رغم كبر الجرح ما دنگت هامه
وابو اليمه ذخرها لهذه ايامه
حضن صارت چبير ولمت ايتامه
والمسلبها گامت تمشي جدامه

والله والله .. صبر الشمع صاحت صبرنا

★★★★★★★★★★★★

رجع بيها الوكت للشاطي واحزانه
تنادي يالكلفني خويه هاي انه
جبت راسي يغالي وروحه ذبلانه
وجبت راس الغريب اليابس لسانه

والله والله .. ردينه للشاطي بنصرنه

★★★★★★★★★★★★