#زينب_السبي
#اساسية


راس عباس اليحاجيني و الحسين
خيتي عينج عالدرب لالا تـــعثرين
كلي خوية صبري
هالنوايب تجـــري
لحد رجـعتج للمديــنة ما تهجعين

〰〰〰〰〰1〰〰〰〰〰

خوية خوية.. شكد صعب راسك تشوفه عيوني
خوية خوية.. ريـــت هاي اللحظة لو ذبحوني
خويه خويه.. اخجـــل من كبالـــك يضربوني
خوية خوية.. ادري تاذيـــك الدمـــه البمتوني

مدللتـــكم انه يخوانـــي يطيبين
عكب عزي صرت بيدين الملاعين
يبقه الاعظم خدري
هالنـــوايب تجـــري
لحد رجعتج للمـــدينة ما تهجعين

〰〰〰〰〰2〰〰〰〰〰

دمعة دمعة...بشيلتي يا خـــوية عن وجهك شلتهه
دمعة دمعة... بيـــهه السياط اللي بيـــدية ادفعتهه
دمعة دمعة...تسولف الصرخة اللي من سكنة سمعتهه
دمعة دمعة... من تنـــادي بويـــة بـــنتك يتمـــتهه

الهضيمة من عكب عينك يالحسين
عداك مارحموني منعو دمعة العين
اشكي ضيمي واسري
هالنـــوايب تجـــري
لحد رجعتج للمدينة ما تهجعين

〰〰〰〰〰3〰〰〰〰〰

لوعة لوعة...من وصلنه الكوفة دلالي شعبته
لوعة لوعة... بمجلس ابن زياد من طبينه سكته
لوعة لوعة... خله ابن زياد راس الولي بطشته
لوعة لوعة... والعصه تبجي بالم تقبله اعله شفته

شلون اعاين عالطشت خوية يالحسين
اتذكرت طشت الحسن و الجبد نصين
شسوة بيه دهري
هالنوايب تجري
لحد رجعتج للمدينة ما تهجعين

〰〰〰〰〰4〰〰〰〰〰

ذكرياتي... مرت كبالي يعبـــاس من انظرك
ذكرياتي... بالطفولة انه اللي ربــيتك بزغرك
ذكرياتي... بحضني من تنام عن خدري اخبرك
ذكرياتي... و هسه راسك عالرمح لازم أعذرك

اسمعك خوية تناديـــني لتبـــجين
اتطمني راسي يخيتي وياج هالحين
خدرج هو خدري
هالنوايب تجري
لحد رجعتج للمدينه ما تهجعين

〰〰〰〰〰5〰〰〰〰〰

بصوت الاحساس... شفافك تتمتم حزن يختي العباية
بصوت الاحساس... لا تخليهه تميل و سمعي هاية
بصوت الاحساس... زينب و اسمج ستر لكل البراية
بصوت الاحساس... ابقه كافل للخدر رغم المناية

يكلي صح راسي اعتله خويه تشوفين
لاجن تحاميج عيني و عيـــن الحسين
يبقه يسعر جمري
هالنوايب تجري
لحد رجعتج للمدينة ما تهجعين

〰〰〰〰〰6〰〰〰〰〰

زاد وني... من دخلنه الشام خلونه بخرابه
زاد وني... طفلة حسين اللي عذبهه غيابه
زاد وني... فزت و صرخت تنـــادي آيــيابه
زاد وني... جابو الراس بطشت و الدم خضابه

صرخت بحســرة منو حز الوريدين
ياهو خضب لحيتك بالدم يالحسين
ماتت و ماتدري
هالنوايب تجري
لحد رجعتج للمدينة ما تهجعين

〰〰〰〰〰✨〰〰〰〰〰
✍🏻ذكرى الخفاف

(اسم المنبر :جروح الغائب)

مـاي الـنـهـر .. يم الـگـمـر .. يتوسل اشرب
ينگط خجل .. گال الكفل .. عطشانه زينب
للخوه وفاي -- متغرني ياماي
***************
اجت زينب وجابت بيدهه سكينه
گصدت لابو فاضل ناشدت وينه
سكينه حشّمت وعيونهه بعينه
عطشانه واريدك عمي تسگينه
عطشانين اخوتي وانت تدرينه
گال الهه ابشري وصفگ چفينه
....................
والله ونعم .. سيد الزلم .. ياعمي انته
راح ارتجي.. وانطر تجي.. جودك اخذته
گالت يرجواي-- متغرني ياماي
***************
اجه يم الشريعه ومن نزل بيهه
ولزم بيمينه جربه ودنگ عليهه
يگله المـاي اشـرب وآنه امليهه
يـگـلـه لـو امـوتـن ما اسـويـهه
انا مواعد سكينه كون ارد ليهه
واترسهه على كيفي لو ابديهه
..............
لــمّــن ســمـع .. گام ورجع .. يامـاي اگلك
ما اضوگ ابد .. ماخذ عهد .. هاليوم اذلك
انطيهه عيناي -- متغرني ياماي
****************
الماي يگله ادري بگلبك الجمره
اشرب يابو فاضل حته لو كطره
شال چفوفه ايده ودگهن بصدره
إذا اشرب شگول لفاطمه الزهره
طگ الماي بيده وخوّفه بنظره
ما اشرب واعوفن زينب الحره
................
هيه الهوه .. هيه الضوه .. اختي وستاري
لحيدر گلت .. واتكفلت .. ماخذ قراري
غدّاره دنياي -- متغرني ياماي
****************
اشرب يابو فاضل واخذ الحچايه
مو بس جربه وحده أترس هوايه
دار على الفرات وعاين لمايه
ما عوفن اخوي وداعت الرايه
ما اشرب اذا مايشرب ويايه
ما اضوگك واعوف سكينه شچّايه
..................
لرب السمه.. ولفاطمه.. منطيهه چلمه
اشرب إلي.. واترك هلي.. ياماي زحمه
اسگيهم وياي -- متغرني ياماي
****************
اشرب وآني اروح وياك لخيامك
واسگيهه العطاشه وترتوي ايتامك
بللهن اشفافك فدوه لاجدامك
وعد من عندي كلنه نصير خدّامك
زمجر عالفرات وصاح باحلامك
راسي ما ادـنـگـه لحضه گدامك
...................
ما انـحـنـي .. ما انثني .. لتلح عليه
لاجل الشرف.. صاح وهتف.. انطيهه اديه
رد چلمتك هاي -- متغرني ياماي
***************
ياماي الشريعه يالصرت غادر
مو آني الخسرتك نهرك الخاسر
حضره تصير عندي وعينك تناظر
تگصدلي لحضرتي واسمك الحاير
تتوسلني ارضه من تجي باچر
وتـطـوف وتـگـلي اقبل الزاير
..................
باچر لون .. دار الزمن .. وتردلي ملهوف
ماسامحك .. ماصافحك.. مگطوعه الچفوف
وتعاين لواي -- متغرني ياماي
***************

سيد علي المدني

بيادمعه اجازيك يل وين الاكَيك
منتظرك وصحت العجل دوم اسأل عليك
*************************
بلكي اشوفك بالمجالس عالعشك علمني عابس
بشتياقي كمت انافس وين اشوفك
يانده بروحي لكَيتك انه عالفطره هويتك
يشهد الله ما نسيتك وين اشوفك
واليحبك هذا راقي ترجمتلك اشتياقي
من دريت انته عراقي وين اشوفك
بخدي الدمع ظيف مر بيه لو طيف
عيني على درب الامل دوم اسأل عليك
***************************
خلصت عمرك محرم عله جدك تبجي من دم
ادري ساكن بالمخيم يا حبيبي
ارد اخفف من ونينك من البجي لا تعمه عينك
يابوصالح كلي وينك يا حبيبي
تغيرت بيه الملامح بنتظارك فكري سارح
والله احبك يا بوصالح يا حبيبي

عني يكولــــون بالمهدي مجنون
يالمرك احله من العسل دوم اسأل عليك
*****************************
بروحي تله وجرحي زينب وي نحيبك انه انحب
وابجي عالخدر التسلب يا هظيمه
من الخيم لاحتني جمره عله زينب رايد اقره
ليلي متعود اسهره يا هظيمه
اقره زينب يا غريبه هله هله شهل المصيبه
الوحدج بالطف عجيبه يا هظيمه
امنيتي الوحيده اقـــره القصيده
وتردد انته المستهل دوم اسأل عليك
****************************
انته يالمالك حياتي ضايع وانته اللكَاني
يكلَبي انته وماكو ثاني هذا عهدي
اشملني مولاي بدعائك احسبني لو خيط بردانك
روحي الكَاهه بعزائك هذا عهدي
بأمرك اجيهه الشعائر للخدامه عمري ناذر
عمري اخلصه اعله المنابر هذا عهدي
والعنده غيره يقدس الشعيره
بهذا العهد انه اظل دوم اسأل عليك
****************************
تعينت بأجمل وظيفه خادم العتره الشريفه
اللعن بأهل السقيفه ديني واضح
انته طاووس العداله الله حياك بجلاله
المهدي دين الله وكماله ديني واضح
كلشي مقرون بوجودك الله خالقني عله مودك
حتى اصيرن من جنودك ديني واضح
من ترفع اللواك احسبني وياك
المهدي يا خير العمل دوم اسأل عليك
*************************
بمسجد السهله اندعيلك كَلي وين الكَه مثيلك
والهجر مارد دليلك يمته ثارك
جلت اعليك النوايب ادري تتنفس مصايب
اطالب بثار الحبايب يمته ثارك
جدك ينادي ورضيعة رايتك فوك الشريعة
جنودك احنه تدري شيعه يمته ثارك
جيشك يموعود منتظرك تعود
كلشي تره عنك سأل دوم اسأل عليك
**********************
تمت—علاء الزيدي

خويه زينب حيل متغيره مشيتج
خويه زينب ماعرفتج من اجيتج
خويه عذريني تره بعيني السهم وما اجيت وياج طفيت الخيم
*************
متغيره ياخويه شكثر زينب احجيلي اشلونج
محنيه تمشين شعجب ومخطوف اشوفن لونج
اشبيها اديج امحركه وشبيها حمره عيونج
ليش من اجيتج باوعت بيدج لزمتي امتونج

خويه وينك ليش من شفتيني صحتي
خويه وينك عالهزل كالولي رحتي
يختي طاحن سوه جفوفي والعلم وما اجيت وياج طفيت الخيم
************
شلونج تكلي شغيرج متكلي خويه شلوني
اشلوني وأكل أيدي الحبل شلوني شكثر سبوني
شلوني واجه ليه الشمر وخلاها زركه امتوني
شلوني وحركها خيمتي شلوني وسبيه اخذوني

شلوني خويه حيل هاليوجعني متني
شلوني خويه هذا حالي من عفتني
خويه حته الطفل منهم ما سلم وما اجيت وياج طفيت الخيم
*********
من عندج اشكد مستحي وخجلان خويه اهوايه
كتلج اجيب الماي الج ونطيتج انه احجايه
من جودي صابوه بسهم وتبده زينب مايه
خويه استحيت ارجع بعد ابلا جفوف ورايه

ما اجيتج خويه زينب سامحيني
ما اجيتج بالعتب لا تجرحيني
حاولت ارجع لجن حيلي انهدم وما اجيت وياج طفيت الخيم
*************
شكالولك عليه بعد من استحيت وماجيت
كالولك شكد حشمت كالولك اشكد تانيت
كالولك عله التل رحت وشكثر بسمك ناديت
كالولك أبين الزلم ياخويه أركض ظليت

راح خدري شسولفولك عني كلي
راح خدري وجان ما ينشاف ظلي
من صحت عباس اشوفنه ابتسم وما اجيت وياج طفيت الخيم
*******
كل حيل مابيه بعد فراكك تره شيبني
عباس لو انته عدل ماجان واحد سبني
خويه اركضت للمشرعه وينك صحت خال ابني
يا خويه اريدن فزعتك كام الشمر يضربني

فاركتني وعطشت اخيامي بغيابك
فاركتني وطيفي مجروح عله بابك
طاح حيلي وياك من طاح العلم وما اجيت وياج طفيت الخيم
*********
اهتز وهز حته الرمح يازينب من يضربوج
وياخويه ادنك واستحي بذاك الحبل لو جروج
هيجي يصير بحالتج وحيل انهضم لو شتموج
نظراتج تسولف عتب وجم مره زينب فجعوج

من اشوفج تسعر النار بدليلي
من اشوفج ينهدم ياخويه حيلي
شما اعاين ناكتج انزف الم وما اجيت وياج طفيت الخيم
******
تمت
ميثم العمري

قصائد شهر محرم 1440...ليلة العباس

يعباس----زينب اختك نادتك
يعباس---خويه ترضى شيمتك
                  ؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
خويه يالكافل اصيحن يا نهار ايامي
الحك الحك يابوفاضل خويه لم ايتامي
خويه بالبر همنه نركض من لهيب اخيامي
وآنا من جمر الخيام امحركات اجدامي

يبو الجود----يالجبتني ابصايتك
يعباس------خويه ترضى شيمتك
                  ؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
ياكفيلي اخلاف عينك تقبل ايبجوني
وآنا اتنطر فزعتك والزلم شافوني
انت جنت احجاب طولي اليخفي كل مضموني
وهسه جم ديوان عكبك باجر ايدخلوني

تمنيت------موتي حان ابموتتك
يعباس-----خويه ترضى شيمتك
                  ؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
آنا حشمتك واعرفك ما تخيب اضنوني
ترضى يابو الغيره اختك والعدى ايضربوني
وللسبي لو ما تجيني باجر ايمشوني
شحجي لو نشدوني عنك وآنا تجري اعيوني

والعيون------تجري دم ابغيبتك
يعباس-------خويه ترضى شيمتك
                  ؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
يالجبتني وياك للطف وانت تحدي اضعوني
وهسه عالهزل يخويه ودهم ايركبوني
وينه جف الدكلي صدره وكلي ما ياذوني
شو تركني ابنص وحوش الماضن ايرحموني

يوفاي--------ياللي خدري ابعصمتك
يعباس--------خويه ترضى شيمتك
                  ؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
انت كافل خدري انت وانت سبع الكنطره
لوتغيب اعليه يعني هذا يوم الآخره
تذكر ابيوم الشبج جفي ويجفك حيدره
وكلك اختك هايه خلها ابنص عيونك جوهره

ولون يوم--------نادتك واترجتك
يعباس---------خويه ترضه شيمتك
                  ؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
يامن امأذينه فكدك ياكفيل العيله
وااا خويه اغياب شخصك آنا مابي حيله
ابرها رد هسه بالطف خويه راكب فيله
واعلى صدر حسين سحكت يابوفاضل خيله

والايام-------ردت وما ردتك
يعباس------خويه ترضه شيمتك
                  ؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
خادمكم فراس موحان الساعدي

شاعر اهل البيت السيد علي المدني:
زينب ( عليها السلام )  تقصد لكفيلها العباس لتشكره ..

 شمس الله كصدت للكمر  .. زينب تعنت للنهر
امن بعيد وتشم ريحته .. كامت تون لونته
  زينب تعنت للنهر زينب تعنت للنهر
***************
من طفت نار المعركه و وحيده ظلت بت علي
كصدت لنهر العلكمي والحزن نار ويغتلي
عباس اسمع جلمتي ظليت وحدي بلا هلي
جيتك يخويه اتشكرك طايح  واشوفك كافلي
……………
مستحيه اجيتك واعتذر .. من غبت طكاني الشمر
من سمع سالت دمعته  كامت تون لونته
  زينب تعنت للنهر زينب تعنت للنهر
*************
يا خويه ماريدن عذر آنه اللي جيت اتعذرك
وفّيت يانعم الاخو بهالجيه اريد اتشكرك
خلّيني ابوسن هامتك خلّيني اشمّن منحرك
ياكمر ياحلو الوجه ياخويه گلّي شغيرك
………………
مشكور اكولن للابو .. اختارك لزينب اخو
ميت وتنكط غيرته  **  كامت تون لونته
  زينب تعنت للنهر زينب تعنت للنهر
***************
كال الهه ردّي لخيمتج طايح وبالخوه يهم
كالتله ياخيمه البقت بالحصل هم عندك علم
كال الهه حركوهه اظن دخان اشمّن بالهدم
كالتله اخوتك عالثره واختك وحيده بلا زلم
……………
وحسين اخيك عالثره .. هم تدري كطعو منحره
وشفافه حرك شافته    كامت تون لونته
  زينب تعنت للنهر زينب تعنت للنهر
*************
شبكت اخيهه ودنكت من عدهه يتناكط ورد
وبروحه يحضنهه غده يحضن شلون بلا زند
نابت بنص عينه سهم ماكدرت لعينه تصد
وياك اجيت لكربله ارجع ويامن من ارد
……………
وسكينه نطرت ردتك .. متروسه ترجع جربتك
تنزف اخيهه هامته  كامت تون لونته
  زينب تعنت للنهر زينب تعنت للنهر
*************
ماقصّرت يابو الفضل مشكور وشويه الشكر
جفّك وعينك قدّمت بيد الله ياخويه الامر
باري العيال بغيبتي معروفه انتي ام الصبر
لحسين كوليله طلب عباس يلتمسك عذر
……………
مشتاك اشمّه واطمئن .. كال الهه ويغمض جفن
لحسين ينده سمعته  كامت تون لونته
  زينب تعنت للنهر زينب تعنت للنهر
*************
وداعة الله ياكمر راح امشي ووداعك صعب
راح امشي عنك بس جسد يمّك اظل روح وگلب
وشلون اردن للوطن وبدونك شيگضي الدرب
لايتامك بيا عين اصد لام البنين شلون اطب
……………
طاحو اگلهه الاربعه .. والغالي يم المشرعه
وين الكه مثله وطيبته  **  كامت تون لونته
  زينب تعنت للنهر زينب تعنت للنهر
***************
سيد علي المدني

الهلال

هل هلالك عاشور .. گلب احبابك مكسور
آنه الخادم يحسين .. وانطر چلمة مأجور
***********
انا متاني الليالي العادهن عشره
.. واهل عبره ..
انا المنطي الوعد لحسين والزهره

شلون اسمع شمر گاعد على صدره
.. يحز نحره ..
ما تكفيني لطمه ياعلي وحسره
.....................
كون يحز نحري ويا .. موبس اصرخ ويلا
كون الطم واعمي العين..وانطر چلمة مأجور
***********
يهل هلال شهرك واذكر خيامك
..تجي ايامك..
واذكر خيل اميه السحگن عظامك

اطگ صدري بمحرم وابچي لآلامك
.. عله ايتامك..
تراب اقبل اصير اتسحگه خدّامك
...................
عاشورك رد ردود .. والبست هدومي السود
خادم راح ابقى سنين .. وانطر چلمة مأجور
***********
وحگ من ساوه سبعه ومن رفع سبعه
.. اهل دمعه..
واصيحن ما اعوف حسين يالبضعه

الكسر ضلعچ يزهره هم كسر ضلعه
.. بتر صبعه..
عهد ما انعه غيرك بس الك انعه
...................
راح الطم وابچي هواي.. عالمحروم من الماي
عالصدر اطبع چفين.. وانطر چلمة مأجور
***********
اون واذكرهه زينب لو محرم هل
.. على الهزل ..
ترد وحبال بيهه واختنگ وازعل

اجتهه الخيل فزعه وهيه فوگ التل
.. غدت تسأل..
بلايه اخوتهه ظلت كلشي ماتندل
.....................
چانت تحميهه سباع .. وسفه تطيح على الگاع
عالحره الطم خدين .. وانطر چلمة مأجور
***********
يهل واذكر رقيه والجره عليهه
.. وبواچيهه..
يطگهه المارحمهه وجر تراچيهه

بطشت راس العميد الچان يحميهه
.. يصد ليهه..
غدت تشبگله راسه وسوطه ياذيهه
....................
طفله وماتت عالراس ..صاحت وين العباس
راح ابچي على الميتين .. وانطر چلمة مأجور
***********
اخدمك راح اخدمك وادري بالخدمه
.. صدگ رحمه ..
اليريد تدوم لازم يشكر النعمه

الخدامه اخلاق طيبه ومو فقط چلمه
.. صدگ زحمه..
اذا واحد يخدمه بس يزعل امه
..................
الخادم ماياذي الغير .. ويحب يسوي الخير
طيب موش بوجهين.. .. وانطر چلمة مأجور
***********

سيد علي المدني

#قصائد_ابا_الفضل_العباس

#رئيسية

لو لكيتوا اعلة النهر جثة رمية
لاتكلولة مشت زينب سبية
كلولة يعباس راحت رافعة الراس
------------.-1---------------
لاتكلولة الحسين انسحك صدرة
لئن مايدري الغريب انكطع نحرة
ولاتخبرونة بخيامي التشب جمرة
وضلموا اطفالة بغيابة وصرنة اسرة

النار تجوينة وننادي بأسمة الحك
جم طفل جم طفلة خيل الغدر تسحك
مامهتمة باالناس راحت رافعة الراس
---------------.--2----------------
لسه مايدري سكينة عذبوهه
ولاتكلولة بناتك لوعوهه
راح يزعل لوسمع زينب سبوهه
واعلة نوك السبي تبجي وركبوهه

خاف من يبجي دموعة تلجم العين
لئن سهم العين لسة بعينة همين
ينشد ابو النوماس راحت رافعة الراس



-----------------3.--------------------
كولي زينب تعتذر منك ينوماس
ماي من بعدك ترة شربت يعباس
والله منك تستحي يارفعت الراس
زينب اتشربك اجت منعوهه الارجاس

رادتك تشرب كبلهه يابو فاضل
هي مثلك كفيلة واخت كافل
رفعت راية احساس راحت رافعة الراس
-------------------.4--------------------
عوفوا جتفهه الحبل عوفوا جملهه
احجوله عن خطبتهه بالكوفة وفعلهه
خلت ابن زياد حاير من سألهه
هاي زينب لوعلي التحجي شيكلهه

لاتكلولة الحسين ابلاية خنصر
ولاتخبرونه الرضيع ادمومة تمطر
زينب علي تنقاس راحت رافعة الراس
-------------.------5--------
لاتكلولة هوت من الجمل وين
طاحت اعلة الكاع شبكت جسم الحسين
خاف ينظرني ولو خليتة بس عين
شلون يرفعني اذا ماعندة جفين

ابمحملي اعلة حسين راسي اني طبرتة
خاف يسمعني الكمر ليش ابجي سكتة
رغم خشوم الارجاس راحت رافعة الراس

الخادم حيدر موسى الرميثي

منهاج محرم الحرام ١٤٤٠ هجري

ليلة الخدمة الحسينية المقدسة

قصيدة بحر الطويل ( طور كربلائي )

خادم وأفتخر لحسين ناذر هالعمر كلّه
بكرامه وملك عيّشيني لا منّه ولا ذلّه
…………………………………………………………………………………

تربّيت آنه للخدمه ناذر عمري وسنيني
أمنيتي گلت ياريت يقبل خدمتي حسيني
هالمنبر الربّاني ملك عايش امخليني
رفعة راس درب حسين
يالخادم وتحصل وين
هالنعمه دگلّي امنين

بس عند الحسين وكون هذا الدرب تندّله
…………………………………………………………………………………

تندّله بتواضع ريت تمشي هالدرب سالم
ميفيد الغرور إيّاك ترجع خاسر ونادم
ربنا يبارك بعمره كونه مخلص الخادم
حسين إنطانه كل عمره
شنوافي شما نقره
هدفنه نظرة الزهره
ترعانه الزچيه انچان عرفنه حسين نوصلّه
…………………………………………………………………………………

أجدد هالعهد وآنه صفه كل يوم عاشوري
لازم أخلص الخدمه تكليفي تره ودوري
سفينه حسين للخادم خضت بزوده بحوري
أبحر للأمان أسعه
بفضل اللطم والدمعه
عمري يشبه الشمعه
أذوب بخدمة المظلوم وبعيني الوفه يحله
…………………………………………………………………………………

مواكب تذكر الظامي مجالس والدموع تسيل
ما بين اللطم والنوح والتشبيه والزنجيل
شعائر ربنا خط أحمر ممنوع العذول يعيل
هالخدمه شعائرنه
يوم الحشر تنصرنه
والزهره تبشّرنه
واليبغضنه ما يربح وبهذا الحقد خلّه
…………………………………………………………………………………

اني اتطوعت خادم لحسين ونواعيّه
أنعه الفجعه واقراها وانحب على المسبيه
كل لحظه الحنين يزود ريت اللطم ليليه
لو كل العمر عاشور
ما أتعب بهذا الدور
أقره والگلب مفطور
على الطف ودموعي تسيل علّه تنافس العلّه
…………………………………………………………………………………

لآخر يوم من عمري دمعي ما يسد بابه
باچر يشفع الظامي والخدام أحبابه
مد العمر گلبي يصيح آه يحسين ومصابه
ليليه العهد دايم
ليليه الدمع ساجم
لحد ما يظهر القائم
وآني لسيدي ومولاي قليل شما أقدّمله
…………………………………………………………………………………

خادم الإمام الحسين عليه السلام

عمار هليل الواسطي

محرم الحرام ١٤٤٠ هجري