#شهادة_الامام_علي ع
ـــــــــــــــــــــ

إستشهاد الأمام علي. ع.

عــلي غدروك لو غدرو نبي الرحــمن
عــلي صابوك مــثلك صــابو القرآن
وياك الحق علي دفنوه••دين المصطفى هتكوه
•~•~•~•
تــدافع عالنــبي ودينه عشت مغوار
عجيبه إنت إنطبر راسك عــلي الكرار
إنت بمــسجــد الــباري چنت خطار
يــوم المــحشر الخالق يــريد الثار

يحامي الجار إلك رب السمه غاضب
تــره الجــبار بــدمك باجــر يطالب
ينادي الضد علي غلوه• دين المصطفى هتكوه
•~•~•~•
وصه أصحابه أبو القاسم على القرآن
إوصــــاهم عــلى العتره نبي الرحــمن
كــــاللهم عــــلي روحي وأنه الجثمان
كــالو عــالنبي يــهــجر بني الشيطان

على الأعقاب من بعد النبي إنكلبو
كََّبل أصحاب صلاة المفتري صــلو
داره بغيبته حركوه•~•~دين المصطفى هتكوه
•~•~•~•
چم غزوه الــخضت بيها وهدمت أصنام
وسهرت اعلى اليتامه انت أبــد متــنــام
عــلي مــــادورت سلطه تدور أيــــتام
قــرينه الفــاتحه بعــدك على الأسلام

تره بفركاك الدين نكتمت أنفاسه
علي وياك محمد منطبر راسه
مثلك بالغدر طبروه•~•دين المصطفى هتكوه
•~•~•~•
علــي للعــالم بأســــره درس أنطيت
راسك بالدمــه إتوضه علي وصليت
سجدت وخصمك إختالك ولا إهتميت
ورب الكعبه فزت أني بفــخر ناديت

علي طبروك وبقيت تسبح وساجد
علــي خلوك إنت الأول الــــرابع
مامثلك شخص ظلموه•~دين المصطفى هتكوه
•~•~•~•
إلك سابع سمه إهتزت هتف جبريل
الليله إنفصمت العروه دماك إتسيل
زمزم يبــجي والمروه عليك بويل
نعه أدم نحب عيسى بچه إسماعيل

عليك الحور وأملاك الســمه ناحت
طحت مطبور وأنوار العرش طاحت
علي ساق العرش رضوه•~•دين المصطفى هتكوه
•~•~•~•

على اباب اليتم چفك. إله بصــــمات
وبكل غزوه إلك نسمع صدى الصولات
بكل محراب إلك ذكرى أثر سجــــدات
مودم من نزف راسك نــــِزف أيــات

دماك السال ظل يعبد علي الجبار
دماك السال يهتــف حــي عالكرار
يصلي بمسجدك خلوه•~•دين المصطفى هتكوه
•~•~•~•
للشاعر
نسيم
الحميداوي

لاستشهاد الامام علي ع

لازمه الباب اليتامه. ياعلي اتكوم بسلامه

ياعلي تصيح اليتامه وبيها حسره
كل يتيم ايده اعله راسه وعينه حمره
روسهم مطبوره جنه وجوه صفره
شلون يتظمد دليله البيه طبره

وكفت ابابك قيامه .... ياعلي اتكوم بسلامه
............ .............. ....... . ....

ياعلي الضايك خبزتك روحه يمك
شلون والوكلته بيدك همه همك
تجري بعروكك يتامه بدال دمك
مو خبزتك منطي الهم حتى إسمك

عاشو بظلك زعامه.... ياعلي اتكوم بسلامه
.................................................

من طحت مخضوب راسك ليك هرعو
فزعت النشمي اعله صرخه بساع فزعو
شافو الطبره غميجه وروح شلعو
رجعت المكسور ظهره بحنيه رجعو

وجوه جنت الها ابتسامه... ياعلي اتكوم بسلامه
......................................

بابك المكسور خاطر يدري بيهم
كام يعرفهم بسمهم من اديهم
حلفو ايترسونه حنه المن بجيهم
ياعلي كون بسلامه اترد عليهم

حطب عش ابلا حمامه.... ياعلي اتكوم بسلامه
...............

وي حسن وحسين صاحو ها يبونه
يلي شفتو الجرح بالله خبرونه
ليش ابو الحسنين اصفر صار لونه
همه مارحموك شتظن يرحمونه

نبقه عكبك للملامه .... ياعلي اتكوم بسلامه
...............

بالجفوف كلوب رفعت تدعي يارب
ياعلي اتكوم بسلامه كلها تنحب
حمر من كثر البواجي عيون زينب
بيت خالي من ابونه شلون ينطب

خايفه ايطول منامه...... ياعلي اتكوم بسلامه

ياعلي



فيصل المياحي

قصيدة اساسية لاستشهاد الامام علي ع

ملج الموت ..صاح بصوت .. هـاي الليله حايـر مـايــگـــدر .. يــم حــيـدر .. بس واگف يناظر
صعبه ياخذ الروح زينب شافهه تنوح
هاي الليله حاير .. هاي الليله حايـر
****
علي بلحظات اخيره والحسن يمّه
يوصّيه عله اخـوته ويـرفـع بعزمه
وزينب يـم ابـوهـه تـمـسـح بـدمـه
يتيمه شـلـون اظـل ياحيدر تكلمه
والالـّـم عــلــي والــزاد مــن هـمّـه
يشوف حسين گاعد يشتم بجدمه
..............
والعباس .. دنگ راس .. من شاف العقيله
صاحت آه .. موتي وياه .. والمدمع تسيله
حيدر وسفه مطروح زينب شافهه تنوح
هاي الليله حاير .. هاي الليله حايـر
****
اجه عـزريـل لـكـن حـايـر بـٲمـره
اجه مدنگ خجل ويعاين بحسره
وگف وعيونه صارت تهمل العَبره
لمح يم راس حيدر گاعده الزهره
زينـب يـم ابـوهـه تصيح متحيره
وحسين وحسن طاحو على صدره
..............
شاف احزان .. والقرآن .. گـاعـد يم عـضيده
شاف حسين .. يهمل عين .. زينب تلزم ايده
علي هاليوم مذبوح زينب شافهه تنوح
هاي الليله حاير .. هاي الليله حايـر
****
ملج الموت اجه يم حيدر يـشـوفـه
يـدري بـحـيدره يستقـبـل ضـيوفـه
زيـنـب عـذبـتـني تـنـوح مـلـهـوفـه
اشـوف وجوهم ياحـيف مخطوفه
علي بعده عدل عزريل اجه يطوفه
لـو بـيدي الامـر ما اوصـل الكـوفـه
...............
زاير جيت .. واعتنيت .. واگصد داحي بابه
هذا الليل .. هدّ الحيل .. من صاحت ييابه
ابو الحسنين مجروح زينب شافهه تنوح
هاي الليله حاير .. هاي الليله حايـر
****
وصل عزريل يمّه ويوصف احساسه
عله زينب شاف حيدر يوصي عباسه
مُحمَّد خـاتـم ادري وحـيـدر الـمـاسه
روح الـمـصطفـى حـيـدر واعـز ناسه
يـتـوضـه بـدمـع ويـصـلي يـم راسـه
عـلـيه دنگ يبوسه ويـشـم بانـفـاسه
..............
يبجي عيون..ربي شلون..صعبه الليله افوتن
للـحــمـّـاي .. نـگّـط مـاي .. آني الراح اموتن
صعبه لحيدر يروح زينب شافهه تنوح
هاي الليله حاير .. هاي الليله حايـر
****
عـلي لعزريل نـاده وگـالّـه اتوكل
بـس عندي طـلـب يتحقق الاول
يـگـلـه ياعـلـي بس احـجي تدلل
خـل اقنعهه زينـب خـاف ماتقبل
هذا امر الله بنتي وهذا المسجّل
سـلـّمـتـج لـعـد عـبـاس الـمـعـدَّل
...............
امشي وياك .. بويه هناك .. يمّك كل حياتي
وانت بـعـيد .. خاف يزيد .. يحرگلي عباتي
اظل وياك مسموح زينب شافهه تنوح
هاي الليله حاير .. هاي الليله حايـر
****
عـذراً فـاطـمـه عـذراً عـلـي وطـه
لتسهيل امري گال الفاتحه ٲقراهه
مـد ايـده عله عينه بهيده سدّاهه
تـنـوح ام الخـدر وحـسـين ويّاهه
عـزريـل اسـتحـه فاطـمـه بـجّاهه
هالليله عـظـيـمـه وصـعبه انساهه
...............
جبرائيل .. دمعه يسيل .. ويعلي نحيبه
والـمختار .. لـلــكــرار .. مشتاگ لحبيبه
باب السمه مفتوح زينب شافهه تنوح
هاي الليله حاير .. هاي الليله حايـر
****
سيد علي المدني

#شهادة_الامام_علي-؏

مصاب الطُهر يُبكينا فقدنا اليوم حامينا
سلامآ يا اخ الذكرِ فنارُ في الحشا تسرِ
فقدنا اليوم حامينا
***************
موعجبه العرش لو يذرف الدمعه
لأن شـــاهد محمد نـــعشك يشيعه
أدريس ويموسى ونوح مجتمعه
ومريم وي ابنها لحيدر تودعه
وجبريلُ غدا ينعى دمآ يبكيه لا دمعا
كسرت الآن لي ظهري فنارُ في الحشا تسرِي
***************
مو بس الملائك تسچب العبره
الفواطم والرسل واللوح والفقره
اليتامه الچانت تنام على شم صدره
شلون اليوم ابوها تودعه لكَبره
مساكين هنا تبكي لمن من بعده تشكي
قتيلا انها تدري فنارُ في الحشا تسرِي

يوفاي اليجيك وتعرف شعنده
علي حاشه اليزورك چفك يرده
هاليوم اليتامى وكل محب وده
دون المرتضى يتوسد بلحده
فليت النفس تكفيه فبالأرواح نفديه
وهل يكفي ترى عمري فنارُ في الحشا تسري
************
يا أول رجل مظلوم يا حيدر
هالعالم جميعه لمصرعك كبر
ما نكَدر على فركاك ما نكدر
بيك تلوذ باچر كلها بالمحشر
شفيعآ قد عهدناك ستلقانا ونلقاك
فذخري انت في حشري فنارُ في الحشا تسري
***********
يا حيدر تعال وشوف موطنه
تخلص محنه نوكَع يا علي بمحنه
الكسر ضلع الزچية وأجج الفتنه
كل هــــاي المجازر والفتن منه
فعهدآ لا ولن نركع حسينُ الطف لا نخضع
فلن ينفع غدآ عذري فنار في الحشا تسري
************
حيدر حسين الكرعاوي

واظحه الطبره وقراهه احساسك
شكوا بگبر الزچيه ابراسك
ابالك ايجوز ادفنتهه @@ من يصدگ فارگتهه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
الله رافع چم سمه بأسمه الجليل
وحده الك رافعهه ومخليهه
براسك الزهراء يدري وهل سماء
تشد راسك لو تصوب بيهه
هامتك بيهه تشدهه @@ من يصدگ فارگتهه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
الطبر راسك ياعلي صابه الجنون
لان جرحك مارضه يصافح دوه
شمس راسك يعني ماتنزف دماء
الشمس من تنجرح تنزف ضوه
من ضوه البظعه وبختهه @@ من يصدگ فارگتهه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
عرگ وجه السيف وانت عللسجود
ماترده وانت عند الباري ضيف
لچن زينب صعبه تتركهه وتروح
وانت تدري بغيبتك حسرتهه صيف
علهجر ماعودتهه @@ من يصدگ قارگتهه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
الدفعوا الباب علضلع ام الحسين
هسه باب الهامه هم دفعوهه
بهامتك محسن يحيدر هسه شاب
خاف كسروا ضلعه من صابوهه
هامتك ماناشدتهه @@ من يصدگ فارگتهه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
الشاعر بشار السامي

للتواصل مع خادم الحسين ع خادمكم ملا مصطفى الكربلائي على هذا المعرف
@MlleMastafa

علي جرحك لاتفتحه اگبالهه
كسر ضلع امهه لهسه ابالهه
گوم زينب لوشفتهه @ وابتسم لو گابلتهه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
مانست لليوم محسن والضلوع
ظمه جرحك ياعلي ارحم بيهه
علسلاسل لاحگه ومجلس يزيد
لاتخلي مصيبتك تسبيهه
الباب گبلك هم سبتهه @گوم زينب لوشقتهه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
لاتحسسهه علي رايد تروح
تدري لو حست يزيد اونينهه
انت يمهه ومن دمه مدمعهه صار
لان جرحك ياعلي بنص عينهه
دماك هاي الي بجتهه @گوم زينب لو شفتهه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
مو فقط والدهه ياحيدر تصير
انت روح اتعيش وي احساسهه
الهوه اتلقبه علي واتگله ابوي
حتئ تقنع من يطب بانفاسهه
چيه تشمك عودتهه @گوم زينب لوشفتهه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
لاتوصيهه علي وصيت وداع
بعده جرح الزهره ماخلص الم
يحترگ خافن گلبهه من الوداع
لاحگه علطفالهه وحرگ الخيم
انت مو لطف ردتهه @گوم زينب لو شفتهه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
الشاعر بشار السامي

اللهم العن قتلة امير المؤمنين

📄حديث اليوم

قال الإمام الكاظم(عليه السلام):
"من لم يتفقه في دينه لم يرض الله له عملا."

📔المصدر : بحار الأنوار.

اَلسَّلامُ عَلَى الاْئِمَّةِ الدُّعاةِ، وَالْقادَةِ الْهُداةِ، وَالسّادَةِ الْوُلاةِ، وَالذّادَةِ الْحُماةِ، وَاَهْلِ الذِّكْرِ وَاُولِى الاْمْرِ، وَبَقِيَّةِ اللهِ وَخِيَرَتِهِ وَحِزْبِهِ،