ولازم حتى هم يشاركو اما بابحاث او دعم مالي

لان اهو اليونان مثلا في السنة اللي فاتت هي وتركيا ( اسطنبول ومناطق غرب تركيا ) جتهم عواصف رملية جاية من الصحراء الليبية

حرفيا عجاجات اجدابية وصلت فيهم

وايطاليا وفرنسا كذلك بشكل اقل

فرنسا يودي تتأثر بشكل اكبر من الجزائر لو صار فيها تأكل غطاء نباتي

لكن زي زا قلت مش غير احنا منضرين حتى هم ينضرو ولازم يشاركو لو صار فيه حل او حاجة هكي

وتبو الحق ولا مصلحة اوروبا كدول من مصلحة ليبيا كدولة بشكل خاص وشمال افريقيا بشكل عام لكن ليش قلتلك كدول لان اللي يتحكمو في مش دول بل سياسيين واصحاب مصالح هو مرات مصلحتة متجيش بكل من مصلحتك كسياسي عالمدى القصير فعادي عندة يهملك لكن عالمدى البعيد كدول ليبيا لو مكانش فيها استقرار امني حتستمر موجات الهجرة الغير شرعية ليبيا لو مدارتش مشاريع استصلاح وخط اخضر اوروبا حيوصل فيها التصحر ليبيا لو ماستقرش وضعها الامني اوروبا امداداتها من النفط والغاز حيستمر ياخذوها من مصادر اقل امانا زي الخليج اللي الله اعلم في المستقبل من يعرف يتسكر المضيق او لا وهم روسيا قاعطعين معاها العلاقات الملاحة الجوية التجارة مع افريقيا كل هذي حاجات تبي دولة ليبية مستقرة ومتمكنة لكن يودي زي ما قتلكم هاذم سياسيين مش دول وعمر السياسي مش زي عمر الدولة

خلني نمسح ونمشي نوكل الشواشيو

جا الضي

بما ان شوية والفجر يأذن وفيه ضي واليوم معنديش موعد غرامي مع جلد الذات اشهد بالله نبي ناخذ راحتي ونعلق على منظر انا نشوف فيه الفترة الاخيرة

في الفترة الاخيرة نشوف في اكثر من جساب على منصات التواصل سواء فيسبوك تيك توك انستا يروجو لافكار خلني نقول انها دخيلة او عالمجتمع اللي هي ربط اللباس الحالي بالتخلي عن الموروث الثقافي

والحق انا نشوف في تركيز كبير بالذات على اللباس النسائي في هذي النقطة ففيه مناشير تطلعلي بين الفترة والاخرى تقولك والله العباية هذي دخيلة والليبيين مكناش نلبسو فيها كانن نساوين زمان يلبسن في فراشية
واول ما تشوف الكلام تقول طيب خلاص تبي ترجعي للفراشية البسي فراشية قصدي في النهاية الفراشية من اللباس الساتر اللي معليشي كلام

لكن الموضوع مش في الفراشية لاااا
فيه من يضيفلك صور من ايام الاستعمار لنساء ايطاليات لابسات قفاطين وطالقات شعرهن ويتم الترويج ان والله النساء الليبيات حتى هن كانن يلبسن هكي وهنا نوقفو يا معلم ونقولو ستوب لان واضح التدليس في الموضوع

لان الحقيقة تقول ان عزايزنا كانن يلبسن في الفراشيات وفيه منهن كان واصلهن العبايات ويلبسن فيها عادي لكن اما تجي تجيبلي صورة ايطالية وتقولي ان حناي كانت تلبس هكي وعادي في الثقافة الليبية لا انت هنا تدلس في التاريخ وتكذب بيش تدخل مفاهيم هي الدخيلة عالمجتمع مش انك تبي تردنا للاصل اللي كنا فيه

واللي يزيد يأثر على كلامي ولا واحد من اصحاب هذه الصفحات كان يتكلم على اللباس الموروث الخاص بالشباب قصدي يا حج شن الشاب الليبي مكانش عندة زي شعبي حتى انت بيش متجيش تقول يلا ارجعو البسوه وسيبو التوتة والجينز واللباس الغربي

بتقولي لا شبابنا يلبسو لا يا حجي احنا نلبسو في مناسبات الاعياد والافراح والجمعة بس اما كلبس كل يوم حتلقا ثلاث ارباع الشعب يلبسلك في توتة وسروال جينز

طيب ليش تركز على ارجاع الانثى للباس التقليدي حسب ما تزعم وانت تدس اللباس الايطالي الغير محتشم من تحت لتحت ومسيبنا احنا الشباب يعني
شن جدودنا ميلبسوش في فرملة
مش بذلتنا العربية في ليبيا اقصر من الهركة الموجودة حاليا ومش الاصح حتى هي نرجعولها لو تبي نرجعو للتراث الليبي الاصلي ؟

بالله قديش نلقو في واحد لابس جرد ولا عباة في ليبيا توة في الشارع

قلة قليلة جدا بدو يلبسو فيهن

المفروض لو كنت انت فعلا صادق خطابك للجنسين وداخل حدود المنطق والعقل مش تجيبلي وحدة ايطالية كاثوليكية لابسة قفطان تحت الركبة بشوي وشعر مطلوق وتقولي كان اسمها معيتيقة

هذا حرفيا دس السم في العسل