لان والله على هذا الحال القدام مرات تبدا درجة الحرارة توصل للخمسين بسبب الاحتباس الحراري

زمان كان فيهرغطاء نباتي يخفف لكن توة اللي يجي يبني تلقاه يقص ومفيش في المقابل زرع

متلاحظوش في الجفاف اللي صاير قصدي يناس ؟

تو هو اصبر

فكرة الحزام الاخضر مش جديدة وهلبا دول ادير فيها الصين بروحها دارتها اللي هي ان البلاد ادير حزام من الشجر وهكي ( يعني نزرعوه ) واللي ورا الحزام هذا يتم التركيز على زيادة الغطاء النباتي فيه والحزام الاخضر هذا بالذات في حالة ليبيا لازم يتركز الاستصلاحمن الحزام وارقا للساحل
بتقولي شن فايدتة خلني نقولك شن فايدتة
اول شي الحزام هذا بينقص الغبار الصحراوي اللي بيجيك من ريح القبلي في الصيف بشكل كبير يعني العجاج ما عجاج هذا بينقص
انت لما تبدا تستصلح الاراضي شمال الخط غنت بتزيد الغطاء النباتي الغطاء النباتي راهو يزيد في رطوبة الجو وينقص من درجة الحرارة بشكل معقول بل وممتاز مرات بسبب التبخر
يعني الزرع هذا كله بيرد ليك بان درجة الحرارة بتنقص وجودة الهواء بتصير احسن بهلبا
وتقدر تزيد مع الحزام مشروع لفرض طلاء المنازل باللون الابيض بتقول ليش نقولك اللون الابيض يعكس الحرارة اللي تجي فهذا بيزيد يخفضلك درجة الحرارة في المنازل وممكن حتى في الشوارع فيخففلك حتى على ضغط شبكة الكهرباء من التكييف
مشكلتك في تطبيق مشروع زي هذا تبي موارد مائية ومع احترامي ليبيا من افقر دول العالم مائيا ومحد ينكرها والنهر الصناعي مش حيقدر يوفرلك

مش حيقدر يوفرلك المياه اللازمة لمشروع استصلاح اراضي زي هذا فلازم منها موضوع محطات تحلية المياه الساحلية من جديد معاش فيها مفر هذي ولازم منها محطات تحلية الصرف الصحي حتى هو يرجعن عالطاولة مواردك المائية محدودة ولازم تعرف تحافظ عليها

وللعلم انخفاض درجة الحرارة من عمليات الاستصلاح هذي بيزيدلك من احتمال هبوط الامطار لان الرطوبة بترقا ودرجة الحرارة اقل بتساعد على زيادة الامطار

لكن وين

تي وين ومني يديرهلك هذا كله

ربي ياخذ الحق منهم ان شاء الله

المفروض حتى في الاستصلاح لو مثلا صار منها البلاد مش ليبيا بس تدفع عليه

ايطاليا واليونان وتركيا ومالطا حتى هم معنيين بيها

ولازم حتى هم يشاركو اما بابحاث او دعم مالي

لان اهو اليونان مثلا في السنة اللي فاتت هي وتركيا ( اسطنبول ومناطق غرب تركيا ) جتهم عواصف رملية جاية من الصحراء الليبية

حرفيا عجاجات اجدابية وصلت فيهم

وايطاليا وفرنسا كذلك بشكل اقل

فرنسا يودي تتأثر بشكل اكبر من الجزائر لو صار فيها تأكل غطاء نباتي

لكن زي زا قلت مش غير احنا منضرين حتى هم ينضرو ولازم يشاركو لو صار فيه حل او حاجة هكي

وتبو الحق ولا مصلحة اوروبا كدول من مصلحة ليبيا كدولة بشكل خاص وشمال افريقيا بشكل عام لكن ليش قلتلك كدول لان اللي يتحكمو في مش دول بل سياسيين واصحاب مصالح هو مرات مصلحتة متجيش بكل من مصلحتك كسياسي عالمدى القصير فعادي عندة يهملك لكن عالمدى البعيد كدول ليبيا لو مكانش فيها استقرار امني حتستمر موجات الهجرة الغير شرعية ليبيا لو مدارتش مشاريع استصلاح وخط اخضر اوروبا حيوصل فيها التصحر ليبيا لو ماستقرش وضعها الامني اوروبا امداداتها من النفط والغاز حيستمر ياخذوها من مصادر اقل امانا زي الخليج اللي الله اعلم في المستقبل من يعرف يتسكر المضيق او لا وهم روسيا قاعطعين معاها العلاقات الملاحة الجوية التجارة مع افريقيا كل هذي حاجات تبي دولة ليبية مستقرة ومتمكنة لكن يودي زي ما قتلكم هاذم سياسيين مش دول وعمر السياسي مش زي عمر الدولة

خلني نمسح ونمشي نوكل الشواشيو

جا الضي