قبل الكلام وكل شي انا مش وطنجي ومش من مؤمني نظرية ان الانسان شجرة لا يترك ارضه التي غرس جذوره فيها لكن فيه نقطة ديما نلاحظ في هلبا ناس تتجاوز فيها عند الكلام على السفر والاستقرار بالخارج بحجة عدم وجود اي مقومات الحياة في ليبيا من خدمات والى هنالك

انت في حياتك اخي العزيز قد تعاني من فقر مدقع ومن انعدام الامن المالي والغذائي يسيدي في ارضك اللي انت فيها حاليا خلنا نقولو مثال مدينة خيالية في دولة خيالية اسمها عيشستان والمدينة اسمها كرم خان
كان فيها رجل الحمدلله ربي انعم عليه بقليل من العلم لترك هذه الارض والدراسة مثلا برا عيشستان هذي

فمشا الرجل هذا ودرس في الجامعات برا واشتغل وقت دراسته في وظائف بسيطة وشاف الفرق الكبير بين عيشستان منعدمة مقومات الحياة وبين مثلا نقولو الدولة هي السويد اللي تعتبر من ناحية الفرص والخدمات من الافضل في العالم

الرجل هذا قرر يستقر بالسويد ونبذ عيشستان بشكل شبه كلي والسعي على جنسية السويد وبدأ يشتغل في السويد وربي انعم عليه بالمال وتزوج مرأة عيشستانية في احد زياراته لاهلة القليلة ومشا بيها للسويد وحتى هي حبت السويد وكل شي حلاوة بالفستق

الرجل والمرأة جابو طفلة زي العسل بسم الله عليها وحبوها وربوها وكانو ديما يحرصو ان جديها من الاب والام يشوفوها بالاتصالات والمكالمات والصور والفيديوهات
وبدور الاجداد مكانوش يفوتو فرصة يشوفو حفيدتهم

فجا يوم من الايام مشا الرجل و المرأة هاذم قررو يرجعو لعيشستان هذي بيش البنت تشوف عمامها خوالها اجدادها
حقهم وحقها قبل ما يكون حقهم انها تعرف اهلها

تجربة البنت في عيشستان كخدمات كانت سيئة هروب ضي واصوات رصاص اشتباكات درجة حرارة عالية مع انعدام تبريد مياه ناقصة وحتى لما جت كان الطقس صيف مكانش الطقس ربيع مثلا لتشوف الارض وهي خضراء لا شافتها وهي في اسوء مناظرها

البنت حبت عيشستان واهلها وكل سنة قعدت تعيط تبي ترجع عيشستان تبي ترجع لاهلها الصح مش السويديين اللي تشوف فيهم في الشوارع
فصار الاب والام من مرة لمرة يرجعو لعيشستان بس بيش يسكتو البنت
لكن جاهم بعدها ولد والولد هذا مشافش عيشستان فخافو انه لو رجعو عيشستان الابن يبدى زي البنت ويعيط ونبي نرجع حتى انا ويبدا بدل من واحد اثنين ولو صارو ثلاثة المصيبة اكبر يوم من الايام حينغصبو انهم يرجعو في النهاية بسبب اطفالهم

فقررو ان الطفل هذا ميرجعش عيشستان ابدا ولا يشوفها بس بالتلفون والولد مسكين لا يعرف اهله ولا يعرف خواله او عمامه او اجداده الا صور رقمية عالتلفون
يلا فيها خيرة شن يبي فيهم هو بس بيبدا يعيط بيش يرجع لجحيم البلاد هذي بحجة انه فيها اقاربه
ناض يودي تمشي الايام والطفل يعيش والاباء يعيشو والطفلة رغم مطالبتهم بانها تمشي وتشوف اقاربها يتم الرفض
جا يوم الطفل للاسف طاح من عالدروج امتاع الحوش ومشو بيه للمستشفى فبعدها جت شرطة الاطفال السويدية بحجة اهمال الطفل انها بتسحبه وبتحطة عند عائلة سويدية تربيه تربيه سليمة
الاب والام انجلطو وبعد شد ورد الاب والام قدرو يسترجعو الطفل لكن رغم انه من اول حادث بسيط صار تهدد وجود طفلهم عندهم قررو انه والله هو حادث بسيط وعادي مش حيصير من جديد فقررو عدم ترك السويد
تمشي الايام والاطفال يتربو في السويد الطفلة خلاص فقدت الامل حتى اهل الزوجين فقدو الامل في انهم يشوفو احفادهم
تمشي الايام واهل الزوجين يموت الجد الجدة العم الخال يموتو مرة حادث مرة وفاة طبيعية
وتجي الايام والتهديدات على الابوين بسحب اطفالهم تزيد بسبب اسباب اغلبها تافهة زي تهمة ان الاب متحرش بس لانه باس بنتة في العلن بقوة تهمة اهمال لان الطفل خلوه يلعب بالتراب فمرض
فقررو العودة لعيشستان لكن لما رجعو مرجعوش لقو اهلهم كلهم زي ما خلوهم
فلا الطفلة شافت من تعرفهم وزعلت على فقدانهم ولا الولد اصلا شافهم هو ولا هم استقرو في السويد
فالسؤال هنا هل فعلا الانسان حياته كلها كهرباء وخدمات وعادي يضحي بكل شي من تقارب ثقافي ودم وكل شي في سبيل الحصول على خدمات افضل ام لا

صح انقطاع الكهرباء مزعج
صح نقص الخدمات الصحية كارثي
صح صح صح كل شي صح
لكن في النهاية كل من سافرو بنسبة 99℅ وهم بنية الاستقرار
سيورهم ورجعو لبلدانهم يسكنو فيها رغم حال بلدهم اسوأ ما يكون

انا ما نجيبلك امثلة من راسي
سوريا اول مثال في تردي الحال الخدمي لكن معاها تجد الاف السوريين عائدين ومستقرين في بلادهم
الليبيين فيه من ترك ليبيا في عصر الجماهيرية ومع هذا قبل انه يرجع في الوقت الحالي رغم انه حاليا خدميا اسوء بمراحل من وقت معمر
العراق
افغانستان
كل هذه الدول

انا منقولكش اقعد غصبا عنك
لكن اللي نقولهلك انت مربوط بهذي الارض حتى لو تركتها
ابنائك في المستقبل قد يكونو ميشوفوش منها الا القبح كبلد ويحبوها
هذا لانهم عيشستانيين مش سويديين
لانهم ليبيين مش المانيين
لانهم عراقيين مش امريكيين
لانهم سوريين مش اتراك

رابطة النسب والثقافة والقرابة اكبر بكثير من انك تبيعها بمقابل كهرباء او خدمات عامة افضل

الله المستعان

بلادي وإن جارت عليَّ عزيزةٌ.

فرحن فرحن فرحن فرحن

غضبن غضبن غضبن غضبن