"Сәлам, микроб!" китабының рәссамы Фәридә Харрасова:

"Балалар тирә-юньне дөрес һәм эстетик яктан да дөрес итеп үзләштерсен өчен зәвыклы, матур сурәтләр булырга тиеш. Шул сурәтләр аша дөньяга карата гармоник, җылы мөнәсәбәт тәрбияләнә. Микродөнья, хайваннар һәм китап геройлары матур, чын булырга тиеш, чөнки бу китап укучыларның эмоциональ хәленә йогынты ясый."

Микробларның да үз матурлыгы бар! Килешәсезме?

СЕЗГӘ КИТАПТАГЫ КАЙСЫ РӘСЕМ КҮБРӘК ОШАДЫ?

Китапта сюжетлы рәсемнәр һәм күп кенә микроблар рәсемнәре бар. Иллюстрацияләр акварель техникасында, А3 форматтагы кәгазь битләрендә ясалган. Бу техникада рәсем ясау күп көч таләп итә. Рәсемнәр зәвыклы, эстетик яктан бик матур! Микроблар рәсемнәре куркыныч түгел, алар җентекләп, бик төгәл һәм дөрес итеп ясалган. Микроскоптан караган сыман. "Сәлам, микроб!" рәсемнәре баланы куркытмаячак, киресенчә, ачык, төсле, матур рәсемнәр баланың игътибарын җәлеп итә.

Әлеге видеода Фәридә Харрасова китап өчен иллюстрацияләрне ясагандагы хис-тойгылары белән бүлеште.

Бала-Сити мәктәбенең 2 нче сыйныф укучысы Сәид микробларга нинди матур тәбрикләмә/хат язган!

Татар теле укытучысы - Хакимова Кифая Васил кызы.

Сәид "Сәлам, микроб!" китабын укып чыккан һәм микробларның күбесе безнең өчен файдалы һәм әһәмиятле икәнен аңлаган. Мин бик шат! Микроблар да куаналардыр;)
Сәид, серле микроблар дөньясын өйрәнүеңне дәвам ит. Фәнгә кызыксынуларың сүрелмәсен. Бик зур рәхмәт!
Сиңа ныклы сәламәтлек, бәхет-сәгадәт, уңышлар телим! 😍

Казан шәһәренең 24 нче балалар бакчасында фәнни остаханә уздырганнан соң балалар микроб рәсемнәрен ясаганнар. Шуларны миңа бүләк иттеләр.

Тәрбияче - Сәфиуллина Илгизә Гаяз кызы.

Рәсемнәрдә инфузория-башмакчыкны хәтерләтә торган микробларны да күрергә була, шулай бит?

Кызыксынучан, саф, уңган, ихлас балалар, сезгә бик зур рәхмәт!

"Микробларның үзләренең микроблары буламы? Микроблар чирлиме?"

Асылъяр, соравың өчен рәхмәт!
Микробларның микроблары була!🦠

🟣 Мисал өчен, бактериофаг (роботка охшаган, шулай бит?). Бактериофаг - бактерияләрне зарарлый торган вирус (безнең өчен файдалы булган эчәклек таякчыгын да).
Вирусның баш өлешендә нәселдәнлек мәгълүматы саклана. Койрык аша вирус үзенең нәселдәнлек матдәләрен бактериягә кертеп җибәрә. Койрык җепселләре ярдәмендә вирус бактериянең тышчасына беркетелә.

🟣 Һәм Бделловибрио бактериоворус дигән ерткыч бактерия бар, мәсәлән.
Әлеге бактерия бик тиз хәрәкәт итә һәм башка бактериянең күзәнәк тышчасын тишеп, эченә үтеп керә. Шунда үрчи башлый. Ерткыч Бделловибрио саны арта, ә хуҗа-бактерия үлә.