Egeree Post

የጤና ሚኒስቴር እየተካሄደ ባለው የማህጸን በር ጫፍ ካንስር ክትባት ዘመቻ አንድ ሚሊዮን የሚጠጉ እድሜያቸው ከአስራ አራት አመት በላይ የሚሆኑ ልጃገረዶችን ሊከትብ ማቀዱን አስታወቀ
__

የጤና ሚኒስቴር ሚንስትር ዴኤታ ዶ/ር ደረጀ ዱጉማ፣ የእናቶች፣ የህጻናት እና የወጣቶች ጤና ዳይሬክቶሬት ዳይሬክተር ዶ/ር መሰረት ዘላለም፣ የሰበታ ከተማ ከንቲባ አልፊያ አብዲራህማን ከሌሎች የስራ ሀላፊዎች ጋር በጋራ በመሆን በኦሮሚያ ክልል ሰበታ ከተማ እና በአካባቢው የሚገኙ ትምህርት ቤቶች እድሜያቸው አስራ አራት አመትና ከዚያ በላይ ለሆኑ ልጃገረዶች እየተሰጠ ያለውን የሂውማን ፓፒሎማ ቫይረስ መከላከያ ክትባት ወይም የማህጸን በር ጫፍ ካንሰር መከላያ ክትባት አሰጣጥ መርግብርን ተዘዋውረው ጎብኝተዋል፡፡

ጉብኝቱ ወቅትም ሚኒስትር ዴኤታው እንደተናገሩት በሀገራችን የማህጸን በር ጫፍ ካንሰር ምንነትን ባለመረዳት እና ህክምናውን እና መከላከያ መንገዶቹን ባለመገንዘብ ለህልፈት እና ለተራዘመ የህመም ስቃይ እንደሚዳረጉ ገልጸዉ የጤና ሚኒስቴርም ላለፉት አራት አመታት የማህፀን በር ጫፍ ካንሰርን መከላከል የሚያስችል ክትባትና ሰፊ የግንዛቤ መፍጠር ስራ እየሰራ እንደሚገኝ አስረድተዋል፡፡ በዘንድሮው ዘመቻም ግጭት ካለባቸው ሶስት ክልሎች በስተቀር በሁሉም የሀገሪቱ አካባቢዎች እድሜያችው 14 እና ከዚያ በላይ ለሚሆኑ ልጃገረዶች እንደሚሰጥ የተናገሩት ዶ/ር ደረጀ በዚህም የአንድ ሳምንት ዘመቻ ከዘጠኝ መቶ ሺ በላይ የሚሆኑ ልጃገረዶችን ለመከተብ መታቀዱን ገልጸዋል፡፡ በየደረጃው የሚገኙ አካላትም ለዚህ እቅድ ስኬት የበኩላቸውን እንዲወጡ ጥሪ አስተላልፈዋል፡፡

የጤና ሚኒስቴር የእናቶች፣ የህጻናት፣ እና የወጣቶች ጤና ዳይሬክቶሬት ዳይሬክተር ዶ/ር መሰረት ዘላለም በበኩላቸው በየአመቱ ከ7ሺ በላይ እናቶች በማህጸን በር ጫፍ ካንሰር እደሚታመሙ፣ ከ5ሺ በላይ የሚሆኑትም ለህልፈት እንደሚዳረጉ አንስተው ይህንን ከመሰረቱ ለመካከል ዳይሬክቶሬቱ የማህጸን በር ጫፍ ካንሰር መከላከያ ክትባት የመደበኛ የክትባት አካል ሆኖ እንዲሰጥ እየሰራ መሆኑን ተናግረዋል፡፡ እናቶች የቅድመ ካሰር ምርመራ እንዲያደርጉ፣ ህመሙ የተገኘባቸውም በወቅቱ ህክምና እንዲያደርጉ፣ እድሜያቸው አስራ አራት አመት እና ከዚያ በላይ የሆናቸው ልጆች ክትባቱን እንዲወስዱና በሽታውን የመከላከል አቃማቸውን እንዲያጎለብቱ ፕሮግራሞችን በመቅረጽ፣ ግብአቶችን በማሟላት እና የግንዛቤ ማጎልበቻ ስልጠናዎችን እና የጤና ባህሪ ለውጥ ስራዎችን እያናወነ እንደሆን ተናግረዋል፡፡

የሰበታ ከተማ ከንቲባ ወ/ሮ አልፊያ በበኩላቸው ከተማ መስተዳድሩ ለዜጎች ጤና ቅድሚያ በመስጠት ለሚቀረጹ የጤና ፕሮግራሞች ሴክተሮችን ሁሉ በማስተባበር ተግባራዊ ምላሽ እየሰጠ መሆኑን ተናግረዋል፡፡ በዚህም የማህጸን በር ጫፍ ካንሰር ክትባት በየትምህርት ቤቶቹ እንዲሰጥ የተለያዩ ባለድርሻዎችን በማስተባበር ከንቲባ ጽህፈት ቤቱ እየሰራ እንዳለ ያስረዱት ወ/ሮ አልፊያ በቀጣይም ዘመቻው የተሳካ እንዲሆንና በመደበኛ የክትባት ሂደትም አካቶ ለመስጠት የታቀደዉ እቅድ ተግባራዊ እንዲሆን አስፈላጊውን እገዛ እንደሚያደርጉ አረጋግጠዋል፡፡

ዘመቻው ከተጀመረ እስካሁን ከዕቅዱ 35 በመቶ የተከናወነ ሲሆን በቀጣይ ቀናትም ዘመቻው ተጠናክሮ እንደሚቀጥል የተገኘው መረጃ ያመለክታል፡፡ #MOHE, #ET

1.57K views18:51