قصص💖واقعيه💖عراقيه

ـ يابة ما قصدي اجرحها بس تحسسني اني شكد ظالم ونذل من تسعى اتزوج نورا لو هسة من تواسيني انت حلها اكو مرة تواسي زوجها على حبيبته وين كرامتها مريدها تقدم تنازلات مريد يابة
امنيتي تحسسني اني ملكها وبس و متتنازل عني لغيرها ولا تواسي ع موت منافستها.

ضحك ابوية..

ـ يعني تتمنى تحسسك انت ملكها وبس و ما تتنازل عنك لغيرها لأجل راحتك حسب تفكيرها..مممم
اكلك شي راجع حساباتك واترك وهمك بنورا. انت تحب مرتك مدام تريد تحس بحبها الك..

باوعت لابوية وسكتت ما يفهمني..

شعوري لهالة الذنب مريد تنطي حقها بسهولة باجر مموجود اني شلون تعيش.. و الدنيا ذيب ما نأمن بيها.

رجعت لابوية اخذت ايده وبستها كدام نظرات الركاب الفضولين.

ـ الله يخليك يابة النا و عمرك اطول من اعمارنا وتبقى خيمة لاحفاد احفادنا...

ـ حيييييل ما بيه حيل بعد اربي احفاد احفادكم ابني تحجي صدك ادعيلي اموت وارتاح الدنيا عذاب الي.

ـ ادعيلك لو قرب موتك عمري البقى منه الك ويطول عمرك...

ـــ انت ليش ما تنجب وتبطل تدعي على روحك. تريد انجلط و ترتاح..
لك كم مرة تتعرض حوادث مميتة و ترجع الي والله يحميك..

ابني اموت ولا يصير بيك شي...

لزمت ايد ابوية حيل.. و درت للجام مال النافذة..
و اباوع حركة الاشجار ترجع ورى بحركة وهم العين نتيجة لسير السيارة امام...

ـ يابة اكلك اني منطيك عمري فداء و طالب من الله اموت قبلك ولا اشوف يوم انت مو بالبيت يابة الوجع الاكبر اذا انت تعوفنا.

ـ لا فاضل لا.. اخاف الله يستجابلك ولك تكسرلي كلبي.
ليش يابة هيج تريد تخليني ابجي دم عليك. يابة اني عشت عمري شريد اكثر انتم بعدكم مسيرتكم و اولادكم توصلوهم اني وصلتكم..

بقوا بس اخوتكم الصغار مؤمل ومحمد وعباس دربالكم عليهم ذول بزر شيب..

انتم ابهاتهم مكاني..

ـ عمرك طويل يابة كلنا فداء الك.

عبد الله...

وصلنا للناصرية.. اتصلت بالرقم الي اتصل بية اطلب العنوان...
من نزلنا

اشرت تكسي..
و كل شوي نخابر ع العنوان انطيت التلفون للسايق ياخذالعنوان.

و جان نوصل لمضيف شيخ من وجهاء شيوخ سوق الشيوخ..

على ما يبدوا منتظرينا مضيفهم بيه هواي ناس و جان المح مؤمل..

مبين مرتبك و مدنك... بعيونة لهفة بس يخاف يجي. يسلم شفته خايف من رد فعلي

ولك ااااخ منك...

ورى سلام وي الشيوخ اريد بس اجر ابني احضنة عرضلي الشيخ كدامي..

ـ يا خوي مو قبل لا تنطي الامان هو غلط من تركم كل هاي الفترة ولوع كلبكم بس بعد شاب واني جنت مسافر لو من البداية موجود ارد الولد لهلة بيومها.. اعرف لوعة الاهل وبهيج وضع مندري انقتل انخطف..

رديت.
ـ اله كل الامان بس حقي اعرف. وين كضة كل هاي الفترة...

وخرت الشيخ بلطف طاك كلبي على وليدي وهذا واكفلي بالنص جريته لحضني اشم بيه واكول بكلبي افيس يا ريحة اجدادي وهلي افيش يا بزر شيبي..

مكدرت اكتم دمعي. شهكت بعتاب..

ـ يهون عليك ولك هبطة الكيناه بالعدلي. اخذت حيلي وحيل امك.. ليش ولك. كل هذا على مود..

سكتت منا الوادم...

جان مؤمل حاضني يبجي

ـ هضمتوني يابة والله كسرتم كلبي كتلكم رايدها.. منطتوني ياها اعتبرتوني صغير طلعت منكم مراهق رجعت رجل.

اكرص بيه بسكتة وهمست عيب منا شيوخ ووادم.. وثمن كلامك شنو هذا النوب.

بس هو حجة
ـ كلشي يدرون بخصوص كسرتكم لكلبي.
حكمتهم بيني وبينك... شلون تخليها تروح لغيري

وخرت عنه و بكلبي كلت والله بيه بوكسي بس لو ما الوادم...
يعني كدام شيوخ وعشاير يحجيلي بالعشك.

ظليت اخزرة وهو يشتكي علينا شلون خدعناه...

هنا فاضل بوقت مناسب سكتة

ـ شو تعال ولك ما تسلم ع اخوك جنك ع مرة عندي انطيك من الي عندي.. شتكول

حضن اخوه..

ـ خلاص زواج بعد مريد بطلت..
افكر اسافر. وهم اكو بدائل لاحتياج كل رجل..

باوعلنا وبعيونة تحدي وتهرب بنفس الوقت...

كلبي كرصني ليش كل كلمة والثانية يلح يركز على شي خوفني تلميحة لهذا الشي ليطلع صح.

رديت

ـ ماكو سفر انت وين والسفر وين... وهسة اسكت.. منا الوادم.. عود بعدين نتفاهم...
الزلم يهدون بيه لان احتد صوتي من صفاقة ابني كدام العالم شلون فشلني ادري بيه متعمد.

ـ مولانا شاب ودمة حار و اخذته الحركة على روحة ناهي على بنت عمه وانتم خرقتم عرف النهوة و منطيتوها حقة لا تزعل...هذي عوايدنا.ظ

درت على الحجة و خزرتة وبحدة كتله.
ـ منو الاوجب برأيك شرع الله لو العوايد ممكن بلة تناقشني.

ظل يتردد وهو يكول

، هو شرع الله واكيد عوايدنا ما خرقت ال.

قاطعته.

ـ لا يابة خرقت وخرقت اولا النهي على بنت فقط لان بنت عم حرام قطع لقسمتها عليه حساب عسير.

شغلة ثانية من تنهي على بنت عم يعني احتمال تقبل تزوجك وهي مقابلة بس حتى لتبقى دون زواج وهنا الزواج دون رضى البنت باطل...

شرط الزواج يتطلب قبول الطرفين سمعت يابة مؤمل.
متريدك شلون اجبرها عليك وارتكب الحرام.

4.28K views08:13