ولوالديّ بأخذيَ القرآن يا

‏أكرمْ بتاجٍ بالوقارِ مرصّعِ! 😭

‏ولإخوتي وأحبتي وأقاربي

‏لاهمّ أشفعُ ، أنتَ أولى فاشفعِ

‏

مرحى ملائكة السماء تنزَّلي

‏واتلي القرانَ مع الأحبةِ واسمعي

‏قولي بآميـنٍ على دعواتِنا

‏فيضي بنوركِ يا ملائكُ شعشعي"💗!

امس وانا راجعة من السوق سمعت واحد يتناقش بصوت عالي جدا ، وياكرهي للصوت العالي خاصة بالنقاشات ، كأنه هو الصح والعالم كله غلط ، هو شخص يعني يمكن بعمر الخمسين، كان الموقف صار بالشارع ان واحد ماسك سكين بيطعن واحد عشان يسرق جواله وهو مو راضي يعطيه ، فهذا الرجال الخمسيني قال في نص النقاش ' الشرع حلل السرقة في بعض الاحيان ' !اختي طالعت فيني مستغربة ، وللأمانة ما فهمت وش سالفتهم من كثر ماهم صراخ !😩ولما واحد من الشباب الصغار بعمر العشرينات غالطه ، تحسينه شوي ويقوم يضربه بس لما واحد ثاني أيد كلام الشاب الصغير هدأ شوي وسكت.

، بغض النظر عن الازعاج اللي صار ، الواحد ما يكون متعصب لرأيه ويشوف نفسه هو الصح والعالم كله غلط بهالطريقة ،لأن كذا مابنتعلم ،وترا حتى اذا انا خالفتك بالرأي!تقدر تحاول تقنعني وتوضح لي ،المعرفة مايبغالها كبير وصغير ، عادي ممكن انت الكبير تتعلم من الصغير فخلوا دائما فرصة للناس تبدي رأيها ، والواحد مايتكلم في الدين قبل يتأكد ، لان ممكن واحد يسمعك ويطبق كلامك الغلط اللي انت قلته بدون ماتتأكد،الانفعال الشديد وقت النقاشات بيخلي رأيك غير قابل للقبول ، ف وش حلو الهداوة ، خلوا رأيكم يحتمل الخطأ ورأي غيركم يحتمل الصواب 💗🌿.

الحمدلله على عطاياه الحلوة ، عطايا الله كثيرة يعني والله ان لطف الله يحسسني بالأمان ، الدعاء شي جميل والاجمل لماتتحقق الدعوات قدامك ،في اي وقت ويمكن ماتكونين حاسبة حساب انها راح تتحقق الآن ، مرات اتخيل كذا يعني بكبر هالعالم الحمدلله اني انا الآن مسلمة وعلى الدين الحق ، يعني هذي اعظم نعمة والله ويمكن ما نستشعرها الا لما نتعمق ، يعني الحمدلله الحمدلله كثير اننا نقرأ القرآن ، واننا لليوم نحاول نصل لرضى الله ، ونلتمس لطفه بنا ومعيته فينا بحياتنا ،

الحمدلله على كل شي ، على الناس اللطيفة الحلوة اللي ربي جمعنا بها وعجيب الحب اللي ينبع من داخلنا لهم ، حتى اذا ما شفناهم ! لكن والله في ناس كثير اتوقع اذا ربي اكرمني بالجنة ! بدور عليهم هم اول شي قبل كثير ناس اعرفهم ، على كثر ذنوبي وتقصيري ، باقي ربي معاي وما صار وخذلني ودائما يحيط بي من جميع الجهات ، دائما لما ارفع راسي للسماء واتنفس بعمق احس براحة عجيبة واطمئن ، الحمدلله الحمدلله الحمدلله دائما وابدا 😭💗💗.

الدعاء يا اصدقائي ، نعمة من عظيم النعم اللي ربي انعم بها علينا ، وما ادري كيف كنا بنقدر نتخطى عثرات حياتنا بدون مانعرف الله ونستشعر وجوده معنا دائما ، كلنا اثقلتنا الذنوب وكلنا فينا اشياء سيئة بخاطرنا نصلحها ، الدعاء عنصر مهم في كل شي تسوينه ، مثلا بتختبرين؟ بتذاكرين وتدعين لأن ماتوفيقنا الا بالله والمذاكرة هي السبب اللي لازم نبذله ، طيب مثلا بتتزوجين ؟ اكيد بتحتارين لان قرارك راح يكون مصيري ، بس مجرد ماتدعين 'يارب اختر لي مافيه الخير ' تلقائيا اي شي يصير بتتذكرين دعوتك وبتطمئنين وتقولين بإذن الله هذا هو الخير اللي دعيت ربي يكتبه لي ،

الدعاء ممتع جدا ، واحيانا لاشعوريا تبكين ، يعني سبحان الله هنا تحسين ان فعلا الدعاء نعمة عظيمة ، فلاتملون من الدعاء ، دائما كرري دعواتك في سجودك بدون كلل ولا ملل ، واطمئني وتيقني بإن ربي راح يستجيب في الوقت المناسب ، واذا ماصار مثل مادعيتي؟ تأكدي ان ربي صرفه عنك لخير وقد يدفع به عنك بلاء؟ او تجيك جبال من الحسنات يوم القيامة ، تأكدي ان ربي لما يوعد ! فوعده ناجز وقوله صادق ، يعني لا تيأسين ابدا ،

والله يا اننا لو نجمع الرحمة واللطف اللي بقلوبنا حق العالم كله ! اننا ما نوصل ولا ربع لطف الله ، الله عظيم والله وحليم ، يمهلنا دائما يمهلنا ، مو بمجرد ما نخطئ على طول يعاقبنا ، وبمجرد ما نستغفر يفرح ويغغر لنا رغم انه غني عننا ،

استشعروا وانتوا تطالعون السماء ان ربي موجود ويحيط بكم ومو ناسيكم ابدا ، اذا جتك فترة مشقة وصعبت عليك ! ابتسمي وقولي' يارب انا صابرة ، يارب انا قد الامتحان بعونك ' علاقتك بالله بتقوى وانتي في كل شي تستشعرين وجوده وتوكلين امرك له وتدعينه بدون كلل ولا ملل وبكل يقين ،

طيب ممكن ربي اخر اجابة دعوتك بيشوف درجة اليقين والثقة به عندك ؟ وتخيلي تيأسين وقتها ؟ احنا بشر نعم واحيانا نتعب ويصيبنا فتور ، بس والله انه بيزول بمجرد ماتقولين ' اللهم اشرح صدري ، ربي اني مسني الضر وانت ارحم الراحمين ، تستغفرين ' ،

اليقين انك تشوفين انه مافي شي مستحيل في الكون بوجود الله ، بس في حاجة اسمها خير وشر وربي عارف اللي ممكن يترتب على كل شي ويختارلك دائما مافيه الخير ،

قبل كم يوم رحنا السوق و رجعنا وذاك اليوم ابوي عازم ضيوف في البيت ، رجعنا ورمينا الاكياس وانشغلنا ، اليوم الثاني لقينا كيس حق اختي مو موجود ، الظاهر تركناه بمحل ولا درينا ، وزعلت وبكت ومدري ايه ، فأنا واختي الصغيرة قلنالها بنشتريلك زيها ' وهقنا انفسنا بس ماعليه كله ولا تزعل '😂

بس كنا احنا وامي نقولها انه يمكن خيرة ماتدرين يعني ليه نسيناها ، يعني دائما الواحد يلتمس جوانب ايجابية في المشكلة ، طيب ممكن بعد هالمناحة نرجع نلقاها بمكان ؟ وتكونين رسبتي في امتحانك لانك ما صبرتي واحسنتي الظن ، وياليتها زعلت وقالت ماعليه الحمدلله كانت حزينة جدا قلك تعبت تدورها 🌚💔

بس ماعليه طلعت عندها خوات رهيبات ، حتى امي تقول الحمدلله عندها بنات زي كذا ، الظاهر كنا طايحين من عينها قبل الموقف😂 💗💗، فدائما خففوا عن انفسكم لاتخلون كل شي يكدر عليكم ، وثقوا بالله ، واحسنوا الظن فيه ،

ولكل وحدة تمل من الدعاء اذا طال وقته، لا تيأسين واستمتعي وانتي تمارسين هذه العبادة الحلوة ، ومعية الله فينا تستحق الكثير ، ورمضان الدعاء فيه مستجاب بإذن الله، فإغتنموه ورتبوا دعواتكم اللي تبغونها في نوت الجوال او ورقة او اي شي او مثلا اللي انتي خايفة تنسيها اكتبيها وقبل تصلين مري عليها عشان تتذكريها ووقت الصلاة تدعين بها ،

وكرريها دائما وقت الافطار وفي صلاة القيام وفي السجود اثناء الصلوات ، على يقين انه ربي راح يستجيب لكم ، فرصة عظيمة والله وقد لاندرك رمضان الجاي ،

فلذلك اغتنموا رمضان هذا وانتبهوا تكونون ممن لم تكتب اسمائهم في صفحة المعتوقين من النار ، لأنها بتكون خسارة عظيمة ، واسأل الله يبلغنا ليلة القدر ويجعلنا ممن نظر اليهم فرحمهم وسمع دعائهم فاستجاب لهم ،

لا تخلون شي يشغلكم عن التزود في رمضان ، لان شعور فوات الاوان والندم مابينفعك وقتها ، وانتبهوا انتبهوا تقولون ' انا دعائي مايتعدا سقف بيتنا ' يعني مايصل السماء ، انتي لما تقولين كذا ! معناها انتي لا متيقنة ولا واثقة بالله فبكذا انتي قاعدة تحرمين نفسك ،

حتى لو ماكنتي انسانة جيدة لاتقولين كذا ، وكونك تدعين الله هذي خطوة كويسة ، كل شي تبغونه يتغير فيكم ادعوا الله به ، وراح يسعد برغبتكم في التغيير ورغبتكم الملحة في ارضاءه ، خلاصة الكلام ادعوا بدون ماتملون وانتبهوا تفوتكم لحظات رمضان وساعاته ، اجتهدوا مابقى الكثير💗☁.