2:06 am
السلام عليكم ، اسعد الله صباحكم اصدقائي💗.
.
بيني وبينكم انا كنت وحدة ماتحب تسمع عن الموت ، او المحاضرات اللي تتكلم عن الموت ، وكل شي عن الموت ، تدرون ليه ؟ لأني اخاف ، للحين اخاف الموت ، وكلنا نخافه ، نخاف من تقصيرنا ، ولا ربي غفور رحيم ، حاشاه ربي جل جلاله 💗 نخاف من ظلمة القبر ، مجرد مانتخيل الوضع ، والمشكلة ان بعضنا اذا سمع محاضرة ، بكرة يقوم وكأنه ماسمع شي ، يرجع لمعاصيه ولا يحاول يصلح نفسه ، انا حزينة جدا ، وامنيتي الوحيدة هالوقت ان ربي يصلحنا ويحسن خاتمتنا ، اخاف القبر وظلمته ، لكن يارب ينور قبري يارب وقبورنا جميعا ، الله يهدينا ويصلحنا ولا يأخذنا الا وهو راضي عننا ،

ترا الموت كثر ، كثر جدا ، الحمدلله اننا للحين موجودين ، كل اللي يقرؤون كلماتي ، لا تطلعون وتخلون الكلام ، بتخافون ايه ! بس وربي هذي نعمة ان ربي يوريكم اشياء تصحي ضميركم ، قوموا نصحى على انفسنا ، قوموا نكفر ذنوبنا ، قوموا نتغير ! الله يلطف بنا ، يارب يالطيف اصلحنا ، خايفة وحزينة من تقصيرنا ، بالله عليكم هل في واحد للحين ما حس بسخف الدنيا ؟ باقي في احد يتكبر عشان وظيفته او شهادته ؟ باقي في احد شايل في قلبه على احد؟ هل باقي في احد ما يصلي ؟ متى اخر مرة فتحتوا مصاحفكم ؟ طيب حاولت تبدأ بحفظ كتاب الله ؟ مين بيشفع لك طيب بعدين ؟؟ لسا ماتسمع كلام امك ؟تتذمر من مطالبها ، تدخن؟ تسمع اغاني؟ يالله ياكثر ذنوبنا ، ياكثرهاا ياكثرهاا ،

كم عمرك الحين ؟ وايش سويت طول هالسنين تضمن به الجنة ؟ ماحد يضمن ، لكننا واثقين من رحمة الله ، لأننا بندخل برحمته ، ومراتب الجنة حسب اعمالنا ، الشيطان عهد على نفسه يغوينا اجمعين ، الا مين؟ عباد الله المخلصين 😢 احنا منهم طيب؟ ؟؟بس احنا نسمع كلام الشيطان ، هو يزين لنا المعصية واحنا نسويها ، بسببه نسمع اليوم المحاضرة وبكرة ننساها ونرجع لدنيانا 💔 كثرة المعاصي بتخلي قلوبنا قاسية والعياذ بالله ،

تزاحم الكلام عندي والله💔 ، وهي رسالة اتمنى تأخذون بها : قوموا من الحين ناويين التوبة ، وتائبين بإذن الله ، ارموا المعاصي وهيا لله ، عيشوا لدنياكم واخرتكم ، وهذه هي الحياة الطيبة ، اسألوا الله حسن الختام ، احنا نحب ربي يعفوا عننا صح ؟ طيب ليه ما نعفوا عمن ظلمنا مثل ما نحب ربي يعفوا عننا ؟ 💗 تصافوا ولا تشيلون في قلوبكم ، ليه ؟ لانها فانية ومافي شي يستاهل ، احنا هنا عابري سبيل ، بنزرع اعمالنا ، ونحصدها في الاخرة ، خلو غرسكم صالح نقي طيب ، اغرسوا حبكم في قلوب الناس وقابلوا المسيء باللتي هي احسن ، خلوكم من العناد وحب التفاخر وطول اللسان واخاطب بذلك نفسي اولا!! ثم اياكم

حبايبي يلا كلكم !من الحين تائبين بإذن الله ، وش قال حبيبنا محمد ؟ "توبوا الى الله فإني اتوب اليه كل يوم مئة مره " هذا حبيبنا صلى الله عليه وسلم ، واحنا اثقلنا عاتقنا بالذنوب وننام وضامنين نصحى بكرة ، والله فجأة نترك الدنيا ، بدون سابق انذار ، بدون ما يقولنا الموت بكرة بجي ، وبدون مايحدد لنا موعد ، اذا بلغت الروح الحلقوم ، ! انتهى كل شي والندم مابينفع ، وينك اول ؟ وينك سنين عمرك ؟ ويين لما ربي في اياته ينبهنا ونتهاون ، من الحين بنتغير ، وربي هو كل شي بحياتنا ، من الحين نتوب ، من الحين ! لا بكرة ولا بعد ساعة ، من الحين الحين ، احيوا علاقتكم بالله التي قتلتها المعاصي ، ربي كريم وغفور رحيم كان ومازال معانا دائما رغم انه غني عننا وفي من يعبده ويرجو جنته ، احنا اللي قصرنا وتهاونا ، احنا ما اطعناه زين ، ايه كلنا نخطأ ! لكن خير الخطاؤون التوابون ، اللي اذا اذنب استغفر لذنبه ، وندم ودعا ربه يغفرله وهو واثق برحمة الله ،

، الله يحب من كان هين لين ، الله يحب الانسان اللي يحب الخير للآخرين ، اللي يعفوا عن المخطئين برحابة ، حتى لو ما اعتذر لي! الله يسامحه ، ليه ؟ عشان ربي يحبني ويرضى عني ويعفو عني ويرفع درجتي ، ليه ؟ عشان انا همي الله ، وهمي ربي يحبني ، وهمي لقاء الله والجنة ، همي الفوز في الاخرة ، والدنيا هي البداية لحياة طيبة هانئة ونعيم خالد في الاخرة ،

لاتتركون الشيطان يستغفلكم ، وتراه بيجي يوم القيامة يتبرأ ! بيقول انه بريء ، بعد كل هذا !!! هو خلاص عارف مصيره ، وبيأخذنا معه ، بنسمح له ؟؟ لا والله لن نسمح ، احنا نحب الله ولولا لطف الله بنا ! لما دلنا على اشياء تصحينا من غفلتنا ، ربي يهدي من يشاء ، وكل عمل نسويه !لولا الله ما سويناه ، الله غفور رحيم لطيف حليم ، لكن اذا غضب ! فإن عذابه شديد ، الله يقينا عذابه ويحرم وجوهنا ووجوه ابائنا وامهاتنا واخواننا واهلنا واصدقائنا عن النار وجميع المسلمين والمسلمات يارب ، عزمنا بإذن الله صح !💗💗😢، واكثروا من دعاء الله بأن يرضى عنكم ، بأن لا يقبض ارواحكم الا وهو راض عنكم اتم الرضى ، ادعوا للموتى كثيرا ، واسألوه ان يريكم الحق حقا حتى تلقونه ، الله يسعدكم اصدقائي ، والله يبلغني رؤيتكم في اعالي الجنان ، على سرر متقابلين ، نتذاكر هذه القناة التي جمعتنا حبا وسعيا لله 😭😭😭💗☁.

ضموا اسمي في غيم دعواتكم
‏لعلها تمطر فرحاً لي ✨
‏ف هناك ملك يقول ولك بالمثل💗

شعور لما تستشعرين حديثك مع الله بقلبك شعور حلو ، لما تحسين انه معاك وبقربك ، لما تستغيثينه في عز المواقف ، امس وانا اصلي التراويح تعبت والحمدلله انه قدرت اتم الصلاة رغم انه ماقدرت اتفكر في الايات حتى ، واليوم خفت اروح واتعب مرة ثانية ففكرت اصلي في البيت ، بعدين قلت خلاص بتوكل واروح ، عالعموم رحت وفي نص الصلاة احس كأني بطيح من طولي تعبت مرة ثانية رغم اني على حد علمي بخير ، بديت اقول بقلبي ، يارب اعني يارب استر علي ، يارب اني مسني الضر ، بقلبي اخاطب الله ،سلمنا وجلسنا شوي عشان نقوم نكمل صلاة ،تنفست بعمق وقمت اكمل والحمدلله قدرت اتم الصلاة على خير ، الحمدلله يارب💗 ، اسأل الله العافية لكل مريض ، بس والله الحياة مع الله حلوة ، حلو اننا دايم نكون متمسكين بالله ومو خايفين ، وفي اشد لحظاتنا نستنجد به وعلى طول يكون معنا ، بالله مو من حق الله علينا نرضيه ونتقرب له بعد كل هذا ؟ ما الطف الله وما ارحمه بنا ، ما ألطفك يارب ما ألطفك😭😭💗💗

‏رمضان كفيل بأن يحدث في حياتك تغيُرا جذرياً نقطة تحول في عمرك فلا تجعلها تذهب هباءً منثورا استثمرها جيداً ، احفظ صيامك وكف جوارحك واغتنم وقتك ، تغنم💗☁.

لا يغب عنكم الدعاء لأخوانكم المسلمين ،لبلاد المسلمين في كل مكان ، تذكروا اخوانكم بدعوة عند فطركم ، اسأل الله ان يصلح الحال وينتقم من كل من يسعى لزعزعة امن المسلمين ، من يسفك الدماء وينتهك حرمة الله وحرمة هذا الشهر الفضيل يارب .☁

السلام عليكم ورحمة الله ، كيف حالكم ؟الله يسعدكم وينور دربكم يارب💗.
.
اخوي الصغير عمره كذا 3 سنوات ، دائما لما تكون برامجهم حقت الاطفال شغالة والبداية والنهاية فيها موسيقى واحيانا بنص البرنامج فدايم امي تقولهم اكتموا الصوت ، الحين صار هو اول ماتجي موسيقى يقفلها من نفسه،حتى اذا اخوي الثاني ماقفلها قالك يروح يفتنه عندي او عند امي 😂💗 فإيش يعني التكرار يعلم الشطار ، صح انه احيانا اذا عجبته مايقفلها الا اذا قلناله بس ماعليه شوي شوي ،💗💗☁

عاد كذا بدأت العشر الثانية من رمضان ، عشر المغفرة ، ويارب نكون ممن شملتهم رحمة الله في عشر الرحمة ، لا ينطفي حماسكم وواصلوا في الاجتهاد ، وكل ما اخطأتوا صححوا ، واكثروا من ذكر الله استغلوا هذه الايام جيدا وهيؤوا فيها انفسكم لإستقبال العشر الاواخر ، مستعجل الشهر جدا فأدركوه بالطاعات ولا تضيعون الوقت،💗☁.

زمن التمحيص

الشيخ بكر أبو زيد المتوفى عام ١٤٢٩
قال رحمه الله في كتابه حراسة الفضيله :

إنَّ المراهنة على اندثار هذا الدين بشعائره العظيمة و فرائضه ، بل وسننه ، مراهنةٌ خاسرة لم تفز يومًا منذ زمن أبي جهل حتى زمن أتاتورك ؛ ولكنكم قومٌ تستعجلون !

*واعلم - ثبَّت الله قلبك - أنَّ الإسلام لا يموت ، لكنه يمر بفترات تمحيص ينجو فيها أهل الصدق ، ويسقط فيها مرضى القلوب في أوحال الانتكاسة ، فاصبر واحتسب

واعلم أنه ستمر بك أيامٌ عجاف ، القابض فيها على دينه كالقابض على الجمر ، سيُحزنك الواقع ، وتؤلمك المناظر ، هذه المشاعر عظيمةٌ عند الله ، ودليل خيرٍ وقر في قلبك ، لا تنحرها بسكين الانتكاسة !

ويا أخي لا يغرنَّك في طريق الحق قلة السالكين ، ولا يغرنَّك في طريق الباطل كثرة الهالكين ، أنت الجماعة ولو كنتَ وحدك { إنَّ إبراهيمَ كان أُمَّة } كن غريبًا .. وطوبى للغرباء !

أخيرًا : اِعلم أنَّ خروجك من قافلة الخير لا يضر أحدًا سِواك ! ووجودك فيها فضلٌ من الله عليك ونعمةٌ أنعم بها عليك ، والخروج منها هو الخسران المبين في ثوب مواكبة الموضة الفاسدة والزمن الجديد المنحدر بالأخلاق المعيبة !

واعلم أنَّ شريعة السماء تسير غير آبهة بأسماء المتخاذلين ، تسقط أسماء وتعلو أسماء { وإنْ تتولوا يستبدل قومًا غيركم ثم لا يكونوا أمثالكم } ...💗💗💗😢

سورة الكهف ، والاكثار من الصلاة على رسول الله 💗.