السلام عليكم ورحمة الله وبركاته ، كيف حالكم اصدقائي ؟ الله يملأ ايامكم سعادة يارب💗☁.
.
كل واحد فيكم الحين يمر بذاكرته على اصدقائه مثل الشريط ، ويسأل نفسه هل اصدقائه صالحين ولا لا ، هل هم قاعدين ياخذون بإيده للجنة؟،ولا هل راح اكون انا وهم من اصحاب قوله تعالى ' الأخلاء يومئذ بعضهم لبعض عدو ' ولا من الاستثناء في قوله 'الا المتقين '؟ هذا سؤال مصيري يستاهل اننا نسأله انفسنا ، الصديق هو اكثر عامل ممكن يأثر عليك وانت مو مركز ، قد تكون صالح والحمدلله وتقول انه اصدقائك مارح يأثرون عليك ، وتدريجيا تلقى نفسك تغيرت ، ماراح اقولكم اتركوا اصدقائكم ! لكن راح اقولكم انتبهوا على انفسكم من رفقاء السوء، واذا كنت واحد منهم فأسرع وانتشل نفسك ، لا تستحي ابدا من انك تقول ان هذا صح وهذا غلط ، ولا تجامل على حساب اخرتك ، لا تسخر من احد عشان تضحك مع اصحابك ، ولا تسمع اغنية صديقك يقولك 'حلوة اسمعها ' ، وش فيها اذا قلت لصاحبي :' انا ما اسمع اغاني ولاعاد تقولي اسمعها وانت بعد لا تسمعها'؟؟، .

انتبهوا من الاصدقاء اللي تخجلون تسوون الطاعة قدامهم ، وعاشروا اصدقاء تخجلون تسوون المعصية قدامهم ، اكرر واعيد اصلحوا انفسكم قبل فوات الأوان ، ولا تجاملون في مسألة المعاصي مع الاصحاب ، فوالله ان يوم تموت !مابيدخلون معك القبر عشان يدافعون عنك ، ووالله ما بيقولون يارب اغفر له وسامحنا احنا اللي اغويناه ، بيتركونك بعتمتك لحالك ، وماراح ينفعك غير عملك ، لما تجتهدون في اصلاح انفسكم بتحتاحون وجدا انكم تبتعدون عن اصدقائكم السيئين ، وفي هالمرحلة انصحوهم واذا قالك شوف هالمسلسل ، او شوف فلان وش يسوي وفلانة كيف لابسة وضحك وطقطقة على الناس ، هنا وقفوهم وقولوا لهم انه مايجوز نضحك على الناس ، ممكن ربي يبتلينا بيوم لأننا ضحكنا على احد ! وتدرون اللي يغتاب احد قيل عنه' انه كمن يأكل لحم اخيه ميتا ' يرضيكم ؟ ، اذا حسيتوا انهم ما يستجيبون لكم ، لاتترددون في انتشال انفسكم منهم ،

ابتعدوا عنهم وادعوا الله لهم بالهداية ، والرفيق السيئ معك في الدنيا بس ، ومجرد ماتموت خلاص اعتبروا علاقتكم انتهت ، لايغركم حبهم واحضانهم وضحكهم معكم بالدنيا ، بتموت ويمكن يتعظون من موتك ويتوبون هم ! وتبقى انت بحسرتك ، يوم القيامة الرفقة السيئة بتكون كالأعداء ، كل واحد يلقي اللوم على الثاني ما بين ' انت اللي خليتني اسمع معك اغاني و بسببك انا صرت اتابع مسلسلات انت اللي كنت تحببني في السجاير وانت اللي كنت تقولي شوف اباحي والعياذ بالله وانت كنت تشغل اغاني في سيارتي ووو ، في هاليوم ماحد يحب يكون من اصحاب قوله تعالى ' فمالهم من شافعين ، ولا صديق حميم ' ، 💔

الرفقة الصالحة نعمة من الله ، وماعليك من طقطقة الناس والعالم ، لأن من يضحك كثيرا يبكي اخيرا ، كل شي بيظهر من لما نموت ، ومن لما تنقطع فرصتنا في الحياة ، انتبهو لنفسكم من اصدقائكم ، واسألوا الله الصحبة الصالحة، وتذكروا انه في قبورنا بنكون وحدنا ، والصاحب الصالح هو اللي بينور قبرك بدعائه ليل ونهار ، وبداية لاتعطون احد اغنية يسمعها ولا صورة خليعة يشوفها ولا مسلسل يتابعه ، اعطوهم القرآن يسمعونه المقاطع الدينية والمفيدة يشوفونها عشان تكون لكم صدقة جارية انصحوهم وساعدوهم على الخير ، لاتخلون لهم مجال للخصام معكم يوم القيامة ، كونوا غيوم ممطرة ، اينما مرت ! اسعدت ولا ضرت 💗☁

اضيؤوا عتمتكم بنور الكهف ، واكثروا من الصلاة على رسول الله 🌿.

الله يسعد شهد على هالقراءة الجميلة ماشاء الله عليها ، محظوظة بصحبتها والله، الله يجعلها من اهل القران الذين هم اهل الله وخاصته يارب يارب😭💗🌿.

اللهم اغفر له وارحمه وعافه واعفوا عنه ، اللهم اكرم نزله ووسع مدخله واجعل قبره روضة من رياض الجنة وجميع موتانا وموتى المسلمين اللهم واربط على قلب اهله واجبرهم جبرا يليق بك يارب العالمين💗

كونوا كالغيث؛ تروون قبور الموتى بالدعاء 🌿☁💗.

رسائلكم يا اصدقائي ، صنعت يومي الله يسعدكم على مشاعركم الحلوة ، ويجعل لكم من دعواتكم نصيب يارب ، شكرا لكم بعمق السماء يا احبابي ، والله يجمعني بكم في فردوسه الاعلى يارب ويغفر لي مالا تعلمون ويجعلني خير مما تظنون ، شكرا لكم شكرا💗💗😭☁.

اليوم 7 رمضان، ويا مسرع مرت ايام ضيفنا الله يطيب الاعمال ، متؤكدة ان فيه منكم اللي قاعدين يتصارعون مع انفسهم في ترك المعاصي ، وله لذة هالصراع اكيد ، تدرون ليه نجتهد ونحاول نزيد بالطاعات ؟ عشان في العشر الاواخر نبذل اكثر ، واقلها نقفل جوالاتنا عشان ما تشغلنا ، واذا ربي احياني بعدين راح اتكلم عن العشر هذه ، اللي للحين ما قامت ! باقي ما فاتك الوقت ، ويمديك الحين تقومين وتبذلين الكثير ، اللي للحين تتابع المسلسلات ،وتسمع اغاني ، وتضيع وقتها في الفارغات! تتذكر انها 30 يوم بتروح وما بترجع ، ويوم يعلنون عن انه بكرة العيد ! بتندمين كثير ، وتذكري ان في ناس تستغل الدقيقة والثانية ، وفمها ما يوقف ذكر ، ترضين انههم يتنافسون على المراتب العالية وانتي تضيعين وقتك وجالسة؟ فيالله ما فاتك شي كثير ولا تيأسين قومي انوي من الحين وكأنه رمضان اليوم ، اجبري تقصيرك ، وتسابقي مع المتسابقين !💗

هذه نعتبرها تجهيزات ماقبل الاواخر عشان نتقوى على الزيادة في العشر بإذن الله ، وترا انا وحدة مثلكم ماسكة نفسي عن اليوتيوب مسكة يعلم بها الله ،😂💗الا عن تعلم اللغة او البرامج الدينية، مو اني كنت اتابع مسلسلات او شي !لا لا الحمدلله بس انها اشياء مو مفيدة في الاخرة ، ويمديني اتابعها اي وقت ، اهم شي لا يفوتني الشهر💗 ، ماعليه ايام تستاهل نستغلها بعيد عن الفارغات ونفسنا تستاهل اننا ما نظلمها بالمعاصي في هذا الشهر الفضيل وفي كل وقت ، وشعور الندم على التقصير فيه بشع ، وضيفنا عجول جدا، فأدركوه قبل يفوتكم ولا تخلون شي يشغلكم عنه ،

صلوا صلواتكم وزيدوا عليها بالنوافل ، صلاة الضحى ، التراويح ، ركعتين قيام ، الوتر ، استغفار وتسبيح وتهليل ، ساعدي في اعداد الافطار ، صحي النايم من اهلك للصلاة ، تصدقي اقلها اعطوا من فطوركم لجيرانكم ، عودي نفسك تجلسين في سجادتك بعد الفجر تقرأين قران وتسبحين لين وقت الشروق وقومي صلي ركعتين كأنك حجيتي واعتمرتي، ادعي لك ولمن تحبين وللمسلمين ، اقرأي القران واستمعي له واحفظي منه ،اعزمي على التغيير وبتتغيرين بإذن الله ، وعن رحمة الله في قوله
‏"وإِنْ أتَانِيَ مَاشِياً أتَيْتُه هَرْوَلةً" !😭💗

الله غني عني وعنك ، ولما تسوين هالشي هو لنفسك ونفعه عائد عليك انتي ، لا تظلمين نفسك ، ويلا شمري عن سواعدك وتأهبي ، اي شي ماينفعك ويضرك اتركيه ، واي شي تستفيدين منه ومو معصية لكنه يضيع وقت ، خليه لبعد رمضان ، عاهدنا انفسنا قبل رمضان على التغيير ، وبإذن الله ما يخلص الا واحنا متغيرين ، الله يسعدكم يا حلويين ويجعلني واياكم في هذا الشهر من الفائزين💗💗☁.

200 مشترك ، أهلا وحبا اصدقائي الجدد
الله يجعلكم شاهدين لي لا علي يارب ، ويجعل هالقناة خالصة لوجهه ويارب يكون لها اثر طيب فيكم ، الله يسعدكم 💗🌿😢

السلام عليكم اصدقائي ، اسعد الله مسائكم 💗
.
الحين بعلق على ظاهرة ، يمكن كثيرين يشوفونها عادية وما يعطون لها اعتبار ، اللي هي تشغيل الاغاني في السيارة ، بغض النظر عن تحريم الاغاني كلنا نعرف انها محرمة ! ويمكن لأنه شفنا كل الناس صارت تسمع الا ما قل ، فصرنا مانهتم لحرمتها ، ولكن! يبقى الحرام حرام لو الكل سواه ، حتى لو انتي الوحيدة اللي ماتسمعين اغاني ! لا تتنازلين عن هذا الشي ابدا لمجرد انك تشوفين كل الناس تسمعه ، لان هذا مايخليها تكون حلال '' الحلال بين والحرام بين ''

المهم الحين اكيد في شباب في هالقناة ، وانا اتمنى انه تنتبهون ، الواحد مايدري وين يموت، فرضا مت بالشارع ! اموت وسيارتي كلها كانت اغاني!! ، تذكروا ان كل مننا يبعث على مامات عليه ، فإحرصوا على انكم دائما تكونون في حال يرضي الله ، بدل ما في الطريق تستمعون للغناء شغلوا قرآن ، او ! اذكر الله لين تصل ، مافيه اجمل من الشاب التقي الصالح والله ، لذلك اتركوا الركض وراء الدنيا ، واحنا ندري انه في اخر الزمان ! يكثر موت الشباب ، فنسأل الله حسن الخاتمة ،

الموت هو اكبر واعظ ، وبإعتباره كاسة ! كلنا راح نتجرعها ، لما تتذكره في سيارتك!صدقني بتستبدل الاغنية بالقران ، وحتى البنت اليوم تسوق ، لذلك النصيحة هذه لعمومكم ،سواء ركبتي سيارتك لحالك او مع احد اتقي الله ، بتاخذين ذنبك وذنب من ركب معك وسمع ! ركبتي مع اخوك وشغل غناء ، انصحيه وخليه يغير ، ولا تخلينه لين يغيرها ، ربي انعم علينا بنعمة السمع العظيمة ، وكثير فاقد هالنعمة ، طيب ربي لما يعطينا النعمة !نعصيه بها ؟ مو عيب علينا ؟ الله يهديني ويهديكم قولوا امين !

والله الاغاني لا تريح ولا شي ، هي سبب الحزن والاكتئاب وكل شي ، والشيطان مزينه في قلوبنا واحنا مصدقين الكذبة'' والاغاني تريح وتونس ووو'' واللي يسمع اغاني ما يقدر يملأ وقته قرآن ، وبلا نكذب على انفسنا ! قران واغاني ما يجتمعون ، ابدا ! خلوا كل مكان يشهد لكم مو عليكم ، السيارة نعمة من الله قولوا الحمدلله وسووا وقولوا واسمعوا فيها شي يرضي الله ، نظفوا جوالاتكم من الاغاني عشان لاترجعون لها ، واذا زليت وسمعت ؟ ارجع وتوب، صدقوني بيجي يوم تكرهونها من كل قلبكم ،

وتصدقون لو اقولكم اني عاهدت نفسي ما اروح زواجات ؟ الا اذا كانت محافظة ، وحتى اذا ما فيه زواجات محافظة بالدنيا والعالم ! مستعدة ما اروح ولا زواج لين يأخذ الله امانته ،ومارح اجامل بإذن الله ، حتى لو اروح قبل يبدأ الحفل ابارك وارجع او بعد الزواج ابارك ، ولو انه اقرب الاقربين ، يرضى عني الله ، ويسخط البشر!💗 اسأل الله يثبتني واياكم على الحق حقا حتى نلقاه ، لما تدركون انه ما احد بيدخل معكم القبر ! وقتها راح توقفون من ' بتزعل مني وبيزعل مني ' سوو اللي يرضي الله ويرضي ضميركم وماعليكم من القيل والقال ، كلنا لله والا الله ، وانا اليه راجعون ، الله يهدينا يارب 😭😭💗☁.

رحم الله دانة القحطاني وجعلها طير من طيور الجنة ، ونسأل الله ان يربط على قلب والديها بالصبر والسلوان ، انا لله وانا اليه راجعون .☁