تعلمت من أمي الله يحفظها ان بعد كل ختمة للقرآن اقول ' اللهم اجزي بمثل اجري لموتانا وموتى المسلمين '💗☁

هالكم يوم حايسة مع جدولي شوي ، وباقي ما زبط زين لكنه ماشي كويس الحمدلله خبروني كيف حالكم هاليومين ،؟ عسى مجتهدين يارب🌙
.

اذا كل وحدة فينا اعتبرت ان هذا اخر رمضان لها! بتجتهد وتنجز واكيد ما راح تحب ان اخر رمضان لها يكون كله ملهيات ومعاصي، اكيد مافيه وحدة مننا 'ذات همة' تحب ان رمضانها يكون عبارة عن مسلسل واغنية وفيلم وسب وغيبة ونميمة ، لذلك اللي باقي للحين ما قامت برمضان واستعدت لاستقابله ، تقوم الحين وتتأهب ، عشان لما يجي العيد ! تحسون بطعم الفرحة الحقيقية ، وبإذن الله بتحسونه اجمل من اعيادكم المضت وانتو مقصرين في رمضان ، بنحس انه هذه هدية الله لنا لأننا احسنا استقبال رمضان ، وعظمنا شعيرة ربنا ، وضغطنا على انفسنا في البعد عن المعاصي ، كظمنا الغيظ ، وتجنبنا العصبية ، تركنا الفارغات ، بس عشاننا نبغى رضى الله وما نبغى يمر هذا الضيف الكريم اللي يجي مرة من بين 11 شهر بدون مانستغله ، حاربنا الكسل وماتركنا الملل يتخللنا جاهدنا واحنا واثقين ان ربي بيعينا، حافظنا على الضحى والسنن الراتبة ، وقمنا الليل واستغفرنا وسبحنا ، حافظنا انه مايخدش صيامنا شيء ، واذا زلينا ندمنا واستغفرنا ، هذا طعم رمضان!😢💗 ، قولوا بإذن الله بنطلع من رمضان اتقياء انقياء، بنطلع منه واحنا نقول انا فلانة الجديدة ، اللي الدنيا صغيرة في عينها والآخرة ماخذة الحيز الأكبر ، المشتاقة للجنة ولقاء ربها ، يارب اصلحنا واجعل رمضان هذا مغير لنا من حال الى حال افضل منه بكثير ، اجعلنا فيه من من صامه ايمانا واحتسابا فغفر له ماتقدم من ذنبه ، انا متؤكدة ان كل من هم في قناتي ، فيهم الخير ، ومتؤكدة انكم تبحثون عن ما يطهر نفوسكم ويهذبها ، انكم تبغون تكونون على الوجه اللي ربي يحبه ويرضاه ، فالله يملأ قلوبكم به وينور دربكم ويرزقكم طول العمر مع العمل الصالح ، وبإذن الله دائم ادعيلكم في صلواتي ، واسأل الله ان يجمعني بكم في اعالي الجنان قولوا امين😭💗🌿.

صباح الخير يا اصدقاء ، اذكاركم 💗
.
قبل شوي قريت مقالة للشيخ علي الطنطاوي من 28 صفحة ،اتمنى من كل قلبي انكم كلكم تقرؤونها ، اسمها 'يا بنتي'، هي عبارة عن نصيحة ، نصيحة لي ولكم وهو يقول ' يا بناتي ' ، وانه اب لبنات واللي مايرضاه لبناته ما يرضاه لنا ، نصحية عمييقة تصف واقعنا اللي احنا فيه ، واقعنا المحزن المؤلم ، واقع العلاقات بين النساء والرجال ،والإختلاط في الجامعات والمدارس، وحتى التعري المخيف اللي قاعدين نشوفه ، تدرون وش اكثر شي يوجعني ؟ انه لما نروح بلاد غير المسلمين بأوروبا وغيره ، اذا في بينهم مسلم ماتعرفين انه مسلم ، اذا ما قال بفمه انا مسلم' الا من رحم' وانا اتكلم عن الشائع 💔 يووجعني جدا والله يوجعني ، احس احنا صرنا السبب في انهم مايدخلون الاسلام ، اتخيل نفسي مكانهم ! واشوف واحدة تقولي انا مسلمة ، ولبسها متعري اكثر مني ، وعادي تسب نفس السب المقرف اللي نسبه واحس مافيها شي مختلف ، بس مجرد انها ما تاكل لحم خنزير وماتشرب خمر بس هاذي ! وش بيكون احساسي ؟ بحس انه اختلاف اسماء ديانات فقط ! لأن مافيه شيء يحمسني ، طيب خلينا منهم ، احنا مانخاف على انفسنا ؟، او طيب مانخاف ربنا؟ طيب ليه لا رحت اوروبا فصخت الحياء!! مين قال ان الحياة ما تمشي اذا ما تعرينا ، يالله ما اقولكم غير اقروا هالمقالة لعل منكم غافلة فتستيقظ من غفلتها قبل فوات الاوان ، اقرؤوها كلكم الله يسعدكم وهي قصيرة جدا عشان حتى نصلح الغافلات بإذن الله وننتبه اكثر على انفسنا ☁🌿.

💗
كلنا نبحث عن الطمئنينة والسكينة والسعادة ،وانا قلتلكم قبل اني جدا احزن من الصفحات البائسة ، اللي تبعث طاقة سلبية في قلوب من يمر بها ، كل انسان ممكن يمر بظروف تضعفه وتحزنه ، لكن لما يكون ايمانك قوي بتقدرين تتخطين المحن ، واللي يكون مع الله في الرخاء ، بيجد الرضا والصبر حتى في اشد المواقف ، بيعظم الله الرضا واليقين في قلبك حتى الامور الشديدة تصير عندك هينة ! الله هو خير انيس وونيس ، كنت احس بالضعف متى ؟ لما احس ودي اختلي بربي والبيت مليان ضيوف ! او مافي مكان فاضي اجلس فيه وحدي افضفض لربي فيه ، احيانا ما اكون متضايقة او شي ! بس كذا احب احساس الهدوء والسكينة وانا مع ربي ، احب لما اشكر ربي على موقف حلو واسعدني .
لا تظهرون حزنكم لأي مخلوق لا تفضفون غير لله لأنه هو اللي ينزل البلاء وبيده يرفعه ، لأنه ابتلاك عشان يقربك له اكثر رغم انه غني عنك !
كل اللي نبحث عنه هو الله ، اللي يطمئنا ويريح قلوبنا ، هو اللي خلقنا معقولة يعجز يتولانا ويدبر امرنا ويصلح افئدتنا ؟؟😢
اعتبروا رمضان هو بدايتكم لجنة الحياة الدنيا ، اصلحوا مابينكم وبين الله ، اذهبوا له وانتم نادمين تائبين عن ما مضى فإنه يحب التوابين ، رمضان فرصتكم في تهذيب انفسكم ،في زرع بغض المعاصي ، وسيكون حصادكم سريعا بإذن الله ، اسألوا الله الثبات على هذا الدين واسألوه ألايزيغ قلوبكم بعد ان هداكم 💗💗

السلام عليكم ورحمة الله وبركاته ، كيف حالكم اصدقائي ؟ الله يملأ ايامكم سعادة يارب💗☁.
.
كل واحد فيكم الحين يمر بذاكرته على اصدقائه مثل الشريط ، ويسأل نفسه هل اصدقائه صالحين ولا لا ، هل هم قاعدين ياخذون بإيده للجنة؟،ولا هل راح اكون انا وهم من اصحاب قوله تعالى ' الأخلاء يومئذ بعضهم لبعض عدو ' ولا من الاستثناء في قوله 'الا المتقين '؟ هذا سؤال مصيري يستاهل اننا نسأله انفسنا ، الصديق هو اكثر عامل ممكن يأثر عليك وانت مو مركز ، قد تكون صالح والحمدلله وتقول انه اصدقائك مارح يأثرون عليك ، وتدريجيا تلقى نفسك تغيرت ، ماراح اقولكم اتركوا اصدقائكم ! لكن راح اقولكم انتبهوا على انفسكم من رفقاء السوء، واذا كنت واحد منهم فأسرع وانتشل نفسك ، لا تستحي ابدا من انك تقول ان هذا صح وهذا غلط ، ولا تجامل على حساب اخرتك ، لا تسخر من احد عشان تضحك مع اصحابك ، ولا تسمع اغنية صديقك يقولك 'حلوة اسمعها ' ، وش فيها اذا قلت لصاحبي :' انا ما اسمع اغاني ولاعاد تقولي اسمعها وانت بعد لا تسمعها'؟؟، .

انتبهوا من الاصدقاء اللي تخجلون تسوون الطاعة قدامهم ، وعاشروا اصدقاء تخجلون تسوون المعصية قدامهم ، اكرر واعيد اصلحوا انفسكم قبل فوات الأوان ، ولا تجاملون في مسألة المعاصي مع الاصحاب ، فوالله ان يوم تموت !مابيدخلون معك القبر عشان يدافعون عنك ، ووالله ما بيقولون يارب اغفر له وسامحنا احنا اللي اغويناه ، بيتركونك بعتمتك لحالك ، وماراح ينفعك غير عملك ، لما تجتهدون في اصلاح انفسكم بتحتاحون وجدا انكم تبتعدون عن اصدقائكم السيئين ، وفي هالمرحلة انصحوهم واذا قالك شوف هالمسلسل ، او شوف فلان وش يسوي وفلانة كيف لابسة وضحك وطقطقة على الناس ، هنا وقفوهم وقولوا لهم انه مايجوز نضحك على الناس ، ممكن ربي يبتلينا بيوم لأننا ضحكنا على احد ! وتدرون اللي يغتاب احد قيل عنه' انه كمن يأكل لحم اخيه ميتا ' يرضيكم ؟ ، اذا حسيتوا انهم ما يستجيبون لكم ، لاتترددون في انتشال انفسكم منهم ،

ابتعدوا عنهم وادعوا الله لهم بالهداية ، والرفيق السيئ معك في الدنيا بس ، ومجرد ماتموت خلاص اعتبروا علاقتكم انتهت ، لايغركم حبهم واحضانهم وضحكهم معكم بالدنيا ، بتموت ويمكن يتعظون من موتك ويتوبون هم ! وتبقى انت بحسرتك ، يوم القيامة الرفقة السيئة بتكون كالأعداء ، كل واحد يلقي اللوم على الثاني ما بين ' انت اللي خليتني اسمع معك اغاني و بسببك انا صرت اتابع مسلسلات انت اللي كنت تحببني في السجاير وانت اللي كنت تقولي شوف اباحي والعياذ بالله وانت كنت تشغل اغاني في سيارتي ووو ، في هاليوم ماحد يحب يكون من اصحاب قوله تعالى ' فمالهم من شافعين ، ولا صديق حميم ' ، 💔

الرفقة الصالحة نعمة من الله ، وماعليك من طقطقة الناس والعالم ، لأن من يضحك كثيرا يبكي اخيرا ، كل شي بيظهر من لما نموت ، ومن لما تنقطع فرصتنا في الحياة ، انتبهو لنفسكم من اصدقائكم ، واسألوا الله الصحبة الصالحة، وتذكروا انه في قبورنا بنكون وحدنا ، والصاحب الصالح هو اللي بينور قبرك بدعائه ليل ونهار ، وبداية لاتعطون احد اغنية يسمعها ولا صورة خليعة يشوفها ولا مسلسل يتابعه ، اعطوهم القرآن يسمعونه المقاطع الدينية والمفيدة يشوفونها عشان تكون لكم صدقة جارية انصحوهم وساعدوهم على الخير ، لاتخلون لهم مجال للخصام معكم يوم القيامة ، كونوا غيوم ممطرة ، اينما مرت ! اسعدت ولا ضرت 💗☁

اضيؤوا عتمتكم بنور الكهف ، واكثروا من الصلاة على رسول الله 🌿.

الله يسعد شهد على هالقراءة الجميلة ماشاء الله عليها ، محظوظة بصحبتها والله، الله يجعلها من اهل القران الذين هم اهل الله وخاصته يارب يارب😭💗🌿.

اللهم اغفر له وارحمه وعافه واعفوا عنه ، اللهم اكرم نزله ووسع مدخله واجعل قبره روضة من رياض الجنة وجميع موتانا وموتى المسلمين اللهم واربط على قلب اهله واجبرهم جبرا يليق بك يارب العالمين💗

كونوا كالغيث؛ تروون قبور الموتى بالدعاء 🌿☁💗.

رسائلكم يا اصدقائي ، صنعت يومي الله يسعدكم على مشاعركم الحلوة ، ويجعل لكم من دعواتكم نصيب يارب ، شكرا لكم بعمق السماء يا احبابي ، والله يجمعني بكم في فردوسه الاعلى يارب ويغفر لي مالا تعلمون ويجعلني خير مما تظنون ، شكرا لكم شكرا💗💗😭☁.

اليوم 7 رمضان، ويا مسرع مرت ايام ضيفنا الله يطيب الاعمال ، متؤكدة ان فيه منكم اللي قاعدين يتصارعون مع انفسهم في ترك المعاصي ، وله لذة هالصراع اكيد ، تدرون ليه نجتهد ونحاول نزيد بالطاعات ؟ عشان في العشر الاواخر نبذل اكثر ، واقلها نقفل جوالاتنا عشان ما تشغلنا ، واذا ربي احياني بعدين راح اتكلم عن العشر هذه ، اللي للحين ما قامت ! باقي ما فاتك الوقت ، ويمديك الحين تقومين وتبذلين الكثير ، اللي للحين تتابع المسلسلات ،وتسمع اغاني ، وتضيع وقتها في الفارغات! تتذكر انها 30 يوم بتروح وما بترجع ، ويوم يعلنون عن انه بكرة العيد ! بتندمين كثير ، وتذكري ان في ناس تستغل الدقيقة والثانية ، وفمها ما يوقف ذكر ، ترضين انههم يتنافسون على المراتب العالية وانتي تضيعين وقتك وجالسة؟ فيالله ما فاتك شي كثير ولا تيأسين قومي انوي من الحين وكأنه رمضان اليوم ، اجبري تقصيرك ، وتسابقي مع المتسابقين !💗

هذه نعتبرها تجهيزات ماقبل الاواخر عشان نتقوى على الزيادة في العشر بإذن الله ، وترا انا وحدة مثلكم ماسكة نفسي عن اليوتيوب مسكة يعلم بها الله ،😂💗الا عن تعلم اللغة او البرامج الدينية، مو اني كنت اتابع مسلسلات او شي !لا لا الحمدلله بس انها اشياء مو مفيدة في الاخرة ، ويمديني اتابعها اي وقت ، اهم شي لا يفوتني الشهر💗 ، ماعليه ايام تستاهل نستغلها بعيد عن الفارغات ونفسنا تستاهل اننا ما نظلمها بالمعاصي في هذا الشهر الفضيل وفي كل وقت ، وشعور الندم على التقصير فيه بشع ، وضيفنا عجول جدا، فأدركوه قبل يفوتكم ولا تخلون شي يشغلكم عنه ،

صلوا صلواتكم وزيدوا عليها بالنوافل ، صلاة الضحى ، التراويح ، ركعتين قيام ، الوتر ، استغفار وتسبيح وتهليل ، ساعدي في اعداد الافطار ، صحي النايم من اهلك للصلاة ، تصدقي اقلها اعطوا من فطوركم لجيرانكم ، عودي نفسك تجلسين في سجادتك بعد الفجر تقرأين قران وتسبحين لين وقت الشروق وقومي صلي ركعتين كأنك حجيتي واعتمرتي، ادعي لك ولمن تحبين وللمسلمين ، اقرأي القران واستمعي له واحفظي منه ،اعزمي على التغيير وبتتغيرين بإذن الله ، وعن رحمة الله في قوله
‏"وإِنْ أتَانِيَ مَاشِياً أتَيْتُه هَرْوَلةً" !😭💗

الله غني عني وعنك ، ولما تسوين هالشي هو لنفسك ونفعه عائد عليك انتي ، لا تظلمين نفسك ، ويلا شمري عن سواعدك وتأهبي ، اي شي ماينفعك ويضرك اتركيه ، واي شي تستفيدين منه ومو معصية لكنه يضيع وقت ، خليه لبعد رمضان ، عاهدنا انفسنا قبل رمضان على التغيير ، وبإذن الله ما يخلص الا واحنا متغيرين ، الله يسعدكم يا حلويين ويجعلني واياكم في هذا الشهر من الفائزين💗💗☁.

200 مشترك ، أهلا وحبا اصدقائي الجدد
الله يجعلكم شاهدين لي لا علي يارب ، ويجعل هالقناة خالصة لوجهه ويارب يكون لها اثر طيب فيكم ، الله يسعدكم 💗🌿😢

السلام عليكم اصدقائي ، اسعد الله مسائكم 💗
.
الحين بعلق على ظاهرة ، يمكن كثيرين يشوفونها عادية وما يعطون لها اعتبار ، اللي هي تشغيل الاغاني في السيارة ، بغض النظر عن تحريم الاغاني كلنا نعرف انها محرمة ! ويمكن لأنه شفنا كل الناس صارت تسمع الا ما قل ، فصرنا مانهتم لحرمتها ، ولكن! يبقى الحرام حرام لو الكل سواه ، حتى لو انتي الوحيدة اللي ماتسمعين اغاني ! لا تتنازلين عن هذا الشي ابدا لمجرد انك تشوفين كل الناس تسمعه ، لان هذا مايخليها تكون حلال '' الحلال بين والحرام بين ''