زينب نايف في امس الحاجة للدعاء ادعوا لها الله يسعدكم: اللهم اشفها شفاء لا يغدر سقما،💔.

زينب مريضة يا اصدقائي ، ادعوا لها من كل قلبكم ان ربي يشفيها ويعافيها وتقوم بصحة وعافية ، ادعوا لها بالوتر الله يسعدكم..💔

مساء الخير يا حلوين ، كيف حالكم؟ اتمنى يكون يومكم كان خفيف ولطيف يارب، والحمدلله على كل شي💗.
.
كلنا نعرف حكم النمص ووصل الشعر ، وكلنا حافظين الحديث حق ' لعن الله النامصة والمتنمصة و الواصلة والمستوصلة والواشمة والمستوشمة ' وللأسف الشديد ، صار عادي النمص والوصل ، واكثرها شيوعا نمص الحواجب ، اسوء شي ممكن يحصل انك تعرف ان الشيء محرم وتستهين فيه وتمارسه وكأنه شيء'عادي' ، حتى ماصار يجينا تأنيب ضمير من الحرام تدرون ليه؟ لأننا نموه للحرام في بالنا حتى يصير كأنه حلال ! ونصير مطمئنين واحنا نسويه ، وحدة تنمص وتقول والله ما انمص بس انظف حواجبي ! او توصل شعرها وتقول بس في الزواج! ، الحلال واضح جدا والحرام واضح ، عدم الاعتراف بالخطأ يدمر كل ذرة احساس فينا ببشاعة الحرام وبإنتهاك حرمة الله ، لما تغلطين وتقنعين نفسك او بمعنى اصح ' تخدعينها ' بإنك ماغلطتي وتحطين اعذار لنفسك ! ابدا مارح تتصلحين لأن كل شي بيصير عندك عادي ، وكذا بتصيرين تتبعين هواك وتسوين كل شي تبغينه ،

قلت لكم في مرة من المرات ان 'طريق الجنة ماهو مفروش بالورود ' يعني ايش؟ يعني ان الوصول للجنة مو سهل ، بتتعبين كثير ، تطيحين وتقومين ، بتجاهدين نفسك كثير في ترك الحرام ، ويا كثر المحرمات اللي تغرينا ، ونميل عن الطريق الحق بسببها واحنا ما ندري ، تبين ترتبين حواجبك بالنمص ! لا ترتبينها لأنه حرام وهذا شي ربي مايرضاه ، نفسك تبي تنمص وربي يقول ما ارضاه ! هل بتتبعين هوى نفسك؟ ، معناه تفضلين رضا هوى نفسك على رضى الله ولا! ، اجتهدوا في الوصول للجنة عشان تنالونها ، ولا تأجلون التوبة لأن محد يضمن عمره متى ينتهي ، ارضي بقسمتك اللي ربي قسمها لك ، واحنا كلنا حلوين لو نرضى باللي ربي قسمه لنا ، حبي حواجبك وحبي شعرك على ما خلقتي عليه ، صدقوني اللي يسوي الحرام مو مثل اللي مايسويه ، الاول تبع هوى نفسه وعصى ربه وحصاده ايش؟' رضى نفسه وغضب الله وذنوب' ، والثاني ترك اللي يحبه لوجه الله وربي بيعوضه خير مما تركه لوجهه ويحبه ويرفع درجته ، وبيكون مطمئن وراضي عن نفسه وماهو خايف يموت وهو يرتكب معصيه ، اسعوا لأنكم تكونون الافضل عند الله ، ربي خلقنا حلوين عشان كذا احنا نحب حواجبنا وشعورنا على ماهي عليه ؟كذا ولا مو كذا!💗

ربي قال { ولقد خلقنا الانسان في احسن تقويم } ، وتدلعي ياقلبي بماسكات ومقشرات واشياء حلوة، رأي الناس فينا ما يهمنا ، رضاك عن نفسك هو اللي بيخلي اللي حولك حابينك ومتقبلينك على ما انتي عليه ، وغايتنا الاولى والاخيرة رضى الله مو احد سواه ، وتخلي عن اي شي نفسك تبغاه وربي ما يرضاه ، ومن ترك شيئا لوجه الله عوضه الله خيرا منه ،
واخيرا ؛ حبوا انفسكم يا اصدقائي ، لا تسوين شي يضرك وماينفعك لمجرد ان نفسك تبغاه او لمجرد انك ترضين الناس ، والله يجعلكم صالحات مصلحات راضيات مرضيات يارب💗☁.
.
وادعوا لزينب بالشفاء لعل دعوة احدكم تستجاب 🌿💗💗.

ترددت في اني اكتب هالكلام او لا ، لكن بقوله لعل وعسى يكون له اثر طيب وتشجيع لكم💗☁.
.
اليوم بعد العشاء تقريبا واحنا نشرب الشاي فرحت لما امي قالت انه كانوا مسويين اليوم محاضرة حق افتتاح مسجد وهي حزينة لأنها ماراحت ، وهذا المسجد ساهموا فيه اهل الخير الله يسعدهم عشان يبنوه للنساء وكله من فضل الله وان شاء الله بنصلي فيه ونقرأ فيه قرآن برمضان ، والله يتقبله خالص لوجهه يارب ويكتب اجر من ساهم في بناءه يارب ، اللي بقوله لكم تسابقوا للأعمال الخيرية ، اذا سمعتوا ان في بئر بينحفر او مسجد بينبنى او افطار صائم او اي شي يكون صدقة جارية لكم وعندكم قدرة حتى لو ريال واحد ! لاتبخلون ابدا ، يمكن هو الشي اللي به ربي يحرم وجوهكم عن النار ، وفكرة حلوة كمان تخلين في اللي بتساهمين به نية لك ولصديقاتك ووالدينك وموتانا وموتى المسلمين ، محتسبة بذلك الاجر من الله ، تخيلوا صديقتي تدخل من فلوسها بنيتي في بناء مسجد واجي يوم القيامة انصدم بالأجر وجبال الحسنات !!خير الوفااء والله 😭💗💗 واكيد هذا الشي بيسعد الموتى في قبورهم ، واللي يعين الناس ربي بيعينه بإذن الله حتى بعد موته بيسخر له اهل الخير اللي يدعون له وما ينسونه ، خلوا لكم اثر طيب في الحياة ، مصحف او سجادة او سبحة تهدونها احد، دراهم تدخلونها في عمل خيري، نصيحة تنصحونها لأحد فتغيره للأفضل بإذن ربي ،كلمة طيبة ' فالكلمة الطيبة صدقة'، تذكير بالاستغفار والذكر في مواقع التواصل ، كونوا نبيهين ولاتضيعون فرصتكم في الحياة واسألوا الله الهداية والصلاح احبتي في الله 💗🌿.

صباح اخر جمعة في شعبان لهذا العام 💗 لا تنسون سورة الكهف والاكثار من الصلاة على النبي ، والدعاء بين العصر والمغرب💗☁

كيفني بس وانا كل فترة احطلكم صور حلوة💗🙈اتمنى بعدين امر المشتركين عندي ما اشوف صور نساء ، رجاء غيروها عشان الجنة ، ممكن؟💗☁

شاكرة لله على كل شئ، على انه وضع في قلبي حب اسعاد الآخرين ، وحب انتشالهم من الضيق وزرع التفاؤل وحب الحياة في قلوب من حولي، احب صديقاتي جدا جدا ، واحب لما وحدة تجي تقولي جيت اقولك عشان اسمع كلامك الايجابي ، شكرا لله على الكلام الجميل اللي قاعد يجيني ويسعدني ويشرح صدري ، ومافي شي يحزن اكثر من انك تشوفين صديقاتك اللي تحبينهم في معصية ، واكيد راح استعين بالله وادعيه يكره المعاصي لقلوبهم مثل ما كرهها لقلبي ، ان يهديهم مثل ماهداني ، ويحميهم ويحفظهم لأني احبهم واحب لهم الخير واتمنى انه نجتمع في اعالي الجنان مثل ما جمعتنا الدنيا😢💗 ،قبل كم يوم قريت هالكلام "والعجيب أنّ النورَ الذي تتركهُ بِداخِل أحدهم ؛يُضيئُكَ أنت" ، فالحمدلله الف مرة على جمال الشعور اللي يطرحه في قلبي واتمنى ان الله يملأ قلبي به ، كل فجوة من فجوات قلبي تكون مغطاة بنور الله ، ويارب يقدرني اتغير واغير من حولي للأفضل يارب ،💗☁.

مقطع جميل للقارئ إسلام صبحي😢 ، هاليومين انام على هالمقطع ، بعد ما اصلي الوتر وأرطب جسمي اقرأ سورة الملك وأذكاري واشغله واتأمل الآيات بعمق لين انام ، بما اني حبيت المقطع وجدا ! اعتبروه هدية مني💗 ، سامحوا كل من اخطأ في حقكم قبل تنامون ،لعلكم بذلك تنالون الجنة ،احمدوا الله على يومكم هذا، على التفاصيل الحلوة والسيئة فيه، وتذكروا ايش الاشياء الحلوة اللي سويتوها اليوم؟ واشكروا الله ثم انفسكم عليها ، وايش الاشياء اللي مو حلوة سويتوها اليوم ؟ وقولوا بإذن الله بكرة ماراح نسويها ، وترا مرتين شيكت على المتابعين اشوف الصور ولقيت باقي في صور ما تغيرت 👀لا تعاندون امكم يا عيال !😂😭 غيروها يا حبايبي لأني احبكم وابغى لكم الخير ،والصور هاذي ماراح تنفعكم في الآخرة، استغنوا عنها لأنها ماتستاهل تخسرون ذنوبكم عشانها💗 ،كونوا متفائلين يا اصدقائي الحلوين وتصبحون على خير وسعادة 💗💗☁

مساء الخير اصدقائي: كيف حالكم💗؟
.
اليوم جدي صلى العصر وجاء جلس معنا ، وهو يسولف مع امي واعطى امي فلوس يقولها اعطيه عيالك وكذا ، فجأة قال لأمي وهو يأشر علي وعلى اختي اللي اصغر مني قال هذولا عيال مين ؟💔 لو تشوفون وجوهنا مدري نضحك ولا نبكي ولا ننصدم ولا ننجرح ، سؤال محزن بس يضحك ، وهو بعذره والله لأن من زماان ما شافنا كله من الغربة والله 😢 وياحليله وهو يرقع يوم شافنا انصدمنا ويقول لا انتو عيالي والله يحفظكم وانا عشان من زمان ماشفتكم من لما كنتوا صغار وو ، حبيبي ياجدي الله يعطيه الصحة والعافية ومايرجع يعيد هالسؤال وبعدين لما يجي ابوي بسأله بقوله يا بابا احنا عيال مين ؟😂💔 ،