Xorijdan ayrim misollar

1️⃣ Birinchi videoda AQShdagi sud jarayoni aks etgan. Unda sudya soatiga 140 mil (224 km/soat) tezlikda yurgan haydovchiga jazoni e’lon qilmoqda.

Jazo:
— butun umrga haydovchilik huquqidan mahrum qilish;
— agar yana qayta rulga o‘tirsa, 6 oyga qamoq va 500 dollar jarima;
— mashina musodara qilinadi.

2️⃣ Ikkinchi rasmdagi 2021-yilda ro‘y bergan voqea haqida xabar berilgan. Norvegiyada yashovchi iroqlik boyvachcha Germaniyada Lamborghini Huracan mashinasini 310 ming AQSh dollariga sotib oladi. Norvegiyaga qaytayotganda yo‘lda Daniyadan o‘tishi kerak edi. Va u Daniyada 236 km/soat tezlikda harakatlanadi. Daniya qonunchiligiga ko‘ra, ehtiyotsizlik bilan transport vositasini boshqarish mashinani musodara qilishga asos bo‘ladi. Shu sababli, yap-yangi Lamborghini musodara qilinadi, qo‘shimchasiga iroqlik haydovchiga jarima ham solishadi.

Daniya qonunchiligida quyidagilar "ehtiyotsizlik bilan haydash" hisoblanadi va transport vositasi musodara qilinadi va auksionda sotuvga qo‘yiladi:

1) tezlik limitidan 100% oshib ketish (masalan, 60 tezlik belgilangan joyda 120 dan tez yurish);
2) istalgan joyda 200 km/soatdan yuqori tezlikda yurish;
3) agressiv haydash;
4) mast holda transport vositasini boshqarish (qondagi alkogol miqdori 0,2%);
5) mast holda YTHga sabab bo‘lish.

3️⃣ Uchinchi videoda esa o‘tgan haftada Rossiyada bo‘lgan voqea aks etgan.

Tataristonlik tezlikni xush ko‘ruvchi 25 yoshli tadbirkor Audi RS5 mashinasida katta tezlikda yuk mashinasining tagiga kirib ketgan va voqea joyida halok bo‘lgan. U bunga qadar 700 ga yaqin qoidabuzarlik sodir etgan ekan. Boshqa bir videoda uning do‘sti 300 km/soatdan tez yurganini suratga olgan (u video avariya kuni olinmagan).

Ayrimlar ushbu voqeada yuk mashinasini ham ayblagan. Lekin bu yerda oddiy fizika qoidalarini bilish kerak. 300 km/soat tezlik — bu soniyasiga 84 metr degani. Ya’ni bunaqa katta tezlikda kelayotgan mashina atigi 3 soniya oldin 252 metr, 5 soniya oldin 420 metr masofa orqada bo‘lgan degani. Bu yerda asosiy qoidabuzar bu tezlikni oshirgan haydovchining o‘zi.

❗️Xullas, bizda ham, bu borada allaqachon jiddiy choralar ko‘rish payti kelgan. Har bir yo‘qotilayotgan kun, yo‘qotilayotgan umrlar, halok bo‘layotgan insonlar degani. Shuni unutmaylik.


👉 @xushnudbek 👈