منصة ثروة 🎖🏆

🌺 #منصة_ثروة 🎖🏆
🌺 #على_مشارف_المرحلة 🪴💐

🌸 بعض الناس أحيانا بييجي لي يشتكي إنه حاول يحفظ قرآن كذا محاولة وفشل في كل مرة، ويقول لي إن سبب بُعده وعزوفه عن حفظ القرآن إنه مبيعرفش يحفظ، وإن إمكانياته في الحفظ ضعيفة، وإنه بقى محبط وتايه ومش عارف يعمل إيه؟. 😔💔

🌸 وطبعا الرد التلقائي عندي في المناسبات اللي زي دي أقول له: "اجتهد ومتوقفش حفظ ولا تسيبه، وحاول تاني وتالت وألف، حاول عشان ربنا بيدي أجر على المجهود زي ما بيدي أجر على النتيجة، فلو مش هتقدر تاخد أجر وثواب النتيجة متضيعش أجر وثواب المجهود". 🌟👏🏻

🌸 وده والله مش كلام أوهام مبالغ فيه، بل ده اللي الدين قاله تصريحا وتلميحا في كذا موضع، وده اللي العقل السوي بيفرضه على صاحبه، إنه يفضل يحاول لأن كل محاولة فاشلة بتقربه من النجاح، وده اللي قلب المحب لربه وإلهه بيبقى مش قادر يفارقه وقلبه مش هيطاوعه إنه يسيب الحفظ، لأن دي حاجة بتقربه من محبوبه، فمهما وقع هيحاول مرة واتنين ومليون، ومن الآخر ده هيكون حال الصادق في طلب الحفظ منذ البداية = إنه ميبطلش محاولة. ❤️

🌸 فانت متنقطعش عن الحفظ حتى لو مش هتطلع منه بنتيجة، أو بمعنى أدق حتى لو انت شايف إنك مش هتطلع بنتيجة ولو متأكد من ده، لأن ممكن يحصل في الأمور أمور 🙈😌، وتلاقي ربنا كرمك وطلعت بنتيجة، بل وبأجندة ٢٠٢٢ غلاف شمواه (متنسانيش في واحدة). 😅😂

🌸 ودايما لما بييجيلي حد يقول لي الشكوى دي، ببقى متأكد بنسبة ٦٦,٨١% -معرفش إيه أصل النسبة دي 😅- إنه مش كده، بس الشيطان ونفسه الأمارة بالسوء ضحكوا عليه وفهموه كده، وهو بريء يا بيه، بريء يا بيه 🙈، بس عشان يقدروا يبنوا على الكلام ده ميل للكسل والتفخيد وتضييع العمر فيما لا يفيد. 💔😔

🌸 أحيان كتير بيبقى من مداخل الشيطان عشان يبعدك عن أعمال البر والخير إنه يصوّر لك نفسك تصويرات مغلوطة ويوهمك بمعلومات عن نفسك مش مضبوطة، وعشان كده مينفعش إنك تاخد نظرة نفسك لنفسك أو نظرة الشيطان لنفسك كحاجة نهائية تعتمدها وتبني عليها قرارات. 😌

🌸 غلط، وغلط كبير جدا، وهتخسر كتير بسببه.

🌸 لازم تحط نفسك في الطريق وتجبرها تستحمل، ومتنساش إن عشان توصل للجنة لازم هتعدي من مكاره كتير (الحاجات اللي نفسك بتكرهها) والإخفاقات والفشل من الحاجات اللي نفسك بتكرهها بس لو أجبرت نفسك تتحمل وتتجاوز هيبقى قطعت شوط مهم جدا إلى الجنة، وافتكر إن النبي ﷺ قال للصحابي: «أعني على نفسك»، فاستهدا بالله كده وأعن المصلحين على نفسك عشان تفوز بالجنة بل بالدرجات العليا في الجنة.

🌺 #تنبيه: في الجنة هتلاقي جميز وتوت نضيف مش م الوحش ده، وهيبقى متوفر وقت ما تشتهيه، فاجدعن بقى. 😊😅

✍🏻 محمد ثروت 🪴

🎀 T.me/m_tharwa 🌷🎉

463 views17:05