platinum🤍

"فاتو 3 شهور يا عقيلة! 3 شهور و100 بيان وسبعين واحد يحلفوا أن ما فيهمش، وكان تتكلم يطلعوك أنت الغالط، ولما تسكت يقولك أنت سلبي وأخطى راسي وقص! عليم الله أنها أزمة من غير لزمة".

يا حضاركم يا عيلة، هذا بوي الحاج خليفة اللي نومته خفيفة، ماهو كان يهني روحه ويبطل يستنى بيان المركز كل يوم في الليل راهو يرقد باهي، لكن مسكين البيان اللي ما يحضراش يحلم بيه، أول أمس حلم بتسعين حالة مرة وحدة ناض فطر معانا بالكمامة! يا حاج أمس صفر حالات، يقولّي: أبدًا، جايكم الخير! يا حاج المطارات مسكرة واللي هذا يطلع في فيديو يقولك تحليلي سلبي، يقولي: ما في سلبي إلا أنت وأختك، تبوها ديما راقدة وما تبوش تعيشوا الواقع، كان ما يبدا الموت في الشوارع ما نتسمى الحاج خليفة! يا ريت الحكاية واقفة على بوي، أني عيلتي عملة نادرة ومش حتتكرر في هالزمان، مش مصدقيني؟! تعالوا ندوروا عليهم بالواحد بالك تفهموني.

نحّي الموس يا همّي! أني خوك مش واحد براني. هادي يا جماعة أختي فوزية اللي تحلم بالحرية، هو مبدئيًّا جهزوا روحكم يا ولاد؛ لأن فوزية ما تعرفكمش، واحتمال تتهمكم بالخيانة والتطبيع مع إسرائيل، حتى الكورونا ماهيش خاشة راسها، وديما شادتها في جرة بوي تقوله: هذا التهاب رئوي بيديروا منه بزنس. لكن الحويج مورقلها، يلقاها جاية جيهته يبخ عليها الكحول تهرب طول، طبعًا لأن الكحول مذكر فيستفز فيها!

فوزية كان حالها حال باقي البنات، تراجي في اللي يجي يفكها من الحوش وخوها اللي مشردها، ولما جي نصيبها، طار بيها السمي وهرب بجناوحه وخلاها اطيح على راسها، ومن وقتها أي ولد يحلفلها على المصحف ويالله تصدقه!

خلاص يا ولاد! عليكم الأمان؛ طلعنا من دار فوزية. بنات معليشي خليكم هنا توا! خير ما تلقن أرواحكن تعصدن في بازين. خشوا يا ولاد ما يحشمكم شي! هذا خوي زيدان أسير الأحزان، وما تسألونيش عن الأحزان، أسألوه هو علاش مش معقب جهد على خواتكم اللي برا؟! الأخ شاري مشتل وكل شوي يبعث منه وردة لوحدة في الخاص، ويقوللها: أنتِ ما تستاهليش اللي صارلك. بالله منين عرف اللي صارلها؟ وهو اسمها على الفيس ما يعرفش يكتبه! ياخي أسلوبه قديم ونبهته كذا مرة يغيره... قصدي نبهته كذا مرة يخلي بنات الناس في حالهم، لكن لا حياة لمن تنادي. أني مش هذا اللي يقهر فيا، أصلًا البنات تعودوا على هالشكالات، اللي تقهر أن المسكينة اللي يخشلها خاص يعطي فيها على راسها في العام، ويشوف أي بنت يقول: خيرها لبست هكي؟ وخيرها تمشي هكي؟ ووقت نهدرزوا يقولي: ما نبيش نتزوج، البنات وجع راس، ومعاش تعرف ادير شي لعمرك. باهي الورود اللي بعتهم دار بيهم شي لعمره؟ قلتله يجي يخدم معاي وياكل بكلاوة عسل حقاني، يرد يقولي: حد الله بيني وبين خدمتك. على أساس النت اللي يدحنس بيه على الخلق دافعه من جيبه ما هو!

عطلنا عليكم يا بنات؟! معليشي هانت، تو نرفعكم لأمي وهدرزوا معاها للصبح، تعالي يا حاجة قعمزي هني! هذوا خواتي وزي بناتك. هذي بركتنا أمي نجية اللي عينها قوية، لكن وطوا صوتكم شوية! أمي كل ما نحكوا معاها بصوت عالي تسألنا أمتى بنرفعوها لدار العجزة، ديما شايفتنا مش بارّين بيها، وما ندوروش في رايها، مع أنها أول حد ندوروا في كلامه والله، وكان تسمع شي خبر مش مزبوط، تقولك يوم القيامة غدوة. ما هو الله غالب، حسينا مقاس العلامات الصغرى بادي يكبر هالأيام! معاش تفهم روحك وين عايش! العالم متكورن وأختي تقولك: لا ما فيش هي بردة وتحز. المسؤولين ينزلولنا بيان متكم وبوي يعلقلهم: يا كذابين الحالات رقم فلكي وأكثر من هكي. تخش وحدة نديد بنته ترد عليه: يا حاج هذوا معترف بيهم عالميًا. توصلها وردة أرض-جو من خوي على الخاص، وما خفي كان أعظم! أني في هذا كله ما مسخفني كان أمي، هالصبّارة اللي شايفتنا كلنا هكي وتدعيلنا في كل صلاة وعندها أمل حد فينا يتغير، مع أن الواقع ما يبشرش، لكن عمرها ما فقدت الأمل، حتى أني تدعيلي ما نطيح في شر أعمالي، يمكن هالدعوة هي السبب اللي مخليتني قاعد قدامكم لتوا!

أي حقّا ما عرفتكمش بنفسي، أني عقيلة الهارب من الشيلّة، كل ثلاثة أيام الأمن يجوا بيطبوني ونطلع من عينها، ويوم كشخوا على بوي أمي قعدت تبكيلهم لين روحوا، يعلم الله قداش مرة تنصح فيا لكن أني معاش هنيت يدي! لو فتشتوا جيوبكم توا مش حتلاقوا لا تليفوناتكم ولا فلوسكم، امّالا نقعد نص ساعة نهدرزلكم على عيلتي ونعترفلكم على روحي بلاش؟! هيا توكلوا آنستونا! واللي بيقرب منكم بنرمي عليه! وما تفكروش تمشوا قانوني، لأنهم حيجوا مش حيلاقوني، وبوي تعود على التكشيخ، وأمي حتبكيلهم بدل المرة عشرة، مش على خاطر سواد عيوني، لكن يوم يطبوني هالعيلة حتموت من الجوع، وخوي مش حيقدر يسقي المشتل مرة ثانية.

- كتابة | Mostafa Abo-zied
- تدقيق | علياء بركة

131 viewsNᴏѕɪ-ʟʏ🖤, 12:37