ديروها ههي ..

اللهم أعطيني شويه من ثقه الناس اللي تهدرز صوت ..

ههلبا الشيء ..

الكفن ما فيشي جيوب
والفاهم يفهّم غيره ..

وصية لأحد الشهداء من مدينة مصراته الصمود
وصية الشهيد سالم محمد نجيب طلب من أخته عدم فتح الوصية حتى تسمع انه أستشهد. سالم شاب لم يجاوز الثالثة و العشرين من العمر و أحد طلبة المعهد العالي لإعداد المدربين بمصراته.
يقول الشهيد بإذن الله تعالى في وصيته

بسم الله الرحمن الرحيم

أما بعد...

هذه رسالتي إذا كتب الله لي الشهادة دفاعاً عن وطني وأهلي و أنا راغب فيها فأسأل الله أن لا يحرمني منها. لكي يرتفع صوت الحق وهو إعلاء كلمة الله.

أولا سلامي إلى أمي الغالية سلاماً حاراً وأقول لها أمي ادعي لي دائماً بالرحمة وأن يتقبلني الله مع الشهداء في كل وقت وفي كل صلاة وأرجوك يا أمي لا تبكي عليا والله نشعر بيك في القبر إنك صار لك شيء والله ماني مسامح روحي أريدك أن تكوني المثال الأعلى لأم الشهيد لأنك تستحقين كل الاحترام والتقدير والحب فلهذا لا تبكي عليا لأني لم أمت بل مازلت حي أرزق وأنتي مؤمنة بالله واليوم الآخر ودليل على ذلك قوله تعالى (ولا تحسبن الذين قتلوا في سبيل الله أمواتاً بل أحياء عند ربهم يرزقون) صدق الله العظيم.

أنا حي يا أمي وكل ليلة بأذن الله تعالى سأذهب لزيارتكي ومنهدرز أحداك لين تقلقي مني باهي ، وأهم شيء السماح دنيا وآخرة يا أمي.

*ولا تنسي الموت موت واحدة والرب رب واحد*

ثانياً سلامي إلى الوالد سلاماً حاراً وأقول له أيضاً سامحني يا بابا يا غالي كن قصرت معاك في شيء وسامحني من قلبك ورد بالك على العيلة وأسأل الله أن يجمعني وإياكم في جنات النعيم وشكراً.

وسلام حار إلى باقي أفراد أسرتي. عمر، فاطمة، وليد،سليمان،وإنشاء الله ربي يرده سالم غانم، أحمد، سمية، آمنة،عبدالهادي، عبدالرحمن، محمد، عبدالحميد، خالد، مصطفى، منيوة، نضال، ولا أنسا حنتي سلمولي عليها واجد وقولولها تدعيلي وسلامي إلى عمي رجب ومرفت واحميدة، وسلامي إلى خوالي وخالاتي وأبنائهم وأولادهم وإلى عمامي وعماتي وحنتي "زهرة" وقولولها تدعيلي وتسامحني.

وسلام حار إلى أعز اصدقائي في الدنيا "عبدالعزيز سويب، مالك البيرة واسبنك وخضوري وحسن وعلي ولد الاستاذ محمد وكل أبناء الجيران وإلى مفتاح أبوعلة وقولولايسامحني، وسلام خاص محمل مع طيور الصباح إلى صديقي -عبدالكريم الحطبة، وسلام حار إلى علي غيث ورجب جهان.

الرجاء دفني في مقبرة سيدي علي البحاري أو في الزروق بجوار عمي "علي عطية الله حدوث العبيدي" لأني أحب هذا الرجل كثيراً فقد كان المثال الأعلى في الصمود فتحية له على شجاعته ورجولته. الرجاء في وقت ليس مشمس وحار.

الله اكبر الله اكبر الله اكبر ولا إله إلا الله
الله كبر الله اكبر الله اكبر ولله الحمد.

أمي وأبي افخروا بيا واصبروا فإن الصبر مفتاح الفرج وسامحوني دنيا وآخرة. باي الله غالب هكي ربي رايد ولا اعتراض على حكم الله كنت نتمنى عندي سيارة خاصة بيا سمحا جديدة وحوش واندير عيلة وانعدي للحج مع أمي و سيدي لاكن الله غالب، هيا مع السلامة ونلتقي في الجنة بأذن الله تعالى.

وصيتي أن يذهب علي أخي ويقول من يريد من سالم شيء قل يقول أني معلياش دين لاكن للإحتياط، عندي 30 دينار واخدهن من سليمان خويا. و50 دينار وديما ناخد منها أمي أرجوك سامحيني يا أمي وحتى سيدي قبل وأني صغير ديما ناخد منا في ربع أو دينار سامحني يا بابا، و ارجو السماح من كل مكان عمل خدمت فيه زي -غميم-اوهيبة-وفوزي صاحب دكان معيوف مسبقاً قولولهم يسامحوني. وإلى اللقاء في أمان الله.

*ابنكم الغالي سالم*

تو يستناه يجف وبعدين يزوق الباقي ..

الحكمه ضااعتت 😂😂😂🤦‍♀

😂😂😂معليشي ندوروا غيرهاا ..

قعمز بروحه ع هاذيكا الطاولة يراجي في اخته او بنته منعرفش ..
اما اني : ف كنت مقعمزة جنبه ع طاولة تانيةة
لاكن الي شد انتباهي انه كان كل دقيقة يشبح لي الساعة متعه شكلها تاخرت عليه هلباااا
اني شدتني هاديكا اللمعة ف عيونه منعرفش مرات تكون دمعةة مرات تكون نضرة شووق ....
و حتا اني كنت مقعمزة نستنا في شخص وكنت نعرف انه مشحا ايجي لان مشي من وقت طويل ....ومن عادتي انجي هني كل مرة باش نرجع دكرياتي بس
فجاءة جت عيني في عينه القيته يبكي بعبرته .
جاه الي يخدم في المقهى وحطله مناديل .. ومتكلمش ولاحرف وكانه متعود ع هالحال ..
مشيتله قالي تبي تدوي مع هاذاكا الولد !؟ قتله ايه
قالي ماتت حبيبته وهوا ايجي كل يوم باش يرجع ذكرياتهم
تلفت باش انشوف الولد ملقيتاش ..?تلفت تاني نبي نسال الي يخدم في المقهى برضوو ملقيتاش ...?
مكانش في حد في المقهى ?
مشيت للتواليت بنغسل وجهي وشبحت للمرايا ملقيتش
#انعكاسي فيها مش موجود اصلااا ...
مع الأسف
كنت اني نفس الشخص الي كان يستنا فيه .....
Ratoo

♥️.

محلاها الأنسانه اههيا ..

فيه راحه ، وفيه راحه ههلبا ، وفيه قهوة ..

ماتصدمنيش الكذبه ولا استمراريتك فيها، يصدمني إيمانك التام بأنها مشت عليا.

اني من الناس اللي ولله الحمد ، نرقد وانوض ننسى شن كان أسمي ..

لو علمت السرعة التي سينساك بها الناس بعد موتك ..لن تسعي في حياتك لارضاء احد سوى الله .

أنا هنا ألمع، ابنة ترفع الرأس، صديقة صادقة لا تعوض، حسناء تليق بالحب، و حياة ثانية لمن أراد الحياة.
"مروة عبد الحميد"

12:12

9??!

- في ناس مش مستوعبين فكرة إنهم ماعاش يهموك بعد ما طلعو من حياتك ، قاعد عندهم هاجس غبي يقوللهم إنك مش قادر تقدم خطوة من بعدهم ، و موقف حياتك ومستنيهم ، مش قادرين يستوعبو فكرة إن الشخص هذا اللي ضروه قادر يكمل حياته طبيعي ، ينجح ، ويفرح وقلبه سليم ، متخيلين إنهم ممكن يشكلو فرق كبير ، أو يكونو محور حياة ، والغائب المنتظر ، ما يعرفوش إنهم عدم ،.


"هالة الفيتوري "

الحمدلله فتت مرحلة إني نطفي المنبه ونرقد ، خشيت ل مرحله نرقد ععادي والمنبه يرنن ..