【中國間接向台灣宣戰】
中美兩國將於聽日舉行視像會晤，《中國日報》社評指，今次會晤主要係希望美方明白，北京決心「不惜一切代價喺可預見嘅未來實現國家統一」^。

無論共產黨點樣講都好，台灣依然都係一個獨立嘅國家，擁有自己嘅政府同軍隊，而《中國日報》咁講等同間接向台灣宣戰。共產黨深知中國解放軍根本就唔係美國對手，所以黨媒多次以中美關係威脅美方唔好再干涉「中國內政」，阻止美國喺台灣問題上保護盟友。香港、新疆同台灣嘅問題其實都應該一早要解決，三個地方都受到共產黨唔同程度嘅侵略同威脅。《中國日報》引述分析指，習拜會晤係反映美方一直以冷戰思維打壓中國嘅措施係「一事無成」，我哋都非常認同，因為對付赤納粹必須採取同打擊納粹一樣嘅強硬方法先係最有效。

^資料來源

Website | Instagram | Telegram公海 | Twitter | LIHKG

【操控輿論】
鄭月娥喺暴政報告提及要打擊「假新聞」，今日李家超表示港共正研究立法處理 [1]。

港共成日以西方國家都有訂立法案針對「假新聞」做理由，合理化打壓言論同新聞自由嘅動機。但只要仔細研究，歐美國家雖然嘗試規管虛假信息，但佢哋將移除相關信息嘅法律責任交咗比資訊科技公司，甚至採取非立法措施，包括喺校園進行教育、鼓勵資訊科技公司自我規管同遵守歐盟嘅《虛假資訊行為守則》等。相反，威權國家係針對散佈虛假信息嘅人，違法者有機會被監禁 [2]。

近呢幾年，港共同親共人士一再強調同重覆「香港假新聞問題非常嚴重」，就係為咗營造香港新聞資訊出現危機嘅假象，製造恐慌。李家超話「社會有共識要立法」，指只要定立一套「自律、有公信力嘅守則」，「自由」喺法律下進行就會有更多「自由」嘅空間。

但其實一但立法，信息真假嘅定義就全由港共政權定奪，從而加大力量去誤導、控制，甚至重新定義公眾對真實同虛假嘅觀念，法律再次用作為專制政權打擊自由嘅武器。所以作為仲有批判性思考嘅香港人，我哋有責任fact check所有接收到嘅資訊，查證消息可靠性。

資料來源 [1] [2]

Website | Instagram | MeWe | Telegram公海 | Twitter | LIHKG

【野豬都係香港一份子】
近日因有野豬襲擊黑警一事，漁護署就發出「野豬捕殺令」，定期捕捉喺市區出沒嘅野豬，然後將佢哋「人道毀滅」。尋日有七隻野豬出現喺黃竹坑深灣道，漁護署同黑警就以食物作利誘，進行捕殺^。

野豬被港共污名化，但其實喺山上住嘅野豬同喺城市住嘅我哋早就建立咗互存共融嘅關係。即使野豬唔小心迷失咗喺佢哋唔熟悉嘅世界，佢哋亦都唔會亂衝亂撞，無緣無故攻擊鄭月娥所「關心」嘅市民。明明今次事件漁護署可以引導上山，或者原用過往措施「捕捉、絕育、放回」，但佢哋就選擇設下陷阱令原本喺山上嘅野豬走上馬路，誘殺。

喺所謂嘅文明社會，反而再容納唔到動物嘅生存權利。人類明明係真正嘅入侵者，破壞咗野生動物嘅棲息地，但係就反指動物係「滋擾者」。原本野豬被列入「受保護野生動物」當中，但喺襲擊黑警之後，就將佢除名。官僚對案件作大量渲染，不斷妖魔化無邪嘅野豬，仲標籤佢哋係危害社會安定，建立敵對形象，合理化虐殺行為。可能喺港共眼中，野豬襲擊黑警係有政治立場，所以要趕盡殺絕。

今次香港人對「野豬捕殺令」反應極大絕非無緣無故，係因為感同身受。港共同為真正破壞香港民主自由嘅兇手，但就因強權在手就肆意打壓動搖到佢哋政權嘅香港人。某程度同野豬事件一樣，多次透過言辭稱手足為暴徒、曱甴，甚至非人化，透過官媒等不斷誣衊抗爭者「危害國家安全」。以政治立場進行社會分類，非我類就進行打壓、清算、拘捕。只要政權唔高興就用各種手段去解決提出問題嘅人，而唔係解決製造問題嘅人，即係佢哋自己。

單純嘅野豬對住極權無還手之力，只可以自求多福唔好被港共發現。但香港人絕非面對暴政坐以待斃之輩，我哋必須團結反抗不公，解決真正破壞香港安定嘅始作俑者。

香港野豬關注組

^資料來源

Website | Instagram | MeWe | Telegram公海 | Twitter | LIHKG

【司法獨立（中國式）】
鄭若驊再次喺網誌聲稱香港係一個「法治社會」，叫大家尊重法官係會「公正無私咁依法獨立審判」，有不滿嘅可以按現行機制進行上訴 [1]。

港共一直營造香港仲有司法獨立嘅假象，但可惜已經再呃唔到國際。前日，美國「美中經濟與安全審議委員會」向國會提交年度報告，內文指《國安法》顛覆香港嘅社會同政治環境 [2]。例出近期香港發生嘅各種打壓事件：「完善」選舉制度後，立法會淪為橡皮圖章議會；修訂入境條例限制市民出入自由；喺校園增設「公民與社會發展科」進行洗腦教育，迫使教育工作者歪曲現實同歷史，又要求教師配合中共，宣傳佢哋所詮釋嘅「歷史」；收緊電影審查條例，《蘋果日報》停刊等。

除此之外，報告仲點名批評陳廣池、蘇惠德同林文瀚，指國安法指定法官係剝奪司法嘅獨立性。司法獨立已經名存實亡，因此質疑海外非常任法官仲可唔可以繼續守護法治。

即使港共多次顛倒是非指國安法令社會「由亂轉治」，今次仲指國安法罪行定義嚴謹，檢控決定係唔涉及任何政治考慮。但好明顯佢哋嘅詭辯已經比國際識穿，相信對一眾申請緊庇護或者準備申請嘅手足係件好事。委員會建議國會修訂《香港自治法》，喺檢討報告入面監察港共有無侵犯香港人嘅移民自由。另外，因香港民主自由已經陷入困境，建議國會鼓勵國土安全部部長喺「緊急情況」同「緊急人道原因」基礎上，按《移民和國籍法》行使權力，有條件釋放依家正在申請進入美國嘅香港人，以上建議都有助抗爭者逃離獨裁政權，避免被港共清算。

資料來源 [1] [2]

Website | Instagram | MeWe | Telegram公海 | Twitter | LIHKG

【恐怖組織反恐】
近呢幾個月黑警多次進行反恐演習，指本港恐襲風險維持中度，要提防有人喺選舉等重要日子發動襲擊^。

「恐怖主義」多指係為咗達成某啲目的而訴諸暴力嘅犯罪行為，目的包括政治或意識形態上，攻擊或置平民嘅安危不理、散播恐慌。按照以上定義，元朗721同831太子站事件確實就係恐怖活動，無差別使用武力攻擊手無寸鐵嘅無辜市民，鄉黑、黑警同港共就係策劃同對香港安全造成威脅嘅恐怖分子。

依家，恐怖分子掌權，恐怖主義定義被佢哋重新演繹。以港大學生會評議會因感激梁健輝烈士嘅英勇行為為例，佢哋只係就事件發出動議表示深切哀悼，但張敬生、郭永皓、杜林丞亨同容頌禧就因而被控「宣揚恐怖主義」。喺港中眼中只要持反對意見、甚至係香港人就會被佢哋標籤為顛覆國家政權、危害國家安全、甚至係恐怖分子，完全係顛倒黑白。但即使佢哋點樣去嘗試去混淆視聽，一再否認佢哋做過嘅事都唔代表無發生過，所有香港人一定唔會忘記。

^資料來源

Website | Instagram | MeWe | Telegram公海 | Twitter | LIHKG