عُلا وحسناء عرفو ع روحهم وقالوا اغلب الكلام يلي نبي نقوله😂
الاهم والمهم هوا انه حنكون معاكم في مادة الكيمياء بعون الله 🧡.
حنديرو خطة كويسة نمشو بيها ، شيتات منظمة ، ڨيدوهات مسجلة ، بثوث لو كان الموضوع محتاج.
المادة السنة هدي متعتمدش هلبا ع سنة تانية يعني مش كان مقريتش السنة يلي فاتت توا تقول وك عليا ومقريتهاش ومش حنقدر نفهمها.
اهم شي الاساسات زي تعرف الرموز والوزن متع المعادلات بش متتعبش وتبدا تحفظ حفظ وحنديرو عليهم تشك اب.

مادة تبي فهم و حفظ الزوز يكملو بعض مش فهم بس🧡.
انشاﷲ بداية موفقة يارب 🧡..

(سجوشن) 🔥

السلام عليكم ورحمة الله وبركاته
ريمُ آخر شخص بيعرف بروحه شكله بس خلونا نتفقو أن النهايات أجمل شيء 😂🤍🤍🤍.
رهام البشير ، الاسم الذي عرفت بهه ريمُ * معلمة و طالبة درست دفعه 2003 و قررت نبدأ معاكم للقمهه و الفل مارگ🦋.
غير اصبري ف أما مادهه بتقرينا يا ريمُ؟
ريم أبله الأحياء هك سموني دفعه 2003 اللطيفين 😂🤍🤍🤍🤍.
بعون الله الأحياء فالجيب و جميلهه جداً انتظروني 🤍🤍.
نسيت نوت صغيرون، ح تكون معايي البست فرند حسناء زيي الدفعه اللي قبلها معبعض يد ب يد، اطمنو مع ريمُ و حسناء الأحياء مليحهه 🦋.

السلام عليكم ورحمة الله وبركاته
ريم مش آخر وحدة اني اخر وحدة😂
اسمي عائشة أسامة، في شوية يعرفوني هني
حنقري مادة التربية الإسلامية وتعليمي حيكون منوع بين صوتيات ومنشورات مكتوبة🤍
التربية الاسلامية حلوة وساهلة بس فيها تركيز وحفظ
وبإذن الله حيكون المنهج ساهل عليكم
لهذا ساعدوني معاكم وما تستهزوش بالمادة لأن على قولة أمي
"الي تهزا عليه يهزا عليك"😂
ويااما ناس صفو كل المواد وقعدتلهم الدين ومش حلوة في حقهم
كمسلمين



احم سر صغير وشوي انحياز اني من دفعتكم يعني منكم وفيكم يا ضنايا😂😂😂

المواد اللي قلتو خايفين منها 💙↙️
كيمياء
رياضيات
انقلش
+تقنية المعلومات

كلها عرفت بروحها وفاتوني الله المستعان 🙇‍♂️😔
محمد عبود حنكون معاكم في اللغة الإنجليزية ان شاء الله.. طالب في السنة الرابعة كلية الأسنان جامعة طرابلس ونعطي ف منهج الانجليزي من 2016..
منهج الانجليزي ف الشهاده يعتبر طويل شوي لكن ممتع مع القواعد ومع الدروس مافيش اي مشكله فيه ان شاء الله
نظام العطاء حيكون لايف يعني كلكم حتشاركو معاي ❤️ وبعدها ينزل التسجيل..
والمحاضرات حنعطي ف القناة هذه وحنعطي ف القناة الخاصه بيا بش تزيد تثبت المعلومه عندكم اكثر وان شاء الله موفقين وبإذن الله دفعة 2004 رغم الظروف اللي ممكن تواجهكم حتكونوا انتم أقوى منها اكيد 👌❤️

السلام عليكم ورحمة الله وباركاته🚶🏻‍♂️🤍
دفعة 2004 معاكم احمد النعاجي
ح نعطيكم في مادة الرياضيات مادة ساهلة وتافهه🔥
أحمد شني تقول راهو تدوي علي رياضيات؟؟
اي ندوي اعلي رياضيات 👍🏻
رياضيات لما تفهمهُ تحبه ولما متفهماشي ح تكرهه اي مادة تانية ❤️🙂
منهج ساهل نقدرو نلموهه مع بعض
مرهه آله ومرهه يدوي 💚
واني نحب اليدوي اكثر سامحوني😂🤍
مهم اني نشبح فيكم حاجه كبيرهه دفعة دبيبة🥺🤍
ربي يوفقكم 🔥✅

@Thehopedesired_bot
دُفعة 2021-2022 الحلوين، بدايتًا هدا البُوت حَ يساعدكُم واجد موفقين وانتُم قدها ويد بيد مع خطوتنا مافيش مُستحيل💜.

قصتي مع شهادة 🚶🏻‍♂️💚
اول شئ لما بدت قرايا بديت نقرا اول بأول ونتعلم من الناس ذو الخبرة والكفائة
ثاني شئ انتم تشبحوا في شهادة قرايا بس لا بالعكس 🙂
اني اكثر انسان هيجت وفرهدت اعلي روحي وغيرت جوي 💚
تقريباً اكثر من توا🤣
يلي نبي نوصله هيج واطلع وغير طاقتك ونفسيتك✅
ومكان الدراسة متخليشي في مكان واحد انتقل ؛لان ح تحس بطاقة جديدة🥳
موفقين دفعة 2️⃣0️⃣0️⃣4️⃣

السلام على الجميع..
معاكم براءة ناصر، الأكثرية يعرفوني لأني كنت نشرح وندير في اختبارات لدفعة 2002 / 2003

مدققة لغوية متحصلة على شهادتين في التدقيق إحداهما بنسبة 97‎%‎؛ لذلك حنبدا معاكم في شرح مادة الدراسات اللغوية خطوة بخطوة بإذن الله.. وموفقين 🌸♥️

السلام عليكم .. 🙋🏻‍♂️
اهلين كيف حالكم ؟
-نعرفكم ب نفسي اني مروان باباي 🤓
بإذن الله هنكون معاكم ف مادة الفيزياء الكهربائية 👨‍🔬✨
-مادة قنينة و ممتعة مافيهاش هلبا صعوبة ف حاجات جديدة عليكم و في حاجات واخدينها قبل وكله بناخدوه مع بعض خطوة خطوة😊
-تعتبر الفيزياء من اطول مواد شهادة لان متكونة من 9 ابواب و بتقرو فيها 3 اجزاء 💡
باذن الله هتكون احلى مادة عندكم و هتحبو المادة هلبا و هتجيبو فيها الفل مارك 💪🏻❤️.

"صعوبات التعلم لا تعني أنك لست ذكيًا"

اهلين كيف حالكم 🙋🏻‍♂️✨.
نبي نهدرز معاكم اليوم ع موضوع مهم ف شهادة
الي هوا (الألة الحاسبة )📠
الالة يجماعه مهمة هلبا ف منهجنا السنة هاذي
هتستخدموها ف اكثر من مادة اولهم رياضيات و الميكانيكا💁🏻‍♂️
و اكيد كلكم زابطين مش اي نوع من الالة ضروري تكون كاسيو 991 👌🏻.
و مادبيكم اللون الاسود مش الفضي.
توا كلكم بتقولو علاش شن الفرق.!!🦦
الفرق الفضية توا كلها مقلدة معاش في الاصلية
اما الاسود تحصلوها اصلية و كويسة يعني تعطيكم الحل دقيق و مزبوط . 👍🏻🌝
لو انت/ي ف طرابلس برا ل مكاتب الظهرة ولا البيفي هاذو احسن مكانات يبيعو فيهم .😎
موفقين بإذن الله 🙏🏻♥️
#الفيزيائي💡👷🏻‍♂️.

لِـنبدأ بِخـطوة – Let's start with a step 🖤:
#منقووووووووول .........

#سلسلة_العـودة_للمـدرسة📖🖌

#اقــلام_الــهايــلايتـر«🖍📓»

• اللون الأصفر📝✨: يستخدم في حالة إذا ما كنت تريد حفظ المعلومة بنصه لاحتوائها على الكثير من القوانين و المعادلات #السبب : لأن اللون الأصفر منشط لخلايا الذاكرة، ويساعد في الحفظ

• اللون السمائي📝✨: يستخدم مع المعلومات التي لها هوامش #السبب : لأن اللون السمائي يوحي باتساع الحيز ، فيتناسب مع كبر

• اللون البرتقالي📝✨ : يستخدم مع الفقرات الطويلة #السبب : لأن اللون برتقالي يوحي بضيق الحيز .

• اللون الأحمر الفاتح📝✨: يستخدم مع المعلومات التي دائما ما تنسي #السبب : أن اللون الأحمر الفاتح لون مثير للانتباه ، وله على حفظ المعلومة .

•اللون الأخضر الفاتح📝✨ : يستخدم مع المعلومات المفصلة المليئة بلشرح و تفصيل #السبب : أن اللون الأخضر الفاتح لون مريح للعين أثناء القراءة .

بدايتنا غداً بإذن الله🤍
بالترتيب من الصباح إلى المساء