حدس للابراج الترابية
الجدي ، الثور , العذراء

• موضوع يخص العائلة او البيت يرجع ينفتح
• شخص اكبر منكم حيحاول يتدخل بموضوع يخصكم
• تتخذون قرار مصيري يخص علاقة او وضع قديم
• تقطعون العلاقة بشكل نهائي مع شخص مهم بحياتكم
• الرسائل والاتصالات حتزيد عليكم الفترة
• خبر سريع يوصلكم ويصدمكم
• شخص يراقب كلامكم وحساباتكم ويحاول يعرف اخباركم
• امنية شخصية تتحق او شي يصير ويكون قريب جدا من الي تمنيتوه
• تحسون بالاكتفاء من موضوع معين،كانوا اخذتوا حاجتكم منه
• سرعة بديهة منكم ورد سريع يخلي شخص كدامكم ينصدم من صراحتكم
• تشوفون حركة مفاجئة من شخص جان ساكت فترة طويلة
• تتخذون خطوة جريئة
• مناسبة او تجمع حلو يخليكم محور الاهتمام والانظار عليكم بشكل مؤقت

• الصورة الاولى •

المنفصلين بينكم طاقة تماسك قوية، اكو تمسك داخلي خصوصا من طرفه، عنده تعلق، عنده احساس بالتملك اتجاهكم،وعنده صعوبة انو يترك الشي الي هو يحس بالتملك تجاهه،بس المشكلة بينكم مو بس حب، المشكلة صراع، اكو مشادات واضحة بينكم، كل واحد بيكم يريد يربح بالكلام وغيرها،ممكن اكو كلام جارح انقال،وممكن صارت مواقف انكسرت بيها الثقة، وهو حاليا بين اثنين، جزء يريد يرجع ويصلح، وجزء ثاني يكابر وميقبل يبادر،والعلاقة بالنسبة اله مو سطحية، بس مشاعره ملخبطة ومو مستقرة، بس حتى فكرة انهاء العلاقة بشكل كامل ما مستوعب هالشي بداخله،هو يراقبكم بس مراقبة خوف، يخاف انو تمشون بحياتكم وتتغيرون وتتخطوه، لذلك عينه تبقى عليكم، اكو رجوع؟ فكرة الرجوع موجودة وبقوة نعم، بس مو رجوع قوي، لان هو يعرف اذا رجع بنفس الاسلوب القديم رح يخسركم،لذلك ديفكر شلوت يرجع بدون ما يبين ضعيف، وبدون ما يخسر كرامته،واذا رجع رح يكون لين اكثر،يستمع اكثر،يحاول يمشي الامور بهدوء، بس هو يحتاج نضج اكثر حتى يثبت الاستقرار،اساسا انتوا هالفترة جاذبيتكم عالية جدا،اكو ثقة وانوثة قوية وحضوركم واضح،حلو هالشي، عموما هو بطبيعته سريع بالكلام، يدافع بسرعة ويندم بعدين، مزاجه يتبدل دائما، طاقته هنا هوائية،ممكن عنده مواقع مائية،او ترابية ايضا، المهم انتوا لتركضون ورا الرجوع، خلوا الخطوة تجي منه،واي رجوع يصير خلوه مبني على اتفاق واضح مو اشتياقات لحظية

الكراش،بينكم جذب حلو، وهو مو مطنش مثل ما تتخيلون،بالعكس هو منتبه،ومتعمد يبين انه ما مهتم، وهو بشخصيته عنده حالة ملل او ميقتنع بالاشياء السطحيى بحياته،لذلك وجودكم لفت انتباهه بطريقة مختلفة وهو شاف بيكم شي مميز، بس اشوف انو هو متحفظ لان ممكن اكو جرح قديم بداخله او تجربة خلته هيج،مشاعره مو باردة تجاهكم بس متردد رغم انو اكو اعجاب واضح واكول أمل بداخله انو هاي العلاقة ممكن تكون مختلفة عن تجاربه السابقة، بس بنفس الوقت يخاف يعيد نفس السيناريو والاحداث، لان كلت الكم هو انكسر قبل يمكن،ويمكن وثق بشخص وخذله،يحس اكو فرصة بينكم،كانوا القدر جمعكم بمرحلة لازم تصير، بس هو شخصيا يحب السيطرة، ما يحب يبين ضعفه بسهولة، لذلك ممكن تشوفون تصرفاته باردة احيانا، لكن هو بالحقيقة ديختبركم، ممكن اكو شخص حاليا بحياته؟ مو ارتباط رسمي بينهم، لكن اكو طاقة ناس حواليه،ممكن ناس منافسين، وبنفس الوقت ناس مهتمين بي اهتمام، اكو ناس معجبه بي، بس هو اساسا متعود يكون محط اهتمام،العلاقة قابلة انو تتطور بس تحتاج شغل وصبر، لان هو من النوع الي يريد علاقة مستقرة ومسيطر عليها ما يحب الفوضى العاطفية،بالمناسبة هو عنده حدس جدا جدا قوي وممكن هو روحاني اساسا، ويحس بالطاقة بشكل سريع،ويعرف اذا انتوا متوترين،مستعجلين،متغيرين، زعلانين، لذلك كونوا هادئين وياه وخليكم غامضين نوعا ما،طاقة هالشخص نارية نوعا ما،وللبعض مائية، او اساسا نارية مكس نارية، وبالمناسبة هو حساس اكثر مما يبين جدا جدا حساس،لكن شخصيته قيادية ويحب السيطرة ظاهريًا

• الصورة الثانية •

المنفصلين الجرح بينكم جدا واضح، الانفصال ما جان سهل ولا جان عابر، جان بي كسر لمشاعر حقيقية، اكو كلام اندفاعي وقوي انقال بشكل سريع،قرارات اتخذت بدون حساب صحيح، وطاقة الالم للان موجودة، وخصوصا من طرفه هو،ممكن ديحاول يبين قوي او عقلاني، بس بداخله تأذى اكثر مما اعترف،هو من النوع الي بسرعة يتحرك بالكلام ويدافع عن نفسه، وممكن حتى يقلب الموضوع لصالحه، بس بعدين يرجع يهدا ويستوعب الي صار، فالمشكلة المشاعر جانت قوية جدا لدرجة خلت العلاقة تدخل مرحلة من الصعب انو يتسيطر عليها،والعلاقة بينكم جانت اختيار واضح مو لعب،وممكن حتى هو جان يشوفكم شريك فعلي مو بس علاقة وقت، واكو عمق عاطفي حقيقي وقوي ومو مجرد تعلق لان هو شخص يعرف يحب بس طريقته بالتصرف باوقات الضغط تخرب كلشي، لكن حاليا مشاعره اهدئ من قبل مو مشتعل مثل بداية الانفصال،صار عنده نضج بسيط وديفكر بالماضي بنظرة احسن ويتذكر الاشياء الحلوة اكثر من المشاكل واكو احساس بندم،والرجوع ممكن لكن مو فوري لان اشوف انو اكو تاخير واكو تعليق واكو تفكير زايد، لان هو ديقيم الاوضاع ويتسائل اذا بعدكم تريدوه؟ واذا رح تكدرون تبدون صفحة مختلفة وجديدة ونظيفة،العلاقة مو منتهية طاقيًا اكو رابط قوي بينكم بس متوقف حاليا، لا تخلون الالم القديم يتحكم بقراراتكم الجاية، فكروا اذا مستعدين تفتحون الباب؟ لو بعدكن شايلين وجع ما نسيتوه؟ طاقته مائية بشكل واضح جدا، ممكن عنده قمر او طالع هوائي للبعض مريخ هوائي وقمر مائي


الكراش،الاحساس عندكم جدا تجاهه جدا غريب، اكو شعور بداخلكم انكم تعرفون هالشخص من زمان حتى لو العلاقة بينكم جديدة او مجرد اعجاب، وبينكم راحة غريبة بشكل عميق، كانوا ارواحكم متعودة على بعضها، وهو يحس وجودكم يكمل شي ناقص بداخله، ونظرته الكم ابدا مو سطحية، بس هو شخص ابدا ما يتحرك بسرعة، هو يراقب وينتظر ويقيم، هو من النوع الي يستثمر وقته بطريقة محسوبة، ما يدخل بعلاقة الا اذا شاف بيها اخذ وعطاء حقيقي عاطفي او استقرار، لذلك ممكن تحسون انو هو بطيئ او متردد لكن هو بالحقيقي ديبني شي كامل قبل لا يقرر،مشاعره بيها تقدير واحترام واضح، مو مجرد اعجاب وايضا يشوفكم اشخاص مناسبين لعلاقة جدية، بس بنفس الوقت اكو صراع داخلي، اكو ممكن منافسة حوالينه، او اكو شخص ثاني ديحاول يتقرب منه؟ او حتى غيرة خفيفة منه اذا شاف اهتمام الكم من شخص غيره، هالشي يحركه داخليا بس يخليه متوتر بنفس الوقت،هو يريد ينطيكم بس بنتس الوقت يريد يستلم، ميحب يحس هو الوحيد الي يبذل،لذلك طريقة تعاملكم واهتمام جدا جدا تأثر عليه لان اذا حس انو الجهد متبادل بينكم، رح يثبت اكثر ويتقرب،هو يراقب تصرفاتكم بدقة ويحب يعرف شلون تفكرون وشلون تتعاملون وقت الضغوط،وممكن يختبر غيرتكم مرات، يثير نقاشات ويشوف ردود افعالكم، ممكن عنده تجربة قديمة بعدها تأثر عليه، او شخص من الماضي للان حواليه بطريقة معينة، لذلك هو مرات يقارن بينكم وبين هالشخص بدون لا يحس،العلاقة قابل تتطور وبشكل جدا قوي خصوصا اذا صار توازن بالعطاء، اشوف طاقة تاسيس حقيقي، بس لازم يصير وضوح وتدرج طبيعي بدون استعجال

طاقته ممكن ترابية، او عنده مواقع او قمر مائي، ممكن للبعض قمر حوت عقرب، خلوا العلاقة تنمو مثل الشجرة خطوة خطوة لا تختبروه بشكل زايد ولا تنطونه كل شي من اول فترة، التوازن هو الحل

ماعرف شوكت الشخص الي يقرا القراءة او الحدس يفتهم انو الكلام عام للكل مو لنفسه؟ شنو عود نرجسي يعني والكلام بس الك لو شنو يعني ليش هالدوخة هاي لو تجي تكتبلي لاععع حبيبي مو هيج، يابه من احرگه لحبيبج عاد شلونه هو، افهموا انو كلشي تقروه بالنت هو طاقة عامة لو ينزل مدري منو مرح ينطبق كلشي عليكم، واذا انطبق نقطة نقطة فشي زين هاي لان القارئ او القارئة حيكون مضبوط ويعرف شنو يقرا مو ذول الجدد الي شله ويعبر يحجيلكم نقطة تصير بروتين يومي لكل البشر ويضحك عليكم وتكتبوله اييي انطبق وهو حتى الجاهل تصيرله هل شغلة بيومه فيا حبايبي بنفس الوقت انتبهوا من هيج اشخاص ومن النصب ، واكرر ماينطبق على الشخص 100% وتكون القراءة كاملة وواضحة غير القراءة الخاصة لان هي محددة لطاقة الشخص فقط، كافي تسألون هيج اسئلة لان لعبت روحي هواية وكل مره اجاوب عليها، وشكرا

حدس للاحرف
ا/ي/ل/ب/م/ط/ز/ظ/و

دتتذكرون اشياء وذكريات قديمة وأشخاص صارلكم فترة ممتواصلين وياهم،ممكن يصير عندكم تواصل من شخص من الماضي فجاة او ترجعون تفكرون بشي صار قبل، رح تميلون للمراقبة هالفترة، حتلاحظون تفاصيل دقيقة حواليكم ورح تفهمون نوايا الناس بسهولة،خصوصا اذا انتوا عندكم موضوع يخص شغل او تعاون وي مجموعة، عندكم احلام متكررة وتشوفون اشياء غريبة، حاولوا تنتبهون لهل اشياء وخصوصا احلامكم لان بيها رسائل مهمة الكم، صاير عندكم نوع من الحذر من الناس، عندكم طاقة صبر عالية هالفترة،ممكن يجيكم خبر مفاجئ يخص مشروع او تعاون،هالفترة شعوركم مزيج بين الفضول وبين الحذر، اختاروا اشخاصكم بعناية واكتموا المواضيع شوية لتحجون كلشي هالفترة

حدس للاحرف
ت/ن/س/ذ/ر/ض/ق/ك/ص/غ

دتمرون بتغييرات جديدة لكن مهمة، حتحسون بنشاط داخلي ورغبة جبيرة انو تبدون شي او تغيرون اشياء بحياتكم اليومية، خصوصا شي يخص فلوس او فرصة عملية، علاقاتكم دتمر بتحولات حلوة، ممكن عندكم تعارف جديد بينكم وبين شخص مهم او شخص قريب رح يرجع يتواصل وياكم بعد فترة انقطاع،رح تحطون حدود شخصية قوية هالفترة بسبب كم شخص،اجوائكم العازفية مستقرة بس دتفضلون المواقف والاشخاص الي ينطكم راحة وسعادة حقيقية، حتلاحظون انو القرارات الي تاخذوها هالفترة حتكون مؤثرة على حياتكم نوعا ما، عندكم حضور لمناسبات صغيرة او تجمعات وهالشي يخليكم ترتاحون

حدس للاحرف
ف/ح/هـ/خ/ع/ج/ش/ث/د

هالفترة هادئة عليكم، ودتشوفون التقدمات مالتكم ثابتة خصوصا بمواضيع مالية، رح تتقربون من ناس مو بعيدين عليمن سواء صداقة او تعاون، حتلاحظون اهتمام واضح من شخص معين وهو نفسه الي ببالكم حاليا، حتشوفون تعامل لطيف وهادئ منه، حساسين هالفترة عاطفيا، دتتاثرون باشياء بسيطة،اكو تغييرات صغيرة بالبيت، ممكن تخططون لاحتفالات بسيطة او طلعات حلوة واطلعوا هالفترة حتزيد الطاقة الايجابية عندكم،حذرين من اشخاص جدد تو عرفتون، تحسون انو لازم تحافظون على حدودكم وتختارون بعناية،حتميلون للهدوء والثبات والراحة وشوية نشاطات اجتماعية حلوة هالفترة وحتكونون مستعدين انو تواجهون اي تغييرات قريبة

حدس للابراج
#سرطان #ثور #حمل #جوزاء #اسد #عذراء

• هالفترة بتلاحظون تغييرات خاصة بسيطة لكن حتكون واضحة للاشخاص حواليكم،بعضكم ممكن يستلم دعم او مساعدة من قريب او صديق، او من شخص يهتم لامركم بشكل عملي، وهالشي بيخليكم تحسون بالراحة والتقدير، تفكيركم صاير كله مركز على خياراتكم القادمة، بتكفرون بمكان او موقف جديد حصل، بعضكم ممكن ديخطط لشي بعيد او فرصة جديدة تتحقق بشكل تدريجي،ذكريات من الماضي ترجع لكم بشكل لطيف، ممكن تلتقون بشخص او اشخاص من ايام قديمة او تسترجعون لحظة حلوة مع شخص معين قديم، وهالشي يخليكم تحسون بحنين ودفئ،بعضكم رح يحس بتضخم او بالاحرى موجة من المشاعر المتجمعة والمتنوعة، احيانا حماس واحيانا تردد، لكن كلشي قاعد يعطيكم فرصة حتى تعرفون شنو الي تحبون وشنو الي يريحكم، في اشخاص يناظرون لكم بطريقة لطيفة ومميزة، بيحاولون يقربون بدون ضغط وهالشي بيخلي عندكم نوع من الفضول والتجربة، ممكن تحسون نفسكم تميلون للتعبير عن نفسكم اكثر، سواء بالكلام او بمظهركم تغييرات بشكل عام، بتلاحظون ثقة واضحة بالاسلوب او النصائح الي جالسين تقدمونها لغيركم

حدس للابراج
#قوس #عقرب #دلو #جدي #ميزان #حوت

• هالفترة تمرون بتغييرات مفاجئة او مواقف غير متوقعيها ودتخليكم توقفون وتعيدون نظركم للاشياء حواليكم، رغم انو احيانا الامور دتبين مزعجة او محيرة لكن الهجف منها انها تفتح لكم باب جديد للفرص، ممكن تبتعدون عن مكان او تتخطون موقف قديم او تتركون عادة او تجربة ما تخدمكم بعد، وهالشي يخليكم تشوفون الطريق بشكل اوضح، اكو أمل جديد ديلمع قدامكم بخصوص شي،ممكن يظهر شخص لكم ويلهمكم او تطلع فكرة جديدة تخليكم تتحمسون لاشياء افضل، بعضكم ديحس بدافع داخلي قوي حتى تجربون شي جديد او تريدون تتخذون خطوة مهمة؟ في اشخاص حواليكم يحاولون يلفتون انتباهكم بطريقة واضحة، خصوصا اذا انتبهتوا لطريقة تواصلهم، ممكن تبدون مشروع صغير او خطوة عملية ايجابيها، كارما خير ترجع لكم، حتحسون برغبة انو تتكرون شي وراكم او تبتعدون عن مرحلة او علاقة ما تناسبكم بعد او تعبتوا من وضعها، وهالشي ينطيكم مساحة اكبر وتركزون على انفسكم وعلى الاشياء الي تستحق الاهتمام فقط، عموما في تغييرات مفاجئة، تبتعدون عن شي قديم كذلك اكثر من مره ذكرتها حاولوا تعرفون شنو الشي المؤذي بحياتكم حاليا وابتعدوا عنه لانه بيأذيكم اكثر، استقبلوا الفرص الجديدة

سالو

حدس للابراج النارية
الاسد ، القوس ، الحمل

• اشوف رجوع تواصل او كلام مع شخص كان بينكم وبينه انقطاع او بُعد ممكن يرجع بشكل سريع ومفاجئ ويصير اكو وضوح اكثر من قبل، هالفترة بيها حركة رسائل ومكالمات او اخبار توصل بسرعة وتخليكم تنتبهون لتفاصيل جانت غايبة عنكم، اشوف شخص رح يتكلم معكم باسلوب مباشر وصريح ويحاول يوضح موقفه او يشرح شي جان صاير قبل، والنقاش هذا ممكن يكون مهم ويخليكم تشوفون الامور بنظرة مختلفة،اكو مواقف حتصير وبيها مساعدة متبادلة بينكم وبين اشخاص قريبين منكم، مره انتوا تقدمون شي ومره المقابل يرد الجميل الكم بشكل واضح، اشوف نهاية مرحلة او موضوع قديم ينتهي وهالموضوع اخذ من وقتكم فترة طويلة، حتشوفون نفسكم تتركوه وراكم بهدوء بدون ماترجعون مره ثانية، هالفترة تكثر عندكم الاحلام هواية او تشوفون اشياء غريبة خاصة بالليل،ويمكن تلاحظون اشياء تتكرر قدامكم مثل اسم شخص او موقف يصير ويشبه موقف صار قبل، اكو امور او كلام حتبين بالبداية مو واضحة الكم بس مع الوقت رح تبين الحقيقة كدامكم، اشوف درجات فيها رقم 8/6/4

حدس للابراج المائية
السرطان ، الحوت ، العقرب

• اشوف ابتعاد عن موضوع او عن شخص كان ياخذ من وقتكم لفترة، كانوا قررتوا تتركون شي قديم وتركزون على اشياء جديدة اكثر هدوء، رح يجيكم تواصل واضح من شخص يعرف شلون يعبر عن نفسه بالكلام ويبين اهتمامه بطريقة مرتبة، ويمكن تشوفون محاولات تقرب او مجاملة صريحة من طرفه، شخص هادئ باسلوبه او طريقته بالكلام رح يلفت انتباهكم وحتحسون ان حضوره مختلف شوية عن باقي الناس حواليكم،اكو جلسات ولقاءات وطلعات مع ناس قريبين منكم وممكن تصير بمكان حلو ومعروف او مكان فيه طابع تقليدي وهادئ، والجو حيكون مريح بسيط، اشوف تواصل جديد او بداية تعارف مع شخص ينطيكم انطباع لطيف من اول مره، ويصير بينكم كلام خفيف او مجاملات تبقى ببالكم، هالفترة حتميلون للهدوء اكثر ويمكن تقضون وقت اطول بالبيت بعض الاحيان او تفضلون طلعات لاماكن هادئة بعيدا عن الضجة، دتشوفون اشخاص تعرفوهم بالحلم هالفترة بشكل قوي؟ او اماكن رايحيلها قبل ومدتعرفون ليش، اشوف درجات فيها رقم 5/8/4

حدس للابراج الهوائية
الميزان ، الدلو ، الجوزاء

• اشوف قوة وهدوء بطريقة تعاملكم هالفترة مع الناس حواليكم كانكم صرتوا اكثر سيطرة على ردود فعلكم وتتعاملون وي الامور بعقلانية اكبر من قبل، اشوف كلام صريح او حقيقة تنكشف كدامكم بعد فترة من الغموض، ويمكن يصير نقاش واضح مع شخص كان بينكم وبينه سوء فهم او كلام مو كامل وناقص، اكو موقف رح يسببلكم ضيقة بسيطة او يذكركم بشي صار قبل، بس بنفس الوقت رح يخلي الامور تتوضح اكبر بينكم وبين شخص، الاجواء عندكم سريعة هالفترة، ممكن وضع او خطة تتغير فجاة وشي صير مو متوقعي يخليكم ترجعون ترتبون الامور من جديد، اكو موقف مفاجئ يلفت انتباهكم او خبر يوصلكم، اشوف قعدات او مناسبة صغيرة بيها ضحك وكلام خفيف، حتشوفون نفسكم بين ناس تحبوهم ويحبوكم او بين اصدقاء قديمين تتجمعون، وحيكون الجو بينكم مريح اكثر من قبل، اشوف درجات فيها رقم 3/1/6

حدس للابراج الترابية
الجدي ، الثور , العذراء

• اشوف اجواء تجمع مع اشخاص قريبين منكم،ممكن تكون زيارات عائلية او لقاءات بسيطة تخلي الجو حلو، ويصير اكو كلام هواية وضحك واسترجاع مواقف قديمة، اكو موضوع شاغل بالكم من فترة؟ ودتحسون انه اخذ من طاقتكن وصبركم كانكم تحملتوا اشياء اكثر من اللازم وتحاولون تكملوها للنهاية،اكو موقف رح يخليكم تعيدون تفكيركم بخصوص شي انعرض عليكم او بخصوص كلام انقال قبل الكم، ممكن بالبداية مارح تهتمون له مثير بس رح ترجعون تفكرون فيه مره ثانية، اشوف شخص ممكن ناري او مائي او مكس بينهم، عملي وواصح باسلوبه يتعامل وياكم بهدوء ويعطي انطباع انه شخص يعتمد عليه، ممكن يصير بينكم وبينه حديث جدي او موقف يوضح نواياه بشكل مباشر،بهالفترة دتزيد الافكار جدا خاصة قبل النوم او دتكثر الاحلام خاصة اذا عندكم موضوع تنتظرون نتيجته او جواب بخصوصه،موقف رح يصير كدامكم ويخليكم تراجعون قرار قديم او طريقة تصرف طلعت منكم قبل، كانوا حتحاولون تشوفون الامور من زاوية مختلفة، اشوف درجات فيها رقم 10/4/9

الاحلام طبيعية كثرتها هالفترة وخاصة بموسم الحوت والعبورات، كثروا ذكر الله وتحصنوا ولتفكرون بيها ولتحجوها لاحد