حدس للاحرف
ا/ي/ل/ب/م/ط/ز/ظ/و

طاقتكم بيها ملل او مراضين عن شي، اكو كدامكم بس مديعجبكم او مدتشوفوه بشكل كافي وديخليكم تبقون بحالة تردد بين خيارين بدون ما تحسمون وهالتردد مارح يطول لان رح تصير حركة سريعة او موقف يجبركم تتحركون وتطلعون من هالحالة ويمكن يكون تصرف سريع منكم او من شخص يخلي الامور تمشي غصبا عنكم، طاقة حماس رح ترجعلكم رح تحسون تريدون تتحركون وتجربون لو تسوون شي جديد بدون ماتفكرون هواي بس بنفس الوقت اشوف اكو للبعض قيد داخلي كانوا خوف او فكرة براسكم دتوكفكم وتخليكم ترجعون خطوة ليورا ودتعيشون بين حالتين همين اندفاع قوي وهمين توقف، اكو غموض بفد موضوع او اكو احساس ديخليكم تشكون بشي او تفكرون زيادة ويمكن تحسون اكو شي مخفي عنكم او مو مفهوم، اشوف مشاعر ناعمة ونية طيبة تجاهكم تجاه شخص او موقف بس متبينون كلشي، اكو ارتباط قوي او تعلق بشي معين ممكن شخص او فكرة ويخليكم تفكرون بشكل متكرر وتحسون صعب تتركوه ويمكن تحسوه ميفيدكم، اكو طاقة كلام ومواجهات ممكن رح تنحجي اشياء بشكل مباشر، اكو شخص ناري رح تتقربون منه يا حمل يا اسد، انتبهوا من التسرع ومن الاشياء الي تقيدكم

حدس للاحرف
ت/ن/س/ذ/ر/ض/ق/ك/ص/غ

تحسون بنقص او ضيق مريتوا بي، ممكن مادي او نفسي وهالشي خلاكم تحسون انو الامور مدتمشي مثل ما تريدون ودتفكرون ترجعون لشي ثابت او اسلوب قديم متعودين عليه حتى يحسسكم بالامان،وترا هالشي حيخليكم تتركون وضع او علاقة او طريقة تفكير متناسبكم،اكو راحة داخلية وراضين عن شي بسيط حيخليكم ترجعون لنفسكم وتفكرون تبجون شي جديد، اكو بداية مختلفة بس المشكلة اكو نهاية او صدمة صارت او رح تصير تخليكم تحسون انكم تعبتوا او انو خلص وصلتوا لحد معين وهالشي بذات رح يتحول لبداية أمل حتحسون اكو نور يرجع وتشوفون انو مو كلشي انتهى ورح تبدون تفكرون بالمستقبل اكثر وتخططون وتنتظرون شي معين، اكو لحظات فرح او مواقف تغير مزاجكم للافضل تحسون بخفة، اكو شي يرجع من الماضي يمكن ذكرى او ممكن رجوع شخص،ورح يفرحكم هالشي حاولوا لترجعون لنفس الوقت، هالشي حيكون تذكير الكم انو تستمرون لحياتكم وتعوفون الماضي يعني مثل الدرس، او مقارنة بين وضعكم قبل وبين الحالي، حاولوا تختارون كلشي بشكل عقلاني وابتعدوا عن العاطفة

حدس للاحرف
ف/ح/هـ/خ/ع/ج/ش/ث/د

اكو تقارب او ارتباط رح يصير يعني علاقة تبلش او تواصل مع شخص يخليكم تحسون بانجذاب وراحة وهالشخص طاقته قوية وواثقة ويحب الاتنشن ويأثر عليكم، اشوف اكو خيبة خفيفة بداخلكم بسبب شي صار قبل او بسبب توقعات ما تحققت مثل ما تريدون ودتخليكم توكفون وتفكرون، دتراقبون شخص او وضع وتريدون نتيجة واضحة، عندكم استقرار بشكل تدريجي، اكو راحة عائلية بالبيت او راحة عاطفية وتحسون اكو شي رح يكبر ويصير اقوى اذا انطيتوه وقت اكو للبعض فكرة بداية بسيطة خطوة صغيرة مهمة ممكن شخص شغل او جانب شي وحتكون اساس لشي اكبر، اكو قرار عاطفي رح تتخذوه او تختارن بين طريقين او بين شخصين او تنهون شعور داخلي ورح تأثر عليكم هالشي، اكو استقرار قوي ممكن مادي او عائلي وامور رح تتثبت، حدسكم صاير قوي ومشتغل هالفترة وتحسون باشياء قبل لا تصير او دتفهمون نوايا الناس بدون كلام او تعرفون تفكيرهم وصايرين اذكى بتعاملكم، اكو اهتمام وراحة بالنفس اكثر دتهتمون بمظهركم راحتكم طاقتكم وحتصيرون اقوى واهدا بنفس الوقت

#الحمل

اشوف داخلين مرحلة انهاء رح تنهون شي مهم بحياتكم، يعني وصلتوا لنقطة النهاية وتريدون تتحركون خلص، واكو سيطرة على وضعكم وعندكم رغبة انو تمشون باتجاه معين بشكل واثق مو مثل قبل لان اشوف انو صرتوا اقوى داخليا وتعرفون شنو تريدون بالضبط وتفكيركم هالفترة عقلاتني ومدتخلون مشاعركم تاثر على قراراتكم، دتبينون واضحين وثابتين بخطواتكم

#الثور

اكو تغيير جذري ديصير وياكم ممكن شي دينتهي وشي ديبدي، واشوف ماشيين بهالتغيير بارادة واضحة مو مجبورين عليه واكو طاقة حيل قوية دتخليمم تسيطرون على وضعكم وصايرين واثقين من نفسكم اكثر وتجذبون الانتباه وهم اشوف انو دتنتظرون شي جاي بالطريق؟ او تنتظرون نتيجة خطوة سويتوها فتراقبون بحماس

#الجوزاء

واضح انو وصلتوا لمرحلة استقرار او انو صايرين مكتفين بنفسكم وتحسون انو صرتوا ثابتين بشكل قوي واكو قرار او صحوة روحية صارت عندكم خلتكم تشوفون وضعكم بشكل اوضح وصايرين تفكرون بالمستقبل وبالاستقرار بشكل قوي، البعض كاعد يراجع الي سواه وينتظرون يشوفون شراح يطلع من تعبهم

#السرطان

انسحبتوا او تركتوا شي او شخص جان مهم الك بس هذا الابتعاد جاب او رح يجيب راحة وياه وشعور خفيف لانكم رح تدخلون بجو افضل او رح تصيرون اقرب لناس يفرحوكم، رح تصيرون مرتاحين اكثر بعد قرار الابتعاد وبنفس الوقت حتحاول ترجع تسيطر على حياتك وتنظمها بشكل اقوى يعني رح تعيد ترتيب نفسك من جديد

#الاسد

اكو مشاعر او مبادرة عاطفية حتتحرك بسرعة بحياتك ممكن يوصلك تواصل او اعتراف او خطوة تفاجئك وهالشي رح يوضح عليك امور جانت غامضة والحقيقة رح تبين بشكل مباشر ورح تخليك تتعامل وي الوضع بعقلانيى اكثر حتى بالبداية المشاعر جانت هي المسيطرة بس الوضوح حيغير طريقة تعاملك

#العذراء

اكو بداية او فرصة تخص الاستقرار لو المستقبل واكو توتر داخلي واضح ممكن مستعجل تريد توصل لشي او دتفكر بشكل زايد وهالشي ديسوي ضغط عليك ورغم ان اكو جانب ايجابي او ثابت بس تفكيرك السريع والمستمر ديخليك تعيش قلق حتى وانت داخل بشي ممكن يكون مستقر

#الميزان

دتعيش حالة تردد او عدم وضوح ؟ اكو شي مخفي او مجاي تفهمه بشكل واضح الك ودتحاول توازن بين اكثر من شي او بين اكثر من وضع بس بنفس الوقت حتحاول انو تفرض سيطرتك على الامور حتى ما تضيع وهالموضوع بي جانب عادل او قرار لازم ينحسم بس بعدك حاير بين الشك والسيطرة

#العقرب

اكو ارتباط قوي او موضوع مهم صاير بحياتك وبي تعلق او سيطرة زايدة وهالشي ديسبب او سبب زعل او خيبة بشكل واضح لانك حاس انك مرتبط بشي مديمشي مثل ما انت تريده بس رغم هذا حتحاول تسيطر على وضعك او تغيره بطريقتك لان متقبل انو تتركه بسهولة

#القوس

اكو صراع بداخلك بين عقلك ومشاعرك من جهة دتحاول تفكر بشكل منطقي وانو تاخذ قرار واضح ومن جهة ثانية اكو احساس قوي ديربطك وهالشي ديخليك تحس بتقييد او ماعندك قدرة انو تتحرك لان يعني انت تعرف شتسوي بعقلك بس مشاعرك مسيطرة عليك بنفس الوقت

#الجدي

حاس بتقييد او ضغط بداخلك ؟ واكو جانب بيك ديحاول يسيطر على مشاعرك وتبين بصورة قوية كدام غيرك، اشوف انو ممكن اكو نجاح الك بشي معين او رح تاخذ تقدير من احد بحياتك رح تصير حذر ومتحفظ بسبب تعب قديم ومدترتاح بشكل كامل حتى لو الامور دتمشي لصالحك

#الدلو

اشوف قلق وتفكير زايد ديسيطر عليك واكو بداية او فرصة جديدة رح تبين الك بس رح تبقى واكف بمكانك او متردد تاخذ خطوة ومتتحرك اله، اكو مشاعر عندك لشخص معين او نية عاطفية بشكل قوي بس بعدها مو متفعلة بشكل كامل بسبب هالتوقف

#الحوت

حاليا دتعيش حالة رضا او اكتفاء داخلي واكو شعور انك مرتاح مع نفسك او دتعيش شي يرضيك، وهمين اكو حركة واضحة باتجاه شي تريده ورح تمشي بشكل واثق بخصوص فرصة عاطفية او بداية احساس جديد وهالطاقة بيها قبول وانفتاح بدون تعقيد