#الجوزاء

عقلكم متشتت بين اكثر من شي او بين اكثر من خيار وصار ضغط عليكم من جهة معينة،تحاولون تكونون حاسمين وتتصرفون بعقلانية بس التوتر والسرعة بقراراتكم دتخليكم تتعبون اكثر

#السرطان

اكو تنافس او ضغط من محيطكم بس انتوا بداخلكم دتشتغلون بهدوء وتفهمون كلشي بدون ما تحجون، اكو فرصة جديدة مادية واكو دراسية، ووي هالفرصة نجاح او انتصار واضح جايكم

#الاسد

اشوف تركتوا شي وراكم او دتبتعدون عن شي ميناسبكم بعد، دتحاولون توازنون نفسكم وتسيطرون على وضعكم ودتفكرون بعقلانية اكثر من العاطفة، بنفس الوقت اكو تمسك او خوف من الخسارة مخليكم حذرين بشكل

#العذراء

طاقة عاطفية واضحة، اكو مشاعر او تقارب بس بنفس الوقت تحسون اكو شي مو واضح او مو صريح، اكو فضول وبداية حركة او تواصل بس تحتاجون تنتبهون من الخداع او النوايا الي مو واضحة

#الميزان

سعادة او لحظات حلوة دتعيشوها مع طاقة حماس اكو وبداية قوية، اكو انجذاب او بداية شي جديد سواء علاقة او خطوة مهمة ووياها فرصة تتطور تدريجيا اذا تعاملتوا وياها بوعي

#العقرب

دتنتظرون نتيجة او شي تعبتوا عليه وبعضكم ديفكر يتبعد او يغير اتجاهه بخصوص شي معين، اكو صحوة روحية او قرار مصيري تتخذوه بس بنفس الوقت اكو خوف او شكوك بداخلكم بعدها ما انتهت

#القوس

اكو تعب قوي او سيطرة من شي معين بس بنفس الوقت اكو وضوح بالحقيقة جايكم، اكو بداية عاطفية او مشاعر بس تحتاجون ترتاحون وتعيدون ترتيب نفسكم لا تتحركون او تبلشون شي

#الجدي

دتشتغلون على نفسكم وتطورون مهاراتكم واكو توازن بالاخذ والعطاء، اشوف اجواء اجتماعية او دعم من ناس ووياها طاقة عاطفية خفيفة او بداية لشعور معين

#الدلو

واكفين على قرار او تفكير بمستقبل معين واكو طاقة اهتمام واحتواء من شخص ناضج عاطفيًا وماديًا ووياها طاقة بدايات ممكن تكبر وتستقر، مهتمين بجمالكم هالفترة

#الحوت

دتعيشون بين خيارين او ضغط بتوازن حياتكم بس بنفس الوقت اكو راحة واكو استقلال جايكم وامنيات رح تتحقق بشكل تدريجي، واكو تحول جبير يخليكم تنهون مرحلة وتبدون غيرها

حدس ل ابراج او طالع
سرطان - ثور - حمل - جوزاء - اسد - عذراء
اواخر شهر مارس

رح تنطون من وقتكم او اهتمامكم لشخص او لموضوع اكثر من قبل ورح تنتظرون رد فعل واضح، واكو مر رح يمر ويخليكم تحسون انو الطرف الثاني مو بنفس الاهتمام الي انتوا بي يعني ممكن تكتبون او تبادرون وهو رح يتاخر او يكون رده بارد .. وهالشي رح يخليكم تفكرون تبعدون شوية ، دتفكرون بموضوع صارله فترة وممكن علاقة او قرار وكل مره تصبرون نفسكم شوية بس بهالاسبوع رح توصلون لنقطة انو لازم تشوفون نتيجة ومارح تبقون تنتظرون بدون مقابل مثل قبل، اشوف رح يصير تقارب واضح وي شخص يعني كلام مباشر واهتمام او مبادرة توصل مثلا رسالة حلوة او كلام يكون عاطفي بي مشاعر وهذا الشي حيخليكم تحسون براحة ويخفف الضغط الي جان عندكم، رح تتصرفون ببرود مع شخص معين يعني رح تردون عليه بكلام قليل او تختصرون الكلام وياه، وممكن لان دتشوفون انو هالشخص مو زين وياكم او مدينطيكم الشي الي انتوا تريدوه، اشوف نهايات واضحة هالفترة ممكن تنهون تواصل مع شخص بشكل نهائي او فد موضوع معين ينتهي وما تفتحوه بعد، والقرار رح يكون واضح ونهائي، اكو تواصل او طلعات اكو اخبار تغير مودكم بسرعة، رح تسوون فد خطة جديدة ممكن تبادرون بشي معين او تسوون تجربة جديدة وهالشي رح ينطيكم احساس بالتحرر من وضع قديم، اشوف البعض متمسكين بشي معين يمكن فكرة او شخص وتحسون صعب تعوفوه، اشوف شخص مائي، ممكن سرطان/حوت او قمره هيج، رح يبينلكم اهتمامه يسال عليكم يحجي وياكم بهدوء او يتقرب بطريقة لطيفة ونيته حلوة يريد يتقرب وعنده اهتمام صادق،اكو شعور بخيبة من شي صار قبل ويمكن رح تتذكرونه هالفترة، بس عندكم فرصة جديدة او شخص يعوضكم عن هالشي، شخص جوزاء او ميزان يتصرف ببروج او يختفي،نيته هالشخص مو واضحة، مترددة فانتبهوا من التعلق بكلامه، تفكيركم رح يكون بالمستقبل وتبطلون تركزون على الي راح، وتخططون لشي جاي،رح تسيطرون على نفسكم وماتبينون ضعفكم بسهولة، رح تتعاملون بهدوء ونضج اعلى من قبل

حدس ل ابراج او طالع
قوس - عقرب - دلو - جدي - ميزان - حوت
اواخر شهر مارس

عندكم حالة استقرار هالاسبوع، بداخل البيت او البعض من الناحية المادية يعني اكو دعم من العائلة او مبلغ رح يوصل الكم او تحسون وضعكم ثابت اكثر من قبل، اكو موقف يصير يخليكم تنجحون بشي او تنجذبون لانتباه الناس مثل مدح او نجاح او ناس رح تحجي عنكم بشكل ايجابي،ديصير تقارب واضح وي شخص يعني كلام مباشر او لقاء او رجوع تواصل بعد انقطاع للبعض،العلاقة رح تمشي بسرعة اشوف انو انتوا بنفس الوقت دتستخدمون ذكائكم بالكلام والتصرف وتعرفون شلون تجذبون الطرف الثاني وتوصلون للي ببالكم بدون ضغط، رح تصير حيرة بين خيارين ممكن البعض عندكم شخصين ديحاولون يتقربون منكم وواحد يبين اهتمامه بالمشاعر والكلام والثاني اهتمامه بالافعال وهالشي يخليكم مترددين ومتعرفون تختارون بسرعة، اكو بداية خطوة صغيرة جديدة ممكن بداية تواصل وي شخص جديد او تتعلمون شي جديد وهالبداية تحتاج صبر لان نتائجها مو سريعة بس رح تمشي، تحسون برضا داخلي من شي تحقق ممكن امنية صارت او شي جنتوا تنتظرونه من زمان وصار وهالشي يخليكم مزاجكم افضل ويخليكم اكثر انفتاح على الناس، اكو ارتباط قوي ديصير وي شخص معين بحياتكم، كلام يومي هواية واهتمام وممكن للبعض لقاءات،وتحسون ان العلاقة دتتثبت اكثر من قبل،اشوف توتر مع شخص ممكن نقاش او غيرة او تنافس وهالشي ديخلي الجو مشحون شوية خصوصا اذا الطرف الثاني يحاول يفرض رأيه عليكم،شخص قوس او دلو ممكن ينافسكم او يدخل بنقاش وياكم قوي وتصرفاته بيها اندفاع او عناد ونيته مو مستقرة انتبهوا، رح تحسون باستقلالية اكبر وتقررون اشياء بنفسكم وتركزون على راحتكم اكثر، ممكن تكتشفون شي مجنتوا تعرفوه عن شخص او موقف وهالشي رح يخليكم تشكون او تتربكون،يصيؤ موقف مفاجئ يغير شي مهم ممكن حقيقة تنكشف او تصرف من شخص يخليكم تغيرون نظرتكم اله

.

🥎
الي يستنزف طاقتكم هو صراع داخلي دائم بين عقلكم وبين عاطفتكم، انتوا تحاولون تبينون نفسكم اقوياء ومسيطرين وعندكم قرارات واجهة بس بالواقع داخلكم ديتكسر بسبب مواقف عاطفية قديمة بعدها ممتعالجة او ممتشافين منها، اكو جروح واضحة خلتكم تحطون باب على گلبكم وتتصرفون بعقلانية زايدة وتبتعدون عن مشاعركم لكن بالعكس هذا الشي هو الي ديستنزفكم اكثر، وغير هذا اشوف انو اكو ضغط من ناحية الاستقرار سواء مادي او عائلي، تحسون لازم توصلون لمستوى معين ببالكم او تثبتون نفسكم وهذا الشي ديخليكم دائما بحالة توتر، وتدخلون بصراعات او مواقف بيها مشادات ومرات تحاولون تفوزون او تثبتون رأيكم حتى لو الموضوع ما يستاهل، وهذا الشي يستهلك طاقتكم النفسية بشكل جبير ويخلي كل هذا متراكم بداخلكم لدرجة ديوصل لقلق وتفكير زايد وارق .. لازم تتعلمون ترجعون للبساطة لان مو كلشي لازم ينفهم بعقل او ينحل بالقوة تحتاجون تسمحون لنفسكم انو تبدون من جديد بدون ما تشيلون كل هذا الثقل وياكم، درسكم هنا انو توازنون بين عقلكم وقلبكم، مو تلغون مشاعركم بحجة القوة ! لا لان القوة الحقيقية مو انو تتحكمون بكلشي وانما تعترفون بتعبكم وتعالجوه، ايضا لازم تعرفون مو كل موقف يحتاج رد او اثبات لان بعض الخسارات راحة، واشتغلوا على تهدئة عقلكم لان التفكير الزايد هو اكبر عدو الكم هالفترة، من تهدئون داخليًا فكلشي ثاني رح يترتب من نفسه

🏀
الاستنزاف عندكم بسبب العطاء الزايد، انتوا اشخاص تحبون تنطون وتدعمون وتهتمون بس المشكلة انو مرات تنطون اكثر مما تاخذون وهالشي شيسوي؟ رح يخليكم تحسون بتعب داخلي حتى حتى لو ظاهركم مبين مرتاح، اكو ضغط هم من ناحية الحركة والتقدم يعني كانوا دتركضون ورا شي او ورا هدف بس بنفس الوقت دتوزعون طاقتكم على اكثر من جهة،ناس،علاقات،فرص وهالشي ديخليكم متشتتين وكذلك اكو تعلق ببدايات او مشاعر جديدة، دتتحمسون بسرعة او تدخلون بقوة، بس من تحسون الطرف الثاني مو بنفس المستوى ف رح تبقون انتوا تنطون وتحاولون تمشون العلاقة بنفسكم وهالشي غلط، اكو جانب بيكم يحب يحافظ على الشي حتى لو ديستنزفه ومتتحبون تتكرون بسهولة وهالشي ديخليكم تشيلون فوك طاقتكم .. لازم تتعلمون التوازن بالعطاء لان مو كلشي ينطي من القلب وما اله حساب، انتوا تستاهلون نفس الشي الي كاعدين تقدموه مو اقل لذلك تحتاجون تتعلمون تختارون وي تحطون طاقتكم لان مو كل فرصة تستاهل ومو كل شخص يستاهل جهدكم وايضا خففوا الاندفاع بالبدايات وخلوا المشاعر تبلش بشكل تدريجي مو من البداية تنطون كلشي وتعلموا تتركون بدون لا تحسون بالذنب لان مو كلشي لازم تحافظون عليه ، اكو اشياء لازم تنتهي حتى تفتح مجال لشي افضل ومن تضبطون هالتوازن رح تتحول طاقتكم من استنزاف الى جذب وتصيرون تمشون الامور بيدكم بدال لا هي تمشيكم

#اشارة

طاقة مائية .. ترابية
ابراج سرطان / حوت / ثور
مريخ حمل / عطارد قوس
مواقع جدي / مشتري جدي

هذا الشخص الي ببالج ديعيش حالة تذبذب يوم يتقرب منج يوم يبتعد بس بالحقيقة مشاعره جدا عميقة اتجاهج وديحاول يوازن نفسه حتى لا ينكشف او لا يبين ضعفه، يفكر بيج بشكل مستمر ويحس براحة قوية وياج بس بنفس الوقت محتار شلون يتصرف او يبادر، اكو انجذاب قوي وسريع وكانما الامور بينكم دتتحرك او دترجع، وهو اصلا يشوفج شخص مميز جدا ويمكن يحطج بمكانة اعلى من الباقيين .. تعلقه بيج واضح بس ديحاول يسيطر عليه وما يبينه بشكل كامل، ملامحه ناعمة جذابة ممكن بشرته فاتحة او ناعمة، حساس شوي داخليًا، شعره مرتب/ستريت، عنده حضور ملفت

احرف / ن ك م و ت س

حدس للابراج النارية
#القوس #الاسد #الحمل

دتحسون انه اكو شي مخفي حواليكم ممكن شاكين بشخص انه ما يحجي كل الحقيقة او ممكن ديتصرف بطريقة تخليكم تشكون فيه وهذا الاحساس ديصير بسبب مواقف واضحة مو مجرد شك،ممكن رح تبادرون او دتفكرون تبادرون بموضوع مهم وتقررون تمشون بي حتى لو مفاهمين كل التفاصيل،اكو مرحلة رح تنتهي عندكم او ممكن علاقة تتوضح حقيقتها او وضع معين يخلص بشكل تام وهالشي حيخليكم ترتاحون حتى بالبداية جان صعب، انتبهوا من شخص ديتلاعب بالكلام او يحاول يلف ويدور، ممكن البعض ديوعدكم بشي بس ميلتزم بي فتعاملوه وياه بشكل حذر،صايرين تتصرفون بثقة عالية وتريدون تفرضون سيطرتكم على فد وضع معين ومتقبلون احد يمشيكم على مزاجه وهالشي ديخليكم اقوى بس بنفس الوقت ديخلي الناس تتحسس منكم فقللوا، رح يصير تواصل سريع او مفاجئ ممكن رسالة او شخص رح يرجع الكم فجاة، تركيزكم كاعد يزيد على شغل او دراسة دتحاولون تطورون نفسكم وتشتغلون على شي يفيدكم للمدى البعيد، حظكم قوي هالفترة ووياكم، ممكن اكو شي جان متوقف فجاة رح يتحسن او تمشي الامور لصالحكم، متمسكين بشخص معين ممكن شخص او فكرة وتحسون صعب تتركوه رغم ممكن تعرفون انه مو الافضل الكم، شخص حمل او قوس ممكن تشوفون مبادرة منه