👩‍🦰: إزاي تقوليلي التحليل طلع إيجابي؟!
ده ابني شايـل اللــوز من 5 سنين!
يعني إيه "تحليل اللوز" يطلع إيجابي؟!
👩‍⚕️ (الدكتورة): طيب بس استهدي بالله بس وخليني أشرحلك، التحليل ده مش اسمه "تحليل اللوز" أصلاً، ده اسمه ASOT
واختصاره يعني:
Anti Streptolysin O Titer
📌 إيه بقى حكاية التحليل ده؟
فيه نوع بكتيريا مشهورة كده عاملة زي الجارة الفضولية،
اسمها Group A Streptococcus
بتحب تسكن في الحلق، وتعمل التهابات، وغالبًا بتكون السبب ورا التهاب اللوز.
لكن لما البكتيريا دي تدخل الجسم، بتفرز مادة اسمها Streptolysin O
وجهاز المناعة بيشوفها "عدو"، فيبدأ ينتج ضدها أجسام مضادة.
إحنا بقى بنقيس كمية الأجسام المضادة دي في تحليل الـ ASOT.
يعني التحليل مش بيقيس وجود اللوز ولا بيعرف إذا كان الطفل شالها ولا لأ.
التحليل بيقيس رد فعل الجسم تجاه البكتيريا… بس كده.
👩‍⚕️: فحتى لو حضرتك شايلة اللوز من 20 سنة،
لو الجسم شاف البكتيريا دي تاني… هيبدأ يدافع عنها، والتحليل يطلع إيجابي.
🧠 يعني من الآخر:
ASOT
مش خاص باللوز، ومش دليل إن في لوز موجودة، ده دليل إن الجسم شاف البكتيريا ورد عليها.