〔老友記都需要玩〕

邊個見到有彩虹玩會最開心？星期五一開始幸運彩虹，首先走過嚟嘅並唔係小朋友，而係老友記。有婆婆同我講，話好多年都無玩過喇，又有伯伯一排排咗幾次，同我講話細個佢喺荔園拋格仔嘅事蹟。

我哋好多時候見到廣福邨嘅長者，都係有需要幫手填表、攞物資，少不免都會有個印象，就係佢地最關心有咩派有咩食，好少會諗到佢地都有娛樂嘅需要。其實老人家都係人，都需要玩，而我哋唔需要好快就覺得老人家淨係會跳大媽舞或者聚賭，只係有時我哋無諗過畀另一種可能性佢哋睇到。

#助理手記

〔小朋友都可以幫手〕

當我哋當值咗幾個鐘嘅時候，有一位小妹妹行咗去平台上面，義工姐姐問佢，發覺原來佢想幫我哋手。小妹妹開始幫手之後，好多原本淨係排隊等玩嘅小朋友都開始幫手，逐漸逐漸，我哋個攤位就多咗好多小幫手。佢哋有啲幫手用水刮掃走唔中嘅金幣，有啲就幫手將金幣疊好五個五個咁，畀參加者去玩，小妹妹仲攞咗個喳喳，一有人中獎就喳一下恭喜佢，令到大家都好開心。

小朋友其實都唔係淨係識得玩同埋做功課。就算佢地得三四年班，其實都已經有能力負責好一個崗位，甚至同人合作，喺社區活動上搵到自己嘅位置。

#助理手記

〔屋邨平台可以令大家相遇〕

屋邨平台可能只係一個我哋會經過嘅地方，佢被規劃成一啲花槽、長凳、吸煙區、垃圾桶...... 當我哋淨係Follow佢嘅規則，好似無可能發生啲乜嘢咁。但其實平台就係一個好有Potential嘅公共空間，我哋可以去諗方法善用佢。有啲人會淨係出平台派嘢宣傳佢個黨，但我會諗，唔應該係咁，議員唔係主人、黨唔係主人，大家先係平台嘅主人。

〔面對無力感，我哋仲有社區〕

寫緊呢堆嘢嘅時候，又有政治人物被捕，有官宣佈緊入餐廳都要用安心出行，區議員DQ又有新「消息」。作為一個有良心嘅香港人，一定會有無力感，仿佛所有嘢都係受人控制咁。但就算係咁，政權係咪能夠無孔不入到咁呢？去到最貼身最微細嘅地方我哋仍然可以鑽到啲位出嚟，畀大家見到彼此。多啲關心自己嘅屋邨、屋苑、甚至自己座樓，我哋仍然都可以做到。小朋友可以幫手，老人家可以落樓下玩，大家仍然有空間祝福到大家，咁香港人就未玩完。

篇文出街嘅時候係年三十，助理T喺度祝大家新一年，仍然有空間同埋心機去貢獻自己嘅地方，可以好好生活。

#助理手記

唔好意思呀，頭先助理我轟炸左個group... 將以上幾樣野加埋，就可以見到一幅美麗嘅圖畫～我哋可唔可以一齊令社區更好呢？

#助理手記

【疫情消息-廣智樓 2月12號 年初一】
祝大家新年快樂，平平安安。

入正題，廣智樓有確診case，衛生防護中心亦講咗廣智樓嘅朋友要強制檢驗，詳細安排我哋仲等緊。由於廣福邨係房署管理，會由房署協調檢驗工作，時地人我哋都仲等緊最新消息，知道再update大家。

【疫情消息-廣智樓 編號10756 2月12號 2130 年初一】
廣智樓強制檢驗安排，講清楚先，「強制檢驗」同大家喺新聞睇到有人跑住咁拉帶嘅「封區」係有分別。大家呢刻仍然係可以自由出入，喺呢段時間內，你哋只需要做一件事，就係驗下自己有冇事。咁點驗呢？

根據政府刊憲，如果你喺2021年1月30號至2月12號曾經喺廣智樓逗留超過兩個鐘，你就屬於今次強制檢驗嘅組別，假設你最近拎到樓，但係未搬入去，你又無喺呢段時間出現過喺廣智樓，今次強制檢驗就唔關你事啦。如果你喺2月10號到2月12號期間檢驗過，都當你有驗到。

請大家記得要喺2月16號或之前(下星期二)用下面嘅方法或者去呢啲地方做檢驗：

1. 臨時採樣站(呢個方法應該最方便)
房署安排咗聽日同後日(年初二同三)開始連續2日會喺廣惠樓紅地幫大家驗。
日期：2月13號-2月14號
時間：1000-1800
地點：廣惠樓後紅地球場

2. 社區檢測中心-太和體育館
開放時間：
年初二同年初三：0900-1330; 1330-1800
年初四：0800-1330; 1330-2000
電話：3611 1301 / 3611 1302
如果你去太和，去到記得同佢哋講聲你係廣智居民，要做強制檢驗，同埋去之前，打個電話去問問。

3. 樽仔
－大埔賽馬會普通科門診診所
－大埔墟火車站

拎完樽整好晒，就拎去收集樣本嘅地方。留意啦，過年期間收樣本嘅時間會同平時唔同，而王少清同郵局公眾假期都唔開嘅，都係嗰句，唔肯定嘅，打去問問。

年初二、年初三同年初四派樣本時間：0900-1300
年初二、年初三同年初四收樣本時間：0900-1100
地點：大埔賽馬會普通科門診診所
電話：2664 2039

過年期間，好多嘢都未必同平日一樣，大家去之前，打個電話問問穩陣。補多句，相關樓層同領展商場已經消毒啦。

【廣智樓檢測Q&A】

Q:去驗要帶啲咩？
A:帶身分證登記就得㗎喇

Q:小朋友係咪都要驗？
A:係呀，小朋友都要驗，但強制檢測中心嘅撩鼻方法唔適合六歲以下小朋友，要麻煩家長幫佢哋落去檢測中心攞返個大便樽返去做檢測，工作人員會有安排。

Q: 係咪淨係廣智樓住戶先可以喺紅地嘅臨時檢測中心驗？
A: 今次臨時檢測中心淨係畀1月30日至2月12日喺廣智樓逗留超過兩個鐘嘅人入去，其他人唔可以入去驗。

Q:驗完係咪要留喺屋企等結果？
A:唔需要，大家可以自由活動

Q:臨時檢測中心驗完會否收到通知？
A:完成檢測後，你登記嘅電話將會收到SMS（如圖），如果結果為陰性，將會喺2-3日內收到SMS陰性通知。如果係陽性，衛生署會盡快聯絡你。

祝各位身體健康！

今日大年初三，頭先派咗好多糖果畀大家，祝大家新年快樂，身體健康！

【疫情消息-廣智樓】
廣智樓有新感染個案，我哋自己了解過，前後兩單case屬同一單位，當然，都係以衛生署公布嘅消息作準。

2月12號 #10756 廣智樓
2月14號 #10777 廣智樓

廣智樓嘅朋友，提一提大家，根據2月12號政府刊憲，大家如果喺1月30號到2月12號曾經喺廣智樓逗留超過兩個鐘，就屬於今次嘅「強制檢測」組別，你哋需要喺2月16號(星期二)，即係最遲聽日要去驗。廣惠樓後嘅臨時檢驗站尋日已經係最後一日，如果你未驗，可以望望下面嘅方法：

1. 社區檢測中心-太和體育館
開放時間：0800-1330；1430-2000
電話：3611 1301 / 3611 1302
如果你去太和，去到記得同佢哋講聲你係廣智居民，要做強制檢驗。

2. 樽仔
因為過緊年，所以拎樽同平時安排都唔同，要留意時間，記住去之前打去問問，我都怕整理錯下面嘅資訊。

2月15號 年初四拎樽地點：
-大埔賽馬會普通科門診診所
-大埔墟火車站

2月15號 年初四收樽地點：
-大埔賽馬會普通科門診診所
電話：2664 2039
年初四派樣本時間：0900-1300
年初四收樣本時間：0900-1100

2月16號 年初五拎樽地點：
-大埔賽馬會普通科門診診所
-王少清家庭醫學中心
-大埔墟火車站
-運頭塘郵政局
-大埔政府合署郵政局
-富善郵政局

2月16號 年初五收樽地點：
-大埔賽馬會普通科門診診所
電話：2664 2039
年初五派樣本時間：0900-1300；1400-1700
年初五收樣本時間：0900-1300；1400-1500

-王少清家庭醫學中心
電話：3157 0926 / 2658 9082
年初五派樣本時間：0900-1300；1400-1700
年初五收樣本時間：0900-1300；1400-1500

街坊提一提，拎樽驗嘅各位可以去下面度登記拎sms:
https://www.communitytest.gov.hk/tg/

仲係新正頭，祝大家身體安康，平安快樂。

【復辦棋聚】

上年我哋搞咗一次棋聚，反應幾好但好可惜之後撞中第三同第四波武漢肺炎。又因為限聚令底下令我哋好難特登去搞一次正式嘅棋聚。最近限聚令逐步放寬，我哋想快啲嚟一次棋聚，誠意邀請各位一齊玩放鬆下。

時間：23/2 2000-2200
地點：姚鈞豪議員辦事處 （廣福邨廣祐樓平台228室）
*所有參加者必須於棋聚時戴好口罩同對奕前要用酒精搓手液。

我哋到時會有西洋棋同圍棋嘅基礎教學，另外議辦都有各類棋同board game提供。今次活動歡迎大家Walk-in參加，聽晚見！

#議員棋聚 #西洋棋 #圍棋 #Board_Game #活動預告

【天氣預報】

各位晚安：有助理T同大家報告未來一星期香港同埋大埔嘅天氣。過去幾日溫差都幾大，日頭萬里無雲嘅時候，氣溫可以去到25、26度，清晨喺大埔又可能只得15度左右。之後幾日都會繼續係咁。過兩日會起東風，東邊嘅海洋會帶來濕氣，去到星期五左右可能會有啲霧添。換言之，今年嘅元宵佳節，出面可能會一片迷濛，星期六仲可能會有幾陣雨呀。

今晚講住咁多先，祝大家事事順利，生活愉快！

#每週天氣預報

【大埔來往白石角 806C試行路線】

呢個之前諮詢過大家嘅路線，會由3月1號開始試行：

走線：基本上同806A差唔多，喺大埔市內同依家一樣，要留意嘅地方係：因為營運商要求，所以科學園去運頭塘係唔會經逸瓏灣迴旋處，而運頭塘去科學園先會經逸瓏灣迴旋處，而經過白石角之後就會兜入科研路進入科學園（科技大道西11號）總站

服務時間：*平日會喺非繁忙時間服務*
大埔去科學園：
平日：0930 – 1630
六、日及假期：1000 - 2000
科學園去大埔：
平日：0930 - 1650
六、日及公眾假期：1000 - 2000
班次：20分鐘一班；我哋向承辦商查詢，佢哋話如果成事，唔會影響到806本身嘅班次
車費：$8.5（本身建議嘅車費係$9.5，而營辦商提供$1優惠）

好多居民都會同我哋反映喺想搭806A/B去石門同黃泥頭，但好多時都有啲去科學園翻工嘅街坊已經坐滿咗架車，又或者有時想喺白石角搭806入大埔，但經常都喺沙田已經坐滿咗，等好耐都上唔到車。所以我哋之前提議過喺不影響現有班次之下，增設806特別線來往大埔同白石角、科學園。之前我哋收到運輸署嘅文件諮詢過大家，依家運輸署決定3月1號開始試行。

#大埔扎根 #攜手革新
#大埔 #白石角 #科學園 #交通

【早站先嚟落雨，唔通…】

本來諗住今日做個早站宣傳一下個tg 同 whatsapp channel，但咁啱撞正落雨，所以取消咗。大家記得出帶翻把遮同埋收衫啊。

【疫情消息：策誠軒 25/2 1245】

尋日衛生署疫情記者會有提及，有一名居住於大埔滘策誠軒嘅銷售員初步確診，暫時源頭不明，佢喺荔枝角億京廣場工作，農曆新年期間曾經見過同事。根據我地得到嘅資訊，嗰位女銷售員唔係港鐵員工嚟嘅，衛生署尋日下晝接咗佢去亞博，尋晚都已經接走咗佢屋企人去檢疫。策誠軒尋晚同今朝已經消毒相關座數同埋公眾地方，港鐵接駁Shuttle亦都已經消毒。

因為係源頭不明個案，大家都好關心策誠軒係咪需要強制檢測同埋安排如何，我哋都問緊，但暫時未有相關資訊，如果有新消息，我哋會第一時間Update。

#疫情消息 #策誠軒