🌳💍 Медведево посёлкысо «Еш аллейыште» таптыме кӱртньӧ гыч ямдылыме пушеҥгым вераҥденыт. Ынде ты районышто илыше да мужыраҥше-влакын у йӱлашт лиеш – загс деч вара аллейыш мияш да пушеҥгыш лентычкым кылдаш.

📸 «Администрация Медведевского района РМЭ» ВК-се лаштык гыч налме.

8 у спектакль лийшаш 🎭

М.Шкетан лӱмеш Марий драмтеатр але марте кеҥеж каныш деч вара шке омсажым калыклан октябрьыште веле почеш ыле. Тений театрын 106-шо тургымжым тылзе ончычак, 5 сентябрьыште, «Микулан – презе, Якулан – ӱдыр» комедийын премьерже дене тӱҥалыт.

Тиде чолга, весела, эрвелмарий илыш гыч налме музыкальный историй чын событий-влак кӱшеш негызлалтын. Режиссёржо – Роман Алексеев. Чылаже ты тургымышто 8 у спектакль лийшаш. А тиде шыжым кок премьер вуча: А.Чеховын пьесыж почеш Степан Пектеевын шындыме «Дядя Ваня» спектакль да Роман Алексеевын ямдылыме «Кавасе алаша» («Небесный тихоход») постановкыжо.

М.Шкетан лӱмеш Марий драмтеатрлан 105 ий темеш, а 2025 ийыште Кугу Ачамланде сарыште сеҥымылан 80 ий теммым пайремлаш тӱҥалына. Сандене 9 Майлан Виктор Розовын пьесыж почеш Алексей Ямаев «Вечно живые» спектакльым шында.

💥 Тыгак М.Шкетан лӱмеш театрын коллективше сентябрьыште Грозныйышто эртаралтше «Федерация» национальный театр-влакын фестивальышкышт «Торешвате» спектакль дене кая.

📺 24 августышто Марий Элыште «Кино йӱд» акций эртаралтеш. Тушто кум российысе фильмым ончыктат:

📽 «Воздух» (18+) (режиссёр Алексей Герман);
📽 «Сто лет тому вперёд» (12+) (режиссёр Алексей Андрющенко);
📽 «По щучьему велению» (6+) (режиссёр Александр Войтинский).

Кином Медведево, Морко, Параньга, Шернур, Приволжский посёлкылаште да Волжск оласе тӱвыра ден каныме рӱдерла воктенысе площадкылаште ончаш лиеш. Кинозал-влакым Килемар, Кужэҥер, Марий Турек, У Торъял, Оршанке посёлкылаште да Козьмодемьянскыште почыт. Звениговышто акций «Мечта» кинозалыште эртаралтеш, а Советский посёлкышто – рӱдӧ площадьыште, Юрино посёлкысо рӱдӧ паркыште кином ончаш йӧн лиеш.

📍Йошкар-Олаште фильмым 19 шагатат 30 минутлан Рӱдӧ тӱвыра да каныме паркыште ончыктышаш улыт.

🌐💭 22-23 августышто Шернур район Кукнур селаште Йӱштӧ Кугызан резиденцийыштыже Шернур районысо самырык-влакын «Энергия будущего» образовательный форумышт пашам ышта.

60 утла инициативан да чолга самырык еҥ-влак тӱрлӧ сомылым шуктат. Тушто Шернур районысо администрацийым вуйлатыше А.В.Кугергин дене самырык-влакын политикышт нерген кутыраш, «Семейные ценности», «Вместе со спортом», «Росмолодежь. Гранты» образовательный площадкылаште пашам ышташ, тӱрлӧ мастер-классышке ушнаш йӧн лийын.