Таче Йошкар-Оласе военкоматын сборный пунктыштыжо черетан призывник-влакым армийыш ужаташ моткоч шуко еҥ толын.

Рвезе-влак, сайын гына служитлен толза!

Куд эн тале-влак коклаште 🏆🏃‍♀️

29 июньышто «Белые ночи» марафон 33-шо гана эртаралтын. Тений тушко куд тӱжем наре еҥ ушнен. Лу тӱжем утла участник лу меҥгым кужаш кумылым ончыктен.

Марий Элыште шочын-кушшо ӱдыр-влак Алина Прокопьева ден Людмила Лебедева куд эн тале-влак кокла радамыш пуреныт. Ты марафонышто Алина кумшо лийын гын, Людмила – нылымше. Алина тушто Моско да Белгород областьым, Людмила Марий Элым да Моском ончыктен. Ӱдыр-влак тӱнямбал классан спорт мастер улыт.

📸 Фото: Алина Прокопьеван лаштыкше гыч.

Марий Эл сеҥен❗

Российысе регионлаште молодёжный политикым комплексно вияҥдыме «Регион для молодых» программе конкурсышто Марий Эл сеҥыше радамыш логалын.

Программе почеш «Авангард» рӱдерыште у инфраструктурым да молодёжь дене пашам ышташ площадке-влакым ышташ федеральный бюджет гыч 97,7 млн теҥге колталтеш. Тыгак «10 граней патриотизма» мероприятий эртаралтеш.

Марий кундем «Регион для молодых» федеральный конкурсышто кумшо гана сеҥен. 2023 ийыште молодёжный политикым саемдаш 122,4 млн теҥгаш субсидийым налын, 2024 ийыште – 95 млн теҥгем, а 2025 ийыште 97,7 млн теҥге толеш.

Таче да эрла (4-5 июльышто) Саранскыште Лидерствын калыкле школжо эрташ тӱҥалеш. Тушко Марий Эл гыч делегаций миен.

Лидерын калыкле школжо – талантан самырык еҥ-влакым пырля ушаш виктаралтше мероприятий. Тудо Российыште илыше калык-влакын пеҥгыде келшымашыштым ончыкташлан эртарлтеш.

Мероприятий финн-угор йылме ешын субъектлаштыже илыше-влакым пога. Программыште пленар заседаний, тренинг, калык-влак кокласе вашкыл, профилактике да самырык ушем-влакыште экстремизм ваштареш кучедалме лӱдыкшым ончылгоч кораҥдыме йодыш, федерал ден кундемысе кӱкшытан эксперт-влакын выступленийышт, IT-технологий полшымо дене тӱвырам вияҥдыме йодыш да молат лиеш.

📸 Фото: Максим Алгайкинын ВК-се лаштыкше гыч.

Шочмо йылме дене 📝

2 июльышто Российыште илыше калык-влакын шочмо йылме да литератур дене федеральный олимпиадын пытартыш йыжыҥыштыже сеҥыше-влакым саламленыт.

Ты олимпиадыште Марий Элысе школла гыч веле огыл, тыгак Татарстан, Пошкырт кундемысе школла гыч тунемше-влак уш-акылыштым тергат. Чылаже 33 тунемшым 2-шо да 3-шо степенян диплом дене палемденыт. Марий кугыжаныш университет олимпиадым эртарымаште регионын базыжлан шотлалтеш. Тудо шочмо йылмым тунеммылан, калыкын тӱвыражым аралымылан кугу тӱткышым ойыра, талантан ӱдыр-рвезе-влакым ямдыла.

📸 Фото: МарГу ВК-се лаштык.

11 туныктышо 👩‍🏫

Моско олаште ВДНХ-ште «Россий» выставке-форумышто непрерывный оброванийын икымше форумжо эрта. Марий Элым тӱрло тунемме тӧнежла гыч 11 педагог тушто ончыкта.

Форумыш иполнительный кучемын профильный, федеральный, региональный органласе пашаеҥ, лӱмлӧ туныктышо, тунемме тӧнеж да госкорпораций вуйлатыше-шамыч толыныт. Тушто ешартыш шинчымашын национальный системыж шотышто йодыш-влакым тарватат. Тидлан могай йӧным кучылташ лийме нерген каҥашат.

📸 Фото: Минобрнауки Марий Эл

65 тӱжем наре йоча канышаш 🏖️

2 июльышто Россий Правительстве Председательын алмаштышыже Д.Чернышенкон вуйлатымыж почеш 2024 ийысе кеҥеж каныш да тазалыкым пеҥгыдемдымаш шотышто совещаний эртаралтын. Тушко участник-влак видеоконференцсвязь йӧн дене ушненыт.

Марий Элыште йоча-влакым кандарыше да тазалыкым пеҥгыдемдыше реестрыш 205 организаций пурталтын.
Кызыт ола воктенысе 15 стационарный ден кок палаточный лагерь-влак пашам ыштат. Тушто 2900 йоча кана. Ты кечылаште ола воктенысе 5 стационарный лагерь шке пашажым тӱҥалеш.

📸 Д.Речкин/ Марий Элым Вуйлатышын пресс-службыжо.

⛔ Таче, 4 июльышто, ориентировко почеш, 20:30 гыч 23:00 марте «Йошкар-Ола – Зеленодольск» корнын участкыже-влакым (Озаҥ кугорно) петырышаш улыт манын Марий Эл Республикын Госавтоинспекцийже увертара.

Тылеч посна, эрла, 5 июльышто йӱдым 02:00 гыч 06:30 марте корно-влакым петырышаш улыт:

📍 «Йошкар-Ола – Зеленодольск» (Озаҥ кугорно);
📍 «Йошкар-Олан объезднойжо»;
📍 «Куяр – Солнечный – Роҥго»;

Корныш лекме деч ончыч информацийым шотыш налаш йодына.

Лӱмлӧ еҥ-влак ден пырля 🤸

Йошкар-Олаште фитнес-аэробике (аэробика, степ) дене тунемме да тренироватлалтме Российысе мероприятий лийын. Тудым Рссийысе фитнес-аэробике федераций Спорт министерствын полшымыж дене эртарен.

Тушко элнан 13 тӱрлӧ регионжо гыч 155 спортсмен ушнен. Тыгак Российысе сборный командын еҥже-влак лийыныт. Тренировкым спортын ты видше дене элнан тӱҥ тренерже Галина Замыцкова вӱден. Тыгак кӱшыл квалификациян тренер, судья-шамычын комитетын еҥже Татьяна Валеева, фитнес-аэробике спорт федерацийын президентше Светлана Лебедева да элнан вӱдышӧ тренерже-влак Ольга Галимова, Марина Федосеева, Татьяна Валеева, Наталья Трущелева эртареныт.

📸 Фото: Российысе Фитнес-аэробикын федерацийже.

10 мужыр ешым чоҥа 💍

Тений Еш, йӧратымаш да ӱшанле улмо кечын республикыштына 10 мужыр ешым официально регистрироватла.

8 июльышто кундемнан кум районыштыжо Мендельсонын маршыже йоҥгаш тӱҥалеш. Тыге эн шуко мужыр – шымыт, Медведево районысо ЗАГС-ыште возалтеш. Кок мужыр Советский, икте Курыкмарий районышто регистрироватлалтеш.

Ты кечын Марий Элысе чыла ЗАГС йӱлаш пурышо «День без разводов» Российысе акцийыш ушна.

📸 Фото: Freepik сайт.

Ах вучымо йӱр🌦️

Теат тиде татым вученда гын ❤️ кодыза!

У НОМЕР ✅