🏆🏊‍♀️ Кировышто эртыше «Путь чемпиона» иймаш дене таҥасымаш гыч Марий Элысе спортсмен-влак 30 утла наградым конденыт.

Таҥасымашке элнан 20 олаж гыч ушненыт, нунын коклаште Вологда, Ижевск, Казань, Москва, Пермь, Сыктывкар да молат. Марий Элын чапшым иймаш дене спортшколын да внешкольный спортым вияҥдыме рӱдерын пловецше-влак араленыт. Икымше кечынак спортсменна-влак 18 наградым сеҥен налыныт, тушеч пелыже – кӱшыл разрядан. Кокымшо кечын тыгак - 18 награде.

Спортсмен-влак кум таҥасыме кече мучко лектышым ончыктеныт. Нунылан иймашын чыла стильже дене 50 гыч 1,5 тӱжем метр марте ийын эрташ кулын.

📸 Фото: «МЭТР» сайт гыч налме.

🐿📆 Г.Г.Гибадуллин лӱмеш Медведевысе мини-зоопарк гыч изи ур куштылго паша арням тылана. Вет кузе шочмым тӱҥалына, тугак арняжат эрта.

🙆‍♀️Йошкар-олаште илыше 84 ияш кова 400 тӱжем теҥге деч посна кодын.

Тудын стационарый телефонышкыжо пуйто ӱдыржӧ йыҥгыртен да корно туткарыш логалынам манын ойлен. Меполышлан тӱлаш тудлан окса кӱлеш улмаш. Аферист дене кутырымыж нерген кова пален огыл да мӧҥгыжо толшо курьерлан погымо оксажым пуэн колтен.

Палыдыме еҥлан шке оксадам ида пу! Лишыл еҥда эҥгекыш логалын манын йыҥгыртат гын, тудын телефонышкыжо шке йыҥгыртен рашемдыза, увертарат полиций пашаеҥ-влак.

💪 Тений 24-28 июльышто Йошкар-Олаште «Игры народов мира по традиционным видам боевых искусств и физической активности» российысе физкультур мероприятий икымше гана эрташ тӱҥалеш.

Тиде Модмаш участник-влакын шукын ушнымышт шотышто республикыштына пытартыш 5 ийыште эн кугу спорт событий лиеш. «Марий Эл» Ий полатыште да «Молодежный» стадионышто 2270 наре спортсмен таҥасаш тӱҥалыт.

🤼‍♂️ Таҥасымаш программыш спортын 17 тӱрлӧ видше пурен: айкидо, всестилевой каратэ, кендо, корэш, муайтай, самбо, мас-рестлинг, лапта (руш), фиджитал айкидо, дзюдо, учкур, каббади, крикет, сонар, шахбокс, текендо, киргиз-курош.

🏐 29 июньышто «Йошкар-Ола» оласе округ Вуйлатышын самырык-влак коклаште пляжный волейбол дене Кубокшо эртаралтеш.

Турнирыш 13 гыч 18 ий марте спортсмен-влак ушнен кертыт. Мероприятий Йошкар-Олан 400 ияш лӱмгечыжлан пӧлеклалтше паркыште (спорт площадкылаште) эрташ тӱҥалеш.

🚨Теҥгече, 24 июньышто, Морко район Нуръял Корамас ялыште пожар лийме нерген 18 шагатат 10 минутлан пожарный частьыш йыҥгыртен увертареныт.

Пӧрт йӱлен. Оперативный данный почеш, еҥ-влак эмганен огытыл.
Электроприбор, коҥга, газ оборудованийым кучылтмо годым пожар лӱдыкшыдымылык правил нерген ида мондо!

☎ Пожар годым 01, 101 але 112 номеран телефон дене йыҥгыртыман.

🌿Тиде шуматкечын, 29 июньышто, Килемар район Алёшкино ялысе «Раздолье» туристический комплексыште «Шачмы мӱлӓндӹ» («Земля предков») XVI регион-влак кокласе фольклорно-этнографический пайрем эрта.

Уна-влакым модыш программе, Угарман область, Чуваший, Татарстан да Марий Эл гыч декоративно-прикладной сымыктыш мастар-влак ден кулинар-любитель-шамыч деч мастар-класс-влак вучаш тӱҥалыт.
Пайремым кава йымалне «Акпатыр» опер дене мучашлат.

Мероприятий нерген кумданрак АФИШЫШТЕ пален налын кертыда👇

🚎🚶‍♂ Йошкар-Оласе чарналтыш-шамычыште информационный табло-влак ешаралтыт. Нунын полшымышт дене чарналтышыш транспортын кунам толын шумыжым пален налаш куштылгырак.

📍Информационный табло-шамычым кушто вераҥдат:

• Киров урем, 14/1 пӧрт дене
• Первомайский урем, 107 пӧрт дене
• Красноармейский урем, 118а пӧрт дене
• Бауман урем, 16 пӧрт дене
• Бауман урем, 13 пӧрт дене
• Пролетарский урем, 53 пӧрт дене
• К. Либкнехт урем, 64 пӧрт дене
• Панфилов урем, 28 пӧрт дене
• Панфилов урем, 35 пӧрт дене
• Пушкин урем, 28 пӧрт дене
• Волков урем, 164 пӧрт дене

🛡⚔ 10-11 августышто Марий Эл Республикнан рӱдолаштыже «Битва эпох» Российысе кокымшо исторический реконструкций фестиваль эрташ тӱҥалеш. Йошкар-Олаште тудо икымше гана лиеш.

Фестиваль кок историй пагытлан пӧлеклалтын: Русышто да Скандинавийыште ончычсо Средневековийлан да Европышто варасе Средневековийлан.

📰 Кумданрак мероприятий нерген Марий Эл Республикын тӱвыра, печать да калык-влакын пашашт шотышто министерствын сайтыштыже пален налза.

20 июльышто Козьмодемьянск олаште «Бендериада – 2024» 30-шо юбилейный регион-влак кокласе сатир да юмор фестиваль эрта.

🎉 Мероприятийыште карнавал, шахмат дене иканаште модмо сеанс, «12 стульев» аукцион, «тараканьи бега» «клёвые Васюки» колым кучымо конкурс, КВН да молат лийыт.

💐📚 Лингвист, шанчызе, «Кугарня» газетнан поро йолташыже Серафима Сергеевна СИБАТРОВАМ «За заслуги перед Марий Эл» медаль дене суапландареныт.

МарНИИЯЛИ-н «Лингвистике» направленийын кугурак шанче пашаеҥже, филологий шанче кандидат, доцент, наукын сулло деятельже Серафима Сергеевна паша сеҥымашыш шумо да наукым вияҥдымашке надырым пыштымылан кугу наградым налын.

Шокшын-шокшын саламлена! 👏

🏥 Йошкар-Олаште 2-шо №-ан йоча поликлиникын у оралтыжым чоҥаш тӱҥалыныт. Тидын нерген Марий Эл Республикын Минстройыштыжо увертарат. Тудым Интеграл микрорайонышто чоҥат. Кызыт ты поликлинике Свердлов уремыште ончычсо йочасад зданийыште верланен.

Поликлинике Тарханово, Машиностроитель, Предзаводской, Свердлов да Западный микрорайонышто илыше 22 тӱжем йочам обслуживатлен кертеш. Тушто сменыште 500 марте еҥым вучат. Тыгак 15 веран кечывал стационарым палемдыме.

Проектын акше – 902,3 миллион теҥге. Паша вес ийлан мучашлалтшаш. У поликлинике медицинылан утларак сай да пайдале лияш йӧным ышта.

📸 Фото: Минстрой и ЖКХ Республики Марий Эл ВК-се лаштык гыч.