🌷8 Март пайрем дене!🌷

Пагалыме ӱдырамаш, ава-кова, ака-шӱжар, йолташӱдыр-влак!

🎉 Шошын икымше пайремже дене мемнам чыланнамат!!! Йӧратыза илышым, йӧратыза шке пашадам, лишыл еҥда-влакым, шкендам..! Пайрем дене!!!

🎬🤭Видео мыскара сынан. Чынжым гын ме пашаште чылан ПАШАМ ыштена.

🎶 Муро: Эльфиз Гараев «Каласе мотор ӱдыр».

☀9-15 МАРТЛАН КАЛЫК ПАЛЕ-ВЛАК

☀9 мартыште леведыш ӱмбалне шуко лум кия – луман Кугечылан.

⛅10 мартыште игече сай гын, кеҥеж шокшо лийшаш.

🌤11 мартыште мардеж кечывалвел але кечывалвел-касвел гыч пуа – игече левыктышаш.

☀12 мартыште пӧрткайык-влак леведыш йымак погынен пуныштым ойыркалат – шокшо толшашлан.

🌦13 мартыште мардеж кечывалвелым пуа да леведыш ӱмбач вӱд пеш чӱчалтеш гын, шокшо кеҥежлан.

⛅14 мартыште кече могай – кеҥежат тугаяк лийшаш.

⛅15 мартыште кечывалым кече ончалеш гын, сай кинде лектышлан.

🎶 Таче, 10 мартыште, Шӱвырзӧ-влакын тӱнямбал кечыштым палемдат.

Пайремым 2012 ийыште шӱвырзӧ-влакын ушемышт тиде акрет годсо инструментым пойдараш манын тӧнежлен.

Тудо тӱнямбалне 130 утла тӱрлӧ шӱвырлан тӱткышым ойыраш, тыгак шӱвырым шоктымо историй да технике нерген шарнымашым арален кодаш ышталтын.

⛵Марий Эл гыч юнга-влак Россий нерген фильмын геройжо лийыныт.

RT федеральный каналыште Наталья Кадырован кугезе кодшым арален да вияҥден шогышо-влаклан пӧлеклалтше «Люди дела: возрождение традиций» документальный лентыжын премьерыже лийын.

Сӱретын ик геройжо Марий Эл гыч «Паллада» йоча парус клубын воспитанникше-влак лийыныт. Отставкысе офицер Андрей Желудкинын вуйлатымыж почеш самырык моряк-влак пушым чоҥат. 2025 ийыште нуно историй судным чоҥеныт – акрет руш ушкуйын репликыжым ыштеныт да Свияжскысе «Калык пуш» фестивальын чын шӱдыржӧ лийыныт.

🎬 Мемнан рвезе-влакым 26-шо минут гыч ссылке почеш ужаш лиеш.

🎼 13 мартыште 18 шагатлан В.И.Ленин лӱмеш тӱвыра полатыште «Эстрадный вернисаж» республикысе эстраде усталык фестиваль-конкурсын гала-концертше эрта.

Конкурс отборышто 253 участник выступатлаш тӱҥалеш:
🔹28 солист;
🔹18 вокал ансамбль;
🔹8 куштышо коллектив;
🔹5 эстраде миниатюр театр.

🎗 Марий Турек район Мариец посёлкысо школын актовый залыштыже Кугу Ачамланде сарыште лийше землякна-влакым шарныме лӱмеш «Версты Победы» стенд-влакым шогалтеныт.

Нуно тудо кундемысе калыкын да школым тӱрлӧ ийласе выпускник-влакын чолган полшымыштлан кӧра ышталтыныт, увертареныт район администрацийыште.

🩺🥼 Российысе эмлымверлаште врач-влаклан тӱс дресс-кодым пуртат

Эмлымверыште ончылныда кӧ улмым рашемдаш вургем тӱсым ончалаш кӱлеш лиеш. РФ Минздрав медпашаеҥ-влаклан дресс-код шотышто темлымашым ямдыленыт – чылаже 6 тӱс:

🔹Фиолетовый – вуйлатышылан;
🔹Шемалге-ужарге – врач-влаклан;
🔹Ошалге-ужарге – кыдалаш медперсоналлан;
🔹Лавандовый – младший медперсоналлан;
🔹Канде – администраторлан;
🔹Сур – IT-специалист ден хозслужбылан.

📸 ИИ полшымо дене ыштыме фото.

🌸 Шуматкечын Йошкар-Олаште «Когда цветёт душа» поро кумылым ончыктышо фотопроектын ончерже почылтеш.

Проектым Мамино пространство Йошкар-Ола тӱшка эртара. Шуко шочшан 20 ава профессиональный портретын героиньыже лийын. 30 утла еҥ образым чоҥымаште пашам ыштен: фотограф, визажист, причёско дене мастар-влак. Кок кугыжаныш техникум, йоча рӱдер, пеледыш кевыт полшеныт. Чыла портретым печатлен лукмо, рамкыш келыштарыме, тиде шуматкечын нуно ончышо-влакым вучаш тӱҥалыт.

Почмо программыште:
🔸 участник ден партнёр-влаклан тауштен, торжественный ужаш
🔸 семӱзгар дене шоктымым колышташ лиеш
🔸 призым модылтымаш
🔸 чумыр фото да неформальный мутланымаш

📅 Ончер 10 гыч 30 март марте пашам ышташ тӱҥалеш, яра пуртат.

📍Мер-политике рӱдер (Гагарин урем, 8)
⏰14 мартыште 12 шагатлан

🌇Йошкар-Олан кечыжым кунам палемдена?

Марий Элдын рӱдолажын 442 ий теммым 35 площадкыште пайремлаш тӱҥалыт.

10 мартыште тидын шотышто икымше паша совещаний лийын. Мэрий палемда: пайрем 7 гыч 9 август марте эрта.

Тиде ийым Российысе калык-влакын икоян улмо идалык семын увертарыме, сандене пайрем мероприятий-влакат тидлан келыштаралтыт. Уремысе пайрем-влак площадьлаште, парклаште, эҥер сер воктене да тӱвыра полат-влак ончылно эртат.

Йошкаро-Олаште илыше да уна-влаклан фестивальым, туныктымо мастер-классым, шергакан призым модын ончыктымым, тӱрлӧ конкурсым да тематический ончерым ямдылат. Тылеч посна программым ончычсо ийласе семынак республикысе вӱдышӧ коллектив ден ӱжмӧ лӱмлӧ еҥ-влакын выступленийышт сӧрастарат.

ПФО-со законодатель-влак Советын Йошкар-Олаште апрельыште лийшаш заседанийже вашеш Кугыжаныш Погын тӱрлӧ йодышлам лончыла. Ты гана агропромышленный комплексын вияҥме корныжым ончен лекме.

Ты темым Марий Элысе Агропромышленный комплекс, экологий да пӱртӱс дене пайдаланыме комитетын членже-шамыч каҥашеныт. Варажым Юл кундемысе парламентын еҥже-влак ялозанлык комплексым вияҥдымашым сату лӱдыкшыдымылыкын гарантийже да еҥ-влакын илышыштым саемдыме кӱлешан фактор семын ончышаш улыт.

Тӱҥ докладым ялозанлык да кочкыш сату министр Павел Раевский ыштен. Тудо пытартыш вич ийысе пашам иктешлен.

✍ Курыкмарий район администраций вуйлатышылан Сергей Першуткиным шогалтыме

Курыкмарий районышто Депутат-влак погынын сессийже эртен. Заседанийыште Марий Эл Вуйлатыше Юрий Зайцевын темлымыж почеш регион Правительствын икымше алмаштышыже Евгений Курмаев ден Республикын элгӧргӧ политике министрже Антон Мирбадалев участвоватленыт. Сессийыш Кугыжаныш Погынын Председательже Михаил Васютинат ушнен.

Тӱҥ йодыш – муниципалитет администраций вуйлатышым ойырымаш. Депутат-влак кандидатурым онченыт да тиде должностьыш Сергей Першуткиным шогалтеныт.

Сергей Витальевич ончыч тиде постышто тыршен, кызыт Козьмодемьянск оласе мэрын социальный йодыш дене алмаштышыже лийын.

📸 С.Першуткинын ВК-се лаштыкше гыч фото. («Йошкар-Ола» газетын сайтше гыч, 2022 ий.)

✍ «Герои Марий Эл. Талешке-влак» кадр-влакым ямдылыме программын участникше юридический практикым эрта

Николай Миншатов юстиций министерствын мероприятийлаштыже, тидын шотыштак министр дене совещанийлаште, эреак участвоватла да ведомствын пашажым саемдыме шотышто ойым луктеш.

Шукерте огыл мер каҥашын вуйлатышыже да еҥже-влак дене вашлиймаште тудын мер тергымаш органлаште член улмо правилым вашталтыме, ты шотыштак СВО-н ветеранже-влакым нунын составыш пуртымо шотышто темлымашыжым каҥашеныт.

Юстиций министерствыште палемдат: Николай Миншатовын чолга позицийже спецоперацийын ветеранже-влаклан полшаш да нуным мер процессыш ушаш кӱлмӧ нерген палемда.

⚡Ушештарыман, «Герои Марий Эл. Талешке-влак» кадр программым «Время Героев» федерал программе дене келшышын ямдылыме.