🎶6 мартыште Йошкар-Олашсе В.И.Ленин лӱмеш тӱвыра полатыште чолга гармонист-влак Сергей Пакеев ден Александр Марков «ЙОЛТАШЕМ НАЛ ГАРМОНЕТЫМ» концертым эратарат.

📖 С.Г.Чавайн лӱмеш калыкле книгагудо самырык-влаклан «Поэзий мастарлык школ» проектым тӱҥалеш.

Программе почеламутым возымын негызше, поэтический образым чоҥымо закон-влак дене палыме лиймаш, тыгак йылмын ритмже, рифме да изобразительный йӧнжӧ дене пашам ыштыме практикым авалта. Участник-влакым весела сылнымут модыш-влак – буриме, «бестолковый словарь», «придумай рифму» да темлыме темылан поэзий экспромт-влак – вучат.

Занятийым Россий писатель Ушемын еҥже, Россий писатель Ушемын марий пӧлкажын литературный консультантше Елена Хисамутдинова вӱда.

🗓Вашлиймаш-влак калыкле книгагудышто тылзылан кок гана шуматкече еда эрташ тӱҥалыт. Чыла занятий яра эртаралтеш!

🖇Курсын тичмаш программыж дене ссылке почеш палыме лияш лиеш: clck.ru/3S5RUQ

👥 Участник-влакын ийготышт 16+.
Тӱшка-влак йодмаш почеш чумыралтыт. 8 927 681 34 65 телефон дене возалташ лиеш (але Телеграммыш уверым возаш).

📥Серымашым 19 март марте колташ лиеш.

☀2-8 МАРТЛАН КАЛЫК ПАЛЕ-ВЛАК

🌨 2 мартыште игече могай – кеҥежат тугай лийшаш. Леве гын –шокшо кеҥежлан. Йӱштӧ да лавыртышан – кеҥежымат юалгым вучыман.

🌨 3 мартыште тӱтыран гын, ночко кеҥежлан.

🌨 4 мартыште корнышто корак ден чаҥа шуко – игече пылан шогышаш.

☁ 5 мартыште леведыш тӱр гыч кужу ийсӱс-шамыч кечат гын, шошо кужун шуйна, а кӱчык ийсӱс писын эртыше шошым сӧра.

⛅6 мартыште лум пушеҥге йыр шулышыжла, тайыл кундемым кода – левыктымылан. Тӱржӧ тура кодеш гын – эше кужу жап йӱштӧ шогышаш.

🌤 7 мартыште яндар каваште кече вудакан онча – игече локтылалтшаш.

🌨 8 мартыште лум лумеш гын, Кугече арня йӱштӧ лийшаш.

2-6 мартыште Марий Элысе МВД «Правильный выбор» оперативно-профилактический мероприятийым эртара.

Тидыже ийготыш шудымо ӱдыр-рвезе-влакым правам пудыртымо да осал пашам ыштыме, интернетыште да тыглай илышыштат экстремизм але терроризм, тыгак закондымо акцийла, наркотикым закондымын кучылтмо дене кылдалтше сомыл деч аралаш ышталтеш.

Полиций пашаеҥ-влак ушештарат: Марий Элысе МВД-ште ӱшан телефон сутка мучко пашам ышта – 8(8362) 68-00-00.

📸Марий Элысе МВД-н архивше гыч налме.

🍊🏃‍♂ Йошкар-Олаште 8 мартыште «Мандариновый забег» лиеш.

Тӱнямбал ӱдырамаш кече лӱмеш Йошкар-Олаште Сеҥымаш паркыште поро кумылым ончыктышо «Мандариновый забег» эрта.

Участник-влакым 10 шагатлан «Тылыште тыршыше-влаклан» памятник воктене регистрироватлаш тӱҥалыт, куржталмашке кеч-кӧат ушнен кертеш. Участвоватлаш эн изи взнос 100 теҥге лиеш, а кажне участниклан шарнымаш значокым кучыктат.

💌 Куржталме жапыште погымо чыла оксам Йошкар-Ола гыч Илья Юртиковын ешыжлан колтат.

⌛Куржталмаш 11 шагатлан тӱҥалеш. Тудо Сеҥымаш паркын асфальт корныж дене ласка темп дене эрта, кругын кужытшо 1 меҥге лиеш. Финишыште чыла участниклан мандариным кучыктат. Акций 12 шагатлан мучашлалтеш.

🌳 МАРИЙ ПАРК эшеат моторештеш

«Марийская правда» газетын увертарымыж почеш, тений Йошкар-Оласе Марий паркыште теве мо вашталтшаш:

✅ Тиде шошым акрет марий календарьын 32 янлык скульптур гыч кодшо 16 фигуржо шке вержым налшаш.

✅ Сценын конструкцийжым кӱкшыракым ыштен шуктышаш улыт. Воктеке йӧнан теҥгыл-влакым вераҥдаш палемдат.

✅ Районласе стендла воктенсе кундемлам шотыш кондышаш улыт. Тиде пайремыш ушнышо-влаклан шке сурт-печыштым тӱзаташ йӧнанрак лийже манын ышталтеш.

✅ Паркым утларак ужаргыракым ышташ палемдат, а тӱҥжӧ – водоотвод системым келыштарышаш улыт.

👠 Тиде кугарнян, 6 мартыште, Йошкар-Оласе Сеҥымашын XXX-ше идалыкше лӱмеш тӱвыра полатыште «А НУ-КА ДЕВУШКИ!» республикысе конкурсын финалже эрта.

💌 А кызыт Республикысе калык усталык рӱдерын тӱшкаштыже ОНЛАЙН-ЙӰКЛЫМАШ кая.

Тушто шке район гыч ӱдыр-влаклан йӱкдам пуэн кертыда.

🎀 Ссылке почеш УШНЫЗА!

ШАРНАШ КӰЛМӦ ДАТЕ 📅

1799 ий 3 мартыште Фёдор Фёдорович Ушаковын вуйлатымыж почеш руш эскадре штурм дене Средиземный теҥызысе Корфу орым сеҥен налын.

Ты операций Наполеонын сарже годым француз-шамычын экспансийыштым чараш виктаралтын. Орым налме дене Российын позицийже Средиземный теҥызыште сайынак вияҥын. Корфу орышто элнан флотшын да войскаже-влакын ик эн кӱлешан базыжым ышташ йӧн ышталтын. А операцийыште сеҥымаш Ф.Ушаковын Российын тале адмирал улмыжым эшеат кугемден. Тыгак теҥызыште у операций-влакым шукташ йӧным ыштен.

🎭✨❤ ШКЕТАН театр, КОСМОС, РОБОТ-влак, ЙӦРАТЫМАШ

«МАРИНАВТ-ВЛАК але ТЕВЕ КУШТО ИЛЫШЕТ» спектакльым шарнеда? Тудым вич ий ончыч ончыктеныт ыле: космос, робот-влак, сай муро-шамыч, йӧратымаш...

Ынде тиде спектакль «Сандалык йӧратымаш» лӱм дене лектеш.
Режиссёр – Р. Алексеев.

📅 Тудын премьерыже 6 МАРТЫШТЕ лиеш. Теат ончаш вашкыза. Мотор да чонлан келшыше спектакльым ончыктат.

Шернур район Койсола тӱвыра да каныме рӱдерыште оҥай еҥ Галина Петровна Бердникова уна лийын. Тудо рӱдерын эртарыме ятыр мероприятийыш ушна.

Галина Петровна эртыше илыш нерген шарналтен каласкалаш йӧрата. Рӱдерыште тудын дене пырля ӱйым шӱшмӧ ожнысо ӱзгар, имне дене тарантасеш шинчын кудалыштме, тумо, ваштар да писте гыч ыштыме «туйс» манме печке, киндым мо гыч кӱэштме, пӱртӱсысӧ чай шудо-влак нерген шарналтеныт.

📸 Рӱдерын ВК-се тӱшкаж гыч налме фото.