🔴🔴🔴🔴🔴
Хараастыы тыатынан

Сэрии оҕотугар аҕабар ананар.

Хоочургуур кыырпах хаар ынчыгар
Хам аччык оҕочоон ытаһар,
Хараҕын таммаҕа тоҥоннор
Хоруоҥка буоланнар тохтоллор.

Хоргуйбут кырачаан ырата
Хурустаал кэриэтэ ырааһа,
Хаһан да сэрии суох буолуоҕун
Халлаантан көрдөһөн этэрэ.

Хам тутар куттаҕын ыарыыта
Хараҕар туманы тардара,
Хаар түһэр кыыдамын налыма
Хара эт ыһарга дылыта.

Хаанынан силлиирэ тулаайах,
Хаартыска сиэбиттэн хостуура,
"Хайаан да кыайыахпыт! Эргиллиэм."
Харыстыыр суругун ааҕара.

Харыаннаах убайын кэтэһэн
Хам ылар ыарыытын умнара,
Хайаан да дьоннорун аһатан
Харыстыах толкуйа соһоро.

"Харалаах уҥуоҕу" ылбытын
Харыстаан сиэптэрин туттара,
Хас киэһэ миинниэҕин суоттуура,
Хара тыын салҕыаҕын саныыра.

Хаар хаһан көмүрүө хаппыта.
Хараҕа уот кыымар хатанна...
Хараастыы хараҥа тыатынан
Халыҥ хаар хайытан барбыта.

Сайылык Уола

Хаартыскаҕа: Сайылык Уолун ийэтэ, тыыл бэтэрээнэ, 95 сааһыгар үктэммит Александра Прокопьевна Комарикова 8️⃣0️⃣🇷🇺

#Кыайыы_хоһоонноро