وين الاحباب آيزينب
كلها غياب آيزينب
يا جرح طاب آيزينب
...
آيزينب وانتي عمرچ يا عمر
بغربتچ وحدچ جمر يجوي جمر
عالدرب عينج ولا غالي يمر
بالگلب مات الصبر يم الصبر
شما تنوحين يالحبيبه
لا تنطرين يالحبيبه
چم بدر غاب آيزينب
...
چم بدر عندچ تغيّب عن سماه
بكربله خضبتي شيبچ من دماه
كلشي گام يصيح أي وازينباه
انتي باهاتج ترستي الدنيه آه
چم اخو طاح يا غريبه
والخدر راح يا غريبه
بحرگ الاطناب آيزينب
...
يا حزن تنسين يا بت النبي
اذكرتي نار الحرگت خيام وعبي
لو صعدتج فوگ تل الزينبي
لو مشيتي مچتفه بدرب السبي
تبچي العيون يا سبيه
من يصيحون يا سبيه
إيدچ احجاب آيزينب
...
يا اخت گبلج تودع احسينها
وعطر للمنحر بقه بچفينها
الدنيه صاحت زينب مسلبينها
يا غريبه وين اخوتج وينها

صاحت الناس هالمسيه
وينه عباس هالمسيه
نسمع اجواب آيزينب
...
چنتي بين اهلج عزيزه مدللـه
انتي عالناگه ودموعج هامله
بصوت صحتي كربله يا كربله
ليش راس عالرمح اعتله
صوتج يصيح واحسيناه
وجابته الريح واحسيناه
بچه التراب آيزينب
...
اسنينج احزان ومآسي رايحه
عالهزل ماكو بواچي ونايحه
لروس اخوتج من قريتي الفاتحه
منچ اعتذرت نحور امذبحه
صاح الحسين يالوديعه
لا تعتبين يالوديعه
بشيبي الخضاب آيزينب
...
خادم الحسين ( عليه السلام)
كرار حسين الكربلائي
( ابو كميل)

ياتاج العرش ليش انسلب تاجك
يالهجرك جرح مثل الهوه احتاجك
اجاني الليل واشتاگيت لعيونك
....
اعتذر مرات من اعتب وأذيك
فرصه عندي الليل بي اگعد وحاچيك
احچي وي راسك وگله شبيك ما بيك
من الرمح انزل يبعد اختك اداويك

تحچي من النحر واعيونك تصدلي
اشلونج عالسبي يا زينب تگلي
واصيحن لا يغالي انت الشلونك
اجاني الليل واشتاگيت لعيونك
..
موسوالف اكضي ليلي دمعه واحساس
احجي بالنظرات واحذر تسمع الناس
الليل كله وياك احجي وانته بس راس
آه يالجسمك نظرته بخيل ينداس

جسمك ع الرمل وبلا دفن عفته
منو مثلك نحر بس گلبه يم اخته
وحگ عيناك ابد ما عيش من دونك
...
انته يا اكثر بشر بالناس احبه
يا هو مثلك منذبح واعليه گلبه
نحرك ويه الشمر يحچي والله صعبه
متن زينب عوفه ولراسي اضربه

من سوطه الشمر خل العبا تبچي
وانت اعله الرمح بس نظرتك تحچي
يبو اليمه السهر مانام بجفونك
...
من السبي تتعب اراملنه واليتام
وانه وي راسك اظل سهرانه مانام
خويه شوف اشلون من تندار الايام
بيا زمن مسبيه بين الكوفه والشام
آخ من الدهر وداني مسبيه
وجروحك عفتها الف وتسعميه
هظم حالي انه ادري خطف لونك
...
قصة مصابي بعد عينك اليمه
وارد اسولفلك بعد عندي هظيمه
وين نغفه بالسبي وماعدنه خيمه
شما انيّملي يتيمه اتفز يتيمه
ويلا يالسبي ليله يعذبني
هاي الي تصيح خويه وهذيج آبني
حرام ارتاح واحتاريت بضعونك
...
ما اعيشن ريت وايامي گصيره
وداعتك يبن امي ضيّعت البصيره
وين چانتلي گبل امشي يسيره
دورّت بوجوهم ما شفت غيره
بالديوان اطب ما تخطر ابالي
ويزيد بقصر يتشمت بحالي
اذا ونيت بالدم تمطر جفونك

...
خادم الحسين ( عليه السلام)
كرار حسين الكربلائي

مشتاگه عيوني لشوفتهم آ يادهري
واهمل دمعاتي لغربتهم آيا دهري
مهظومه يمهم .. هاي انه امهم
..
يا دهر من حگي لو اگعد وعاتب
ليش بس اعليه مكتوبه المصايب
دوم تكسر خاطري بغله الحبايب
ولدي لا زوار يمهم لا مواكب
جرح البقيع ايأذيني آ يادهري
وامصيبة ولدي تبچيني ايا دهري
دهري حرمهم .. هاي انه امهم
..
وكت الغروب اعتني وبچي عليهم
آه منك يا دهر شمسوي بيهم
لا مناره اتضوي لا زاير يجيهم
دعوتي ياربي العن ظالميهم
ما نامت عيني ومهظومه ايادهري
لگبور اولادي المهدومه ايا دهري
بعيوني اضمهم .. هاي انه امهم
..
بمهجتي سهم البقيع الباري شاهد
الثامن بشوال عنّه لا تناشد
گاعده وگبالي گصدو للمراقد
الاضرحه يهدموها واحد بعد واحد
چم مرقد هدمو گدامي ايا دهري
هاجت احزاني والامي ايا دهري
ولدي احبهم .. هاي انه امهم
..
ليا سبب ولدي مراقدهم خليه
لوحدي افتر شايله شموعي بديه
من شفت ذيچ الوجوه الناصبيه
اذكرت ناس الأحرگو بابي عليه
نفس الناس الحرگت بابي ايا دهري
ردو هدمو دور احبابي ايا دهري
بس يا دهرهم .. هاي انه امهم
..
الگطعو چبد الحسن ابني بحياته
لمرقده رجعو يهدمونه بمماته
وعلي السجاد اشعظمهن نايباته
لسه من اگيودهم دمه بعباته
يوم ويشبه يوم العاشر ايا دهري
نوحي اعله الصادق والباقر ايا دهري
بگلبي جمرهم .. هاي انه امهم
..
من أشوف گبور ولدي الهدموها
اذكر خيام العقيله الوجروها
آه يا ام البنين الما رعوها
چنها زينب ردو اليوم وسبوها
اقسم لو ما كسر ضلوعي ايا دهري
آنه الابنيهم بدموعي آيا دهري
ابني گبرهم .. هاي انه امهم
..
نسألكم الدعاء
خادمكم
كرار حسين الكربلائي
ابو كميل

خادم لكل من طلب نشر هذه القصيده بخصوص شهداء الكراده
رحمة الله عليهم
...
ودعناهم
چانو ويّانه شمحلاهم
ودعناهم
دنيه من الاحلام
خطفتها الايام .. ما ننساهم
...
بالسمه خالي مچان بدورهم
شموع شفنه النار تاكل نورهم
لهالوكت نشتم نسيم اعطورهم
العيد اجانه وهم بين اگبورهم
الله وياهم
صيام وفطرو يم حيدر
الله وياهم
صفوه من الخدام
خطفتها الايام ... ما ننساهم
...
ودعونه والحزن بعيونهم
اعزاز ما نگدر نعيش بدونهم
بالمگابر ما درينه اشلونهم
الموت يمكن هسه غيّر لونهم
من ذكراهم
هواي انحبهم لا ما نشبع
من ذكراهم
والله وخوش ازلام
خطفتها الايام
...
مو وكتها الموت من دگ بابهم
رسمت اصورهم دموع احبابهم
چنه يوميه نشم بثيابهم
هسه نشتاگ ونشم بترابهم
وين الگاهم
جيت واسأل يهل الديره
وين الگاهم
الچانت ما تنظام
خطفتها الايام
...
يا وسافه خالي ظل امچانهم
راحو وكسرو ظهر خُوانهم
يكسر الخاطر دمع صحبانهم
والصور ظلت على جدرانهم
يا فرگاهم
مثل السيف ايگطع بينه
يا فرگاهم
والذلت ظلام
خطفتها الايام
...
راحو المثل البلابل صوتهم
استعجل الموت وفجعنه بموتهم
امر يوميه اعله باب ابيوتهم
اسكت واسمع كلام اسكوتهم
ضيعناهم
بفرگتهم ضعنه ويا وسفه
ضيعناهم
يا وسفه الأعلام
خطفتها الايام
...
يل فگدتي الغالي ابوسن ايدچ
جيت مثل ابنچ ابارك عيدچ
يُمه اصبري والحزن شيفيدچ
وبمكان اوليدج انه اوليدچ
زفيناهم
زفة عرسان اعله الوادي
زفيناهم
البيهم چم جسام
خطفتها الايام
...
كرار حسين الكربلائي

*★مجنونه روحي★*

مجنونه بخدمتك روحي خليها
ومبخوت الحياته اوياك يگضيها
...
بدخان المخيم صدري متنفس
عمري بلا وجودك مظلم وهندس
خليني اصير تراب بالمجلس
شرف تسحگني خدامك برجليها
....
بعشره اخيول يا من صدرك اترضرض
اليحضه بنظره منك هذا صاحب حظ
اريد ابقه بخدمتك والوجه ابيض
وامك فاطمه لنحرك ابچيها
...
تحضر فاطمه بضلوع محنيه
تتوچه اعله حيطان الحسينيه
الطم الحيل بلكي تأشر اعليه
وابچي اعليك يحسين واواسيها
...
احلفك بالرضيع الما برد دمه
حاچيلي الزچيه وگلها يا يُمه
عليچ بنحري هالخادم اكتبي اسمه
وي خدامك التكتب اساميها
...
عليك الما لگت راسك لگت منحر
وگفت بالعبايه اتفيي عن الحر
اريد اگضي حياتي بخدمة المنبر
وانعه لزينب وابچي لمآسيها
...
آنه وياك اسولف وادري تسمعني
من سفرة خدمتك حاشه تمنعني
ولخاطر رقيه لا تضيعني
لغيرك صعبه هاي الچلمه احچيها
...
عليك بهامة العباس وصوابه
اريد لتالي عمري دموعي سچابه
وآخر كلمه ايحسين ومصابه
ويمك روحي تاخذها يراعيها
...
*خادم الإمام الحسين عليه السلام*
*الشاعر كرار حسين الكربلائي*
------------

كل حرمه إذا جان الأخو يمها
يا ابا الفضل كل الناس تحشمها
****
معروفة الاخت لو جان عدها خوان
الغريب يهابها وبالدهر ما تنهان
منو يصدقها زينب توكف بديوان
مجتوفه بحبل ويزيد يشتمها
****
دمعة عتب بعيوني يراعي الجود
شفت موقف ويا ريتك جنت موجود
شفاف حسين كاموا يضربوها بعود
شفاف الجان جدي الهادي يلثمها

خليني أسولف خويه خليني
أسولفلك بعد موقف مأذيني
أكو واحد يبوفاضل سطر عيني
وصارت عين اختك مثل عين أمها

أسولفلك يخويه لو بعد كافي
لو أگلك اشسوى السوط بچتافي
لو أگلك لهسه يابسه شفافي
لو أگلك بعد زينب شألمها

أسولف ظيم گلبي وأحچي آﻻمه
ومن أحچي يخويه ألچم الهامه
واحد گال أريد سكينه خدامه
حگك يابو فاضل ما چنت يمها

*الشاعر كرار حسين الكربلائي*

فاطمه كل عام
تشكر الخدام
لا متنساكم يالخدمتو حسين
...
فاطمه بآخر محرمها وصفرها
تجازي اصحاب المآتم والحضرها
لليقدم تعزيه اتقدم شكرها
شكراً من الزهره يا ناس اشكبرها
ينكتب اسمه
بدفتر الخدمه
ربنه يرعاكم يالخدمتو حسين
..
تگول يوميه چنت للمأتم اسعه
الناعي والرادود من يقرالي اسمعه
لو بچيتو بيدي احسب دمعه دمعه
والله كل دمعه بگبركم تضوي شمعه
العبره لوليدي
توگع بأيدي
حاضره اوياكم يالخدمتو حسين
..
اني ما أنسه الخِدم والباري يشهد
والصرف درهم ، ألف مني ايتسدد
يا بشر أقسم وحق شيبة محمد
چان يجبر خاطري الي يلبس اسود
كلشي دين بدين
حته دمع العين
گلبي يهواكم يالخدمتو حسين
...
اليلطم ويترك على صدره علامه
بهالأثر يتميز بيوم القيامه
ينحشر للجنه بثياب الخدامه
ايصير جاري وهذي للخادم كرامه
إلي يخدمنه
منزله يمنه
الجنه مأواكم يالخدمتو حسين
...
بالقيامه هناك مجلس عدنه يا ناس
نشوف عاشوراء واقع مو بالاحساس
من نشوف حسين بس منحر بلا راس
وآنه بالمحشر أشيل اچفوف عباس
بساحة المحشر
نبچي عالمنحر
هناكه الگاكم يالخدمتو حسين
...
حسين لمن ينذكر لو چانو اثنين
دوم اصيرن ثالثتهم واهمل العين
يالتناشد عني وين ومرقدي وين
انه گبري بكل گلب ينحب عله احسين
ونتي مخفيه
بكل حسينيه
جرحي واساكم .. يالخدمتو حسين
..
★خادم الحسين ( عليه السلام)
كرار حسين الكربلائي★

بويه مشتاگه تشوفك عيني
وينك انته بياكتر حاچيني
...
الك يابويه اشكثر ملهوفه
موبعيده كربله عالكوفه
وجهي يالغالي تعال وشوفه
اتغيرت يالفرگتك تاذيني
..
وين يالعندك چنت متدللـه
اشلون يوم اعليه مر بكربله
طايحه ما بين شمر وحرمله
من گبل لا انسبي حاميني
..
بويه اسأل عن حميده اشلونها
ذابله من البواچي اعيونها
مورمه من السياط متونها
محرگّه بنار الخيم چفيني
..
لا تناشدني اعله شيال العلم
چفوفه طاحت وبعمد راسه انهشم
من عمت عيني طفو عينه بسهم
چان ظِل برايته ايفييني
..
عود يابويه وتعال من السفر
يوم عاشوراء شبعني قهر
هذا عمي حسين مگطوع النحر
وانكسر گلبي لمصاب احسيني
..
بويه حته بهاي مكسورة گلب
كل طفل يم جسم عوده بالحرب
وانته عني بعيد بديار الغرب
اگضي بالحرمان ليش اسنيني
...

★كرار حسين الكربلائي★

بغربه وصحت صوت
ريحني ياموت كافي قهر
كتلتني الهموم
وبعيني مرسوم گطع النحر
..
انتخيتك وانت ما تسمع نـَخوْتي
بكربله اتمنيت تلفيني اويه اخوتي
ردتك بيوم انسمع عالناگه صوتي
گبل ما شوف الشمر ردتك يموتي
ماعندي وليان
بخيامي نيران وين المفر
كتلتني الهموم
وبعيني مرسوم گطع النحر
..
انه يالموت التولاها دهرها
الرادت وي حسين يتهشم صدرها
انه ذيچ العالنهر كسرو ظهرها
والسطر عين امها يوم الطف سطرها
شاط الگلب شاط
من ضرب السياط ظهري انكسر
كتلتني الهموم
وبعيني مرسوم گطع النحر
..
چم مصاب وچم حزن بعيوني شفته
محجبه اعله الناگه وجري دموعي سكته
بلا وداع حسين عاري جسمه عفته
عالرمح راسه وشوفه يبچي لخته
فوگ الرمح راس
بدموع الاحساس مني اعتذر
كتلتني الهموم
وبعيني مرسوم گطع النحر
..
اشعطلك يالموت وانه انتظرك سنين
بوگفتي ويّه الزلم بين الدواوين
من نشدني ايزيد اخوچ الكافلج وين
بخيزرانه شفته يضرب راس الحسين
بچفوفي الاحبال
وصحت اعله هالحال وين الگمر
كتلتني الهموم
وبعيني مرسوم گطع النحر
..
آه يا يوم الخرابه شسوّه بيه
ابلا سگف والشمس فوگ الفاطميه
بيها راحت اغله طفله من اديه
والله ردت الموت وي موتت رقيه
شينيّم العين واطفال الحسين بين الخطر
كتلتني الهموم
وبعيني مرسوم گطع النحر
..
اهلي مشتاگين اليه عندي احساس
ارحمني يا هالموت وخمد مني الانفاس
من كثر شوگي لخوتي شيّب الراس
ساعه اندب يا حسين وساعه عباس
ارحمني يابين
وديني لحسين
گلبي انفطر
كتلتني الهموم
وبعيني مرسوم گطع النحر
..
تراب اقدامك

#كرار_حسين_الكربلائي

آية اسراري .. حجة الباري يزهراء
يا اعز ناسي .. صاحت انفاسي يزهراء
...
يا ملاك الله التجله بهيأة انسان
لؤلؤة حُب وتشع للدنيه مرجان
بگلبي يالزهره تشيّد بيت الاحزان
فاطمه واسمچ اشوفه بعيني قُرآن
بعالم اجروحي .. أذّنت روحي يزهراء
لحظه ما ناسي .. .. صاحت انفاسي يزهراء
...
بعالم احزاني قريتچ آية النور
الكوكب الدُرّي اشوفه ضلعه مكسور
يا سناء اليهدي موسى بجانب الطور
فاطمه من باب حزنچ يبدي عاشور
تكتب ادموعچ .. قُصة اضلوعچ .. يزهراء
حزني بحساسي .. .. صاحت انفاسي يزهراء
...
انتي يا قصة معاجز تحمل اسرار
الحبر دمچ والكتب هالقصه بسمار
صورة ابراهيم چانت تضوي بالدار
الهالسبب فرعون وجّر بابج بنار
دمع ضلع ينزف .. والعرش يهتف.. يزهراء
انتي نوماسي .. صاحت انفاسي يزهراء
...
انتي يا بَضعة محمد كوثر الآه
ضلعچ الدامي قضيه وما نسيناه
كل بشر ترضين عنه احنه ويّاه
الما يريدج ما نريده يشهد الله
الساخطه عنه .. الخالق يلعنه .. يزهراء
يا جَبل راسي .. صاحت انفاسي يزهراء
...
بكل زمن يبقه سؤالي مرقدچ وين
يا وكت قُبه ومناير تنظر العين
نعتنيلچ بالمواكب يآم الحْسين
لو شهاده لو نصر وحده من الثنين
نرفع الرايه .. ونجي مشايه .. يزهراء
بعشگ عباسي .. صاحت انفاسي يزهراء
...
فاطمه هذا العهد حته المنيه
نهجي باقي عالولايه الحيدريه
ولمماتي بيدي رايه فاطميه
ما اعوفچ خل تموت الناصبيه
اعلن اجنوني .. وخل يسمعوني .. يزهراء
ما أطخ راسي .. صاحت انفاسي يزهراء
...
خادم الزهراء عليها السلام
★الشاعر الموفق
كرار حسين الكربلائي★
( ابو كميل )

عطشان الجواد وچبده مسموم
يا ساقي العطاشه إحضر اليوم
صاح بآخر انفاس .... ادركني يعباس
..........
الحضرتك ياغيرة الله الهاشميه
اتوجِهَت شكوة گلب هاي المسيه
هذي صرخه من رحاب الكاظميه
ضامي وعيونه اعله درب الغاضريه

من جمر العطش دلاله هايج
بحيره وناده ياباب الحوائج
صوت ايظهره الاحساس .... ادركني يعباس
..........
بروحي صيوان العطش يسعر لهيبه
واعله تل نوحي الگلب يندب حبيبه
عيني تشبه زينب الظلت غريبه
بغربه واتدور گمر طوّل مغيبه

انت الما تخيّب گلبي حاشه
إكشف همي يا ساقي العطاشه
جيب الرايه والطاس .... ادركني يعباس
..........
ضامي چبدي وللأجل بانت علامه
يا بو فاضل وانت سلطان الشهامه
عمي ، واتنخيتك بنخوة نشامه
واليطيح بشده توگفله عمامه

ها يبن العرب يبن الاجاويد
لغيرك ذله تصبح مدت الايد
يالبيك ارفع الراس .... ادركني يعباس
..........

طيب انت ودمعي دگ ابواب لطفك
وانت سُفرة ألله فوگ الگاع چفك
يالغيور اتحب أسم زينب اعرفك
لا تردني بعمتّي زينب احلفك

انظر حالي ضامي ودمعي هامل
إحضرني دخيلك يابو فاضل

صحت وتسمع الناس .... ادركني يعباس
..........

حالي مثل حسين فوگ الغبره مرمي
وراح أگلك من حضر هالليله يمي
الزهره حضرت تبچي لمصابي يعمي
إملي جودك واعتنيني لخاطر أمي

من تنظرني يا حامي الضعينه
خاف اتگلي عمك يبني وينه
حشمتك ينبراس .... ادركني يعباس
..........
چن اسمعك جاوبتني وشب ونيني
يالجواد بعتبك اتهيّج حنيني
اشلون اجي من كربله ومصيوبه عيني
اشلون اشيل الجود وانه بلا يميني

لسه بسمعي صرخات العقيله
من چتفوها عالناگه الهزيله
نادت بين الارجاس .... ادركني يعباس
..........
الخادم
كرار حسين الكربلائي

شعنده وياي التراب
هواي اخذ مني شباب
دهري يوميّه يهشملي ضلع
شيبت حته الرموش من الدمع
...
فاطمه ودمعي ترك بخدودي نيشان
لسه مبني وماهدمته بيت الاحزان
شگد الي بالمگبره راحتلي شبان
ولدي كل واحد يذكرني بعلي چان
للمگابر من افوت
حته انفاسي تموت
يم گبرهم اعلگ جروحي شمع
شيبت حته الرموش من الدمع
...
هنا يهالعندك شهيد وللعزه جاي
آنه موجوده وريدك تبچي وياي
فاگده مثلك وحس بحرگتك هاي
جمرة الفارگ شبابه تدوي بحشاي
حگه المفارگ حبيب
خل يموت من النحيب
آنه گبلك عايشه بهذ الوضع
شيبت حته الرموش من الدمع
...
اشلون اهيد من المناحه وصبر اشلون
بعمر الورود بمگابرهم ينامون
كافي من هالنوم اصيح وما يگعدون
يالشباب الكم تره مشتاگه العيون
يالرحلتو بلا وداع
ما دريتو بعمري ضاع
وبنواظرنه صوركم تنطبع
شيبت حته الرموش من الدمع
...
والله من اسمعلي ام تبچي اعله ابنها
لبيتها امشي واساعدها بحزنها
التدفن اوليد شيظل عدها بزمنها
حته شيلة راسها اتشيب اضنها
الوالده حگها تصيح
وانه وي طيحتها اطيح
ها ويلادي الهجر ما ينجرع
شيبت حته الرموش من الدمع
...
عمر بس ضيم ومواجع من يطيقه
مو خيال وياكم ابچي بالحقيقه
چم صديق بدمعته ودّع صديقه
المغربيه يزرع اعيونه بطريقه
اوف من هذا الزمان
والله مابي كل امان
بالگلب بسمارهم ما ينشلع
شيبت حته الرموش من الدمع
...
عالجواد انصبتو هاليوم العزيه
شاب ودفنته بتراب الكاظميه
مات عطشان وذكرت الغاضريه
الفرق ما داسو ولا اخته سبيه
صرختي طول السنين
يا حبيبي يا حُسين
عالرمح شالوه راسه المنگطع
شيبت حته الرموش من الدمع
...
خادم الحسين ( عليه السلام)
كرار حسين الكربلائي
( ابو كميل)

فاطمه بچف العباس
كل الخدم ترعاهم
...
هالخدمه تاج وتنوضع فوگ الراس
احنه بعناية فاطمه يا هالناس
تباوع علينه بعين ابنها العباس
تنسه ضلعها المكسور
والخدم ما تنساهم
...
الخادم اذا مر بمصيبه اتواسيه
لمن يمر بعوز هيه التغنيه
وكت المرض تسأل عليه وتشافيه
فاطمه لخدام حسين
بالشده تتلگاهم
...
والله شرف ما ينوصف هالخدمه
الله لا يحرمنه من هالنعمه
الخادم يحس بالزهره احن من امه
اي والله امنه الزهراء
تگول الخدم حياهم
...
بمجلس ابنها المحب لمن يحضر
يحس بالزچيه اتنوح يم المنبر
تنسمع ونتها اعله طاري المنحر
تحسب ادموع اليبچون
وتستانس بمبچاهم
...
يا ريت كل ايامي دمعه و عاشور
ومن اللطم ياريته ضلعي المكسور
كلما انوح الزهره صاحت مأجور
وبالمجلس ويانه املاك
تلطم واحنه وياهم
...
بجاه النحر يا ربي والمسبيه
جمرته بگلبي خلها تسعر بيه
وارزقني احضر مجلسه يوميه
يا ربي ذوله اهل البيت
ما نسوه شي لولاهم
..
كرار حسين الكربلائي

انه الباقر وچبدي من الهظم ذاب
جرح الطفوف بگلبي ما طاب
حرگ الخيام وحرگ الحجاب
نار واشد من نار بيه
...
عماتي ولا انسه شدهاهن
يركضن والشمر يركض وراهن
ضرب السوط شمسوي بگفاهن
وشچم سوط متگطع عليه
...
الشايف كربله كف لا تحاچي
حگي من اموت من البواچي
رقيه اگبالي سلبوها التراچي
واويلا يترچية رقيه
...
بكل مصباح جدي حسين اذكره
اشلون الشمر يرفس بصدره
عله كيفه يحز بالسيف نحره
وداست فوگ صدره اخيول اميه
...
لجدي حسين ما تنشف الدمعه
من يوم اسمعت تهشيم ضلعه
باوعت اعله چفه ماهو اصبعه
شيبني مصاب الغاضريه
...
ثلث اعوام عمري چان يا ناس
زغير وسبي زينب شيّب الراس
شمر يحدي بضعنها خلاف عباس
والوادم تصيحلها السبيه
...
يوم الشام لوعنّي مصابه
زينب نزلوها بالخرابه
ماكو فراش نمنه اعله الترابه
مت ونتي اعله اهلي خفيه
...
اسياد الدهر وسفه يهلنه
ضعنه وعگب ابو فاضل ياهوالنه يهلنه
زينب صاحت بحرگه يهلنه
الحگو للحرم طلعت سبيه

#كرار_حسين_الكربلائي

يعباس جيب الماي لسكينه

العطش نار بالكلوب تجوينه
نتـــــانيك بالخْيــام ظـــلينــه
نخيناك يــــوفّــاي رد لينـــــه
حشاك اعله هالحال تبقينــــه
جيب الجود يبو الجود ورْوينه
غيابك يرجواي يـــــــآذينه




ومنين اجيب الماي يبني ياعلي

للخيمه رد ويّاي يبني ياعلي
وشْرب دمع عيناي يبني ياعلي
ظلمه صفت دنياي يبني ياعلي
ناحتلي حته اعداي يبني ياعلي
لو تستمع نخواي يبني ياعلي
جاوبني يارجواي يبني ياعلي

خادم الحسين (عليه السلام)
كرار حسين الكربلائي
@dk1996

كوم شيل العلم وظهر يا حبيب ابن مُظاهر

تربية حيدر نعرفك تــسحكَـ مـــتون المخاطر
ما تهاب من المنايه بصدرك اتلاكَي العساكر
سيفك بوكت الصلا يتوضه من دم المناحر
شيخ الانصار و يمينك صولته اتقُر النواظر
لشيبتك تحله الشهاده و الأجر مضمون باجر
كبرك بكتر ابو اليمه ايسجل اسمه اليجي زاير







طلع شباب من الخيم كومي يزينب هلهلي

رمله تحاجي عمته ارد افرح بعرس الوَلي
ما عندي غيره بدنيتي منّ الحسن ذكره الي
اتــــمنه احضر زفته اشموعه جبتها بمحملي
يــا عـمّته طيّب كَلب شطلب يكلي اتدللي
محروس من عين الحسد بالله ومحمد وعلي
آنه دْري ما يرجع بعد وابقه بشماتة عاذلي








كطعو يمين العباس يا فاطمه الحزينه

للمشرعه كومي بساع طلعي السهم من عينه
للخيمه ما يرضه ايعود خجلان من اسكينه
فوكَه انحنه ظهر احسين و يقبّل بـــجفينه
بخيمتها زينب وتصيح وينه الكفلني وينه
ندريبه غالي العباس هــــالخبر متــحملينه
فوك الضلع لتلطمين لا ضلعـــج اتلجمينه









هالله هالله حسين وينه بالسيوف مكطعينه

بالسهم ممرود جبده والحجر صوّب جبينه
من المهر طاح اعله وجهه وعالمُخيم دار عينه
من الكَـُفه مكطوع راسه و حته ثوبه امسلبينه
داست الخيل اعله صدره ونكَطع خُنصر يمينه
زينب اعله التل تنادي خويه ما تلحك عَلينه
السلب تُرجية رُقيه بسوطه رد يضرب اسكينه
@dk1996

(نزله عامه)
وياك دنيه واخره يحسين يحسين

بكل نِفَس عهد الولاء انجدده
تبقه جلمة يا حُسين الخالده
الدنيه ظلمه بلايه مصباح الهدى
واحد انت وكربلائك واحده
يبن البتول الطاهره يحسين يحسين

سيدي اسمك يظل اقدس اسم
انت يا قصة عشك ماتنفهم
الله رافع رايتك فوك النجم
تبقه بعيون اليحبونك حلم
نحبك يبن خير الوره يحسين يحسين

للرفض منك درس نتعلمه
انت بدء الدين انت الخاتمه
مانعوفك عاهدينه فاطمه
وياك بيعتنه نوقعها بدمه
هذا العهد منغيره يحسين يحسين

للابد يحسين حبك بالكلب
من يمر اسمك مدامعنه تصب
سيدي للحاربك نبقه حرب
لخاطرك هالدنيه نكلبها كلب
شيعي وكتب دم منحره يحسين يحسين

أستظل بأسمك بيوم الشدد
انت فوك اشفافي احله من الشهد
ياملاذي وعصمتي والمعتمد
مقصر اني شما اقدملك بعد
مقصر وارجو المعذره يحسين يحسين

سيدي يالمنحرم من العذب
خادمك واعليك انه منحسب
انت حُبي وتدري غيرك ما احب
طلبتي أسمي بسجلك ينكتب
خادمك لا تتعذره يحسين يحسين
خادم الحسين (عليه السلام)
كرار حسين الكربلائي

(قصيدة الهلال)
وكت الغروب شفت الهلال
يـــــــــامحرم و الدمع سال
بيوت اخوتي مظلمه المن تشع بالسمه

جنت اصلي ودمعتي تعاشر سكوتي
شفت نورك من شلت ايـــدي بقنوتي
طلعة هلالك تذكرني بـــــــــــأخوتي
من بعد عيناهم اتمنيت مـــــــــــوتي
انتي تزهي وبيتي اظلم
وين اخوتي يا مــحرم
غابو اهل الغانمه المن تشع بالسمه





يا هـــــلال اتعذبت يا حـــــــرمه مثلي
بكربله بظــــــــهريه وحـــده راحو اهلي
وين ابو اليمه حــــــــــــبيبي مـــــا تكلي
ارجعــــــــــت بهلالك عليه ومارجعلي
يالمــرارك شيب الراس
ارد أسألك وينه عباس
هامته متهشمه المن تشع بالسمه

ريت وي اهلي انطفت شمعة حياتي
يالرسمت بطلعتك كــــل ذكرياتي
انه كمت اكعـــد واصليها صلاتي
يالخذت حيلي وخذت كل امنياتي
يدنه موتـــي ادعي كل حين
بلجي اموتن وانظر حسين
بغييبته متألمه المن تشع بالسمه
يا هـــــلال وارد اوصيك بوصيه
بالله سلملي اعله ارض الغاضريه
من تكلــــــــــها لا تكول الهاشميه
هيه تتذكرني لــــــــو كلت السبيه
يا محـــرم كـــلي آلآم
وين الاكبر وينه جسام
خضبوهم بالدمه المن تشع بالسمه

يا هلال وكبر ابـــو الــــــــــيمه تنظره
هاك اخذ عيوني خل تضوي اعله كبره
هاك اخذ دمعي على كبره تنــــــــــــثره
بلجي مكطوع النحر يتروه نحــــــــــره
عن حبيبــــي اخذوني كوه
ومن دموعي مـــــا تروه
حسين مات من الضمه المن تشع بالسمه

ياهلال الدنيه كلها بعــيني ظلمه
ليله يمي تكول الاكبر ارد اضمه
هاي رمله تصيح وينك يمه يمه
والرباب كماط عبـــــد الله تشمه
حكي انحب مــو بديه
عذبتــــــني الغاضريه
وبرقيه الخاتمه المن تشع بالسمه

خادم الحسين (عليه السلام)
كرار حسين الكربلائي

(مقدمة العليله)
عنك سؤالي وينك يغالي
ناديت بحنيني ماتسمع ونيني

يالعفتني وسافرت سفره طويله
ماتجيني وتستمع كلبي وعويله
رحت عني وما كلت عندي عليله
اعتاب اكتبه بمدمع عيوني الاسيله
اعتاب الحبايب وياك اعاتب
لجيتك تربي عيني ماتسمع ونيني





فكري يستعرض صوركم كل مسيه
مانسيت اللمه والكعده سويه
هنا رباب هنا سكينه هنا رقيه
اهنا جنت عبد الله اهز مهده بأديه
داري زهيه صارت خليه
كاتلني حنيني وانتظرك تجيني

بويه ماعندي خبر منك يغالي
كل صباح وكل مسه عنك سؤالي
مادريت شسوت بكلبي الليالي
من كثر نوحي الصخر ناح اعله حالي
احسب ثواني ترجع واتاني
انثرلك سنيني ماتسمع ونيني
بويه بنتك ما بجت وحده مثلها
ياعليله الكبلي عافوها اهلها
عدها امل ترجع ولا كطعت املها
وما تعوف النوح الا ترجعلها
بجيتك حبيبي اترك نحبيبي
اهلي مفاركيني ماتسمع ونيني

ايدي فوك اعيوني واطلع جسمي ناحل
بالطريق اكعد وظل عنكم اسائل
أسأل من الناس ما شفتو محامل
بالدرب ماشفتو عمي ابوفاضل
ساقي العطاشه تنساني حاشه
وين مودعيني ماتسمع ونيني

بويه من ظلوعي نار الفركه تلهب
بويه ابقه لياوكت محتاره وانحب
ياكلب مثلي يبو اليمه تعذب
والله مشتاكه اشوفن عمتي زينب
روحي الحنينه ظلت حزينه
المن عايفيني ماتسمع ونيني
خادم الحسين (عليه السلام)
كرار حسين الكربلائي

هلال الحزن لاح و بدت أيــامك آيحسين ومصابه
واجب نعيش همومك و آلآمك آيحسين ومصابه
شلنه اعله هامات النجم اعلامك آيحسين ومصابه
هذا النشيد اتسمعه من خدامك آيحسين ومصابه
اعمارنه فدوه لتراب اقـــدامك آيحسين ومصابه
والدنه انته و أحنه كلنه ايتامك آيحسين ومصابه
جمرة حزن لهابه آيحسين ومصابه



ليلة الثالث مـن محـــرم لاحت آيحسين ومصابه
دموع العرش لجل العليله ساحت آيحسين ومصابه
من ودعتها اخلاف ضعنك صاحت آيحسين ومصابه
ما لحظه من بعدك يبوها ارتاحت آيحسين ومصابه
ذبلن نواظرها بكثر مــــا ناحت آيحسين ومصابه
وردة حزن و بعطر حزنك فاحت آيحسين ومصابه
وتنادي وينك يابه آيحسين ومصابه


ليلة الرابع من مـحرم تبدي آيحسين ومصابه
ام البنين اتكول اعز ما عندي آيحسين ومصابه
أتشرف لأجلك أقــدّم ولـــدي آيحسين ومصابه
تكتب دموعي من تصب ابخدي آيحسين ومصابه
لو متت تلـكاني اصيـــح بلحدي آيحسين ومصابه
امك ولا تتركني يبني لـــوحدي آيحسين ومصابه
ايموت اليودع احبابه آيحسين ومصابه






ليلة الخامس بـــالحـــزن معروفه آيحسين ومصابه
نذكر سفــيرك وحّــده بــــــالكوفه آيحسين ومصابه
ظلت حميـــده لشوفته ملهــوفه آيحسين ومصابه
صاحت يعم أُنظر الحالي وشـوفه آيحسين ومصابه
آنه ورُقيــه بـــالحبــــل مجتـــوفه آيحسين ومصابه
هذا ندائي للحشر ما عــــوفه آيحسين ومصابه
والغالي مُر اغيابه آيحسين ومصابه



ليلة السادس صحبتك يـــفدونك آيحسين ومصابه
هذا حبيب ايكول شسوه بـدونك آيحسين ومصابه
جون الهتف عمري فده لعيونك آيحسين ومصابه
عابس ينــادي ســيدي مجنونك آيحسين ومصابه
انصارك اتقدم منــــــاحر دونك آيحسين ومصابه
بعيونهم يبن النبي ايــــخلونك آيحسين ومصابه
نعم الصَحابه اصحابه آيحسين ومصابه



ليلة السابـــــــع خل تنادي الانفاس آيحسين ومصابه
بليلة كمر هاشم لَطُمنه اعله الراس آيحسين ومصابه
كطعو جفوفه وناده رب النوماس آيحسين ومصابه
اليفكد اخو ينكسر ظهره يا ناس آيحسين ومصابه
والعنده حاجه يمد جفه لعبـــاس آيحسين ومصابه
باب الحوائج بابه آيحسين ومصابه





ليلة الثامن خل نــصيح بلهفه آيحسين ومصابه
وشموع جاسم بـــالمدامـع تطفه آيحسين ومصابه
هاللــيله رملـــه للمنيـــه اتــزفه آيحسين ومصابه
بدم الشـــهاده أمــــه حنّت جـــفه آيحسين ومصابه
تكله اعله عرسك الف حيف اوسفه آيحسين ومصابه
عيون امك بيا ليل بعدك تُــغفه آيحسين ومصابه
اتحني الولد بخضابه آيحسين ومصابه



ليلة التاسع ليلــــه بسم الاكبـر آيحسين ومصابه
هذا شبيه الهادي جسمه اتــوذر آيحسين ومصابه
ونطبر راسه مثل طبرة حيــدر آيحسين ومصابه
رايد يحمــله لخيـــمته مــا يكدر آيحسين ومصابه
اتمدد اويه الاكبر اكبال العكسر آيحسين ومصابه
الفاكد ولد خل ينحب ويتحسر آيحسين ومصابه
ظل بالدليل اصوابه آيحسين ومصابه



ليلة العاشر ليله هِدْمَت حيلك آيحسين ومصابه
اتودع العيله والحزن يوحيلك آيحسين ومصابه
زينب اكبالك كاعده و تحجيلك آيحسين ومصابه
من جرح بُعدك بت علي تشكيلك آيحسين ومصابه
من تنذبح حته العرش يبجيلك آيحسين ومصابه
وعن الشمس زينب تجي اتفييلك آيحسين ومصابه
يمسلبين اثيابه آيحسين ومصابه
خادم الحسين (عليه السلام)
كرار حسين الكربلائي
@dk1996

(قصيدة العليله)
عذبوني بهجرهم عذبوني
عالدرب انتظرهم عذبوني
راحو الله وياهم كلبي ما ينساهم

ما نسيته اكبالي حمّل ضعن الاحباب
وانه محنيه وباوع من وره الباب
حالي بفراك الاحبهم بجّه التراب
آه ياجرح الوداع بكلبي ما طاب
ليل الفراك ذبحني ليل الفراك
بأطيب الناس جرحني ليل الفراك
شما بِعَد مسراهم كلبي ما ينساهم

راحو وعافو صورهم بين العيون
حايره ومدري شوكت اهلي يرجعون
اني ما أذاني بس حجي اليلومون
يلكلتلي اتصبري اشلون اصبر اشلون
يمته أرتاح يدهري يمته ارتاح
من الزغر دمعي يجري يمته ارتاح
ينتظر ملكاهم كلبي ما ينساهم

انتظر لحظة فرج بس الفرج وين
خوفي من كثر البواجي تنعمي العين
دنيا ما تسوه اذا ما بيها الحسين
نار فركاهم ونار العله نارين
ليلي مانام بعدهم ليلي مانام
وبغياب الاودهم ليلي مانام
روحي تتمناهم كلبي ما ينساهم




راحو ولا جف امل للراحو يلوح
اعتب ويجرح عتابه الكلبه مجروح
روحي من تشتاك احسها تطلع الروح
اليفكد الاحباب تبقه سلوته النوح
والله مليت مراري والله مليت
من عذاب انتظاري والله مليت
يمته اتلكاهم كلبي ما ينساهم

باقيه بدرب الاودهم تربي عيناي
اصفن وحسبات كلبي صارن هواي
مدري ليش انحب وغص من اشرب الماي
الله يستر من زماني شعنده من راي
شعنده ويّاي زماني شعنده ويّاي
من الطفوله سباني شعنده ويّاي
موسهل فركاهم كلي ما ينساهم

اندعي ياربي رجعلي الغوالي
لا تخليني غريبه وبيتي خالي
لويروح حسين من عندي شبكالي
كلبي ما مرتاح من هاي الليالي
خوفي ميعود حبيبي خوفي يمعود
احسين جرحي وطبيبي خوفي ميعود
عيني تترجاهم كلبي ما ينساهم

خادم الحسين (عليه السلام)
كرار حسين الكربلائي