يالله يالابتي يولاد بن بمقر...
وحمو علي حدكم لوتدو الثاني

معنا لوتدو الثاني....لويظحومن كل اثنين بواحد......المهم......
..........القصه........
كانت في حرب إدريس وكان الابقور مازالو مع إدريس رفضو حكم الإمام وكذالك بعض قرأء الطلح منها أهل قريت الطلح مازالو ادريسين رفضو حكم الإمام...وكل بلاد سحار دخلو في حكم الإمام.....المهم.......
وجه الإمام جيشه علي بلاد الابقور واستمر الحرب سنتين ولادخل الإمام شبر واحد في بلاد الابقور وعندما عجز من دخولها استدعء دهم وأباح بلاد الابقور لهم يدخلوها وينهبوها اهم شي أنهم يحرروها من حكم إدريس وتدخل في حكم الإمام......المهم........
أقبلت دهم وطررحت مطارحهم في الشط..وقيل انه انذرهم أحد القبايل من الشط وحذرهم ونصحهم لايدخلو بلاد الابقور
فإذا دخلوها ماهم راجعين الاجنايز ولكنهم أصيبوا بالغرور....المهم.......
طلعو دهم في جبل عزان والصباغي بكل ما معهم من مدافع وسلاحهم الشخصي.وبمساندت جيش الامام.....وبدأو بظرب بلاد الابقور ...وكان ارجال الابقور في الجبل العربيه منها جبل قرهد والخيال ومهم جيش إدريس وقيل انه قتل قايد الجيش الإدريسي في الخيال واسمه ابن عايض من حصات ابن حويل....المهم......قامو دهم بتقدم حتي وصلو علي الجبال المطله علي بير حيان جهت صابرالحمار ودرثوبان..حتي العقاب .....ولكن رجال الابقور....قامو بالالتفاف عليهم من الخلف وقامت قبيلة الطلح بالفزعه لرجال الابقور....وطلعومن الفرحه وشعوب ألبير ومن شعب مقل قل ...المهم.....مارجع من دهم الأمن تسللم اسير.....فقال....احد..شعراء رجال الابقور..قيل انه صالح كدش وقيل انه خميس قدحه ...والروايه متركزه..علي خميس قدحه......المهم......

قال يالله يالابتي بأولاد بن مبقر....
وحمو علي حدكم لوتدو الثاني

قرح المدافع من آل صباغ بيتجهر...
كنذا خبيط الذره في راس علاني...

والله ماتدخل دهم وسحار تتخبر
بنهب دار حسين وآآدرابن ثوبان

لايرجعو غيجنايز يابني بمقر
انتو هل الحرب لاجاء يوم هيجاني

وغارو من الطلح غاره تزهي المحظر...
بارودهم شرعبي شللاع الكواني...

مسسلحه موزر وطلياني وطالب شر..
فزعه مع اصحابهم في كل ميداني...

وسقيت لي ياجبل دلعان ذي يذكر..
ياذي سيوله تصل مال ابن جرماني..

واخيل برق الحياء والرعد يتنهجر..
وخلف المطر يلتوي رأسه عمياني..

وباقي منها أبيات لم اتذكرها..
.........المهم........بعدكل سنين الحرب عرف الإمام أن بلاد الابقور عصيه ولا يقدر يدخلها بالقوه وان الحلول السياسيه افضل الطرق لدخول بلاد الابقور......وفعلا.....دخلت بلاد الابقور في حكم الإمام باختيارهم و بالطاعه لكبارهم.....والي هنا وتنتهي القصه...وسلمتكم......
...بقلم....صالح علي هديان.....

👆👇بقلم✍️صالح علي هديان .

أن اقبلت باض الحمام علي الوتد..
وان ادبرت شخ الحمار على الاسد...

قصة هذا البيت الشعر الذي أصبح مثل يعرفوه جميع الناس.
....المهم...القصه....
كان فيه واحد من صعده من نفس المدينه اسمه طلحان من بيت آل طلحان....المهم الرجال جارعليه الوقت والظروف القاسيه..رغم أنه إنسان طيب ومشهور بالامانه والصفات الحميده...وفي يوم من الايام اشترى تنكه سليط من اجل يبعها تجزئه الي كتب الله له فيها حاجه بسيطه من الربح ...المهم.....جلس عند باب دكان وفتح التنكه والناس يبيعون ويشترون جمبه وهو ماجاله ولازبون يشتري منه...المهم...الرجال انسدح على جمبه وجلس يفكر في الحض الردي... والنوم دنا منه وحلم سواقي من الماء شي ملان وشي نص وشي قطره قطره.وشاف ناس في نفس الحلم....المهم سأل من هذه له قالو لفلان وذه لفلان قال وهذه المليان قالو للأسد قال وهذه قالوحقك ولا فيها قطره ...المهم الرجال ركض برجله يشتي يقطع ساقيت الأسد علي ساقيته والتنكه عند.رجليه..كفحها..ولاقام وفيها قطره..اخذته الحسره وراح البيت....وفي يوم من الايام شاف صاحب له يشتغل عندالاسد..الاسد من صنعاء يشتغل في التجاره يسافر بكل منتوجات الوطن إلي مكه ..المهم..شكاء علي صاحبه وقال الظروف وبده بعمل اذا توسط له في عمل عند الاسد...فقال قم معي العمل جاهز...المهم...سافرمعه صنعاء واشتغل مع الاسد فكان يسافر مع القافله الي مكه وتعرف علي تجار يقبلون إلي مكه من دول الشام..وتشارك معهم في اشياء يبعها لهم ويدوله عموله وهكذا....المهم...الرجال حصل خير..وابدا وحمل له بين قافلت الاسدجمل في حضه .وكل قافله يزيد له جمل بحمله قبلت....والأسد بدأت تقفي وكل مره ينقص عليه جمل بحمله.حتي قدثلث القافله لطلحان وارجع النص وفي الأخير قرر طلحان يسكن في الطايف ويستقبل البضايع من اليمن ومن دول الشام....المهم..
انه سكن الطايف والخير اقبل عليه وفتح له سمسرات والسمسره تشمل الإبل والحمير والخيول حتي الحمام....المهم.....الاسد طواه الوقت وفقر لاابعد درجه ..فقال الله يانفسي كم امتلكتي من الرزق وماذا فعلتي من خير يلقاكي عند الله ولاشي لامنهل ولا مسجد ولاحتي يانفسي حجيتي حجت الاسلام..فوالله يانفسي بدل ماكان تحجي راكبه ان تحجي حافيت الاقدام....المهم....حج مشي علي الأقدام حافي .حتي وصل الطايف وشاف محلات طلحان سمسرات طلحان محلات طلحان سمسرات طلحان...فتذكر ان كانه عامل عنده ...المهم كان الجو مغييم ومطر وبرد فدخل السمسره يحتجي في عرض الجدارمن البرد والمطر..طلحان قال لزوجته تنزل تغلق باب السمسره وشافته قالت من انت يا هذا تفضل اطلع استكن من المطر فوق راع الدار موجود ...قال لا انا عابرسبيل وبمشي..طلعت قالت لطلحان في واحد قال انه عابر سبيل كلمته يطلع يستكن عندك ورفض ..قال طلحان انزلي قليله يطلع يستكن...المهم...نزلت .والمطر نزل بغزر والأسد احتجا تحت بطن الحمار وشاف الدجاجه طرحت البيضه فوق وتيد الحمار طبعا كلنا نعرف الوتيد هوعباره عن مسمار يصكوه في الأرض وله حلقه وفيها حبل مربوط في الحمار...المهم الدجاجه باضة فوق الوتيد ولاسقطت ..وفي نفس اللحضه الحمار بال فوق الاسد....فقال...
الاسد....ان أقبلت باص الحمام على الوتد...وان ادبرت شخ الحمارعلي الاسد.....فسمعته زوجت طلحان وقالت يا هذا صاحب الدار يقلك تطلع تستكن وترتاح فوق الله يحييك...ولكنه رفض..والسبب أنه ما يحب يشوفه طلحان ويعرف وهو في هذا الحال بعد الرز ق...المهم...طلعت زوجت طلحان قالت رفض وشكله كأنه مهبول يكلم حاله ..يقول ان أقبلت باص الحمام على الوتد وان ادبرت شخ الحمار على الاسد...فنزل طلحان وعرفه وحس أن الأسد مابده يعرفه...فسوى نفسه أنه مايعرفه....المهم قال من انت ياهذا عيب عليك تجلس بين الحمير والحيوانات..تفضل ياخي الحال من بعضه. انبسط طلحان انه ماعرفه..وهو عرفه من اول ماشافه بس سوى نفسه مايعرفه....طلع وجلس عنده تعشوى وسمرو وارتاحو حتي وقت النوم ونامو....وفي الصباح افطرو..قال. الاسد.استاذنك انابدي امشي..حاول فيه يجلس عنده كم يوم ورفض .اعطاه فلوس مصاريف ورفض...حاول فيه يأخذها ورفض...قال طلحان اذا مابدك تشل لك مصاريف دربك فعلا الأقل تشل لك اكل انتضر شويه حتي يسوو لك خبز تأخذه معك ..قال...الاسد لابأس بالاكل...دخل طلحان علي زوجته قال سووله قرم واجعلو بين كل قرمه حبتين ثلاث حبوب جنيه وباياكل في الطريق ويشوفها..طبعا كلنا نعرف القرم....المهم سووله 100 قرمه في كل قرمه حبتين ثلاث جنيه وحطوها له في كيس وتوكل بالله مشي وصل في سوق الطايف شاف واحد يرقع احذيات ويبيعها...قال..كم الحذيان به قال بكذا كذا....المهم قال الأسد مامعي فلوس باتعطيني وحده واعطيك هذا العيش ..اعطاه وحده وشل الكيس ..وصاحب الاحذيات مدبر مثل الأسد ولا فك الكيس وطلحان وصلت قوافل من الشام واليمن وقت الغداء ...فقال للعامل امش اشتر خبز وماخبز من السوق ماهو مكفي الغداء الموجود في البيت ...العامل راح السوق اشترى الكيس بنفسه

وصله البيت طلحان أخذا الكيس وأعطاه زوجته قال وزعوهذا العيش فوق السفره..زوجته فتحت الكيس وعرفته بسرعه فكت قرمه الاوالجنيهان بينها..نادت علي طلحان قالت هذا اللي اعطيناه الرجال هذا عيشنا وفنس العدد ولاناقص حبه...واحده...قال طلحان انا لله وانااليهي راجعون...صحيح ان أقبلت باض الحمام علي الوتد ...وان ادبرت شخ الحمارعلي الاسد......هذه هي القصه..فلاخير يدوم ولاشرا يدوم...فخلو ثقتكم بالله.. ....وسلامتكم.....
بقلم...صالح علي هديان...

ايام عاد اخبارنا صوت لندن
قبل الجزيره والحدث قبل الأدشاش

كنا بخير وحالنا كانه أحسن
ولاحدا يبغا من الدوله معاش

كلن على رب السماوات يركن
يسرح  وعاد الطير نايم بالاعشاش

ويعود بيته قد تقضى وخزن
مرتاح  مايشتي مناحي ولاطاش

وكل شي موجود بركه ومسكن
والرزق يتسهل وبه خير  وقراش

ذلحين مابه خط مسعى ومأمن
اسمع لكم عتال يقتل برشاش
 
والبعض جاله قنبله وزنها طن
وكم وكم ماتو بلدغات الاحناش

ومن نزح  ضابح  وعقله تجنن
في بيت مستأجر وماعنده فراش

مابش معه بطاريه لجل يشحن
ولا دخل بمنظمه تدعمه كاش

واخس خلق الله بدوي تمدن
لاشاهدك في حلقة الضيق ينحاش

ينسى اﻹخا والصحب اذا قد تمكن
وتصير له كلمه وهو لاش ابن لاش

****
محمدناجع القهري

موضوع بيع ارض تعاون خولان الواقعه على شارع خولان ،صنعاء والتصرف فيها من قبل من لاصفه لهم ولا ولايه لهم عليها ....الخ

من لديه معلومات عن هذا الموضوع فليراسلني على الخاص او يتصل بي على الرقم ٧٧٤١٥٨٨٣١


المحامي / زياد السعيدي

.
على الثقة تبنى علاقات الاصحاب
والصدق معيار الصحب والعلاقة

وان شفتها غابت ومعيارها غاب
عزيت ربعك في الإخاء والصداقة

والطارفة غلق على رجلها الباب
لاقد عيون الشر في كل طاقة

واشطب على بعض الاسامي والالقاب
ذي طارفتهم خلف ظهر البطاقة

وحط جملك في عريقين الانساب
واحذر من اهل المشطرة والحذاقة

الوضع حولك شوم والدهر غلاب
والجهل عائق والحقايق معاقة

والشعب ثلثينه منافق و كذاب
يجمع صبوحه والعشاء من نفاقه

وفي المية تسعين سارق ونصاب
كلين في سوقه يجيد السواقة

أزمة ثقة بين الحكومة والاحزاب
وازمة ثقة في السيرة والرفاقة

وازمة ثقة بين الاقارب والانساب
ولا قريب الا ويشكي فراقه

فخل همك في رضى رب الارباب
وهم عبد المطلب في نياقة

ولايغرك مدح معصور الاشناب
مدح المجامل مثل موس الحلاقة

والاصدقاء ذي فيهم الظن ماخاب
اهدي لهم من غالي الورد باقة

وقبل تمشي حط تعليق واعجاب
وان ما اعجبك رديت لي في طلاقة

هل الحماقة عند من شك وارتاب ?
والا الثقة في الوقت هذا حماقة ?

بقلم #الشاعر_مجلي_القبيسي

خولان الطيال جدهم
حمير بن سبا في النسب
واخوتهم بصعده كذا
كُل سُرآة خولان وحرب
فرض المملكه والحجاز
ومن في مصر وشام العرب

خولان عمرو حمير سبا
جد الكُل مِن ذو حسب
من قحطان سام ابن نوح
روس القوم واساس العرب

شمل قبائل خولان /
زياد السعيدي

جهلنا من تجاهلنا وخضنا
دروب العز وتركنا الرقادي

وعدينا صروف الدهر واحنا
قروم ابنا قروم رغم الاعادي

وكنا مثلما الواقع عرفنا

سلاطين الممالك والبلادي

ضياغم من سلاله جد جينا
ومن نسله عددنا غير عادي

بنو خولان من حمير نسبنا
ملوك ابنا ملوك في كل وادي

وفي خولان سدنا وانتشرنا
وحلينا الطوارف والبعادي

ولا خولان عامر انتقلنا
بصعده والسراه أهل المعادي

ولانجد ارتحلنا حيث منا
قبايل حرب زخازيخ البلادي


لنا تاريخ مشرق لا ذكرنا
ولنا حاضر قوي وغير عادي

ومستقبل بإذن الله لنا احنا
بحول الله خلاق العبادي

من أقوال شمل خولان
المستشار
زياد السعيدي

سـلـم عـلــى خولان يا طير مريوش
واعطي لها تقدير شــــاعــــر يماني

فيها الهناء والـخـيـر داني ومفروش
فيها السعاده والـــــــــدواء للمعاني

من جوها الحالي قد العين مدهوش
شلت جـــــمـــــال الارض كِنّا جناني

خولان عـــــامـــر حُبها صار منقوش
فالقلب ثابـــــــــت دوم داخل كياني

يا الله تجعلها مـــــد العمر مرشوش
بالخير والامطار. طــــــــول الزماني

✍️الشاعرابوعاصف سلمان

يا ليت وان ابليس في قيد محكم* والا عمي والا طمر بو بحر مظلم* بو سابع البحور* والا قفاي السد لا يطلع وينزل* بو موضعو يدور*** ذي هو قفا نور القمر والشمس ذي تبره على الدنيا من الفجور/
والا خلق بو صورة ابن ادم مع علي* لاجلو يبارز وآيجه بالصف الاول* بو مقدم العبور* يذوق ضرب السيف ذي طعموا يسيل* ذي باردو يفور*** نسلم وساويسه وحلم الليل ذي صور خياله نجس الطهور
كلمات الشيبة حسين سلامة الربيعي رحمه الله

سلام ياديره حكمها الشيخ بن مناع
حاز المكارم قبيله واِقبال

جينا نشارك فرحكم والود ماقد ضاع
عهد المخوه بيننا مازال

خالدالميفاعي

سلام والجيهان قادم* على قبيلة سيل عارم* من قوم لفت قوم وعلى راسها ابن مقيت/
واليوم جينا باللوازم* في واقعة جايت سلايم* والمدعي في ما ادعى ملزوم بالتثبيت
هذا من شعر الشهيد ناجي علي البكيلي رحمه الله في مقصد من قبيلة غمر عند بعض بني حذيفة

الشيخ علي صالح البقشي المستنيري شيخ قبائل مستنير بني جبر

وهذا القصيده فيه يقولها. بداع. بعيد. المرااااميس
سجل بميدان القوافي ضهوره

في شيخ كاسب عزنا والنواميس
يوم النوايب ما تباء الا حضووره

علي كبير القوووم ذيب المغلايس
وين ما الناموس قايم بدووووره

اتعب واخر من يبوووون المنافيس
بدرب المراجل رقم واحد عبووره

ولابته ابطال يوووووووم المقابيس
لجل الشرف والمجد ربعه صبووره

غنت لهم امات العيووون المناعيس
يوم العدو من ضربهم اقفاء معوره

وعاد في راسي الهجوس المكاديس
لاكن ما اوفي علي هو وصقوووره

مجااراه بين شتوي وقليط و الضو۽في داخل المدينه حوالي عـ1998ـــام

قال الضوﯠ۽ وقليط:

يا مرحبا يا ضيف من قلبي برغبه
ياضيف لا تشبح لي القطبه
قد الخبره مهاجين..

قد لي مراقب وصلكم من قبل غربه
والله يحيي من هوا۽ الجربه
علۑ الاكتاف والعين..

واما مجالسنا المحليات دربه
بيرفعوا في قيمة الشربه
قد الكيلوا بسبعين


وسحار واهمدان حاقونا بزربه
بتزرعوا في المال والحربه
قلقل يحمر العين..

📝📝📝📝📝📝📝📝📝
اجاب الشاعر شتوي جياش..


والله يعز الجيد كلاً بيحبه
يمشي علۑ مرضات ربه
وانذروا بحنين وطنين...

ولنت عاطش فبشروا منا بشربه
فقيه حاذق صورته زربه
وا معه مشروع واثنين

📝📝📝📝📝📝📝📝📝

ثم قال الشيخ شتوي جياش:

يا مرحبا مادام طير العرش يلوي
عاده طري من لسن شتوي
قدر ومعزه لمن طال

ويا فقيه النفس لك من صدق تهوي
هاويش عد بدك نسوي
وانت لا تكثر فالتشهلال


ماحل في كحلان غير انسان مقوي
والضو۽ بيسرح ويضوي
حصلته عشرين فنجال

قد بين ارا۽ الخبره علۑ المسقاه توي
من هو نمر فيقوم يضوي
قهقه ضحكه وتلال..


والله يصيبه شعب كلاً فيه يهوي
قدهو كما بيت المقهوي
ماعلۑ بيبانه اقفال...

ياضو۽ نسمه عندنا مشتيك تضوي
راع العنيه غد منوي
يذبحوا قفران وجمال...
..

فتكلم الضو۽ عن يرسم وقال انه حقهم وبايحلفوا عليه يمين..

📝📝📝📝📝📝📝📝📝
فاجاب الشاعر شتوي :

يامرحبا ياضيف قمت بكل لازم
مسفر وعبدالله قاسم
بيدورا نقشر الثوم...


ماقد علمت بناس قال الضو۽ عالم
من شب في الدنيا مزاقم
مادرا انه رزق معلوم..

واما اليمين اشتي مصلي ناس صايم
بّا نَلُقًطِ الُنَاقًوَسِ والصارم
وايفجر يزقف القوم...


باندخلك في سوقنا لا با تساهم
ويا فقيه الله عالم
بعضكم ماعمّعه غوم...


📝📝📝📝📝📝📝📝📝
اجاب الضوء:
في احمد مهدي الدباء

وان صاحب هو بايسبر لك عزايم
سرقد فطم حتى البهايم
والقلم من شق مخروم..

وما ون نفعكم علي والا ابن هاشم
والا قد الماء في المقاسم
ون يسقي وانت ملزوم...

تمت من بعض المحفوظات..


بقلم➱عمار.خالد.ee

والله يكثر خيركم يا زينة الحدود
وانتوا قبيله تعتني بالضيف وا تجود
لو مطلبه كبير
تتوارثون الجود من والد الى أولاده

والجيد يتحمل وطبعه لا شرد يعود
والعفو عند المقدره من شيمة الأسود ما يقتلوا اسير
والجود والناموس دائم عندكم عاده

مجهول
بقلم✍️طه السراجي
★☆★

سلام والجيهان قادم* على قبيلة سيل عارم* من قوم لفت قوم وعلى راسها ابن مقيت/
واليوم جينا باللوازم* في واقعة جايت سلايم* والمدعي في ما ادعى ملزوم بالتثبيت
هذا من شعر
ناجي علي البكيلي في مقصد من قبيلة غمر عند بعض بني حذيفة