خوان يا نوووور.
بقت بتصرخ بطريقة هستيرية.
الدكتورة شالت انفاسها قبل م تديها كف.... الكف خلاها توعى لنفسها
الدكتورة : اوعي..... احمدي ربنا على كل حال... الدنيا دي اختبارات... الحمدلله ف بتك... في ناس حصل ليهم الشي دا وم عندهم اطفال اساسا... احمدي ربنا انو حنستأصلو ليك وخلاص كدا حتبقي كويسة.... ف ناس بيحت شعرهم وبيقتلهم.... اتنفسي ب الحمدلله.
وجدان ختت يدها ف وشها وبقت بتببببكي.
ونور بتبكي معاها.
_______________________________
ميكال كان قاعد مع وائل...
المغرب اذن...
ميكال : ارح قوم نصلي
وائل باستغراب : بسم الله... منو معاي ؟
_ معاك مشاري العفاسي
_ لا بجد مالك فجأة
_ الغريب شنو ؟ عشان عايزك تصلي ولا كيف ؟ انت م استغربت ايام عدم صلاتي هسه بتسغرب على صلاتي ؟
_ سبحان الله....صحي يهدي من يشاء.
_ اي... يلا قوم.
قامو الاتنين نزلو ومشو الجامع وصلو 💕
( انا لو كنت ولد م كنت حفوت صلاة ف الجامع... صوت الامام وهو بقول استقيمو... والناس بتقرب اقدامها من بعض عشان م يخلو فسحة للشيطان والصلاة الجماعية وصوت المصلين وهم بقولو الله اكبر 💕.... دا اكتر شي الاولاد ينحسدو فيه والله 💜)
بعد م الصلاة خلصت وهم راجعين ف الشارع.... ميكال استفرغ دم تاني... بطريقة ارعبت وائل.... الجرا بسرعه وجاب ليه موية عشان يغسل بيها خشمو.
وائل : مالك يا زول ف شنو ؟
_ عادي عادي
_ كيف عادي عادي ؟ دي م اول مره ولا شنو ؟
_ اي م اول مره.
_ وقاعد كدا بي كل بساطه وم مشيت كشفت
_ حمشي
_ هسه دي تمشي وحمشي معاك
_ لا لا خليك ف بيتك... بمشي براي.
_ طيب طمني عليك.
_ طيب
_ حالتي كنت عايزك تشرب شاي المغرب معاي
_ م عندي نفس اصلا للشاي... على كل حال مشكور
_ العفو يا اخينا.... لئيم دا
_ لئيم ؟
_ اي... وتقول زاتو جبدت ميكال الصغير... طالع عصبي وود لزينه... اي شي قدامو يفلق بيه
_ صراحة انت تستاهل يفلقوك بطوب عديل... مش حاجات عيال صغار بزازة وسكاته وكدا
_ مش قلت ليك لئيم 🙂
_ طبعا امو م بعمل ليها كدا صح ؟
_ قلت ليك ود كلب قاصدني انا بس
_ اهو الكلب جاب جرو عادي 😂
مشو على عمارة ناس وائل.... ومن هناك ميكال ساق عربيتو ومشا المستشفى عشان يفحص... ووروه انو يجي يشيل النتيجه بكره.
رجع البيت..... وكان مرهق.
اول م دخل لاقتو ماما عشه : مساء الخير
_ مساء النور
_كيفك يا وليدي ؟ وكيف كان يومك
_ الحمدلله
_ تعال عايزة اتكلم معاك....
_ان شاء الله خير
_ انت يا ولدي مرتك العملتو دا شنو ؟
_ عملت شنو ؟
_ يعني قصة الاولاد الكانو ف الشقه
_ انتي عايزة توصلي لي شنو ؟
_ عايزة اوصل لي انها اكيد مواعداهم
وقف على حيلو : الفي راسك دا كلو غلط.... البت دي م النوعية الانتي متخيلاها... عشان كدا ارحميها.... وانا احلف ليك بالله انها الاخلاق الفيها لا كانت ولا حتكون يوم في بت.... عن اذنك.
م اداها فرصة تتكلم تاني ومشا طوالي
اما هي هزت راسها : محن.... عاد شكيتك على الله كان اكلتي مخو بي حلاوة.
طلع فوق.... واول م فتح الباب..... لقاها واقفة قدام مراية ف الصالة حقت شقتهم وبتعاين لنفسها: توتيل ؟
قبلت وراها وظهرت الدموع في وشها : دا شنو الفي جسمي دا ؟
_ شنو ؟
كانت والعياذ بالله شايفة جسمها كلو ثقوب 💔
مدت يدها زي الطفلة: عاين عاين
عاين لي يدها وهو بيقرب منها : ماف اي شي
ختت يدها ف راسها : م تكذب.... جسمي مالو.... دي شنو القدود الفيه دي.
بقت بتتحرك بي هستيرية وشوية بقت بتصرخ وهي بتحك في يدها.
قلعت الشاش اللافين ليها يدها بيها.... وبي قسوة زحت اللصقة وغرست اضافرها في مكان الجرح المخيط.
ميكال مسكها بسرعه من يدينها الاتنين عشان م تأذي نفسها.... بقت بتصرررررررررررخ وبتتلولو عشان تفك يدينو منها.
لحدي م في النهاية تفت في وشو.
فكا يدينها ومسح وشو وهو بعاين ليها بغضب.
اتفاجأ بيها بتديه كف.... طبعا بالنسبة ليه م قوي... لكن ف النهاية كف.
علا صوتها : بككككرهك.... بكررررهك اطلع..... وشك كرييييه... زي ريحتك اطلع بره.
نهرا بصوت غضبان : توتيل
ختت يدها ف راسها : اسكككككت صوتك بيفجر لي راسي
طبعا ماما عشه سمعت صوتهم جات جارية وبقت خاتا راسها ف الباب حقهم وبتتصنت
جات لجين : هي في شنو ؟
ماما عشه : كدي خليني انسمع المغضوبة دي بتقول ف شنو
لجين : ماما عشة م صح البتعملي فيه دا
_ دايره تسمعي مدي اضانك م عايزة غوري.
بس فجأة الباب فتح... ميكال عاين ليهم من فوق لي تحت... وطبعا لجين مظلومه ساي 😂.
ماما عشه : 🌚
ميكال وهو بعاين لي لجين : قولو لي بتتصنتو ؟
لجين : ابدا والله
ماما عشه : ارحكاكي يا بت اديني الدوا هل الضغط 😌
ميكال وهو بيمسك يد لجين : ادخلي شوفي توتيل دي مالا... بتبكي وبتصرخ وتصرفاتها متغيره
ماما عشه : اتلقيها مشوطنه.... البنت دي ماها نصيحه
شال انفاسو ومشا خلاهم.... دخل بيت نور عشان يستحم ويغير هدومو.... وكان بفكر دي فيها مالا فجأة بقت كدا ؟
بي تردد جرا قميصو وشماه.... شككتو في نفسو.... كان م

تأكد انو ف شي وهي م طبيعيه.
لجيت خشت ليها : توتيل ؟ مالك حبيبي في شنو
كانت متربعة ف الارض وبتبكي.
لجين ضمتها عليها وبقت بتمسح على شعرها وبتهدي فيها.
اما هي كل شوية بتقول : دا شنو الفي جسمي دا ؟
لجين : مالك جسمك فيه شنو ؟
مدت يدها : عايني.. عايني يدي مقددة كيف
_ بسم الله الرحمن الرحيم... يدك سليمه مااااف اي شي.
كانو على الوضع دا لحدي م توتيل نامت.
___________
نور و وجدان جو راجعين....
طبعا وجدان منهاااارة.... الدكتورة حددت ليها العملية خلاص.
نور ادتها حبوب مسكنه للصداع المسكها.... ونامت.
بعدها هي مشت شقتها.
فكت ربطت شعرها ودخلت الاوضة.
اتفاجأت لمن لقتو قاعد ف الكنبة.... كان قاعد بي بشكيرو المغطي نصو بس... وضامو يدينو وبعاين للارضية وظاهر انو بالو مشغول وبفكر ف شي.
حست بي فرحة كبيره: ميكال
رفع عينو وعاين ليها قبل م يزفر بضيق : كنتي وين ؟
_ مشيت مع وجدان مشوار
_ كويس
جات عليه : يادوبك اتذكرت انك معرس واحدة اسمها نور ومفروض تجيها؟
م رد عليها واكتفى بالسكات.
قعدت جمبو وهي بتعاين ليه : ميكال
عاين ليها
_ انتي لي بتعمل فيني كدا ؟
_ عملت شنو ؟
_ انت م مهتم بي... ولا معبرني... ولا حتى عادل بيناتنا... حرام عليك عذبتني معاك
_ انتي عايزة شنو بالضبط ؟ يا نور انتي عارفة انو انتي العايزاه دا م حقدر اعملو ليك ولا اديك ليه.... انا زول واضح وم بحب اكذب... كنت واضح معاك من البداية حب وعلاقات والخرابيط دي م عندي معاها شريعه... وانا معترف انو ف حاجات غلط كتيرة حصلت بيناتنا... وعشان كدا انا اتزوجتك... بس حتى دا م معناه اني بحبك... انا كدا ومبادئي كدا وم حتتغير
_ طيب اشمعنا مهتم بيها هي ؟
_ اسأليني تاني
_ للللي مهتم بيها هي ؟ لي هي براها... مش ف النهاية هي مجرد زواج مصلحه ؟ ولا عشان هي القروية الشريفة المابتعرف اولاد وكانت شي جديد بالنسبة ليك ؟ انا اي شي بدر مني عشان بس بحبك
_ عارفك بتحبيني... وانتي م اول ولا اخر واحدة تحبني.... واعرفي اني انا م بحب.... والله العظيم م بحب.... قلبي دا م زي قلوب باقي الرجال.... م بقدر اتعلق بي انسانه اصلا.
_ وطيب لي كنت بتعلق البنات بيك؟
_ يعني انتي محامي دفاعهم ؟
_ ياخ حرام عليك... حس بي.... حس بالعاملو جواي 💔.... انا عشانك عملت حاجات م بتشبهني اصلا.
وبدت تبكي.
عاين ليها.... ولي اول مرة تظهر علامات الشفقة ف وشو.
اتفاجأت بيه.... بيضمها عليه.
ختا ليها راسها في صدرو ومشا بيدو في شعرها : انا اسف.... على كل شي عملتو فيك... اسف والله.... لكن صدقيني العايزاه م حيحصل.... وم حقدر احبك الحب الانتي عايزاه.
كانت دي اول مره تسمعو بيعتذر فيها.
حست بيه بيزحها منو... قال ليها بصوت مرهق : تصبحي على خير.
مشا سريرو ونام.
وخلاها قاعدة ودموعها سايلة.
اليوم التاني :
ميكال مشا دخل اوضة توتيل.... لقاها نايمه ومعاها لجين.... شال هدومو وحاجاتو وطلع.... جهز نفسو ف شقة نور وبعدها مشا المستشفى وشاف التحاليل وبعدها طوالي على الشغل.
مرت الايام... وتوتيل حالتها مستاءة... هلاويس وصراخ وكوابيس.... وفجأة يوم اتفاجأوا بيها بتقص في شعرها بي حجة انو في حشرات فيهو.
هنا لجين اقترحت على ميكال يمشو لمعالج بالقرآن لانو توتيل البتعمل فيه دا م شي طبيعي.
وفعلا ودوها وبالقوة.
اول م بدا يرقي ليها بقت بتبكي بصوت عالي.
ولجين ماسكاها.
قام ونفث ليها ف راسها.
وبعد م خلص من الرقية عاين لي لجين : البت دي معمول ليها عمل... عايزين يجننوها.
_ انا كنت متأكدة انو ف شي كدا
_ حديكم زيت زيتون وموية مقروئين فيهم... وعسل نحل... وتسمعوها رقية وبي اذن الله كل شي حيبقى تمام
ميكال : طيب ممكن نعرف العمل الشي دا منو ؟
_ والله يا ابني انا بعالج لكن م بقول الاسماء البتوضح لي.... عشان م تحصل مشاكل... وقد م تكون صحيحة اصلا... على كل حال... العمل كدا كدا حتعرفوه براكم وحيظهر.... واتوقعو القريب قبل البعيد.
بعدها طلعو.... ولجين كانت هي المهتمه بي توتيل.... ولمن تشربها من الموية كانت بتقول طعمها مر... وبعدها بترجع....
مع الايام بدت حالتها تتحسن... لكن ميكال بقا نهائي م بقرب من الاوضة حقتها.
_________________________
وجدان جات داخله لي سيف الماسك تلفونو وبيوتسب.
زحا التلفون وعاين ليها.... وشها شاحب وعيونها محمرة.
سألها بي استغراب : وجدان ؟ مالك ف شنو ؟
_ انا بكره حعمل عملية
_ عملية شنو ؟
_ استئصال رحم
سيف نطر عيونو.... وعاين ليها بصدمة : كيف يعني في شنو مالك ؟
_ عندي كانسر
وبدت تبكي.
سيف ظهر الحزن في وشو وختا يدو في كتفها : لي م كلمتيني؟
_ ولو كلمتك حيحصل شنو يعني ؟ حبقى كويسة مثلا ؟ كدا كدا كدا خسرانه.
سكت وظهرت دموع ف عيونو.... م كان عارف يصبرها ولا يصبر نفسو.
اليوم التاني من الصباح مشت ومعاها نور وسيف.... وم كلمو اييي زول.
_________________________
وائل جا داخل لي ميكال الكان مدنقر في المكتب حقو: ميكال
رفع راسو : نعم ؟
_ مالك ؟
_ انت وين

الايامات دي م بتظهر ولا بتجيني حتى ف
البيت؟
_ والله تعبان شديد... وزاتو البيت دا بجيه زول نوم بس.
_ ومالك ضعفت كدا ؟
_ الضغوط
_ يا زول انت كويس ؟
_ انت شايف شنو ؟
_ م عارف حاسي بيك مرهق شديييد
_ فعلا مرهق شديد.... بس ايام وحتعدي... م اول مره
_ ممممم... وم وريتني نتيجة الفحوصات كانت شنو ؟
_ جرثومة معدة
_ عشان كدا كنت بترجع دم
_ اي.
_ ربنا يشفيك ان شاء الله.
_ تسلم.... يلا امشي على شغلك
_ تمام
______________________________
لجين ساقت توتيل عشان يقصو ليها شعرها كويس ويساووه ليها بعد العملتو في نفسها.
قصو ليها قصه كدا رهيييييبة زي حقت كايلي جينر... وكانت جايا مع وشها وشكلها اتغير نوعا ما 💕.
لجين : ميكال لمن يشوفك حيجن عليك
ظهر الاحراج ف وشها : بقا م شغال بي
_ لا لا.... بس عشان انتي الفتره الفاتت عارفة الحاصل والكنتي بتعمليه
_ والله م بيدي.... كنت بشوفو قبيح شديد وريحتو بتقتلني.
_ حسبي الله ونعم الوكيل ف العمل فيك كدا
نزلت راسها وهي بتحرك ف يدينها بتوتر.
_ انتي يا توتيل ؟
_ اها ؟
_ م حسيتي بزول معين ممكن يكون سبب ف الحصل ليك دا
_ حسيت بزول لكن.... لكن تاني استغفرت وم عايزة اظلم بشكوكي
_ كدي قولي لي منو ؟
_ م عايزة
_ لا لا حاولي قولي
_ نور
_ تصدقي يا توتيل نفس كلامي انا ؟ انا برضو حاسا بي انها هي العملت كدا.... حتى الحادث الحصل ليك داك... شاكا فيهم هم... لانو الرسالة الجات من تلفوني ليك انا اساسا م رسلتها.... واليوم داك نمت ف بيت نور وتلفوني معاي يعني هي الوحيدة الممكن تفتح التلفون عشان ترسل ليك.... وهي الوحيدة الحتستفيد من الحصل دا.
توتيل بتفكير : اليوم داك زاتو وجدان عرفت انو انا حامل.
_ ووجدان صحبتها... واقسم بدين الله الاتنين ديل ليهم يد
_ مش الاولاد اتقبضو
_ اي
_ احتمال يعترفو عليهم
_ ان شاء الله... هم لحدي هسه م جابو سيرتهم... لكن اعترفو على زول... قالو هو الوصاهم بي كدا.... ودا لو قبضوهو خلاص.... دمنا حيبرد.
_ انا غايتو مفوضة امري لي ربنا.... واي زول اذاني ربنا بجيب لي حقي منو... حتى لو انا سامحت... لانو ربنا م بخلي حق الناس
_ ونعم بالله كلامك صح ومنطقي جدا.
__________________________
وجدان طلعوها من غرفة العمليات.... واول م فاقت بقت بتبكي بي حزن.... وطلبت يجيبو ليها بتها.... الدكتورة وافقت انو يدخلوها ليها.... جا سيف شايلها.... وهي م صدقت حضنتها عليها شديد ودموعها م فارقت عيونها.
والشي الحصل ليها دا خلاها تحقد وتكره توتيل بدون مبررات تذكر.
___________________________
ميكال بطنو فجأة قلبت ودخل الحمام ورجع شديد.... مشا بعدها ورقد ف الكنبه.... عشان يرتاح..... م اخد وقت وطلع طوالي على البيت....
__________________
لجين وتوتيل رجعو.
لجين دخلت وتوتيل فضلت قاعدة بره.... شافت نور جايا داخله عليها.... قبلت وشها منها.
نور : شفتي شيطان ولا شي ؟
_ اختاري بس العاجبك
نور بي ابتسامه وهي بتقعد : توتيل.... حبيبتي.... عايني.... عشان نكون واضحين.... انا وانتي هسه ضرات وبنتشارك نففففس الراجل عشان كدا خلينا حلوين مع بعض تمام ؟ ولا انت مقهورة مني عشان انا حامل وانتي اجهضتي( البكذب وبصدق نفسو )
_ والله دا م شي انقهر منك فيه.... لانو بيد ربنا.... انتي براك الفهمك غلط
ضحكت ضحكة كريهة : وااااي يا ناس معليش م تزعلي من كلامي.
_ ازعل منو لي مثلا ؟ انا بشفق عليك... كونك بتجي تتمسخري بحاجات م بيد الناس
_ كلامك بيدل على زعلك.... معليش يلا ربنا يعوضك
_ و يعوض الجميع 😊💜
نور دخلت... وتوتيل طلعت بره.... بس وهي ماشا ف الممر فجأة تشوفو ليك داخل.... لا عرفت ترجع ولا تكمل طريقها ولا تقيف.
بطأ خطواتو ووقف قدامها
قالت ليه بتوتر : ازيك
_ الحمدلله بخير وانتي
_ الحمدلله
قال ليها بنبرة مستهبلة : ممكن اسلم عليك كويس ولا انا و وشي وريحتي كريهين.
ردت عليه بدون تفكير : لا لا... م كريهين والله.
ابتسم وهو بيبوس يدها : حمدلله على السلامه
بادلتو الابتسام : الله يسلمك.
____________________________
مرت الشهور..... وتوتيل حبها يوميا بزيد لي ميكال... كان بيعاملها بطريقة مهذبة وجميلة... لكن م بيقرب منها.... وم اعترف ليها بي انو حتى معجب بيها بس..... توتيل كانت بتحسب كل يوم لليوم الحيجي ويفرقها منو.... اليوم الفاصل الحترجع فيه غريبة تاني.... وكان فاضل ليه شهرين بس.
نور كانت متورطه.... وبقت بتلبس بطن احساس انها حامل وبطنها كبرت عشان م تبقى موضع شك... واتفقو هي ووجدان على انو حيقولو انو الجنين ميت وحيعملو ليها عملية طارئة وينزلوه..... لجين كانت منتظره يجي اليوم الحيوصلو فيه للراجل الاعترفو عليه الاولاد.... واللي هو لحدي هسه م لقو ليه اثر.
وجدان ونور كانو كارهين توتيل شديد وبيفتشو على اقل ثغره يدخلوها ف مشاكل بيها لكن م بيقدرو.
وجدان كانت قاعدة بتلعب في بتها بعد المغرب بشوية لمن تلفونها ضرب.
ردت عليه : الو
_ انتي

وجدان ؟
_ اي ان شاء الله خير
_ تعالي صالة....... سريع
_ انت منو ؟ واجي لي ؟
_ تعالي وحتعرفي براك.
وطق الخط قفل.
مسكت بتها للفلبينيه.
غيرت هدومها وركبت عربيتها ومشت للصالة الوصفوها ليها.
دخلت وهي بتتلفت... وضربت للرقم لكن اداها مغلق.
بس فجأة عينها وقعت على الكوشة القاعدين فيها العرسان.
بطنها قلبت.... ورجولها بقت م شايلاها.
الدموع ملت عينها وهي بتمشي ناحية الكوشة..... الفيها العريس.... الواضح جدا انو مبسوط وهو بيبشر بيدو.... كان سيف.... زوجها
طلعت ليه فوق.... واتجاوزت الناس الواقفين معاه وبيصورو.
ندهت عليه : سيف ؟
رفع راسو وعاين ليها..... وظهرت الخلعه في وشو.
هزت ليه راسها باستغراب.
وهو نزل راسو بخجل.
طلعت ليه.... وابتسمت بين دموعها وهي بتمد ليه يدها : مبروك
م رد عليها.
مشت ناحية العروسة وكانت صدمتها اكبر لمن لقتها دي دعاء بت الكوفير..... دعاء وقفت وحضنتها وهمست ليها : سمعت نصيحتك وعرست.... وشكلو كدا حتكوني حياتي مع حبيبي حلوة شديييييد.
اتراجعت لي ورا وقربت تقع( ضوقي احساس توتيل لمن كنتي سبب ف زواج ميكال من نور )
مشت وحست انها م شايفة شي قدامها.... الدموع حجبت الرؤية عندها.
ركبت عربيتها وقفلت الباب.....
اتحركت ورجعت البيت..... ومن م وصلت قعدت ف الارضية وبقت بتببببببببببببببكي بكاء حق حرقا..... م اتوقعت نهائيا يجي يوم سيف يتزوج فيها ويخليها..... م اتوقعت يسمح لي نفسو بي كدا.
طلعت فوق وكانت مرهقة شديد لقتها نور.... سالتها باستغراب: وجدان مالك
_ عرس.... عرس فيني
_ دا شنو م فاهماك
_ سيف عرس فيني..... عرس فيني يا نور
نور بي انذهال : وااااااااااي يا وجدان...... واي الله يربط على قلبك قومي خليني ادخلك اوضتك
_ انا لي بيحصل لي كدا ؟ انا عملت شنو ؟( هه عملتي شنو ؟).
دعاااااااء والله م اخليك...... والله احرق دمك زي م حرقتي دمي
_ العروس دعاء ؟
_ اي دعاء.... دعاء الفجعانه الجعانه.... انتقمت مني ف راجلي والله لو م شربتها من نفس الكاس م يبقى اسمي وجدان.... وهو الجاموسة يصبر لي... والله الا اخليهم يلقطو ورق الشوارع.
_________________________
فجر اليوم التالي :
ميكال فتح عيونو من بعد نومه طويلة.
لاحظ ليها واقفة قدام قزاز باب البلكونه....
كانت فاكة شعرها و ولابسة قميص ابيض.... لصقت مقدمة راسها بالقزاز وشالت نفس طويل.... ومسحت الدموع الغرقت عيونها.... الدموع الكانت م بتفارقها لمن تكون وحيدة وكل م تفكر في يوم طلاقهم القرب.
حست بي حركتو وراها لكن م قبلت عليه.
احاطها بيدينو وهو بينحني ويتكل على كتفها بي ورا.
قال ليها بصوت نعسان : المصحيك هسه شنو
_ م جايني نوم
رفع راسو لمن حس بنبرة البكاء ف صوتها.
لفاها عليه.....
كانت مدنقره راسها.
رفعو ليها بطرف يدو وهو بعاين ليها بنظرات عميقه : بتبكي لي ؟
_ لا بس.... يعني زهجت شوية... واشتقت لي اهلي
_ اهااا..... طيب الزهج وشوقك لي اهلك دا بيتحل.... اسفرك ليهم ؟
_ م هسه اصلا كلها حكاية كم وستين يوم ونتفارق
ابتسم : بتحسبي ليها يعني ؟ شكلك مستعجله شديد عليها
_ بحسب من اول يوم جيت فيه هنا
ضحك : شكلها دي دموع السعادة ولا كيف ؟ اخيرا حتتخلصي من الوحش الفي حياتك دا
دنقرت راسها وسكتت.
رفع راسها تاني..... ومسك وشها بين يدينو..... انفو الحاد استقر جمب انفها.... همس ليها وهو مغمض عيونو : خلي ايامنا الاخيره تكون حلوة طيب ؟
مسح دموعها.... وضماها لصدرو بحنان.
كان محاوطها بيدينو..... وباس راسها اكتر من مره.
ميكال شوية بطنو المتو.... وفكاها ودخل الحمام وبقا بيرجع تااااني 💔
وقفت جمب باب الحمام وبقت بتعاين ليه بقلق.... ملاحظة لي حجمو البدا يقل وشهيتو البقت مقفولة واستفراغو الدايم.
اول م طلع مدت ليه فوطه صغيره نشف بيها يدينو ووشو ورجع سريرو ونام... من دون م يتكلم معاها.
الساعه 10 توتيل طلعت مع يوسف القال عايز يوديها مدرسة قيادة عشان تتعلم السواقه 😂.
كان اول يوم ليها... وهو مشا جامعتو وخلاها.
بعد م خلصت طلعت بره.... وطلبت ترحال وبقت مستنياه يجيها.... بس بعد شوية كان تشوف ليها شافع مترتر في نص الظلط وجاااااري بي كل انفعال وبدون خوف.
شهقت بخوف وجرت عليه.
قبضتو ف نص الظلط وشالتو.... كان عمرو زي 4 سنوات كدا.
سالتو باستغراب : اسمك منو
_ حمودي
_ امك وين
_ ف البت
مرقت من جمب الظلط وبقت ماسكاه وبتتلفت وم عارفة تلاقي امو كيف..... بس بعد شوية شافت مرة لابسة توبها وماشا بسرعه عليها.... عرفتها امو وطوالي مشت ليها.
شالت ولدها وقرصتو في يدو لحدي م بكا : يا ولللد مالك عايز تجنني... دايما شارد من البيت
توتيل : انتي خلي بالك عليه هو صغير
المرا عاينت ليها : احححححيا اخلي بالي على منو ولا على منو.... اب راس الزي الدومه كرهني....
_ ربنا يعينك
_ انتي اسمك منو
_ توتيل....
_ مشكورة والله يا توتيل
_ دا الواجب
_ تعالي اشربي معاي جبنه جهزتها... لو م وراك شي
_ صراحة م وراي شي
_ خلاص تعالي عليك الله... بالمره

اتعرف عليك
كنسلت الاوردر ومشت
معاها.
دخلتها بيتها الكان كلو عبارة عن اصايص زهور وشفعها يتجارو ويلعبو فعرفت حمودي شرد لي 😂.
كبت ليها الجبنه : انتي من هنا يا توتيل ؟
_ لا م من هنا والله.... بس ساكنه هنا 😂.... وانتي
_ انا برضو ساكنه بس.... زوجي مغترب وياهو قاعده مع عيالي هنا.
_ قاعدة براك ؟
_ معاي خالتي... واهل زوجي ساكنين قريب لي
_ اها
علا صوت مرة كبيرة : هويده يا هويدة
_ اي يا خالتي جاياك.
دخلت جوه حكاية 10 دقايق وجات طالعه تاني.
قعدت وهي بتعتذر : معليش اتأخرت عليك
_ لا لا عادي
_ طبعا خالتي دي عميانه.... لكن والله مره حكيمه بشكل م طبيعي.
_ ربنا يحفظها ليكم ان شاء الله
_ ويحفظك يارب.
هويدا كان شكلها نوع النسوان الما بتتبلا فولة في خشمهم سكتت شوية وقالت تاني : خالتي دي قصتها تنفع رواية
توتيل عاينت ليها بفضول.
هويدا وهي بتحرك ف باقي الجبنه الفي الفنجان : عمت من شدة الظلم.... فجعوها ف ولدها وشالو منها وهو صغير.... مرت 27 سنه على فراقها ليه... ولحدي يوم الليلة اليوم كلو بتقول ف اسمو وبتدعي ليه.
_ لا حول ولا قوة الا بالله
سكتو شوية.... وفجأة توتيل بدت تربط ف الاحداث.... ضربات قلبها زادت وقالت لهويدا بسرعه : ولدها... ولدها اسمو ميكال ؟
_ اجي ؟ عرفتي كيف ؟
_ اسمو ميكال ؟
_ اي ميكال.
_ واي
_ مالك
_ ولدها... ولدها دا زوجي انا
هويدا سكتت ونطرت عيونها.
توتيل شالت تلفونها وجرت بره وضربت ليه.... جاها صوتو المرهق : اي يا توتيل
_ انت وين ؟
_ ف الشغل
_ عاين تعالي لي سريع جمب مدرسة...... للقيادة
_ في شنو ؟ انتي كويسة ؟
_ تعال سريع عليك الله وم تخاف انا كويسة
_ طيب جاييك
توتيل بقت بتحكي لهويدا..... وهويدا لمن بقت بتبكي.... ودخلت لي خالتها وقعدتها بره..... كانت مرة فيها ملامح جمال.... م كبيرة شديد... لكن الزمن اخد حقو منها.... وبغض النظر عن اي شي ظهرت كمية من الوقار ف وشها.
هويدا قعدت وبقت بتشرح ليها وبتحكي ليها شوية شوية....
ظهرت الدموع في عيونها... ونادت توتيل ومسكت يدها : احلفي.... احلفي عليك الله انتي مرتو ؟ ولدي معاكي ؟ ميكال معاك ؟
_ اي يا امي ولدك انا مرتو وهو هسه حيجيك
بقت بتقول الحمدلله وبتكرر فيها بصوتها الباكي.
بعد مسافة ميكال ضرب ليها عشان تجيو.
طلعت ليه بره... لقتو متكل على العربية ومكتف يدينو... اول م شافها سألها : مالك ف شنو جبتيني زي المجنون ؟
شالت انفاسها : ميكال
_ خير
_ انت قلت قالو ليك امك حصل ليها شنو ؟
_ انتي جايباني عشان السؤال دا ؟ جادة انتي ؟
_ جاوبني
_ امي ماتت
_ امك م ماتت... امك حية ترزق وقاعدة جوه
ضحك : انتي مجنونه ؟ مجنونه صح ؟ ماما عشه م بتكذب امي ماتت زمان وشبعت موت.... وارح خلينا نرجع.
وقف بي صوتها الجادي : والله م بكذب.... والله العظيم م بكذب امك حيه يا ميكال.
ملامح وشو اتغيرت
توتيل : تعال... تعال شوفها
مسكت يدو.... مشا معاها بتردد وحسا انو صوت قلبو الدنيا كلها سامعاه.
توتيل وقفت بيه قدام المره القاعده.... وكانت متأثرة وبتعاين ليه ودموعها نازلة.
ميكال لمن شافها وركز ف ملامحها حيلو م شالو.... قعد ف الارض قدامها.
قال بصوت جاهد شديد عشان يطلعو : امي ؟
علا صوتها وهي بتبكي : ميكال.... وليدي
مشت يدها في وشو.... وكانت دي الطريقة الوحيدة عشان تتعرف على ملامحو.
مسك يدها بعدم تصديق : امي... امي.... انتي حيا ؟
وفجأة صوتو بكاهو علا وهو بيضمها عليه : انتي حيا.... كذبو علي.... شالوني منك.... 27 سنه حرموني منك..... ااااه يا امي انتي حيا وانا القايلك تحت التراب.....
الطريقة الكان بيبكي بيها خلت توتيل وهويدا يبكو معاه بشدا.
ضم امو بقوة اكبر وهو بيبوس ف راسها : اااااه يا البعد م بقيت راجل حتن لقيتك.... حرموني منك ويتموني
كوثر : ولدي يا ناس رجع لي ولدي شالوه مني صبي وجاني راجل.... ميكال يا ولدي اخيرا رجعت لي بعد السنين دي.
#يتبع غدا

#القروية_والوحش20
#الاخيره
_تكملة2
🌸انتقام الايام
مضت قرابة النصف ساعه.... امضياها بالبكاء.... الام المفجوعة ف ابنها....والابن الذي لا يكاد يصدق م يحدث امامه... اول م رآها التهمت الذكريات عقلة بملامحها.... كان بين مصدق ومكذب.... التي اخبروه بموتها وتعايش مع هذا الخبر.... حية ترزق.
كان يبعدها قليلا عن احضانه ليتأمل ملامحها التي نقشت نقشا على ذاكرته.
كنائم مصاب بالجاثوم لا يدري اهو يحلم ام ان هذا واقعه.... وفي كلتا الحالتين هو لا يستطيع ان يعطي نفسه جوابا كافيا
كان يضمها بقوة....
ليطفئ ظمأ شوقه وصدمته وليثبت لنفسه بأنه لا يحلم.... يضمها بشدة طمعا ف الحنان والدفئ والامان الذي تدسه في صدرها والذي حرم منه لأعوام ليست بقصيرة.
بكى و كأن الدموع سيل قوي رفض الوقوف....
وهو الذي اقسم الجميع على قسوته وبرودته..... هو الذي لم يراهو احدا يزرف الدموع ولا حتى في وفاة والده وعمه.
وضع رأسه على حجرها بينما احمرت اطراف فتحتي انفه وهو يشهق كالاطفال : امي.... انت حيا ؟.... انت حيا ؟ انا م قادر اصدق.
قام من الارض وقعد جمبها.... ضم يدينو لخشمو وهو بعاين ليها ودموعو سايلة..... اما هي فمدت يدينو ليها..... كانت عايزة تمشي يدينها ف وشو تاني.... عايزة تتحسس كل تفاصيل وشو الاتحرمت منو لي 27 سنه.
باس بطن يدها وختا ليها كفيها ف وشو.... كانت بتمشي يدينها بي بطئ.... في حواحبو..... انفو.... دقنو.
وكل م تنزل منها دموع هو يمسحها ليها بسرعه.
_ والله العظيم... والله العظيم كنت عارفة انو ربنا حيردك لي.... كنت عارفة انو لو مضت 100 سنه مصيري القاك يوم... م فقدت الامل.... وفي كل يوم.... مع كل اذان اسمعو... اول اسم بدعي بيه انت.... كنت عارفة دعوة المظلوم ماف بينها وبين الله ححاب... وكنت واثقة دعواتي حتصيب.... دعيت الله يحفظك ويوفقك ويرزقك ببنت الحلال ويحميك من كل شر..... ويجي اليوم الاشوفك فيه.... اي ربنا اخد بصري لكن الحممممممممدلله الجابك لي يا ميكال.... الحمدلله يا وليدي.
ختا راسها في صدرو : هندا رجعت ليك... م حسيبك تاني.... والله العظيم م حسيبك..... وانا الكنت بتمنى بس لو الزمن يرجع بي ورا عشان احميك واخد حقك من اي زول ظلمك.
_ اي زول ظلمني ربنا اخد لي حقي منو....انا هسه م عايزة اي شي غيرك انت بس.
قال ليها بصوتو المهزوز : وانا م عايز اي شي غيرك انتي.... حعالجك يا امي..... وحتشوفي تاني..... حتشوفي وشي.... وحتشوفيني قدامك.
____________________________
وجدان نزلت من شقتها.... كانت مغبونه وممغصوة والليل امبارح م قدرت تنومو.
لقت ماما عشه قااااعده تشرب ف الشاي وتعاين ليها.
_ مالك يا ماما عشه بتعايني لي كدا ؟
_ معجبة يا اختي
_ اهاااا.... حقك والله
ماما عشه بنبرة فيها شوية شماته : اتي ياختي عرفتي انو راجلك عرس ؟
وجدان النار قامت فيها : اي عرفت
_ كر عليك.... الله يقويك
_ م هاميني كتير.... ان شاء الله يولعو الاتنين بجاز وسخ
_ بري ياختي كان قلتي م زعلانه تكوني كضااااابه.... الضر بيحرق م تكابري
_انتي كنتي عارفة بزواجو ؟
_ اي كلنا عارفين
_ ولي ماف زول جا كلمني ؟
_ قال م يكلموك وهو براهو بيكلمك وكدا كدا ماف زول مشا العرس زاتو... هسه للمعلومية هم م ماشين شهر عسل طوالي حينزلو هنا فتره وبعدين يسافرو
وجدان بانفعال : لا.... يا سلام كمان جايبها هنا بيتي ؟
_ بيتك مفصول من بيتها.... وهسه م هندي توتيل ونور ساكنات ف نفس البيت.... الحصل شنو ؟ حاولي يا بتي بردي دمك وتلجيه وم تشتغلي بيهم.
_هم جايين متين ؟
_ حيجو بعد كم ساعه كدا
وجدان بتفكير : طيب.... يجو يا اهلا وسهلا.
قامت طوالي طلعت فوق شالت مفاتيحها ومرقت... جات بعد مسافة وهي شايلة ليها عبوة مغلفة وخشت بيها جوه.
_______________________________
كوثر كانت بتحكي لي ميكال بالحصل بعد م ساقوه منها : يا ولدي بعد م ياسر جا وساقك.... اليوم داك البكاء البكيتو قلت حيقتلني والله.
م قدرت انوم..... وتفكيري كان محصور فيك.... اكلت ؟ شربت ؟ بردان ؟ خايف ؟
عارف يا ميكال انا 3 يوم م دخل شي ف بطني لا اكل لا شراب لمن نقلوني المستشفى....
حمد لمن شاف حالتي ومرضي طلقني.... والحمدلله ارتحت منو.... بعد عدتي جيت الخرطوم وفتشت عليك.... بس م لقيتك..... ماف يوم قدرت انسى فيهو الحصل لي.... ولا قلعتهم ليك مني.... ومن صدري.... م كنت قادرة انسى صوتك يا ولدي..... وجريك ولعبك.... متذكراك كنت مسكييييييين وهادئ وكنت دايما بقول وليدي دا لمن يكبر حيبقى لي مهندس عشان هدوئوا دا.
اختى مها.... ام هويدة دي.... ماتت فجأة والهم والوجع بقو لي اتنين 💔💔💔💔.
فرقة جنا حشاي واختي.... ربيت هويدا دي.... لكن صحيت يوم وانا م شايفة شي.... بس ضلام..... وفقدت بصري 💔.
انا مؤمنه بقدر ربنا... ومؤمنه بي ابتلائوا.... وهندا بعد كل الحصل ربنا رجعك لي تاااااااااني.... رجع ليك بعد م الشوق غلبني وقتلني عليك.
مسك يدها وختاها بحركة لا ارادية في صدرو مكان قلبو البيخفق بسرع

ه : م حسيبك
تاني.... و والله يا امي لو عايزاني ابقا ليك مهندس ارجع امتحن وقرا هندسة عشانك.
ابتسمت بحنان : دا كلو م هاميني هسه.... الهاميني قعادك معاي بس 💕.
ميكال قبل على هويدة : يا هويدة جهزي لي هدومها وحاجاتها كلها.... انا سايقها معاي.
_ سمح... سمح يا ود امي..... لكن تسوقها مني كدا مرة واحدة ؟ 💔
عاين ليها لمسافة قبل م يقول : م كفاية علي ال27 سنه وانا بعيد منها ؟
هويدا بحزن واضح : م اوصيك
قاطعها : م توصي ولد على امو
طبعا الشفع ناس حمودي والكوته الباقيين الكانو بيلعبو.... بقو واقفين منطرين عيونهم ومتابعين الحاصل.
هويدة وتوتيل ساعدو كوثر وجهزو حاجاتها.... كانت بتمشي كانها شايفه.... وبتحس بيها م بتحب الناس البيساعدوها عن شفقه.
كانت بتحرك عصايتها ف الارض.... لحدي م وصلت العربية.
ركبها وربط ليها حزام الامان وقفل الباب وتوتيل ركبت ورا.
وقف في المجمع السكني الفيه شقتو.
طلع بي امو وهو شايل شنطتها.... دخلها واحدة من الغرف المرتبه وقعدها وقعد جمبها..... م كان قادر يفارقها..... زي الطفل الصغير الما راضي يزح من امو.
توتيل كانت قاعده بره وابت تدخل ليهم عشان ياخدو راحتهم.
بعد مسافة جا طالع.
رفعت راسها وعاينت ليه : نامت ولا شنو ؟
_ اي.... توتيل
_ نعم.
_ احكي لي الحصل شنو بالتفصيل
_ والله يا ميكال بس كنت منتظره الترحال... وف الشارع فجأة شفت طفل جاري ف الظلط... ف لحقتو وسقتو من الظلط... بعدها جات هويدة وكانت بتفتش عليه وشالتو مني.... وقالت لي عازماك قهوة ارح معاي
ميكال باستنكار : وانتي طوالي وافقتي تمشي معااها ؟ م خفتي منها ولا خفتي يحصل ليك شي كونك تتعاملي بالبساطه دي مع زولة م بتعرفيها ؟
_ م عارفة..... لكن حسيت بيها زولة طيبة شديد وروشة زي سيدة.... م عارفة لي وثقت فيها للدرجة الخلتني اوافق اني امشي معاها فيها بالسرعه دي
ميكال وهو بيشيل انفاسو : ربنا خلا كل دا يحصل عشان يلمني بيها..... م قادر اصدق انو بي صدفة صغيره كدا.... اكتشفت انو امي حيه.... والله م مصدق....
قرص يدو لا اراديا : انا م عارف انا بحلم ولا دا الواقع..... معقولة امي راقدة جوه ؟؟؟؟؟
ربتت على يدو برفق : م بتحلم ودا واقع... امك معاك وقاعدة جوه ونايمه.
يدينو اخترقت خصرها وهو بيجذبها عليه في عناق قوي.... همس بصوت صادق : شكرا.... انا م عارف مفروض اشكرك كيف ؟ والله م قادر.
سكتت وهي بتغمض عيونها وبتتكل راسها على كتفو.... ريحة عطرو القوية كانت زي المخدر بالنسبة ليها..... م كانت عايزة تفتح عيونها اصلا خصوصا مع عقلها الشغال زي المؤقت الزمني وبيذكر فيها كل شوية انو ساعة الصفر قررررربت.
كانت عايزة تستمتع بي كل ثانية معاهو.... بي كل كلمه يقولها ليها.... وكل حضن ونظره..... وهي الكانت بتشمأز منو وبتقرف من كلامو ونظراتو.... وبتتمنى متين الايام تعدي وترجع لي قريتها وبيتها.... م كانت مفتكره انو الموازين حتتغير وحيتقلب سحرها عليها وحتتيم بيه وتتعلق بي ادق تفاصيلو.
في عشره شهور بس جربت معاهو الحب الماكنت عارفة معناهو....
كانت بتحتار من تصرفاتو..... عندو القدرة على انو يكون متوحش ومسالم.... مهذب و وقح.... طيب وشرير..... زول حسن وزول سيئ..... كأنو اي صفة جواهو الصفة المعاكسة ليها موجودة معاها.... وبيظهرو سوا ف نفس الوقت.
اتعلقت بيه... للدرجة البتخلي قلبها يضرب بخوف لمن تعرف انها مفارقاه....
لي بس الوحيد الدخل حياتها حتتخلى عنو عشان اتفاق بيناتهم.... اتفاق وافقت عليه وم كانت فاكره حتجي ايام تندم عليه فيها.
بتعشقو للدرجة الممكن توريكم فيها انو بيحب العطور القوية.... اللاذعة البتجذب اذواق الناس بسرعه..... بيحب يكثف شنبو ويخفف دقنو.... بيحب يقعد بالبشكير حقو بعد الحمام.... وبيكره انو يضرب لي زول كم مره وم يرد عليه.... اشول..... قد يكون وقح وجريئ جدا بس برضو ممكن يتعامل بطريقة الرجال المهذبين...ما بيحب يمد يدو عليها.... وبيميل للساعات اللونها فضي.... بيكره الشاي وبحب القهوة والنسكافيه.... نظراتو الحادة القوية طبع فيه م متصنعها و اخيرا عندو القدرو الهائلة على انو يعلقك بيه 💔.
في الوقت دا هو زحا منها وتأمل ملامح وشها الرقيقة.... مشا يدو في وشها الناعم وهو بيقول ليها : خلي بالك منها لحد م اجي... طيب ؟
هزت راسها : م تشيل هم.
_ شكرا 💕
شال مفاتيحو وطلع بسرعه.
علا صوت نغمة تلفونو.... رد بعد م شاف اسم الضابط : الو
_ ميكال كيفك
_ انا بخير الحمدلله
_ احنا قدرنا نوصل للراجل اخيرا.... وادلى باعترافات خطيره انت لازم تجي هسه ضروري
وقف العربية واستعدل على الطريق التاني : طيب هسه حكون معاك.
____________________________
وجدان خشت المطبخ.....
ظبطت عصير اناناس بالكركدي وختتو ف كبابي جاااهز.... وفي النهاية طلعت عبوة زي القطرة.... ونقطت ف الكباية عدة نقاط.... ابتسمت وهي بتقول بالهنا يا عروس
نادت الشغالة ونبهت عليها من م يجو تديهم العصير.... واشرت ليها على الكباية المعنيه انها تديها للمره ال

حتجي مع بابا سيف.
طلعت فوق اخدت دش واتمكيجت.... ولبست فستانها وفكت شعرها وبقت قاعدة مستنياهم يجو... همست بحقد : دعاء انتي كدا خلاص ببح..... اما انت يا سيف.... نشوف لمن عروستك الجديدة تموت حتعمل شنو..... حتجيني جاري زي الكلب لانك اساسا كلب وبغل وغلطانه انا الوافقت بيك.
شوية نور جاتها : وجدان كيفك الليلة ؟
_ الحال ف حالو
نور وهي بتقعد ف اقرب كرسي : عارفة يا وجدان انا لحدي هسه م قادرة اصدق انو سيف عرس...
_ يعرس ويلقا العافية
_ وحتعملي شنو ؟
_ حقتلللها
_ تقتلي منو ؟
_ دعاء
_ لا لا يا وجدان العني الشيطان احنا م ناقصين.
_ انتي بس خليك ف حالك
_ وهسه لو اتكشفتي ؟
عاينت ليها باستحقار : حصل انا عملت شي وانكشفت ؟
_ وجدان عليك الله م تدخلي نفسك ف مكانات ضيقة.
_ انتي بس اطلعي منها..... خليها تموت.... احرق حشا اهلها.... تموت وتطير من الدنيا دي.
_ واها يا وجدان بعدين لمن انتي تموتي حتعملي شنو ؟ لمن تجي قاتلة روح
_ الايمان الوقع عليك فجأة شنو ؟ دا م كلامك
_ صراحة يا وجدان انا حاسة بي اكتئاب عديل... حياتي قبل م اعرس ميكال افضل بكتير من هسه.... الزول لمن يصر على شي وهو م ليه ف النهاية بيندم 💔.... وهندا هسه غير متورطة بحمل بالغش م حاصل شي.... حتى توتيل الكنت عايزة امغصها واغيظها م شغالة بي كتير.... لقيت نفسي بمغص وبغيظ ف نفسي بس 💔.
وجدان وهي بتقيف : اتلهي.... شكلهم وصلو سامعه صوت العربية ؟
نور وقفت برضو وطلعو يعاينو بالبلكونه.
سيف كان ماسك يد دعاء العاينت فوق لي ناس وجدان وابتسمت.
وجدان طوالي نزلت ومعاها نور.
نورتو
قالتها وهي واقفة ف السلم
دعاء : بنورك
لقو ماما عشه منتظراهم تحت.
سلمت عليهم ودااااك يا الاستقبال.... وبعدها جو ناس لجين وجوري سلمو عليها.
وكانو مبسوطين لي وجدان شديد 😂.
وجدان انحشرت ف المطبخ وبقت بتحسب للوقت.
لحدي م ادت الشغالة الصينيه ووصتها تدي اي واحد كبايتو.
بعد دقااااايق كدا حتن يادوب جات طالعه وقعدت قصادهم وبقت بتعاين لدعاء بنظراتها الخبيثه.
ابتسمت لمن شافتها بتقح.
سيف نادا الشغالة تجيب ليها موية.
ماما عشه : مالك يا بت امي ؟
_ لا بس شكلو عشان الجو كان حار برا وهسه هنا بارد
_ اهااااا.
فجأة عينها وقعت على لولو بتها الراقدة بهدوء في حضن ابوها.
م عرفت لي قلبها قرصها : سيف
_ اي يا وجدان
_ البت دي مالا نايمه كدا ؟
_ كيف يعني ؟
_ كدي ناولني ليها.
قامت عليو وشالتها
كشرت وشها وظهر التوتر فيه لمن لمست جسمها وكان بارد
عاينت لي سيف : شربتها شي انت ؟
سيف باستغراب : شربتها العصير حق دعاء بس لانها قالت م نفسها تشرب شي هسه
وجدان : شنوووووو.... شربتها شنو
كلهم ركزو معاها
صرخت بصوت عالي : الحقوني بتي حتموت
جوري وهي بتقوم بسرعه وتشيل لولو من يدها عشان تشوفها : نبضها ضعيف شديد
وجدان وهي بتسكلب : المستشفى الحقوني وودوها المستشفى.
سيف قبل م يفهم ف شنو خماها وجرا بيها وهي حصلتو والباقيين كلهم جرو وراهم بي دعاء.
_____________________________
ميكال وصل قسم الشرطه.
لاقاه الضابط وسلم عليه وطلب منو يقعد : ميكال.... الراجل اعترف انو في اتنين هم طلبو منو يجيب الاولاد ديل وكانو عايزين يفضحو مدامك بس طبعا ربك لطف وستر
_ خش ف الموضوع طوالي ووريني هم منو ؟
_ نور و وجدان... وعندو معرفة قديمه بيهم.
ملامح الصدمه كانت واضحه ف وشو.... وسرعان م سيطرت ملامح الغضب عليهو.... عرق جبهتو برز.... وطرف انفو انتفخ وانفاسو بقت قايمه.
وطوالي قام واتجاوز صوت الضابط وهو بينده عليه.
كانت صدمة سيئة جدا بالنسبة ليه..... وكان بس عايز يلاقيهم الاتنين وووووووو والليلة والليلة والدقة والسيره.
________________________________
لولو ابوها دخل بيها الطوارئ وامها معاها وشغالة تبكي قدرتهاا وتترجى فيهم ينقذوها.
طلعوهم بره..... وبقو قاعدين على اعصابهم..... ونور كانت بتعاين لي وجدان بنظرات متجمدة.
بعد دقايق جاهم دكتور طالع.
وجدان : اها.... اها طمني بتي كويسة ؟
سكت لمسافة وبعدها قال ليها بأسف : ربنا يصبركم ويجعلها شفيعه ليكم.
وجدان : انت بتقول الكلام دا لي يعني ؟ عايز تقول لي بتي ماتت ؟ اسمعني هي م ماتت بس ارح... ارح نسعفها سرعه هسه حتقوم.... انا عارفاها اصلا هي مشاااغبه كدا
مسكتو من يدو : تعال تعال ارح نسعفها... هي حتكون نايمه لكن انا بصحيها ليك.
سيف قعد ف الواطه وختا يدينو ف راسو.
ولجين وجوري كانو مصدومات..... اما ماما عشه كانت بتقول : لااااااا حول ولا قوة الا بالله.
وجدان : يا ناس مالكم ؟ بتي م ماتت.... ليان م ماتت... لولو حبيبتي لسا صغيره الموت بدري عليها والله.
نور جات عليها وهي بتهذي والدموع ف عيونها : خلاص ؟ ارتحتي ؟؟؟ قتلتي بتك.... انتي القتلتيها.... انتي القتلتيها يا وجدان قتلتي بتتتتتتتتتتك وقعدتي.
وحدان بعصبية : م ماتت بتي ما ماتت
قعدت ف الارض : لا لا لا مستحيل م ماتت.... يا ناس بتي م ماتت.
جوري ضربت لي ميكال بصوت بااااكي : ميكاااال...

اصحاب لينا كم سنه ؟
_ سنين طويلة جدا
_ من كنا اطفال صغار صح ؟
_ اي.
_ اتعودنا واحد فينا يخبي على التاني ؟
ميكال سكت وبقا بعاين ليه بنظرات مستغربه.
_ رد علي
_ في شنو مالك ؟
اهتز صوت وائل وهو بيطلع ليه ورق الفحوصات : دا لقيتو الليلة ف مكتبك
ميكال جرا منو الورق بعصبية ورماه ف الكرسي الورا.
وائل وهو بيحاول يمسك الدموع الغرقت عينو : لي م وريتني ؟ لي ميت بالموضوع براك ؟
_ م تكبر الموضوع... م للدرجة دي
_ وعشان كدا وزنك نازل ودايما مرهق وشابكني جرثومه معدة ؟
_.............
_ ياخ كان على الاقل بس انا توريني...وم معقول معرض نفسك لي ضغوطات الشغل كدا عادي من دون م تريح نفسك
ميكال رجع بضهرو لورا وهو بيضحك بطريقة استفزت وائل : قلتا ليك عااادي الموضوع بالنسبة لي زي نزلة البرد
وائل بعصبية وهو بيضرب ف الدريكسون : لا معليش.... الكانسر م زي نزلة البرد.... ارحم نفسك شوية ياخ حرام البتعمل فيهو دا.
#يتبع
والله العظيم كان نفسي اخلصها الليلة لكن نعست والتفاصيل والاحداثث لسا كتيره 💔.

لولو ماتت 💔💔💔💔💔... الحقنا عليك الله
ميكال خلاص كان اكتفى بالصدمات حقت اليوم دا سكت لوقت طويل قبل م يسألها انتو ف ياتو مستشفى.
وجدان قبضت دعاء وخنقتها : انتي الكان مفروض تموتي... انتي الكان مفروض تتسممي.... انتي دخلتي حياتي لي ودمرتيها لي..... انتي قتلتي بتي..... السم مفروض تشربيه انتي م هي.
سيف : انتي بتقولي في شنو ؟
_ هي الكان مفروض تموت
_ ختيتي.... ختيتي سم ف العصير
_ ااااااي ختيتو ليها هي... عشان تموت.... عشان تموت وارتاح.
م حست الا بي كف خلاها وقعت ف الارض....
سيف بين دموعو وصوتو العالي : قتلتي بتنا بحقدك.... قتلتيها بوساختك وتخطيطك اترد علينا... انا م عافي ليك روح بتي يا وجدان م عافي ليك وحسبي الله ونعم الوكيل خسرت بتي بسببك... الله يلعنك..... الله يلعنك.... الله يلعنك.
وجدان كانت قاعدة ف الارض وبتعاين ليه بس.... مرة تبتسم ومرة تدمع.
ميكال اول م وصل نور شافتو وجات عليه وهي بتبكي.
مسكها من يدها بقسوة ووقفها قدامهم.
سيف : ميكال.... بتي ماتت.... وجدان ختت السم في عصير دعاء عشان تقتلا وقتلت بتي 💔
كان بتكلم ودموعو نازلة زي الطفل.
ميكال بلع ريقو وعاين لي وجدان : وجدان انتي ونور كنتو ورا الحادث الحصل لي توتيل..... وكنتو سبب في انها تجهض....وجدان فاكره انك م حتتكشفي ؟ شايفة خباثتك عملت شنو ؟ عايزة تقتلي مرتو قتلتي بتك.... وزي م قتلتي لي توتيل جنينها ربنا قتل بتك وبي يدك.... انتو فاكرين انكم م حتتكشفو كنتو ؟؟؟
فاكرين ربنا حيستر عليكم كتير ؟؟؟؟ وعلى العموم.... الشرطه حتشوف شغلها معاكم
نور كانت بتحاول تملص يدها منو....
عاين ليها بغيظ وبضهر يدو رزع فيها كف.
لجين بخوف : ميكال.... براحة عليها البت حامل
هي م حامل... كذابة م حامل.. لابسة بطن لكن م حامل ولا حتولد
جات العبارة دي من وجدان.
ميكال عاين ليها وم استبعد خالص كلامها يكون صح.
نور : اخرسي... اخرسي يا تافهة... انتي الخليتيني اعمل كدا... انتي الخليتني اغش عليهم بي اني حامل.... وانتي الخليتيني اخش معاك في حادث توتيل... وانتي الخليتينا نعمل ليها العمل... انتي يا راس الحيه دمرت نفسي وحياتي من يوم عرفتك وانا ف القاع يا وسخ.... حسبي الله ونعم الوكيل فيك.... وهندا في النهاية اي شي كنا بنعملو بيرجع فينا... قلتي لي م بتتكشفي صح ؟ اها اتكشف كل شي يا وجدان
صرخت لمن ميكال مسكها من يدها وبقا بكورك فيها : بتكذبي علي انا ؟؟؟؟ بتغشي علي ؟؟؟ خليتيني اصدقك واعطف عليك.... دا كلو عشان لقيتيني متزوج توتيل ومستقر معاها صح ؟ انتي ووجدان كان هدفكم الاول تأذوها وبس مش ؟ كنتو عايزنها تتفضح وتشرطو علينها لكن م قدرتو.... عارفين لي ؟ لانها زولة نضيفة من جوه.... قلبها ابييييض.... ربنا مديها على نيتها.... وانتو كمان ربنا اداكم على نيتكم..... ومصيركم الاتنين السجن لحدي م تعتتو فيه.
نور وهي بتبكي : ميكال.... الله يرضى عليك م تتخلى عني.... انا بحبك والله العظيم بحبك... سامحني واي شي عايزو مني حعملو ليك.... اي شي... ولله لو ابقى خدامه تحت رجلينك بس م تتخلى عني انا عملت كل دا عشان بحبك صدقني
غرس ضفورو ف فكها وهو بيضغط عليه بقسوة : وانا ؟ انا م بحبك.... انا بكرهك... بقرف منك... بشمأز منك.... انتي ارخص انسانه انا قابلتها في حياتي.... رخيصة... ومقرفة وتستاهلي تعيشي طول عمرك ف الحضيض.... وكذابة ومنافقة ومجرمة وكلو عليك.
تف عليها وهو بلزها بعيد منو : نور انتي طالق طالق طالق.
صرخت بصوت عالي وهي بتبكي : لاااااااا.... عليك الله لاااا يا ميكال م تسيبني.
ميكال : م عايز اسمع صوتك يا مريضة
وجدان بقت بتضحك وتاني تبكي وتاني تضحك وتاني تبكي وبتعاين لي نور البتبكي وتصرخ بحرقة.
كانت اسوأ لحظات تمر على الكل...
ساعة تاني وتم القاء القبض على وجدان ونور.
وبعدها تم دفن لولو 💔.... الماتت بي سبب امها وخبثها.... والدنيا يا اخوانا زي م قلت سداية ورضاية اوعك تفرح لمن تظلم زول ولا تأذيه كلو راجع ليك قدام البتقدمو بتلقاهو.... وجدان ونور كانو عايزين يدمرو حياة توتيل لكن دمرو حياتهم💔..... ربنا يمهل ولا يهمل.... ومااااف زول حقو بضيع والله.
سيف تعب شوية وخلوه ف المستشفى لساعات الصدمات الاتلقاها م كامت هينه وفاة بتو وصدمتو ف وجدان 💔.
ولمن الناس عرفت جو المعزيين من كل حدب وصوب عشان يعزوهم.... ويوسف لمن عرف بالخبر لمن هبط 💔.... بس ف النهاية شد حيلو عشان يسند اخوه.
ميكال نهااااائي م اتكلم مع ماما عشه... متجاوزها عديل.... وقدر م تتكلم معاه بيعمل نفسو م سامع.... لمن هي اتحيرت... وكان بس منتظر المعزيين يقلو شوية عشان يقعدها قدام البيت كلو ويواجها بالعملتو....
بعد اذان العشاء وائل ضرب ليه وكان ظاهر انو في شي من نبرة صوتو.
طلب منو يقابلو ف شارع بيتهم
ميكال طلع وانتظرو شوية كدا وائل وصل وميكال ركب معاه.
وائل وهي بيمشي يدو على الدريكسون : سيف بقا كيف ؟
_ ربنا يعينو بس
_ وانتو ؟
_ الحمدلله على كل حال
_ يا ميكال
_ خير
_ احنا

م تنسخو الا بعد 10 دقايق للمراجعه
#القروية_والوحش
#الاخيره
#التكمله2
🌸الختام
علا صوت انفاس وائل المضطربة : انا والله م قادر اصدق.... م قادر اصدق
_ صدق... وخلي الموضوع دا عندك
جرا منديل ومسح بيه الدموع الغرقت عيونو : لا م حخليه عندي....
ميكال بضحكة : صوتك وانت بتبكي كعب صراحة 😂
_ ياخ خليك جادي شوية
_ اخر مرة شفتك بتبكي فيها بالطريقة الغبية دي لمن كنا ف تالته ثانوي والبت البتحبها سابتك 😂😛
وائل سكت وبقا بعاين ليه وضحك وهو بخت راسو ف الدريكسون.
ميكال : اسمعني ضحكتك دي احتفظ بيها... انا العيان م بكيت بكاك دا.
_ انت م بتحس والله.
_ انا زول واقعي.... دا قدري ولا مفر من القدر
_ ياخ طيب على الاقل ارحم نفسك.... ارتاح.
_ منو القال ليك م برتاح.
_ يا ميكال انت بتداوم من 8 لي 5.... مفروض ترتاح على الاقل...بعدين اهلك لازم يعرفو
_ لا لا اهلي لا.... لو سمحت يا وائل عايز الموضوع دا يفضل عندك بس
_ دا حقهم
_ م هسه
_ يا ميكال اصلا حيعرفو انت شكلك بدا يتغير....
_ ححلق شعري بكره
_ بدا يقع ؟ 💔
_ اي
_ بتاخد الكيماوي وين ؟
_ ف مستشفى.........
_حار ؟
_ النار بتجري في عروقك ... دا اول مرة لكن تاني عادي.... الاطفال الصغار بيستحملوه م بقت علي
_ سافر ياخ.... خلي الشغل وسافر واتعالج.
_ حسافر بس م هسه عندي حاجات اخلصها.
_ توتيل عرفت ؟
_ دي بالذات لا.... م عايزها تعرف نهائي
وائل سكت شوية وهو بيمسح ف وشو قبل م يقول بي انفعال : قلت ليك يا ميكال السجاير لا.... م تسجر ياخ بتقتل ف نفسك انت... وم بتسمع كلامي.
_ الحصل حصل.... وم تظلم السجاير م عندها ذنب على فكره 😂...
_ لا اله الا الله محمد رسول الله... انا م شفت زول دمو دم بقر كدا ياخ
قال جملتو وهو بيعض شفتو السفلية بغيظ وبيحاول يكبح دموعو.
ميكال رجع كرسيه لورا : انت بتبكي لي.... انا الدكتور من البداية قال لي سرطان المعدة بعد التشخيص عندك حكاية 5 سنوات بس ولو محظوظ 10 سنه.... ودمعتي م نزلت كمان ضحكت.... احساس غريب لمن يحددو ليك السنين الحتعيشها.
وائل بصوت مكتوم ودموعو جارية : ياخ اسكت ياخ... وبعدين الاعمار دي بيد الله... يعني اوعا تسمع الكلام دا.... احنا عايزين نشوف احفادنا... واحتمال ولدي يعرس بتك.
_ بتي شنو كمان 😂.... انا حموت وم حيكون عندي طفل يشيل اسمي
_ عليك الله م تجيب سيرة الموت.... ولي م يكون عندك طفل يشيل اسمك ؟ الا اذا انت عايز كدا .
_ انا م شايف نفسي بستحق اكون اب لطفل اصلا.
_ ميكال لي دايما نظرتك لنفسك كدا ؟ انت بتستحق كل خير والله.
_ الوقت اتأخر وانا نعست
_ بتطردني ؟
_ اي... امشي بيتك خلاص
_ طيب حمشي.... لكن بكره حمشي معاك لمن تجي تاخد الجرعه
_ انت قايلني باخد كل يوم ولا شنو ؟
_ اها كيف ؟ انا عرفني شنو ياخ ؟
_ الله لا عرفك ولا ضوقك ليه في يوم
هز راسو بي مكابره : امين... يلا انزل
_ بتطردني ؟
_ وانت قبل شوية مش طردتني.
ابتسم : خلاص طيب مع السلامه... نتلاقى بكره
_ لا لا م نتلاقى... تاني م تجي من الصباح... وترجع من 2 والا حوري الناس كلها.
_ نشوف الموضوع دا بكره
_ طيب سلام
_ الله يسلمك.
____________________________
طبعا ميكال م كلم توتيل بي اي شي حصل ولا وفاة لولو 💔.
الساعه كانت 11 لمن توتيل كانت بتتكلم مع ام ميكال.
كانت قاعدة جمبها ف السرير وماسكة يدها.
سالتها بتردد شوية : يا خالتي كوثر انتي لمن جيتي الخرطوم كيف م لقيتيه وهنا ناس الشرقي معروفين.
_ تصدقي يا بتي لو قلت ليك اني اسم الشرقي دا اول مره اسمع بيه... ياسر م كان مديني معلومات كتيره عنو.... كل الكنت عارفاه انو اسمو ياسر عبد العظيم... واهلو ساكنين هنا وبس.... وزواجنا زاتو م استمر طويل..... كان عايزني انزل الفي بطني.... عشان اهلو م يعرفو.... مع انو معرسني بالحلال وعلى سنة الله وبي رضا اهلي.... بس الحمدلله قدرت انفذ بي جلدي منو.... بس ربك اراد بعد السنين يعرف بي ولدو وجا قلعو مني بالقوة.... وانا راضية بي قسمة ربنا دي.... لانو اكيد الحياة الوفرها ليه م كنت حقدر انا اوفرها ليه.
_ الحمدلله على كل حال... والمهم هسه انو هو جاك.
_ هسه امنيتي الوحيدة بس اشوف شكلو.... نفسي اشوف ملامحو كيف.... وانتي زاتك يا بتي نفسي اشوفك
_ ربنا يرد بصرك وتشوفيه وتملي عينك بيه
_ ان شااااء الله.... لكن يا بتي في امل بصري يترد تاني ؟
_ اي ان شاء الله.... انا متأكدة حيجتهد معاك شديد لانو بيحبك 💜.
_ الله يحبب عبادو فيه... وفيك ان شاء الله.
سمعو صوت باب الشقة بيتفتح.
توتيل : اكيد دا هو.
سمعت صوت خطواتو وهو بيقرب منهم.
اول م شافتو ابتسمت.... بس حست بي الحزن ف وشو.
قعد جمب امو وهو بيبوس راسها بحب رهيب ظهر وهو بيغمض عيونو... كانو م عايز اللحظة دي تنتهي.
ابتسمت وهي بتمسك يدو وتبوسها ليه.
عاين لي توتيل : اكلتو ؟
_ اكلنا وشربنا شاي واتونسنا وكلو 😌
_ طيب كويس 💜
طلعت بره وهو قعد مع امو طويل... لحد م نامت حتن جا طالع.
هي كانت قاعدة ف الصا

لة..... بتعاين للمكان الجات فيه اول م كانت جديدة عليه.... واول تهديد منو ليها كان هنا.
حست بيه بيقعد جمبها.
قبلت عليه : في شنو ؟ ملاحظة للحزن ف عيونك.
_ الاطفال لمن يموتو بيمشو وين ؟
ردت عليه باستغراب : اكيد الجنه وبلا حساب 💜
_ لولو مشت الجنه
م استوعبت كلامو الا بعد مسافه.... الصدمة م خلتها تبكي.... ختت يدها في خشمها وسكتت.... اخدت وقت طويل حتن قالت : لا اله الا الله... انا لله وانا اليه راجعون.
_ طلقت نور
سكتت وهي بتعاين ليه بفضول : ف حاجات كتيره حصلت الليلة.... وجدان ونور كانو سبب ف كل الحصل ليك... وقبضوهم وحيتحاكمو.
ملامح الدهشة اتسطرت ف وشها : م.... معقول
_ اي
_ ميكال.... انا عن نفسي عافية عنهم...
_ كيف تعفي عنهم ؟ ديل كانو عايزين يذلوك ويهينوك ويفضحوك
_ عارفة.... عارفة كل دا...بس.... انا والله عافية من جواي... ف النهاية انا م حصل لي شي...
_ ولدنا مات.... وكنتي حتموتي برضو... كانو سبب ف انك تخلي سكين حادة تخترق عروقك وتقطعها... احتمال انتي مثالية وبتعفي.... لكن انا م عافي ولازم ياخدو جزاهم على كل شي عملوه.... بالذات وجدان لانها سبب ف موت طفلتها... كانت عايزة تقتل زوجة سيف لكن قتلت بتها.
_ لا حول ولا قوة الا بالله.
_ عارفة يا توتيل... انا اكتشتف اني عايش وسط ذئاب.... ذئاب حرفيا.... المشكلة الذئاب دي من الجنس البيتقال عليه لطيف.... نور... وجدان... و..... و عشة... ديل اسوأ شي ف الحياة.
عيونها دمعت لمن قال ليها : انا بكره حواجها بي كل شي... وقدام الكل.... والبيت دا تاني م حدخلو.
_ واخواتك ؟
_ م حبعدهم عني.... لكن م عارف... احتمال الدنيا تبعدني عنهم.
_ لا... ان شاء الله ربنا م يحرمكم من بعض.
_ امين.
_ ميكال
_ نعم
_ ربنا يسهلها عليك ويشيل كل همك
_ جمعا 💜.
______________________
اليوم التالي.... البيت حالتو كانت سيئة وكئييييب.
ماما عشه : حسبي الله ونعم الوكيل فيك يا وجدان.... عشان كدا انا لمن اعترض على اي شي بكون لي سبب... بس ماف زول بيرضى كلامي
جوري : الله يعين سيف
يوسف : ويعينا كلنا.
ماما عشه : وهناية وينا ؟ لي م جات عزت
م خلصت كلامها الجرس ضرب.
جات الشغالة فتحت.... كان ميكال و وتوتيل.
توتيل عزتهم كلهم.
وجات قعدت ف النهاية جمب ميكال... الكان بعاين لي ماما عشه بنظرات باردة.
قالت ليه : مالك م بتسلم علي يا ميكال.
عاين لي يوسف : امشي نادي سيف.
وقف على حيلو : طيب
شوية سيف ودعاء جو نازلين.
عاين ليهم كلهم... اخواتو التلاته ويوسف وسيف ودعاء وتوتيل.
لجين : في شنو يا ميكال
اتصلح ف قعدتو : عايز اقول ليكم شي.... وللاسف بدر من اكتر زول م اتوقعتها منو.
نظراتهم اتحولت لي ماما عشه البعاين ليهو هو.
_ عشة.... شكرا ليك.... شكرا شديد عشان عيشتيني على وهم انو امي ميته وهي عايشة.
كلهم بقو بعاينو لي بعض ويعاينو ليه.
ماما عشه : يا ولدي
قاطعها : انا م ولدك ... انا ولد كوثر... بتعرفيها ؟ القلتي انها ماتت من سنين.... لي ؟؟؟ غشيتيني لي ؟؟؟ خليتيني اعيش يتيم لي ؟ المشكلة انكم كلكم بتكونو فاكرين انكم م حتتكشفو لكن ربنا قادر.
جواهر : ماما عشه.... ماما عشه الكلام دا صح.
كانت بتعاين ليه وعيونها حتطلع من محجرها من شدة الخلعه.
جواهر : ماما عشه ردي... دافعي عن نفسك بي اي شي
ميكال : تدافع عن نفسها بياتو عين ؟؟؟
جا صوتها : م... ميكال امك ميته....
ضحك بصوت عالي : بعد الشر عليها.... امي قاااااعده شميت ريحتها وحضنتها وبست راسها.... انا م الطفل الصغير داك الحتقدري تخدعيه تاني
_ لكن.... انا م كنت عايزاك ترجع تفتش عليها... انت... انت ود عز.... ولد ناس الشرقي.... وابوك غلط وعرس واحدة م مستوانا
قال ليها بعصبية : لو سمحتي.... دي امي.... اياك تتكلمي عنها بالاسلوب دا.... وبعدين شنو م مستوانا الماسكه فيها دي.... دا اي مستوى الاحنا فيه؟ ياتو مستوى البخليك تحرمي ام من ولدها ؟ عشان اقل منك قررتي انها لازم تعتبر ميته ؟ انتي شنو ياخ ؟ م عندك قلب ؟ م عندك رحمه ؟ انتي شايفة عائلة الشرقي ديل نسلهم نسل ملايكه ولا كيف ؟
لجين : ماما عشه الكلام دا صح ؟
ميكال : هي كذبت علي السنين دي كلها عايزاها تصدق هسه ؟ م كان العشم والله 💔💔💔... اخر زول اتوقعت يأذيني...
_ ميكال...سامحني بس دا كان عشان مصلحتك
_ اسامحك ؟ صعبه 💔... انتي م عملتي شي هين.... ياخ دي امي... امي الولدتني... انتي عارفة انك السبب في اني اكون بعيد منها كل السنين دي؟؟ كنت حرجع وافتش عليها... لكن نهيتي لي كل شي بي بساطه.... ميكال امك ماتت... ياخ بي اي حق قررتي تحرميني منها ؟ ومصلحتي دي نهائي انتي م بتعرفيها.... الحكاية انتهت.... وانسي انو عندك حفيد اسمو ميكال.
اشر لي توتيل عشان تقوم.... اتجاوز كل النداءات الجات منها والتوسلات...
احفادها كلهم بقو بعاينو ليها بنظرات عتاب.
لجين ختت يدها ف وشها : انا م قادرة اصدق .... معقولة ؟
يوسف : خلاص كدا... الناقصة تمت... ميكال وساب البيت.
قام منهم.
جوري :

ماما عشه اخر واحدة اتوقعناك تعملي كدا
كلهم قامو وسابوها براها وهي بتعاين للباب الطلع منو ميكال.
الحقيقة مهما حصل ومهما طالت السنين مصيرها تظهر ف النهايية وتتكشف.
توتيل حست بي حالة ميكال النفسية السيئة الظهرت ف سواقتو.... لكن فضلت ساكته... نزلها ف المجمع وطلع على شغلو.
اول م وصل بلغوه انو في زول منتظرو ومصر انو يشوفو.
دخل مكتبو... رفع راسو لمن السكرتيرة فتحت الباب وجا ماجد داخل بوراها.
رجع بي كرسيه لورا ووشو اخد ملامحو الطبيعية الباردة.
عاين لي ساعتو : انا مشغول حديك 10 دقايق بس وريني عايز شنو
قعد في الكرسي القدامو : انا جيت عشان اتقدم لجويرية
هز راسو : م عندي اخوات للعرس... اتفضل
_ ميكال.... لو سمحت... احتمال تكون اخدت عني فكره سيئة عشات الشي الحصل داك
رفع حاجبو : احتمال ؟؟؟ يعني م مؤكد ؟
_ ليك حق.... وانا لو مكانك برضو حعمل كدا... اختك وعرضك وبتخاف عليها.... بس احلف ليك برب العباد.... انا بحترمها وبقدرها شديد.... واي شي ممكن اعملو عشان توافق على اني اتقدم ليها.... جويرية ف نظري ماف زيها اتنين.... وانا هندا جيتك بالباب ودغري.... عايزها على سنة الله ورسوله.
_ وانا البضمني شنو انك م طمعان فيها ؟
_ انا راجل.... والراجل م بطمع في قروش مره.
_ الكلام ساهل شديد.
_ انا لو زول كلام بس م بجي لحدي هنا وعارف ومتأكد انك حتتعامل معاي بالاسلوب دا.
_ وجاييني كدا الله وروحك بس ؟
_ م فهمتك!
_ جيب رجالك وتعال
_ يعني.... يعني انت موافق
_ والله انا ممكن اغير رايي ف اي لحظة عشان كدا اسرع .
_ طيب اجي متين ؟ اديني موعد
_ الاسبوع الجاي.... ويلا عشان وقتك انتهى
ماجد بابتسامه : طيب ان شاء الله.
طلع بي سرعه.
ظهر شبح ابتسامه ف خشمو وهو بشوف ماجد طالع.
ماجد طلع بي هنا.... وائل جاهو داخل.
_ ميكال
_ نعم!
_ موضوع المستشفى حقت العيون الكلفتني بيه..
_ اها
_ افضل مستشفى ممكن توديها لي مستشفى مورفيلدز... مستشفى بريطاني.... لكن الحمدلله في فرع منو في ابوظبي يعني م حتحتاج تسافر لي اوربا... وريني احجز ليكم متين ؟
_ احجز لي ف نص الاسبوع الجاي.
_ طيب وبخصوص ال
قاطعو : م تشيل هم..... حعمل حسابي.
_ طيب.
____________________
توتيل اتوجهت ناحية الباب لمن سمعت الجرس بيضرب.
لقتهم جواهر ولجين وجوري ويوسف( حار حار )
سلمت عليهم... ولاحظت لي انو جواهر بتتكلم معاها بي طريقة غير الاتعودتها منها.... كانها غيرت نظرتها ليها.
بعد م سلموا عليها طلبوا يدخلو لي خالتو كوثر.
وروها انهم اخوات ميكال.... واتفاجئوا من كمية الطيبة والحكمة الهي فيها....
اتكلمت معاهم طويل ونهائي م ملوا منها وحبوا كلامها شديد.
_________________
مرو الكم يوم ديل والجماعه كل يووووم بيجو لي خالتو كوثر.
ميكال كلم جوري بي انو ماجد اتقدم ليها وهل هي موافقه.... كان عارفها اصلا موافقة لكن عايز يدي الموضوع طابع دوبلوماسي جادي.
عمل الخطوبة ف شقتو وكانت حاجه بسيطه مراعاة لي سيف.
والموية رجعت لمجاريها بين ماجد وجوري اخيرا.
كان فاضل يومين لسفر ميكال وامو.
توتيل لاحظت ليه جا وشو مصفر وظاهر الارهاق فيه.
سالتو : ميكال انت كويس ؟
هز راسو ودخل لي امو.
وقفت جمب الباب حق الاوضة وعاينت ليه.... كان خاتي راسو ف حجر امو.
حست انو ف شي م طبيعي حاصل ليه..... خصوصا الفتره الاخيره.... مع شكلو البدا يتغير.... لونو البقا شاحب.... وشعرو الحلقو فلات... ودقنو بدا يخف وعيونو واقعه.... كانت بتتسائل يا ترى دا من ضغط الشغل؟
دخلت ليه جوه قلعت ليه جزمتو وشرابو وغطتو....
لاحظت لي يد امو البتمشي على راسو.... ابتسمت لا اراديا لمن حست بي كمية الحنان والامان الحيكون حاسي بيها هسه.
دخلت الاوضة حقتها ونامت.
صحت بصوت اذان الفجر..... سمعت صوت موية الماسورة ف الحمام عرفتو دا هو.... قامت طوالي ومشت ليه.... لقتو بيتوضا.... اتوضت هي برضو وصلو الصبح سوا 💜.
قعد جمبها ف السرير... اتفاجأ بيها بتسألو : ميكاال انت كويس ؟؟؟؟ حاسا بيك متغير
_ ضغط الشغل بيعمل اكتر من كدا
_ يعني هسه دا كلو ضغط شغل بس ؟
_ اي
_ انت داسي علي شي ؟
_ زي شنو مثلا؟
_ اه... اقول ليك انسى
مسك اطراف شعرها : كأنو رجع يطول تاني( قااااادر الله )
ابتسمت : اي
_ اها جهزتي نفسك للسفر ؟
_ اي جهزت نفسي... انتو حتقعدو هناك لي متين ؟
_ اسبوعين
_ طيب.... ربنا يرجعكم سالمين
_ان شاء الله
_ بالمناسبة
_ اها
حركت يدينها بتوتر : حشتاق ليك
_ م اختلفنا... انا برضو حشتاق ليك.
حضنها بهدوء.....
وهو بيخلل يدو ف شعرها... اتفاجأ بي قبلاتها الحانيه و....
________________________________
اليوم التالي....
ميكال وامو سافروا الامارات.
وتوتيل سافرت قريتها...
لحسن حظها سفرتهم صادفت زواج سيدة من احمد .
م اتغير شي في القرية بيوتها القديمة وشوارعها الضيقة
... والاشجار الضخمه بالاضافة للمشروع الزراعي الادا المكان خضره ومنظر اجمل.... تم استقبالها بفرح من قبل اهلها...
قضت ايامها وهي ب

تساعد في سيدة وبترتب ليها ف حاجاتها
وتشتغل وتساعد النسوان ف شغلهم...
كانت بتشغل نفسها طول النهار عشان م تتذكرو او تفكر فيه لكن هيهات.... من م يجي الليل والاصوات تهدأ والناس تنوم... بيخترق تفكيرها وبي قوة..... لي درجة بتشم ريحتو ف الهواء....كانت متمنية متين الايام تمر عشان تشوفو تاني.... لكن بتتذكر انو لمن يرجع ايامها المعاهو حتكون بسيطه.... بدت تفكر ف حياتها بعد م تطلق منو.... حتعيش كيف ؟ اصلا مستحيل تاني تسمح لي نفسها انها تتزوج... لانو المكان الاخدو ميكال من قلبها ما حيسمح لي اي زول تاني انو يقرب منها....
وهي راقدة ابتسمت بشماته لمن اتذكرت الحريم وهم بيتكلمو في عباس العرس واحدة خلتو يبقا زي الفار وادبتو ونجمتو هو وامو.
______________________________________
في امارة ابوظبي :
وقف وهو بيفرك ف يدينو بتوتر وبعاين للدكتورة البتفك ف الشاش اللافين بيه عيون امو.... كانت اللحظة الحاسمه... الحتوضح هل العملية نجحت ولا لا... امو حترجع تشوف تاني ولا لا.
اول م الدكتورة خلصت..... بدت تتكلم معاها.
انفاسها القايمه... وعيونها البتلمع ونظراتها... اكدت لي ولدها انها شايفه 💜.
اخيرا ربنا رد ليها بصرها بعد م رداهو ليها.
واللحظات التالية كانت لاتوصف.... دموع فرحتها.... واحضانها لولدها.... وصلاتهم الاتنين شكرا لربنا 💜💕.
كوثر اخيرا شافت وشو.... بي رغم كل الفيه شايفاه احسن واجمل خلق الله..... م كانت عارفه انو ف مرض لعين بياكل فيه 💔.
بعد كم يوم رجعوا السودان.... وكانت الصدمة في انو حصلت ليه انتكاسه ومن المطار نقلوه بي اسعاف.
واخيرا المتخبي والمستور انكشف..... وعمت الصدمة على الجميع... وعرفو بمرضو
حتى امو م اتهنت بيه 💔💔💔💔💔💔.
اللحظة الرقدوه فيها.... توتيل هناك قعدت ف سريرها وهي بتستغفر.... شافتها 💔.... شافتها بتلمع... ياها مهيره بتلمع عشان تنبها انو ف شي.
صباح اليوم التالي سيدة زواجها تم و سافرت مع احمد.
توتيل كانت بتضرب لي لجين وبتسألها وبتتونس معاها دايما.... المره دي كان واضح تغير صوتها....والاضطراب الفيه.
طوالي اول بص ورجعت الخرطوم.
لاقتها لجين.... سألتها بخوف : مالكم ف شنو ؟
_ توتيل.... ميكال بيموت
شعورها ف اللحظات دي كان لايوصف.... حست بي ضوت شي بيتكسر جواها.... وجسمها كلو بقا بيرجف.... مستحيل.... دا ميكال.... قالتها بعدم تصديق.... بطريقة خلت لجين تبكي.
_ وديني ليو بس.
ساقتها وودتها المستشفى المرقدنو فيها.
اول م دخلت ليه... م صدقت الشايفاه قدامها..... م صدقت انو دا ميكال.... ملامحو اتغيرت كليا..... وشعرو كلو اختفى.... اللعين وعلاجو دمرو شكلو.... كانها عين وصابتو.
كان راقد ف السرير..... اول م شافها حاول يقعد.
بكت.... بكت من جواااااها.... م افتكرت نهائيا يجي يوم تشوفو فيه كدا.
جاها صوتو الضعيف : م تبكي
_ انت كنت كل الفتره دي داسي علي ؟
_ م انتي بس على الناس كلها.... بس كدا كدا انكشفت
_ حرام عليك
_ بالجد حرام علي 💔....حرام علي دموعك النازلة دي.
ختت يدها ف يدو ودموعها م وقفت: ميكال لي كدا ؟
_ دا قدري يا توتيل.... ماف زول بيهرب من قدرو.... وبعدين انا م خايف والله.... ولا حتى زعلان.... الموت اصلا مصيرنا كلنا نلاقيهو.... بعدين انا عندي حاجات كتيره عملتها سيئة ولا تغتفر.... قد يكون المرض كفاره من ربنا.... يكفر لي بيه عن سيئاتي.... كلو مسطر ومكتوب.
غطت وشها بيدها بعد م قال ليها : وين القروية الشجاعه ديك ؟؟؟؟ انا عايزها.... م عايز البتبكي دي..... م اي زول يجيني يقعد يبكي... عايزين تقتلوني قبل يومي ؟
قال جملتو الاخيره وابتسم
_ بعد الشر عليك ان شاء الله حتقوم وتبقى كويس.
_ توتيل.... م عايز اظلمك معاي..... عايز اطلقك لكن 💔
_ م هسه سيرة الموضوع دا م هسه عليك الله 💔.
_ عارف انو م وقتو... بس
قطع كلامو بدخول الممرضة العايزة تديه الكيماوي 💔.
وصلوه ليه.... بقا سااااكن هادئ.... كانو دخل ف غيبوبة.... م بتحرك الا وشو لمن يكشرو شوية لمن الالم يزيد عليه 💔
كانت مراقباه بصمت... بس دموعها نازلة.
بعد م جرعتو خلصت.... طلبو منها تطلع عشان يرتاح.
توتيل.
قالها بنرة ضعيفة جدا 💔
عاينت ليه.....
_ بحبك( اخيرا قالها💕)
قال الكلمه الكانت منتظراها لشهور طويلة......
شافتو بيبتسم وبعدها خارت قواه.... وغمض عيونو 💔....
غمض عيونو قبل م تزف ليه خبر انها حامل 💔.
كانت عايزا تفرحو..... لكنها اتأخرت 💔.... زي م اتأخر هو في اعترافو بحبها 💔.
كيف حتقدر تعيش من دونو تاني ؟ من دون صوتو ؟ من دون تفاصيلو.... من دون كل شي فيه.... انتهت المعركه واعلن اللعين فوزو..... وزاد عدد ضحاياه.... وفي عداد قتلاه كان ميكال.
_________________________________
بعد 9 شهور استقبلت عائلة الشرقي التوأمتين هانية ودانيه.... ولدتهم توتيل بعد لحظات شاقة استمرت لي 16 ساعه.... ومع صرختهم الاولى اتردت الروح للبيت الكان على وشك انو يبقا بائس بعد الاحداث الاخيره الحصلت فيه.
الايام مشت ب

ي سرعه وعدت السنين.
مضت 18 سنه :
كانت قاعدة بتوبها الحريري الناعم وبتصفق تبع الحضور لي بناتها الاتخرجو من المرحلة الثانوية..... ورثوا جمالها واخلاقها.... هانية كانت مشاكسة نوعا ما اكتر من دانيه الكانت هادئة.... اخدت اكبر كمية من الصور ليهم.... واتمنت لو كان معاهم.... هي متأكدة من انو كان حيفرح بيهم شديد 💔.
كانو معاها عمات بناتها ... جواهر وجوري ولجين.... الاتزوجو وهسه بعيالهم.... وكوثر حبوبتهم.
بعد الاحتفال الطويل ساقتهم ورجعت البيت.
الساعه 5 فجر.
استعدت هي وبناتها وحبوبتهم للسفر.
من مطار الخرطوم لي مطار الشيخ حمد لي مطار ليوناردو دافنشي.
كانت نفس تفاصيل رحلتها حقت شهر العسل الزمان 💔.
بس العكس انها هسه جايا بي بناتها.... سيدة في اواخر التلاتينات من عمرها.... زاد جمالها وجاذبيتها💕.... وبقت بتجيد الانجليزية والايطالية.
م عرفت لي الدموع اخترقت عيونها بعد م الشتل بص وقف بيهم ف الميناء وشافت السفينه الواقفة....
لحدي هسه متذكرة تفاصيل رحلتها القديمه.... وحتى الميناء ووقفتها هنا وكيف كانت بتتلفت بي خلعه وعجاب.
مسحت دمعتها وابتسمت لمن شافت بناتها بينططو بفرحة وبيجرو على الراجل الواقف منتظرهم وجمبو ولدين بتترواح اعمارهم بين ال15 و 10 سنوات.
علت اصواتهم وهم بيحضنوه : بابا 💜
هانيه : اشتقنا ليك شديييييد
دانيه : ماما ورتك صور التخرج حقتنا ؟
جا صوت الراجل الفي بداية الخمسينات من عمرو.... والبدا جذاب و وسيم خصوصا بخصل الشيب الاتخللت شعرو : اي شفتها... الف مبروك ليكم.
ضماهو عليهم بحنيه.
اسمحوا لي يا اعزائي القراء انو اقول ليكم... ميكال المرض م غلبو.... هو الغلب المرض 💜.
وحضر ولادة توتيل.... وصرخات توأمو الصغار ف صدرو ادتو قوة خلتو يكافح ويوصل للنهاية.... وقدر كمان بعدها يجيب ولدين وائل و وسيم 💜.... السافروا معاه بعد م خلصت مدرستهم.... وتوتيل قعدت وحضرت تخريج بناتها.
اتقدم ناحيتها هي وامو وسلم عليهم بي كل حب 💜.
وبعدها طلعو السفينه.
خلوني اديكم طله على شوية احداث....
ماما عشه ميكال سامحها بعد مده وجات طلبت السماح من امو بعد م حست بي غلطها... ولسا عااايشة ولسانها طول زيادة وبتمووووووت ف اولاد ميكال.... تعاملها مع توتيل اتحسن شوية.
يوسف كبر واتزوج 💜.... طبعا اخواتو. التلاته برضو اتزوجو زي م عرفنا.... وسيف ربنا عوضو بي 3 اولاد وبنتين من دعاء..... اما وجدان فلقت حتفها ف المصحه بعد م فقدت عقلها.... ونور خلصت عقوبتها ف السجن وطلعت وبدت حياة جديدة.... اما سيدة فبقت مغتربه 🌚😂... وعندها اربعه بنات 💜
اتحركت السفينه وبعد نص ساعه كانت لحظات شروق الشمس.... كانو متكلين كلهم على السور ومنتظرين الاشعة الذهبية الحتظهر بعد شوية....
شوية شوية بدت الاشعة تتخلل السحب وتظهر... وعلت اصوات اولاد ميكال المتحمسه بالمنظر وكانو موقفين حبوبتهم ف نصهم وبيأشروا ليها على الشمس.
ميكال ختا يدو ف كتف مرتو 💜
توتيل القروية القدرت تغير حياته 180 درجة.... الادتو الامل ف الحياة بعد م فقدو وكان منتظر حتفو...كانت ولا زالت مميزة بالنسبة ليه.... هي حبو الاول والاخير..... هي الوحيدة الخلتو يقول كلمة بحبك بي صدق وفي لحظات صعبه.
الاشعة الذهبية عكست في عيونو العسلية 💕.
ابتسمت وهي بتتكل بي راسها على صدرو....
و
تمكنت القروية من ترويض الوحش 💜
النهاية
28/6/2018💕
20:00
13/8/2018 💕
1:33

في روايه جديده اسمها
هيامي…..
تنفع ❤️
م تنفعش💔

هيامي ❤ ...
الحلقه الاولي. ♥♥♥♥

إمتحنت شهاده عربيه الإمارات وابوي وامي قرروا ينزلوني السودان عشان اقرا الجامعه ... قدمت طب لي جامعه الخرطوم ولأنو انا بنت واااحده عند اهلي وسط تلاته اخوان رجااال وكلهم خرجين وانا اااخر العنقود 😍😄 ... كنت مدلعه من انا صغيره اي شي اقولو يمشي على البيت كلو ويتنفذ..
اهلي خلوني على راحتي من لبس وشعر وكده .. ما كانو بيسألوني عن حاجه ... لابسه كده ليه ولاماتفكي شعرك ..
وماشاء الله .. كنت آيه من الجمال زي مابقولو .. لي كتيييير 😋
عيون واااسعه وعسليه وحواجب غزيييره ومحدده طبيعيه وقوام حلووو .... لاني كنت بحب الرياضه شديييد ومن انا صغيره بحب ارقص وخصوصا الزومبا 😍.. وشعري طويييل .. ولوني قمحي كده 😉...
كنت بالجد انثى ... ناااعمه شديييد ..من صوت ومن ملمس ....
في يوم ٤/١٤ /٢٠١٣
ودعت اهلي في المطار واتجهت للسودان .. وبصراحه كانت اول مره اشوف بلدي فيها 😍😍 كنت متحمممسه للناس والعلاقات وكده ..
وصلت ودخلت داخليه المها ❤ ... الداخليه الكانت سبب لسعااادتي ..
اتعرفت على بنات منها وبقينا اعز صحبااات ... وشلتنا كانت محور الكلام في الداخليه والجامعه .. وكلنا كنا بنقرا طب اسنان .. نور ورشا وهدى وأنا هيام 😋...

بدت سنه اولى ... وانا كنت مركزه على هدف واااحد .. ابقى دكتورة .. قدر الدنيا دي كلها ... ومافي حاجه تقيف في طريقي 😃...
اما باقي شلتي .. غير اللبس والحركات كانو بحبو يجكسو ويطلعو وينزلو ..
انا صاح كنت متحرره شديد في فكري ولبسي .. بس ما كنت بحب اعمل علاقات حب وغراميات .. لأني بصراحه بحترم الحب شديييد 😍
ولأني كاتبه ومؤلفه ... كنت بكتب عن الحب غالبا .. رغم انو زملائي في الجامعه كانو مستغربين .. انو بتطلع من جواي كتابات زي دي .. وانا ماجربت الحب 😆..
بس كنت بكتب عن الناس وحالاتهم وكنت بحب اسمع الشكاوي... وطبعي هااااديء الا وقت الرقيص 😂 بقلب مجنووونه عديل😂😂...
نادراً ما أحكي بخصوصياتي ... اتعودت اكون كتووومه لاني اتربيت بين ماجد واشرف وأيهم ... وأيهم اخوي اكبر مني بي اربعه سنيين .. كان اقرب زول لي بعد امي طبعا ❤...
فقدت اهلي شديييد .. وحسيت اني في غربه ... 💔
لانو بالنسبه لي السودان مجرد بلد مافيها اهلي .. فما كان عندي حب انتماء ليهو.. وكنت حاسه اني غريييبه فيهو وعنو...
لحدي ما جا اليوم .. وللآن بتذكرو .. يوم ١٠/١٠/٢٠١٣ ❤❤❤
اليوم ... البسببو بقيت احس اني قطعه من السودان وانو روحي فيهووو..
اليوم ده بالليل واحنا جعاااانين كلنا سوا .. والداخليه خلاص قفلت ابوابها ومافي طريقه نطلع .. الا انا وهدى فكرنا .. نسرق المفتاح .. ونطلع نجيب اكل ونرجع ... وفعلا عملنا كده ،😂😂😂💔 وهربنا زي الحراميه ... اشترينا ونحنا راجعين .. شفنا ضباااط جيش ... بعملو في مخيمات جنب الداخليه مباشرةً 😕
انا وهدى استغربنا .. في شنو ..
هدى: هيام ديل مااالهم ياربي ؟
انا: جايين يحرسونا ولا شنو 😂😂
وضحكنا باعلى اصواتنا .. وفجأة هدى صرخت ... اللليله واللليله لو شافونا ياهيام سجمنااا 😱😱 نحنا هاربين ولازم نرجع سرييع ..
انا: يابت اهدي في شنو .. حنرجع .. ارح 😒
ووصلنا الداخلية .. وهدى فتحت الباب ودخلت .. ولما جيت ادخل اتذكرت انو .. نسبت تلفوني في السوبر ماركت ...
قلت ليها امشي وانا بلحقك عشان البنات جعانييين ..
وهدى ادتني المفتاح ودخلت وطلعت للبنات فوق ..
ورجعت جبت تلفوني وانا راجعه في الطريق .. الشارع كان ضلااام .. 😨😨 وحسبت بالخوف .. وكمان ماشه وشعري مفكوووك ..
وفجأة اطقش ليك بي واحد ضابط ...
وسيم وسامه ماعاديه واسمر سمره خفييييفه لكن .. ولابس لبس الجيش ولحيتو وملامحو قريييبه للخلجيين 😍😍😍😍
ماعرفت اتكسر ولا اجري عشان الحراس مايحسو علي😍😍
قلت ليهو.. اسفه 😔
وجيت امشي .. عارض لي طريقي .. تاني مشيت خطوه وتاااني عارض لي 😳😳
قلت ليهو.. عفوااا!!!
قال لي: انتي طالعه بدون اذن صح ؟
قلت ليهو: وانت منو عشان ارد عليك ..
نهرني بصوت عاااالي ... يابت .. طلعتي ليييه في الوقت ده 😡😡
انا صرااحه من النهره قررربت ابكي .. بس سكت .. وفي اللحظه دي جا ضابط تاني جاري ليهو .. قال ليهو .. يا كابتن فهد في شنو ؟
رد عليهو.. محمد البت دي هاربه بالليل من الداخليه الجنبنا دي .. وصلها سريع 😡
انا الوقت دا شميتو وكرهتو عدييييل 😡😡 .. ومشيت وانا ساكته .. لانو ضااابط ولا كابتن ولا مافهمت موقعو شنو .. بس شكلو حاجه كبيره ...
مشيت ودخلت والدموع في عيني ... نادوني للأكل .. اكلت حبه ورقدت .. وكل ما اغمض اتذكر صوتو ونهرتو لي..😡
بس ماقدرت انوم من ملااامحو 😍😍😍 كل ما امض اشوف وشو السممممح ياااااخ ...نتقااااابل تاااني بإذن الله

‏بيوم عرفة
اسأل الله 🤲 أن🍃، يُملِاء قلبك ❤ فرح وسعادة ورضئ ويغفر ذنبك ويفرج همك و يقضى دينك، و يكتب لك الجنة🕊 و يحرم عليك النار أنت ووالديك وكل من تحب، وأن يبشرك بما "يسرك" ويكف عنك ما " يضرك " ويثبت يقينك ويرزقك حلالاً " يكفيك " ويسترك فوق الأرض " ويرحمك تحت الأرض 💛🌹
كل عام وانتم بخير
#هواش_سوداني

عيدكم مبارك وينعاد عليكم بالصحة والعافية وتامين ولامين ولا فاقدين ولا مفقودين والله يصلح حال البلد ويجعلوا آمن ومستقر❤️