Bugun Qoraqalpog‘iston tibbiyot institutining Stomatologiya kafedrasi bitiruvchi kurs talabalari bilan “Korrupsiyaga qarshi kurash virtual akademiyasi” o‘quv kurslarining ahamiyati, mazmun-mohiyati yuzasidan dars mashg‘ulotlari tashkil etildi.

Dars jarayonida talabalarga Virtual akademiyaning maqsadi va vazifalari, unda joylashtirilgan o‘quv kurslarining mazmuni hamda korrupsiyaga qarshi bilim va ko‘nikmalarni shakllantirishdagi o‘rni haqida batafsil tushuntirishlar berildi.

Shuningdek, bitiruvchi kurs talabalari bilan kelgusidagi kasbiy faoliyatida halollik, xolislik, qonuniylik va mas’uliyat tamoyillariga rioya qilish, korrupsiyaviy holatlarga yo‘l qo‘ymaslik, manfaatlar to‘qnashuvining oldini olish hamda korrupsiyaga nisbatan murosasiz munosabatni shakllantirish masalalari muhokama qilindi.

Joriy yilning 5-oktyabr kuni Qoraqalpog‘iston tibbiyot institutida talaba-yoshlar o‘rtasida “Jamoada sog‘lom psixologik muhitni shakllantirish” mavzusida psixologik trening tashkil etildi.

Trening institutning xotin-qizlar masalalari bo‘yicha psixologi M. Ismailova tomonidan o‘tkazildi.

Mashg‘ulotdan ko‘zlangan asosiy maqsad talaba-yoshlar o‘rtasida o‘zaro hurmat, ishonch va samimiy muloqotni mustahkamlash, jamoaviy hamkorlikni rivojlantirish hamda sog‘lom psixologik muhitni shakllantirishdan iborat bo‘ldi.

Trening davomida ishtirokchilar o‘zaro munosabatlarni mustahkamlash, bir-birini tinglash va tushunish, jamoada hamjihatlikni rivojlantirishga qaratilgan turli psixologik mashqlar va interfaol metodlarda faol ishtirok etdilar.

Mashg‘ulot yakunida jamoada birdamlik, o‘zaro qo‘llab-quvvatlash va ijobiy muloqot muhitini shakllantirishning ahamiyati alohida ta’kidlandi.

Qoraqalpog‘iston tibbiyot instituti Yoshlar ittifoqi boshlang‘ich tashkiloti tashabbusi bilan “Do‘stlik festivali” doirasida talaba-yoshlarning kitobxonlik madaniyatini yuksaltirish, badiiy adabiyotga qiziqishini oshirish hamda intellektual salohiyatini rivojlantirish maqsadida “Yosh kitobxon” tanlovining fakultet bosqichi o‘tkazildi.

Tanlov test savollari shaklida tashkil etilib, unda 1- va 2-tibbiyot fakultetlari hamda magistratura ta’lim yo‘nalishi talabalari ishtirok etdi.

Test natijalariga ko‘ra, 1- va 2-tibbiyot fakultetlaridan 10 nafardan, magistratura ta’lim yo‘nalishidan 2 nafar talaba yuqori natijalarni qayd etib, tanlovning institut bosqichida ishtirok etish huquqini qo‘lga kiritdi.

Mazkur tanlov talaba-yoshlar o‘rtasida kitobxonlikni keng targ‘ib etish, mutolaa madaniyatini rivojlantirish va yoshlarning bilim hamda dunyoqarashini kengaytirishga xizmat qilmoqda.